KALEWANAIK 28 - Bukuit Ne Tilil

¹ Mweei kiptengekyot ye maonei chii, ago nyigoonen che po iman ko uu ng'etundo.

² Chaang'aitu pounigap emet amu pistoennyi, ago tebyei keny emonooto amu piik che tinyei kaguiyet ak naet.

³ Chiito ne ma tinyei kiy ne usei kibananook ko uu usoonetap ropta ne ng'emei amitwogik.

⁴ Ilasu piik che yaach icheeget che metoi ng'atuutik, ago porye pichooto yaacheen `icheeget che riibei ng'atuutik.

⁵ Ma iguitos piik che yaach kirwooget, ago iguitos tuguuk tugul icheeget che cheeng'ei Kamuktaindet ne Toroor.

⁶ Kaigai kibananiat ne wendotee imandanyi, kosiir ineendet ne imaasat eng' ortinwekyik, agot ngo mogoryo.

⁷ Weeriit ne utaat age tugul ko riibei ng'atuutik, ago iteweeri kwandanyi ineendet ne chorweetap kipkeinik.

⁸ Ineendet ne tesei tuguukyik eng' keljinet ne siirei ne nyolu, eng' tuguuk che tesoksei, koyumjin chooto ineendet ne riiree kibananook.

⁹ Kiwechei saaetap ineendet ne eesyoi kogas ng'atuutik.

¹⁰ Ibutyin keriingennyi age tugul ne imaasi che po iman kobun ooreet ne ya, ago poorei eng' tuguuk che myach, piik che ititaatiin.

¹¹ Menee mogoryot utaaatyennyi, ago isyachi ineendet kibananiat ne tinyei kaguiyet.

¹² Piitu toroornatet ne oo ye iterteerisyei che po iman, ago ye ng'eetyo kiptengeginik, kounygei piik.

¹³ Ma nyooru perurto ineendet ne unyei pistaosyekyik, ago nyooru rireenet age tugul ne ng'aanyei ak kometo.

¹⁴ Paibai chiito ne iyweisyei kotugul; ago ibutyin yaityet ineendet ne iuuiiti muguleldanyi.

¹⁵ Uu ng'etundo ne pooriseni ak magalaluut ne ombenoti, pounindet ne ya ne pou kibananook.

¹⁶ Usiindet ne oo agine pounindet ne ma tinyei kaguiyet; ago ineendet ne wechei kasetap myat kotesei peetuusyekyik.

¹⁷ Mwechin keriinget chiito ne mi paragunnyi korotiigap chii age; amat koraany chii ineendet.

¹⁸ Kisaru age tugul ne wendotee imanda, ago ibuti koma tyanit ineendet ne imaasat eng' ortinwekyik.

¹⁹ Nyooru amitwogik che chaang' chiito ne ibati korennyi; ago nyooru pananda ne oo ineendet ne isubi tangoita.

²⁰ Nyooru perurwogik che chaang' chiito ne po iman, ago ma kimetoi ama kibir ineendet ne labatyin koek mogoryo.

²¹ Ma myee ketiytiy piik; anan kobistoe chii kole si konyoor kererutyet.

²² Labatyin mogornatosyek ineendet ne tinyei kong' ne ya, ama naei kole nyoonjin pananda.

²³ Tuun nyooru chameet ineendet ne kere kong' chii kosiir ineendet ne chemwai kuut.

²⁴ Ineendet ne chorei tuguugap kwan anan kamet ak komwa kole, “Ma pistoet niito,” ko chorweetap ng'emindet ineendet.

²⁵ Ing'eeti pooryeet ineendet ne tinyei kasetap myat, ago nerei ineendet ne imang'u Kamuktaindet ne Toroor.

²⁶ Perber ineendet ne imang'ugei; ago kisaru age tugul ne wendotee utaatyet.

²⁷ Ma rarchin kiy ineendet ne igoochin tuguuk kibananiat, ago nyooru chubisyosyek che chaang' ineendet ne unyei konyekyik.

²⁸ Ye kang'eetyo piik che yaach, ko unyegei piik che po iman; ago ye kalusyo icheek, ko tesoksei che po iman.