1 SAMUEL 10 - BAIBEL KANGTHIR (BSI)

¹ Anke Samuel jit ajangthu abong ponlo, lapen Sol aphu athak dung-lo, lapen la aphan ingjup-lo, lapen pulo, “Alangli Israel arat aphuthak kepangriji aphan Hemphu nangliphan jangthu patip-lo. Nangli la arat aphuthak pangripo lapen halatum ahotur kedo-an pen raipo lapen lahelo Hemphu nangliphan ingvaitang-lo pu angthek-lo, la arat aphuthak kepangri abang-lo pu:

² Pini neliphan odet aphi, nangli banghini amonit Rachel athiri, Zelzah adung Benjamin alongri chetongji. Nangli keri agadha longtang-lo pu halatum nangthanpo, ansi nangli po halahei aphan ningriredetpo bonta nangliphan la arjubompo, ‘Nesopo aphan ne kopi klem nangpoma?’

³ Hadak pen nangli dambomnon ha kangthir athengpi arong Tabor leletik, hadak bang kethom amonit aphan tovar chetongpo, halatum Bethel along Arnam aphan kethokjilo. Halatum angbong inut abang bi jonthom ponpo, akaprek abang him plangthom lapen inut abang drakha ahorlang ajarong ponpo.

⁴ Halatum nangliphan ardompo lapen him plangni nangliphan nangpipo, hala nangli chodeng nangpo.

⁵ Anke nangli Gibeah along Arnam anglong arludam nangpo, hadak Philistia atum amukam dolo. Rong anghap along esong amontri inglong adim pen nangkehir nangli chetongpo. Latum kum beleng, cheng, pongsi lapen kumbeleng-chongdeng rotpo. Halatum hangsi kanpo.

⁶ Menmen amat Hemphu akarjong si nangliphan nangjapo lapen halatum dhorom alun akekan along nanglita chelangdunpo lapen nangli prekjek amonit plangpo.

⁷ Lahei plang-lote nangliphan Arnam nangkeja alingle nangli klemnon.

⁸ Gilgal along neli mute nanglisi le paphrangpo, hadak neli nangchetongpo lapen kephrin athok lapen kejalang athok thokpo. Neli vangvetik-ke lapen kopisi keklem nangjima pupetik nangli ni throksi neli inghong nangji.”

⁹ Samuel aphan Sol ke-ojipu kechetevar ahut Sol aphan Arnam isi a-ot kemi pilo. Lapen halabangso arni Samuel kepu alam an chekok et-lo.

¹⁰ Sol lapen aban Gibeah along kele pen esong amonit atum laphan chetong-lo. Menmen Arnam akarjong la aphan jalo, lapen halatum akekan, akehang along lata chelangdunlo.

¹¹ La aphan aphrang kechini atum la lahei keklem thek-longsi lahin lahin chepulo, “Kish asopo kopi cheplangdet loma? Sol inut amontri cheplang-loma?

¹² Hadak kedo inut amonit arjulo, ‘Hala akaprek amontri atum kopusonlo-halatum apo komat mat-lo. nethantha?’ Lason si lam chethanseilo, ‘Sol inut amontri plang-loma?’

¹³ Sol chechininepin akeklem lapen akehang pajutsi la inglong angsong dovan along damlo.”

¹⁴ Sol a-ong lapen aban aphan thek-lok-lo, lapen alangli latum aphan arjulo, Nangtum konatsi kedamlo? Gadha keridam, pusi Sol thak-lo. “Nelitum lahei longle-ong amat Samuel along damjuilo.”

¹⁵ Alangli nangliphan kopisi nangkethanlo? Sol a-ong arjulo.

¹⁶ Alangli nelitum aphan neli kethanke, pi-heihei longtang-lo pu, Sol thak-lo bonta amethang arecho keplangnangji alam ke la a-ong aphan chethanthedet-lo.

Sol Aphan Recho Kebat

¹⁷ Mizpah along dhorom amei kechingrumpetjisi rat aphan Samuel hang-lo,

¹⁸ lapen halatum aphan pulo, “Israel a-Arnam Hemphu pulo, ‘Ne nangtum aphan Ijip pen nangvanlo lapen Ijip atum pen nangpajok-lo lapen nangtum aphan nangkechenek arat an penta pajok-lo.

¹⁹ Ne nangtum a-Arnamlo, nangtum kepachoi lapen akesung-heihei an pen nangkepajok Abang-lo, bonta nangtum pini Nephan Ne-otang-lo, lapen inut arecho nangtum aphan nangji pusi nehang-lo. Mesen, tangte Hemphu angno akheitin, arotin nangtum chingrumnon.’”

²⁰ Anke Samuel akheitin pavangtoilo, lapen Hemphu Benjamin akhei ingvailo.

²¹ Anke Samuel Benjamin akhei ahemtun kedo-an pavangtoilo. Matri ahemtun isi pavangpet-toilo lapen Kish asopo Sol aphan ingvailo. Halatum la aphan cholang-lo bonta laphan longledet-lo,

²² halatum Hemphu aphan arjulo, “Anut kaprek dolangma?” Hemphu thak-lo, “Sol ke hadaksi amar-atar angbong chepatujoilo.”

²³ Lasi halatum katsi Sol aphan rat angbong vandet-lo lapen halatum thek-long-lo, la helo kedo-an angbong ajon kedingnei.

²⁴ Rat aphan Samuel pulo, “La helo Hemphu kangvaitang amonit-lo! La asonthot etum angbong baduta avelo.” Kedo-an arat atum hang-lo, “Recho achethe padingnang.”

²⁵ Rat atum aphan recho ajakong lapen keklem nangji arpu alam Samuel thanlo, lapen lahei isi aloh along tokdet-lo, la kangthir adimsi alangli bilo. Ansi kedo-an arat aphan la ahem toirep-lo.

²⁶ Solta Gibeah anat ahem chedamlo, lapen Arnam aningkeparung ajehak jakongkethenei amonit atum la along dunlo.

²⁷ Bonta ajehak amokevangve amonit atum pulo, “Kopusonsi laso amonit etum aphan akeme akam eklempi thekpoma?” Halatum Sol aphan pinremlo lapen la aphan thangnat adanta vanpipedet-lo.