NG'ATUTIK 24 - Bukuit Ne Tilil

Katunisyet ak peesyet

¹ Ngo tunis mureno ama nyoor osotyonnyi chameet eng' tainnyi amu kageerchi chiichooto kiy ne ya kwonyooto, kosirchi anyun sireetap peesyet konde eunnyi ak koon eng' koonnyi.

² Ak ye kagomanda kwonyooto eng' kootap chiichooto, komuuchi koek osotyotap chiito age.

³ Ngo wech ineendet manong'otyot ne po let ak kosirchi sireetap peesyet ak konde eunnyi yeityo koon eng' koonnyi anan ngo me manong'otyot ne po let ne ki itun ineendet,

⁴ ko mat komut manong'otyondennyi ni ki po tai ne ki oonei ineendet kole koek osotyonnyi kogeny amu ki king'wanit ak ko wegot yautyet ne uu nooto eng' taitap Kamuktaindet ne Toroor. Amat igoochi emet ne koonin Kamuktaindet ne Toroor Kamuktaindeng'ung' koek poroteet koyai tengek.

⁵ “Ye kagotunis chiito, ko matkwo lugeet anan kiim eng' poit age tugul. Ago ing'otebi eng' kaa kenyiit agenge si kobiit kobaibai osotyonnyi ne kogotun.”

⁶ “Amat koip chii koitap pai anan isyet kobunji kaarorunet: amu ngo nam ko uu nooto ko uu yo kabunji ineendet saboondap chiitap ko po.”

⁷ “Ngenyoor chii ne kachoor tupchennyi age ne po piigap Israel ak koyachi ko uu otwogin anan koalda, ko ingome anyun choorindonooto. Iste ko uu nooto anyun yaityet eng' kwenung'ung'.”

⁸ “Riipkei eng' koroitap mogondosaik, riip komyee eng' kagiiletapkei ak iyai ko uu tugul che ineetin tisiik Lawiik. Ko uu ye ki ang'at icheek, oriip anyun si oyai ko uu nooto.

⁹ Ibwaat kiit ne ki ita `Kamuktaindet ne Toroor Kamuktaindeng'ung' Miriam, eng' ooreet ye ki omong'u eng' Misiri.”

¹⁰ “Ye ibesendochi chiitap kokweng'ung' kiy age tugul, ko mat iwe koonnyi inemu kiit ne iname pesendo.

¹¹ Ago tonone saang' inyee ne iyaaksei, si koibun konyo saang' kiit ne iname pesendo.

¹² Ak ngo kibanania chiichooto, komat iru itinye kinnyi ne iname pesendo.

¹³ Iweekyi kinnyi ko karorokto asiista si kobiit kotugegei ye ruei ak koberuurin ak koek nooto imanda eng' inyee eng' taitap Kamuktaindet ne Toroor Kamuktaindeng'ung'.”

¹⁴ “Amesastae otwogindet ne nyooru melekto ne kibanania ne nyalili, ngo age eng' che otupche anan ngo po punootik che mi emeng'ung' eng' kurgotiguk.

¹⁵ Igoochi ineendet melektanyi eng' peetuunnyi ne po melekto. Ameng' kororokto asiista kotom igoochi amu kibanania ak imang'u chooto. Si ma riirchi Kamuktaindet ne Toroor agobo inyee ak koek tengekto eng' inyee.”

¹⁶ “Ma kibarei kwanisyek amu lagok anan kebar lagok amu kwanisyek. Ago ki parei chii age tugul ineegei agobo tengektanyi.”

¹⁷ Amemaas kirwoogetap toondet anan ne ma tinyei sigiik anan iname pesendo ngoryeetap mosoget.

¹⁸ Ago ibwaat ile ki ii otwogin eng' Misiri ak ki ityaachin Kamuktaindet ne Toroor Kamuktaindeng'ung' eng' olooto. Kang'atiin anyun amu nooto ale iyai kiito.

¹⁹ “Ye igesisye eng' mbareeng'ung' ak iutye ratuutigap peek eng' mbar, ko mat iweege iwe iibu. Ingobunji toondet, ne ma tinyei sigiik ak mosoget: si kobiit koberuurin Kamuktaindet ne Toroor Kamuktaindeng'ung' eng' tuguuk tugul che iname eung'ung'.

²⁰ Ye itui logoegap emitiguk ko megetyinotegei iturote eng' mooriik. Ago ingobunji toondet, ne ma tinyei sigiik ak mosoget.

²¹ Ye ibute logoegap mbareeng'ung' ne po sabibuk, ko megetyigei iturote. Lakte kobunji toondet, ne ma tinyei sigiik ak mosoget.

²² Ak ibwaat ile ki ii otwogindet eng' emetap Misiri: kang'atiin anyun eng' nooto ale iyai ng'olyoondoniito.”