TAUNET 3 - Bukuit Ne Tilil

Kabutetap chii ak kergong'yet

¹ Ki ng'aaliindet ndaret kosiir tyony age tugul ne po ng'wony ne kiga koyai Kamuktaindet ne po Toroornatet. Ki leenji anyun kwondo, “Tos, iman ki mwa Kamuktaindet kole, ‘Amat oam logoek che po keetit age tugul ne po mbareet i?’ ”

² Ki leenji kwondo ndaret, “Ki chamwech keam logoek che po keetiigap mbareet;

³ ago ki mwa Kamuktaindet kole, ‘Amat oam logoek che po keetit ne mi kwenutap mbareet, amat otwaa, si mobegu.’ ”

⁴ Koleenji ndaret kwondo, “Mobegu iman!

⁵ Amu ingen Kamuktaindet kole eng' peetuut ne koam che po keetoto, koyatagisyei konyekwok, ak ogergeitu ak Kamuktaindet, onai ne myee ak ne ya.”

⁶ Ye kingo keer anyun kwondo kole myee keetooto eng' ameet, ak ko karaaran eng' koonyek, ak kogoochin chii konyoor utaatyet, kobut anyun logoekyik koam; ak kogoochi manong'otyonnyi, ne ki mi tuwai, ko am agine.

⁷ Ki yaatagis anyun konyekwak icheek tuwai ak konai kole mi aach ngor. Ki nabanap anyun sogeegap mogoywet, konapchigei ngoroik che kigermenegei.

⁸ Ak ki kas `icheek Kamuktaindet ne po Toroornatet kowendoti eng' mbar ye kiga kogaititit koskoleny, koistoegei ole mi Kamuktaindet ne po Toroornatet ak kounygei eng' keetiik oriit che mi mbar.

⁹ Ki kuur anyun `Kamuktaindet ne po Toroornatet chiichooto koleenji, “Imi ano?”

¹⁰ Kowolji chiichooto koleenji, “Kagas iwendoti eng' mbar ak kaywei amu ami aach ngor ak kaunygei anyun amu nooto.”

¹¹ koteebee Kamuktaindet koleenji; “Ng'oo ne kamwaun kole imi aach ngor? Ka iam logoek che po keetooto ki ang'atiin ale amat iam?”

¹² Kowolji chiito koleenji; “Kwonyoo ki igoono ketebi tuwai, ko ineendet ne kagono logoek che po keetit ak ka aam.”

¹³ koteebee `Kamuktaindet ne po Toroornatet kwondo koleenji, “Nee ni kaiyai?” Kole kwondo, “Kagoberbera ndaret, ak ka aam.”

¹⁴ Koleenji `Kamuktaindet ne po Toroornatet ndaret, “Amu kaiyai kii, ko kagichubin kosiir kiyagiik tugul ak tyong'ik tugul che po timiin; iichuute moeng'ung' ng'wony ak iame ng'ung'unyek peetuusyek tugul ko tee isabe.

¹⁵ Andoi punyondiit kwenung'wong' inyee ndareet ak kwondo ak kwenutap iyoteng'ung' ak iyotennyi. Tuei ineendet meting'ung' ak isuse aginye kwaryandennyi”

¹⁶ Koleenji anyun `Kamuktaindet kwondo, “Atesun miising' nyaliildang'ung' eng' sigisyeng'ung', isiche lagok eng' ng'wanindo. Inyali manong'otyong'ung' eng' mageng'ung' ak koboun.”

¹⁷ Yeityo Koleenji Adam, “Amu kegas ng'aleegap kwondong'ung', ak iam che po keetit ne ki ang'atiin ale amat iam, ko kagichup ng'wony agobo inyee; iame che po ng'wony eng' nyaliilda ko tee isabe;

¹⁸ iiun `ng'wony katook che toorei piich ak che rutei piich, ak iame ingweek alak tugul che po emet.

¹⁹ Iame amitwogik eng' kaotigap togeng'ung' kot koit iweekyigei ng'wony amu ki kinemunenen yooto; amu ii ng'ung'uny, iweekyinigei ng'ung'unyek.”

²⁰ Kiguure `Adam kwondonyi Hawa, amu ineendet kametap tugul che saptos.

²¹ Ak kinapchi `Kamuktaindet ne po Toroornatet Adam ak kwondonyi ngoroik, ak kolaakyi.

²² Ak ki mwa `Kamuktaindet ne po Toroornatet kole, “Ogeero! Kagogergeit chiichi ak agenge eng' acheek, ne ingen ne myee ak ne ya.” Ko si mata koyogooito eunnyi kobut che po keetitap saboondo koam ak kosap koigeny,

²³ ko ki imaanda `Kamuktaindet ne po Toroornatet ineendet eng' mbareetap Eden, si kobiit kobat ng'wony ole ki kinemune.

²⁴ Ki oon anyun chiichooto koomaanda ak konde Kerubik kotebee komostap kong'asiis ne po mbareetap Eden. Yeityo konde rootwetap chok ne ilyeli ne tokyingei komoswek tugul si koriip ooreet ne tokyingei keetitap saboondo.