ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2 - ಕೊಡವ ಬೈಬಲ್ಸಬೆರ ಜನಕ್ ಉಳ್ಳ ಬೋದನೆ 1 ನೀನ್ ಆರೋಗ್ಯವಾನ ಬೋದನೆನ ಕಂಡಿತವಾಯಿತ್ ಅನ್ನನೆ ಬೋದನೆ ಮಾಡ್. 2 ವಯಸ್ಸಾನ ಆಣಾಳ್‍ವ ಅಯಿಂಗಡ ಆಸೇನ ಅಡಕತ್‍ಲ್ ಬೆಪ್ಪಯಿಂಗಳಾಯಿತ್, ಮರ್ಯಾದಸ್ತಂಗಳಾಯಿತ್, ತನ್ನಡಕ್ಕ ಉಳ್ಳಯಿಂಗಳಾಯಿತ್ ಇಪ್ಪಕ್ ಎಣ್ಣಂಡು. ಇಂಞು, ದೇವಡ ಮೇಲೆ ಉಳ್ಳ ನಂಬಿಕೆ, ಪ್ರೀತಿ ಪಿಂಞ ತಾಳ್ಮೆಲ್ ಆರೋಗ್ಯ ಉಳ್ಳಯಿಂಗಳಾಯಿತ್ ಇರಂಡೂಂದ್ ಬುದ್ದಿ ಎಣ್ಣಿ ಕೊಡ್. 3 ಅನ್ನನೆ ವಯಸ್ಸಾನ ಪೊಣ್ಣಾಳ್‍ವಳು, ದೇವಡ ಮೇಲೆ ಪ್ರೀತಿ ಉಳ್ಳಯಿಂಗ ನಡ್‍ಪನೆಕೆ ನಡ್‌ಕಂಡು. ಕುತ್ತ ಪರಿಯತಯಿಂಗಳಾಯಿತ್, ಕಳ್ಳ್ ಕುಡಿಚಂಡ್ ಇಪ್ಪಕ್ಕಾಗ. ಏದ್ ನಲ್ಲದೋ, ಅದ್‍ನ ಅಯಿಂಗ ಬೋರೆಯಿಂಗಕ್ ಪಡಿಪ್‍ಚಿಡಂಡು. 4 ಅಕ್ಕ ಈ ವಯಸ್ಸಾನ ಪೊಣ್ಣಾಳ್‍ವ, ಬಾಲೆಕಾರ್ತಿಯಂಗಕ್, ಅಯಿಂಗಡ ವಡಿಯ ಪಿಂಞ ಮಕ್ಕಳ ಪ್ರೀತಿ ಮಾಡಂಡೂಂದ್ ಎಣ್ಣಿ ಕೊಡ್‍ಪಕಯ್ಯು. 5 ಎಲ್ಲಾ ಬಾಲೆಕಾರ್ತಿಯಳು, ತನ್ನಡಕ್ಕ ಉಳ್ಳಯಿಂಗಳಾಯಿತ್, ವಡಿಯಂಗ್ ನೇರಾನಯಿಂಗಳಾಯಿತ್, ಅಯಿಂಗಡ ಮನೆನ ಚಾಯಿ ನೋಟ್‍ವಯಿಂಗಳಾಯಿತ್, ಅಯಿಂಗಡ ವಡಿಯಂಗಕ್ ತಗ್ಗಿತ್ ನಡ್‍ಪಯಿಂಗಳಾಯಿತ್, ಪ್ರೀತಿಯುಳ್ಳಯಿಂಗಳಾಯಿತ್, ಇರಂಡೂಂದ್ ಬುದ್ದಿ ಎಣ್ಣಿ ಕೊಡ್. ಅಕ್ಕ ದೇವಡ ವಾಕ್ಯಕ್ ಅಯಿಂಗ ದೂಷಣೆ ಕೊಂಡ್ ಬಪ್ಪುಲೆ. 6 ಅನ್ನನೆ, ಬಾಲೆಕಾರಂಗಳು ಎಲ್ಲಾ ವಿಷಯತ್ ತನ್ನಡಕ್ಕ ