LUKA 12 - Bukuit Ne Tilil

Tuguugap ung'oot

¹ Eng' saisyechooto, ye kingo yumgei piik ng'iisyat che po tuiyet, kot kotyechkei icheegei, kosip kotoi koleenji kasubikyik, Oriibegei mermeregap Pharisaik, nooto chombilisyet.

² Ago ma mi kiy ne tugoot, ne ma tuun king'aanyei, anan ne ung'aat, ne ma tuun naaksei.

³ Amu kiy age tugul ne omwae eng' mesundeito kotun kegasei eng' ole lapkei; ak che ki ochaamji itit eng' koot oriit kotun kemwaitoi eng' koot parak.

Kocherei `Jeso kasubikyik

⁴ Ak amwaiwok choronokyuk ale, Amoiywei che parei poorto, yeityo ko mata komuuch koyai kiy age.

⁵ Ago ateiywok si onai ineendet ne kanyool oiywei: Oiywei ineendet, ne ngo kagobar komuuchi kowiirchi Gehenna; ee, amwaiwok ale, Oiywei ineendet.

⁶ Tos ma ki aldae toriitik muut che mengeechen kebebertap muut ne po dinarit? Ama utye Kamuktaindet agot agenge.

⁷ Ago iitotin suumeek tugul che po metowekwok. Amoiywei anyun: osiire okweek toriitik che chaang' che mengeechen.

Weeriitap chii

⁸ Ak amwaiwok ale age tugul ne ibortaa eng' taitap piik, kotun iboortoi agine Weeriitap chii chiichooto eng' taitap malaikaisyek che po Kamuktaindet.

⁹ Ago ineendet ne eesyoa eng' taitap piik kotun keesyoi agine eng' taitap malaikaisyek che po Kamuktaindet.

¹⁰ Ak age tugul ne mwaei ng'olyoo ne ya agobo Weeriitap chii, kenyochin kaat: ago ineendet ne chubei Kabuuset ne Tiliil koma kinyochin kaat ineendet.

¹¹ Ak ye kimutak ye mi sinagogisyek, ak taitap kirwoogik, ak pounik, ko matogereer met agobo kiit ne owolu anan omwae:

¹² amu ineetook Kabuuset ne Tiliil eng' sainooto kiit ne nyolu omwa.

Kalewenet agobo mogoryot ne perber

¹³ Ki leenji anyun chiito age eng' tuiyet, Kaneetindoni, mwachi weeriit ne kitupche kopcheiywa tuguukyok.

¹⁴ Ago ki leenji ineendet, Chiichi, ng'oo ne kindea aek kirwoogindet anan pcheindet eng' okweek?

¹⁵ Ak ki leenji icheek, Ogeer, ak oriipkei eng' kasetap myat tugul: amu ma tebyei saboondap chii eng' chaang'indap tuguuk che tinyei.

¹⁶ Ak ki mwachi kalewenet koleenji, “Ki mi mogoryot age ne kiga rur mbareennyi miising'.

¹⁷ Ak ki ibwaat eng' muguleldanyi kole, ‘Ayae nee, amu ma tinye ole agonoree peekyuk?

¹⁸ Ak ki le, Ayae ko uu ni: abute chogenikyuk, si ateech che eecheen kosiir chu: si agonoree peekyuk ak tuguukyuk tugul che myach.

¹⁹ Si aleenji saboondanyu, Saboondanyu, itinye tuguuk che chaang' che myachen che konorotiin che yamei kenyiisyek che chaang'; imuuny, amisye, eeise, ak ibaibaitu.’

²⁰ Ago ki leenji Kamuktaindet, ii perber inyee, kimachei saboondang'ung' kemouni po ra; ara, si kobunji ng'oo anyun, tuguuchooto koichop?”

²¹ Ki igees Jesu kole, “Uu nooto anyun chiito ne konorchingei mogornateet ineegei, ne ma mogoryo eng' Kamuktaindet.”

Kereretap met

²² Ki leenji anyun kasubikyik, Nooto anyun amwaiwok ale, Amogereer met agobo sabeeng'wong', eng' tuguuk che oame; anan agobo poorwekwok, eng' tuguuk che olaachi.

²³ Amu siirei sabeet amitwogik, ak siirei poorto ngoroik.

²⁴ Obwaat chepkuginik, amu ma kolei, ama kesei; ama tinyei ole konoree anan choget; ago Kamuktaindet ne paei: osiire toriitik konyil ata!

²⁵ Ak ng'oo eng' okweek ne imuuchi kogereer met si kotes koindonyi eng' kakwautyet agenge ne po euut?

²⁶ Ngo momuuchi anyun oyai agot kiy kitigin, ko amu nee anyun si ogereer met agobo tuguuk alak?

²⁷ Obwaat taaptook, ole pititoi: ma poisyei, anan koletis; ago amwaiwok ale, Agot Solomon, eng' talbistanyi tugul, ko ki ma kolumegei ko uu age eng' chuuto.

²⁸ Ago ngo laaksechin Kamuktaindet ko uu nooto susweek che po keeweet che mi ra, ak mutai kewiirchi ma, kotos siirei ne tya anyun kolaaksewok okweek, che otinye kayaneet ne ming'in!

²⁹ Amocheeng' che oame, anan che oee, amosage.

³⁰ Amu cheeng'ei tuguuchuuto tugul pororyosyegap ng'wony: ago ingen Kwandang'wong' kole omakyinige tuguuchuuto.

