ISAIAH 65 - Bukuit Ne Tilil

Kirwooget ak saruunet

¹ Teeba piik che ki ma koteeba; kigonyoorwo icheek che ki ma cheeng'a: ki aleenji pororyet ne ki ma kemwaitae kainennyu, Ogeera, ogeera.

² Ki aitoochi eunekyuk peet komugul piik che ingeleldos, che pendote ooreet ne ma karaaran, che pendote kabwaatutikwak;

³ piik che tacha kimni kotugul, koeng'sei eng' mbareenik, ak kobeelei nyamdutik eng' matubaruuk parak;

⁴ che teebote kereeriisyek, ak komenyei komoswek che po ung'oot; che amei panyeegap toorook, ak mi tereenikwak suutegap tuguuk che kiwechei.

⁵ Che mwaei kole, tonon inyegei, ameriikyo, amu aa tiliil asiirin: chuuto ko iyeto eng' serunnyu, maat ne lalei peetuut komugul.

⁶ Ogeero, siraat eng' tainnyu: masise, ago ayaaktoi, ee ayaakyini andochini tegetikwak,

⁷ tengekwogikwok, kobooto tengekwogigap kwanisyekwok, mwaei Kamuktaindet ne Toroor, che ki kobeel nyamdutik eng' tuloonook, ak kochuba eng' tuloonook che mengeechen: ageerchini anyun poisyonikwak che po tai, andochini tegetikwak.

⁸ Mwaei Kamuktaindet ne Toroor kole, ko uu ye kinyoorchin divaik che leelach logoek che irurugotin eng' temeet, ak kole age, Ameng'em, amu mi kaberuret tuguuchooto: ayae anyun ko uu nooto agobo otwogikyuk, si ma ng'em icheek tugul.

⁹ Ak amutu ne ki kiii eng' Jakobo, ak amutu eng' Judah nyabanindetap tuloonookyuk, ak kobunji yooto chechuuk che ki kilewen, ak komenyei yooto otwogikyuk.

¹⁰ Ak koek Saron piutap akwotisyegap keechiirek, ak koek atebweetap Akor ole ruiye akwotisyek, amu piikyuk che ki kocheeng'a.

¹¹ Ago okweek che ometoi Kamuktaindet ne Toroor, che outye tulweennyu ne tiliil, che ochobe meset agobo Kelunet, ak che onyiityini Kagesunet divaik che ki kiburuch:

¹² aityinok anyun rotwetap chok, ak ong'uruukyini tugul parisyet: amu kinga kuurse, koma kowolu; kinga ng'alaal, koma ogas; ago ki oyai yaityet eng' tainnyu, ak ki olewen ne ma paibaitune.

¹³ Mwaei anyun Kiptaiyat Kamuktaindet ne Toroor kole, ogeero, tuun amisyei otwogikyuk, ago amok rubeet: ogeero, tuun eeisei otwogikyuk, ago amok melel: ogeero, tuun paibaitu otwogikyuk, ago olilandosi:

¹⁴ ogeero, tyendos otwogikyuk amu poiboiyetap mugulelwekwak, ago orirtosi eng' arageneetap muguleldo, oteitosi amu ng'wanindap muguleldo.

¹⁵ Ak omete kaineng'wong' koek chubisyet eng' chechuuk che ki alewen, ak kobarin Kiptaiyat Kamuktaindet ne Toroor; ak koguur otwogikyik eng' kainet age:

¹⁶ si koek ne iberuuregei eng' ng'wony ne iberuuregei eng' Kamuktaindet ne po iman, ak koek ne iyastos eng' ng'wony ne iyastos eng' Kamuktaindet ne po iman; amu kigeutye nyalilwogik che po tai, amu kigeuny si ma ageere.

Kipsengwet ne leel ak ng'wony ne leel

¹⁷ Ogeero, atau ayae kipsengwet che leelach ak ng'wonyut ne leel: ama kibwaati tuguuk che po tai, ama kochutei metit.

¹⁸ Ago ogaaskei ak oboiboitu agoi agobo kiit ne atau ayae: amu atau ayae Jerusalem koek ne kiboiboitune, ak koek piikyik poiboiyet.

¹⁹ Ak abaibaitune Jerusalem, abaibaitune piikyuk: ama kegasei ne riirei eng' nganasanooto, anan tuugeet ne po riirek.

²⁰ Ma piitu eng' olooto kogeny lakweet ne po peetuusyek che ng'ering' anan poiyot ne ma ilil: amu meei lakweet ko po kenyiisyek pogol, ak kechubei kiptengekyot ne po kenyiisyek pogol.

²¹ Ak koteech kooriik, ak komeny; ak komiin sabibuk eng' mbareenik, ak koam logoekwak.

²² Ma teeksei icheek, si konyo komeny age; ama minsei icheek, si konyo koam age: amu igeitu peetuusyegap keetit peetuusyegap piikyuk, ak koboiboitune chechuuk che ki alewen, poisyonigap eunekwak.

²³ Ma poisyei puch, ama ichin nyalil, amu icheeget ko iyoteetap che iberuurotin che po Kamuktaindet ne Toroor, kobooto lagokwak.

²⁴ Ak ye tomo koguurso, awolu; ak ye ta kong'alaali, agas.

²⁵ Ageti suiyot ak aarwetap keechiir, ak koam ng'etundo susweek ko uu teta: ak koek ng'ung'unyek amitwogigap ereneet. Ma itoi kiy chii anan kong'emis eng' tulweennyu tugul ne tiliil, mwaei Kamuktaindet ne Toroor.