EZRAH 3 - Bukuit Ne Tilil

Keteechei kogeny Kaptisisyet

¹ Kingo it arawetap tisap ye kiga komeng'iis piigap Israel eng' nganasookwak, koyumjigei piik Jerusalem ko uu chiichak.

² Yeityo kotonon anyun `Jeshua weeriitap Josadak ak tupchosyekyik tisiik, kobooto Zerubabel weeriitap Shealtiel, ak tupchosyekyik, ak koteech kaptisisyet ne po Kiptaiyat Kamuktaindetap Israel, si kogoitoe kagoochinoik che kibeelei ko uu ye siraat eng' Ng'atuutyetap Musa chiitap Kamuktaindet.

³ Nga ki tinyei; amu ki tinyei kaiyweisyet amu piigap emotinwek alak, ko ki inde kaptisisyet ole tebee ak kogoochi Kamuktaindet ne Toroor kagoochinoik che kibeelei, karon ak koskoleny eng' kaptisisyonooto.

⁴ Ki riip igoorto ne po keryosyek, ko uu ye siraat ak kogoito kagoochinoik che kibeelei eng' peetuut age tugul kobee koiitennywa, ko uu kayomiset ak ko uu ye yamei poisyetap peetuut age tugul.

⁵ Ye kingo pata kogoito kagoochinet ne kibeelei ne po kotugul, kagoochinoik che po ye kaleel arawet, che po igoorwek tugul che po Kamuktaindet ne Toroor che ki king'at, che ki kitabaan ak che po chii tugul ne ki igoochin Kamuktaindet ne Toroor kagoochinetap chamyet.

⁶ Kitau kogoochin Kamuktaindet ne Toroor kagoochinoik che kibeelei eng' peetuut ne po tai ne po arawetap tisap, nga ki tomo kelumda lumeiywegap Hekaluutap Kamuktaindet ne Toroor.

Ketau Teekseetap Hekaluut

⁷ Ki igoochi kogeny fedhaisyek musogigap koik, ak che po pagoinik, ak kogoochi piigap Sidon ak che po Tyro amitwogik, che kieei ak mwanik, si kobiit koip taragonik eng' Lebanon kobwa nyanjetap Mediterenian, agoi Joppa, ko uu ye kiga koyanji Cyrus laitoryatap Persia.

⁸ Ak eng' kenyiit ne po aeng' ngap koit kootap Kamuktaindet eng' Jerusalem, kotoi Zerubabel weeriitap Shealtiel ak Jeshua weeriitap Josadak kobooto tupchosyekwak (tugul che tisiik, Lawiik ak luulenik tugul che kiga week Jerusalem) poisyet. Ki inde Lawiik, kobooch che po kenyiisyek tiptem ak che siirei, koriip poisyet ne po kootap Kamuktaindet ne Toroor.

⁹ Ki tonon anyun Jeshua kobooto weeriikyik ak tupchosyekyik, Kadmiel ak weeriikyik, weeriigap Judah, komi tugul koriip kiboitiinik eng' kootap Kamuktaindet: weeriigap Henadad, kobooto weeriikwak ak tupchosyekwak Lawiik.

¹⁰ Kingo lumda teegik lumeiywotap Hekaluutap Kamuktaindet ne Toroor, konam poisyennywa tisiik ak kolas Kamuktaindet ne Toroor kolaachi ngoroikwak che po tiseinateet ak kotinyei iryagook, kobooto Lawiik weeriigap Asaph che ki tinyei sanisyegap sugunonik che kibirei, ko uu ng'atuutyetap Daudi laitoryatap Israel.

¹¹ Kiwoljingei kotyeni kolasu ak komwachin kongoi Kamuktaindet ne Toroor koleen, “Amu myee ineendet, amu po koigeny rireenennyi eng' Israel.” Ak ki waakyo piik tugul eng' waagaat ne oo ye ki ilasu Kamuktaindet ne Toroor, amu kiga kelumda lumeiywotap kootap Kamuktaindet ne Toroor.

¹² Ago ki riiryo eng' kutit ne oo tisiik che chaang' ak Lawiik ak kandoigap kooriigap kwanisyek, poisyek chooto kiga keer koot ne ki po tai, ye ki ngelumdoi lumeiywotap koiito eng' tainnywa, ak ki waakyo alak eng' poiboiyet.

¹³ Ki ma mata komuuch piik koobeesyo waagaat ne po poiboiyet ak ne po riiregap piik, amu ki waakyo piik eng' waagaat ne oo, ak ki it waagandanooto ole loo.