NG'ANG'UTYET 14 - Bukuit Ne Tilil

Aarwet ak piik eliphuusyek pogol ak artam ak ang'wan

¹ Ki ageer, ak ogeero, tononi Aarwet eng' tulweetap Zion, ak komi kobooto `ineendet piik eliphuusyek pogol ak artam ak ang'wan, che tinyei kainennyi, ak kainetap Kwandanyi, che ki kisirchi togoochikwak.

² Ak ki agas kutit kobun kipsengwet, ne uu cheetap peek che chaang', ak ko uu cheetap tuleet ne oo: ak cheonooto kigagas ko ki uu ne po putiik che putei ketubosyekwak:

³ ak kotyeni tyendo ne leel eng' taitap ng'echereetap laitornatet, ak eng' taitap tyong'ik ang'wan che saptos ak poisyek. Ma mi chii ne imuuchi koneetkei tyenooto kobatee pichooto eliphuusyek pogol ak artam ak ang'wan, icheeget che ki kial eng' ng'wony.

⁴ Chuuto ko icheeget che ma imurwongei eng' kobogorisyek; amu pergeinik icheeget. Chuuto ko icheeget che isubi Aarwet eng' oldo tugul ole wendi. Ki kial chuuto eng' kwenutap piik, koek tongoanik eng' Kamuktaindet ak eng' Aarwet.

⁵ Ama ki nyoorchi kutusweekwak lembeita: ama tinyei tisya.

Malaikaisyek somok

⁶ Ki ageer malaikaiyat age kotirireni eng' kwenutap kipsengwet, kotinyei logoiywek che myach che po koigeny koamji icheek che menyei ng'wony, ak pororyet age tugul ak ooreet age tugul ak kutit age tugul ak piik alak tugul;

⁷ ak komwaei eng' kutit ne oo, kole, “Oiywei Kamuktaindet, ak ogoochi toroornatet; amu kagoit saitap kirwoogennyi; ak olasu ineendet ne ki yai kipsengwet ak ng'wony ak nyanjet ak kondametusyegap peek.”

⁸ Ak koosup malaikaiyat ne po aeng', ne leen, “Kagoluul, kagoluul Babilon ne oo, ne ki igoochi pororyosyek tugul koe divaik che po koroomnatetap soksennyi.”

⁹ Ak koosup icheek malaikaiyat ne po somok, ne mwaei eng' kutit ne oo kole, “Ngot kolas chii age tugul tyondo ak kanamwennyi, ak konyoor perutyet eng' togeennyi, anan eng' eunnyi,

¹⁰ koeei agine divaik che po koroomnatetap Kamuktaindet, che ki kichop ama kiburuch eng' kigombetap nereeknatennyi; ak kinyaliili eng' maat ak koik che laldos eng' taitap malaikaisyek che tiliileen, ak eng' taitap Aarwet:

¹¹ ak kotogostoi iyetap ng'wanindanywa koigeny ak koigeny; ama tinyei kamuung'et peet ak kemoi, icheek che ilasu tyondo ak kanamwennyi, ak age tugul ne nyooru perutyetap kainennyi.”

¹² Mi yu muitaetap piik che tiliileen, icheeget che riibei ng'atuutigap Kamuktaindet, ak kayaneetap Jeso.

¹³ Ak ki agas kutit kobunu kipsengwet kole, “Sir ile: Poiboen icheek che pegu eng' Kiptaiyat kobooch nguno.” Mwaei Kabuuset ne Tiliil kole, “Ee, imuunyi icheek eng' poisyonikwak, amu isubi icheek `poisyonikwak.”

Kesisyetap ng'wony

¹⁴ Ki ageer, ak ogeero, pooldet ne leel; ak kitebee poldanooto chiito ne uu weeriitap chii, kotinyei eng' metinnyi naaryeetap thahabu, ak ki mi eunnyi chepkeswet ne ng'atip.

¹⁵ Ak ki mong' malaikaiyat age eng' Hekaluut, komwachin eng' kutit ne oo ineendet ne tebee pooldet, koleenjin, “Iyookte chepkesweng'ung' ak igesisye, amu kagoit saitap kesisyet; amu ki kosiirto kesetap ng'wony.”

¹⁶ Ak ki wiirchi ng'wony chepkeswennyi ineendet ne ki tebee pooldet; ak ki kiges ng'wony.

¹⁷ Ki mong' malaikaiyat age eng' Hekaluut ne mi kipsengwet, kotinyei agine chepkeswet ne ng'atip.

¹⁸ Ak ki mong' malaikaiyat age eng' kaptisisyet, ineendet ne tinyei kimnateet ne poune maat; ak kiguur ineendet eng' kutit ne oo, ne tinyei chepkeswet ne ng'atip, koleenji, “Iyookte chepkesweng'ung' ne ng'atip, ak iyum sabibugap keetit ne po ng'wony; amu kagoruryo sabibukyik.”

¹⁹ Ki wiirchi malaikaiyat chepkeswennyi ng'wony, ak kiyum sabibugap ng'wony, ak kowiirchi ole kitue sabibuk, kenut ne oo, ne po nereegegap Kamuktaindet.

²⁰ Ak ki kityech ole kitue sabibuk eng' nganaseet saang', ak komong' korotiik eng' ole kituisye, kot koit kariigap kutitap paraisisyek, ne itei olo po maelisyek pogol aeng'.