2 KORINTOEK 4 - Bukuit Ne Tilil

Konorwet eng' tereenigap ng'ung'unyek

¹ Nooto anyun, amu ki tinyei poisyoni, ko uu ye ki kenyooru rireenetapkei, ko mameech mugulel:

² ago kigeeesye tuguuk che ung'ootiin che po kalilanet, ama kibendoti eng' ng'aalseet, anan keboisyee ng'olyootap Kamuktaindet eng' kaberberisyet; ago eng' kabartaetap imanit, kiboorchinigei kabwaatetap chii age tugul eng' taitap Kamuktaindet.

³ Ago ngo tugootiin logoiywekyok che myach, ko tugootiin eng' icheek che lustos:

⁴ eng' icheek che katuch kamuktaindetap ng'wonyuni kabwaatutigap che ma iyani, si ma iluuchi icheek lapkeiyetap logoiywek che myach che po toroornatetap Kristo, ne ineendet ko itoondap Kamuktaindet.

⁵ Amu ma ki amdoti agobo kei, ago Kristo Jeso ne Kiptaiyat, ak acheeget ko ki otwogikwok amu Jeso.

⁶ Amu Kamuktaindet ne ki mwa kole, “Tuun iluu lapkeiyet eng' mesundeito,” ineendet ne ki iluuchi mugulelwekyok, si kogoon lapkeiyet ne po naetap toroornatetap Kamuktaindet eng' togeetap Jeso Kristo.

⁷ Ago ki tinyei konorwani eng' tereenik che po kimindeet, si kobiit kobunji Kamuktaindet ooindo ne siirtoot miising' ne po kamuktaet, ago ma acheek;

⁸ kinyalilech eng' komosta age tugul, ago ma kigichech; kitoptobeni, ago ma petwech kamang'unet;

⁹ Ki onwech, ago ma kibagaaktaech; ki wiirtaech ago ma ki parech;

¹⁰ ki ibooti kotugul eng' poorto meetap Jeso, si kobiit kong'ang'ak agine saboondap Jeso eng' poorwekyok.

¹¹ Amu acheeget che kisoptosi kimutyinech meet kotugul amu Jeso, si kobiit kong'ang'ak agine saboondap Jeso eng' poorwekyok che pegu.

¹² Nooto anyun poisyei meet eng' acheek, ago saboondo eng' okweek.

¹³ Ago amu ki tinyei Kabuuset ne Tiliil nooto po kayaneet, ko uu ye ki kisir keele ki ayan, nooto anyun ki ang'alaali; kiyani agacheek, ak keng'alaali amu nooto;

¹⁴ kingen keele ineendet ne ki ing'eet Kiptaiyat Jeso ko tuun ing'eetech agacheek kobooto Jeso, ak kobartech kobootok.

¹⁵ Amu tuguuk tugul ko agobo okweek, si ye tesak myeeindo eng' che chaang', koyai kagoitoetap kongoi kotesak eng' katorooretap Kamuktaindet.

Pichiindo ak toroornatet ne po koigeny

¹⁶ Nooto anyun, mameech mugulel; ago agot ngo ng'emak chiinyo ne po parak, kewalei chiinyo ne po oriit kileeliti peetuut age tugul.

¹⁷ Amu pichiindanyo ne nyumnyum, ne ma tebyei, koyaiywech toroornatet ne oo ne po koigeny, ne tesoksei miising' kosiir;

¹⁸ ye ma kigeere tuguuk che taagu, ago tuguuk che ma taagu, amu tuguuk che taagu kosiirtoi; ago tuguuk che ma taagu ko po koigeny.