KOMONG'U 40 - Bukuit Ne Tilil

Keteechei Koot

¹ Ki ng'alaalji anyun `Kamuktaindet ne Toroor Musa koleenji,

² “Lumde koyooto po emait ne kituiyechin eng' peetuut ne po tai ne po arawet ne po tai.

³ Inde moingetap paornateet koot oriit ak ituch eng' ngoryonooto kioiye koot.

⁴ Yeityo iibu meset inde ko ak itet komyee tuguuk che tebee paragunnyi ak iibu keldap tait, inde ko ak inaam taisyek.

⁵ Inde kapkorosuut ne po thahabu ne kibeelee nyamdutik eng' taitap moingetap paornateet, ak isonginin angeet eng' kurgeetap emaitap Kamuktaindet.

⁶ Inde kaptisisyet ne kibeelee tiseiywot taitap kurgeetap koyooto po emait ne kituiyechin.

⁷ Inde taabeet ne kiuunse kwenutap emait ne kituiyechin ak kaptisisyet ak iroong'ji peek kioto.

⁸ Lumde ng'ootweetap seremut kot kotuiyo ak isonginin angeet kurgeetap seremut.

⁹ “Iipe mwanik che ki ilse ak iil emaitap Kamuktaindet ak tuguuk tugul che mi oriit; itabaan ak tuguukyik tugul, si kotiliilit.

¹⁰ Yeityo iil kaptisisyet ne kibeelee tiseiywot ak tuguukyik tugul; itiliil kaptisisyet, si kotiliilit miising'.

¹¹ Iil taabeet ne kiuunse ak ng'echerennyi ak itabaan.

¹² “Imutu Aron ak weeriikyik kobwa kurgeetap emait ne kituiyechin ak iune peek.

¹³ Yeityo ilaakyi Aron ngoroik che ki kitabaan ak iil ineendet ak itabaan, si kobiit koboisyeiwo eng' tisiisyet.

¹⁴ Imutu weeriikyik ak ilaakyi ngoroik che kooen,

¹⁵ ak iil icheek ko uu ye ki iil kwandanywa, si kobiit koboisyeiwo eng' tisiisyet. Egu kailsennywa ne ki ili icheek tiseinateet ne po agoi eng' ibinwekwak tugul.”

¹⁶ Ki yai anyun Musa ko uu nooto, ko uu tugul che ki ng'at `Kamuktaindet ne Toroor ineendet.

¹⁷ Ki kilumda anyun koyooto eng' kenyiit ne po aeng' eng' arawet ne tai eng' peetuut ne po tai.

¹⁸ Ki lumda Musa anyun koot, ki iteepto kong'iikwak che tononie, ki lumda pagoinikyik, ki irooch rateiywekyik ak kolumda lumeiywekyik.

¹⁹ Yeityo koiito anyun emait eng' emaitap Kamuktaindet parak ak kotuge angook alak koliich, ko uu ye ki ng'at `Kamuktaindet ne Toroor Musa.

²⁰ Yeityo koip paornateet konde moinget oriit, ki irooch moinget keetiik che ki ibe ak ki iteepto kerwetap rireenet eng' paragutap moinget.

²¹ Kingo pata, koip ineendet moinget kwo ko oriit ak kosonginin angeet ne kioiye emaitap Kamuktaindet, si koteekta moingetap paornateet, ko uu ye ki ng'at `Kamuktaindet ne Toroor Musa.

²² Ki inde meset emaitap Kamuktaindet ne kituiyechin, kotobon murot kaataam, eng' emaitap Kamuktaindet ne sip kemong'jin.

²³ Kitet magatiinik eng' meset eng' taitap Kamuktaindet ne Toroor, ko uu ye ki ng'at `Kamuktaindet ne Toroor Musa.

²⁴ Ki inde keldap tait emait ne kituiyechin, kotoorchin ak meset, kotobon murot tai eng' emaitap Kamuktaindet.

²⁵ Ki inaam taisyek eng' taitap Kamuktaindet ne Toroor, ko uu ye ki ng'at `Kamuktaindet ne Toroor Musa.

²⁶ Ki inde kapkorosuut ne po thahabu emaitap Kamuktaindet ne kituiyechin eng' koyooto sip kemong'jin,

²⁷ ak kibeelee kapkorosunooto nyamdutik che po tuguuk che ng'uu ne anyiny, ko uu ye ki ng'at `Kamuktaindet ne Toroor Musa.

²⁸ Yeityo kosonginin angeet eng' kurgeetap emaitap Kamuktaindet.

²⁹ Ki inde kaptisisyet ne kibeelee tiseiywot eng' kurgeetap emaitap Kamuktaindet ne po emait ne kituiyechin. Ki igoito kagoochinet ne kibeelei ak ne po peek, eng' kaptisisyonooto, ko uu ye ki ng'at `Kamuktaindet ne Toroor Musa.

³⁰ Ki inde taabeet ne kiuunse kwenutap emait ne kituiyechin ak kaptisisyet ak koroong'ji peek oriit, si kiuunse.

³¹ Ki iun Musa ak Aron ak weeriikyik eunekwak ak keelyekwak eng' kioto.

³² Ki iuni ko uu nooto ye kichutei emait ne kituiyechin oriit ak ye kimachei koriikyi kaptisisyet, ko uu ye ki ng'at `Kamuktaindet ne Toroor Musa.

³³ Ki lumda ng'ootweetap seremut koyiem koot ak kaptisisyet ak konde angeet kurgeetap seremut. Ki iges anyun Musa poisyonooto.

³⁴ Ki nyo kotuch anyun pooldet emait ne kituiyechin ak ki nyi emait `liilindap Kamuktaindet ne Toroor.

³⁵ Ki ma imuuch Musa kochut emait ne kituiyechin amu kigatebee pooldet paragutap koyooto ak kiganyi emaitap Kamuktaindet liilindap Kamuktaindet ne Toroor.

³⁶ Ye kingo naam kotogosta pooldet eng' koyooto, konaam koba anyun piigap Israel ko uu nooto eng' panwekwak tugul.

³⁷ Ago ye kingo ma togosta pooldet, ko ki ma kobendi ui agoi peetuut ne togostoi poldanooto.

³⁸ Amu kiteben poldetap Kamuktaindet ne Toroor emaitap Kamuktaindet parak peet, ak ki mi maat poldanooto kemoi, kogigeerei emaitap Kamuktaindet komugul ne po Israel eng' panwekwak tugul.