³¹ Ago ocheeng' okweek laitornatetap Kamuktaindet, si keteswook tuguuchuuto tugul.

Mogornateet eng' kipsengwet

³² Amoiywei, okweek akweet ne ming'in; amu paibai Kwandang'wong' kogoonok laitornatet.

³³ Oalde che otinye, si ogoite kagoochinoik; onapchigei suberok che maosegitu, konorwet eng' kipsengwet ne ma pegu, ole mariikyin chooriik, ama ng'emei kuutik.

³⁴ Amu ole mi konorweng'ung', ko olooto ole mi muguleldang'ung' agine.

Kanyool keriipkei

³⁵ Ongogermenogis suenutikwok, ak ongolalyo taisyekwok;

³⁶ ak ogergeitu ak piik che igeni kiptaiyannywa, kobunu igoortap katunisyet: si ye nyo ak kogongony, koyatyi sainooto.

³⁷ Poiboen otwogichooto, che nyooru kiptaiyandanooto koriipsei ye nyo: amwaiwok iman ale, kermenigei ineendet ak chobei pichooto kotep ng'wony eng' ole amisye, ak kwo kobai icheek.

³⁸ Ak ngo nyo eng' riipseet ne po aeng', anan ne po somok, ak konyoorta ko uu nooto, ko poiboen anyun otwogichooto.

³⁹ Ago onai ni ole, nda ki ingen kiptaiyatap koot sait ne nyoonei choriindet, ta kiriipsei, ta ki ma kobagaaktoi koonnyi kobut choriindet.

⁴⁰ Ochopkei ak okweek: amu nyoonei Weeriitap chii eng' sait ne mobwaati.

Riibindet ne kiyani ak ne ma kiyani

⁴¹ Ki leenji anyun Petero, Kiptaiyat, imwaiwech acheek kalewenoni, anan imwachini piik tugul?

⁴² Kole anyun Kiptaiyat, Ng'oo anyun riibindet ne kiyani ak ko ng'oom, ne indoi kiptaiyandennyi kotononji koonnyi, ak kogoochi amitwogikwak che yamei eng' peetuut ne makyin?

⁴³ Paibai otwogindonooto, ne nyooru kiptaiyandennyi koyaei ko uu nooto.

⁴⁴ Amwaiwok iman ale, indoi chiichooto kotononji tuguukyik tugul.

⁴⁵ Ago ngo mwa otwogindonooto eng' muguleldanyi, kole, “Igaegei kiptaiyandennyu ma sip koitu,” ak kotoi kobir otwogik che murenik ak che tiibiik, ak koamis ak koeeiso, ak kobogit;

⁴⁶ weeksei anyun kiptaiyat ne po otwogindonooto eng' peetuut ne kama koogeni, ak eng' sait ne ma naei, ak kobir miising', ak kopchechi kebebertanyi kobooto che ma tinyei kayaneet.

⁴⁷ Ak otwogindonooto, ne ki ingen mageetap kiptaiyandennyi, ama kochopkei, anan koyai ko uu magennyi, kebire pirutik che chaang';

⁴⁸ ago ineendet ne ki ma kongen, ak koyai tuguuk che nyoljin pireet, kebirei pirutik che ng'ering'en. Ak age tugul ne ki kigoochi che chaang', kotun kimage che chaang': ak ineendet ne ki kigoochi koriip tuguuk che chaang', kotun kimage ineendet che siirei.

Nyonunetap Jeso

⁴⁹ “Ki anyoo awirchi maat ng'wony; nee anyun neta amache, ngo kagolal nguno!

⁵⁰ Ago atinye kabatisanet ne tatun kibatisanena; kamarigitya ne tya agoi kosulda!

⁵¹ Tos oleen ki anyoo agoonu kaalyeet konyo ng'wony? Amwaiwok ale, Achicha; ago peesyet:

⁵² amu kobooch nguno kopchegei piik muutu che mi koot agenge, suryee somogu aeng', ak kosurye aeng' somok.

⁵³ Pchegei, kwanda ak weeriit, ak weeriit ak kwanda; kamet ak cheptonyi, ak chepto ak kamet; kametap weeriit ak osotyonnyi, ak osotyotap weeriit, ak kametap weeriit.”

Kaboorunoigap ole teptoi peetuusyek

⁵⁴ Ki mwachi anyun tuiyet koleenji, “Ye ogeer kotogosune pooldet cherongo, ole, ‘Machei koroobon’; ak koyaak ko uu nooto anyun.

⁵⁵ Ak ye ogeer usoonet ne usune murot tai, ole, ‘Machei koit kemeut ne ng'waan’; ak koyaak ko uu nooto.

⁵⁶ Chombilichu, ongen obesye ole teptoi ng'wony ak kipsengwet; kalya anyun si monai ole teptoi peetuusyechu?

Yai kalya ak punyondeng'ung'

⁵⁷ “Kalya si morwoch okweegei agobo tuguuk che po imanda?

⁵⁸ Amu ye ta obendi ak punyondeng'ung' taitap kirwoogindet, igiilgei obendi eng' ooreet si kounden; si mata komutin taitap kirwoogindet, ak komutyin kirwoogindet asigarindet, ak kotoorchin asigarindet korgoreet.

⁵⁹ Amwaun ale, Ma koi imang'une olooto, agoi iyaakte sendeiyot ne po let.”