1 SAMUEL 1 - BAIBEL KANGTHIR (BSI)Shiloh Along Elkanah Lapen Ahem-asor 1 Ephraim akhei pen Elkanah pu amen inut amonit Ephraim Anglong alongsi Ramah arongsopi along dolo. La Jeroham asopo lapen Elihu asupo, lapen Tohu ahemtun asor, Zuph aro-abeng-lo. 2 Elkanah apiso banghini do, Hannah lapen Peninnah. Peninnah asomar do, bonta Hannah ke inut-ta ave. 3 Elkanah aningkan vangta Shiloh along Jakong Kethenei Hemphu aphan karchoji lapen athok-heihei kepijisi Ramah pen damlo. Hadak Eli asomar banghini Hophni lapen Phinehas atum Hemphu aphan kurusar cheplang-lo. 4 Elkanah athok kepi aphongtinta apharman isi ke Peninnah lapen pharman isi ke la asomar abangphutin aphan ok pilo. 5 La Hannah aphan chinghon-o seta pharman isi ansi la aphan pichot-lo, pima Hemphu bangpi aphan osomar pavedet-lo. 6 Peninnah, bangpi aphan panopo lapen pinrem po, Pima Hemphu bangpi aphan osomar pipedet-lo. 7 Lasonsi aningkan ningkan dambomlo; halatum Hemphu ahem kedam aphongtin ta Hannah aphan Pinennah lason aning padukpo lapen pachirupo anke bangpi ajatta kechoji molo. 8 Bangpi apenan Elkanah bangpi aphan arjupo, “Hannah, nang kopi athesi kechiruma? Nang kopisi chochedet loma? Nesomar bang kep apar ne nangphan nang chinghonhe det-loma?” Hannah Lapen Eli 9 Arnisi, Shiloh along halatum Hemphu ahem along chodet aphi Hannah thurphlut-lo. Bangpi aning runpik-lo lapen bangpi Hemphu aphan kardom ahut chiruvarret-lo. 10 Halaso ahut inghap adung Eli, kurusar amethang adim chongnilo. 11 Hannah isi chechakthip-lo: “Jakong Kethe Hemphu, nephan nelangtha, Nangbanpi aphan. Ne kesung nanglangtha lapen nemathatha! Nephan netengneri! Nang jongsi sopo inut nepilote, la akai isi nangphansi ne hodaipo, ne la chechak-lo lapen la aphan kaita achu ingtipte detpo.” 12 Penang an ajirkeding Hemphu aphan Hannah Arnam ardombom ahut Eli-ke bangpi angtur langpangthek-lo. 13 Bangpi dojoisi ardombomlo, bangpi angtur paklemchot bonta ase ave. Lasi bangpi hor kangrilo pusi Eli mathalo, 14 lapen bangpi aphan pulo, “Nangli hor kangri chepaklang var-ret-rinon! Hor kejun che-ora do pamenon!” 15 “Kali, neli, hor junje akehai,” bangpi thak-lo. “Neli hor junjepinlang! Nelining oipik, lapen neli Hemphu aphan Arnam ardombomlang, neli kesung an laphan hodailo. 16 Amovangve arloso pu neli phan mathari. Neli lasonsi ardomlo pima nelining dukpik.” 17 “Ningkangsam penle damnon,” Eli pulo, “Lapen nangli kehang ason Israel a-Arnam nangli papilonang.” 18 “Neliphan akemele nangli pama-thaverlonang,” bangpi thak-lo. Ansi bangpi aning ke-oi hamlo. Samuel Amahang Kethek Lapen Kehodai 19 Puthot adap Elkanah lapen ahem asor adapprang thursi Hemphu aphan ardomlo, lapen Ramah anat hem chedamlo. Elkanah la apiso pen dim-tar pasilo, lapen bangpi akardom Hemphu thak-lo. 20 Lasi bangpi aso dolo lapen inut amahang pathek-lo. La aphan Samuel pusi bangpi amen irlo, lapen thanlo, “Hemphu aphan ne la ardomlo.” 21 Elkanah lapen la ahem-asor Shiloh kedamra Hemphu aphan ningkan esek athok lapen kechechaktang kepanong athok kepi apor nangletang-lo. 22 Bonta non aphong abang ke Hannah dundedet-lo. Bangpi apenan aphan pulo, “Oso an chothek lote ne la aphan Hemphu ahem pondetpo, hadak la akai isi dopo.” 23 Elkanah thak-lo, “Chokpo nangning kehang akeme alingle klemnon; la an chothek-lo pupe tik ke hemle donon. Lapen nang kechechak ason Hemphu-le ahok paplang-lonang.” Lasi Hannah hemsi dokok-lo, lapen asopo aphan chelanalo. 24 La aphan bangpi an chothek-lo pu pen bangpi la aphan Shiloh along pondet-lo, lapen ningkan kethom achainong-alo, him aduk lin kep, ok-reng ajarong isithup drakha ahorlang ponlo. Bangpi oso bihek Samuel aphan Hemphu ahem Shiloh along ponlo. 25 Halatum chainong thudet aphi oso Eli angno halatum pondet-lo. 26 La aphan Hannah pulo, “Neliphan neli diya tha, akehai. Neliphan nanglining dolangma? Neli helo ladak karjapther pen Hemphu aphan kardom abangpilo. 27 Laso a-oso kelongji aphan Hemphu along neli hang-lo, lapen Alangli neli kehang atengsi nelipilo. 28 Lasi Hemphu arideng laso a-oso neli hodailo. La achethe dotik an la Hemphu apharmanlo.” Anke halatum hadak Hemphu aphan archolo. |
Karbi Holy Bible © Bible Society of India, 2010.
Used by permission. All rights reserved worldwide.
Bible Society of India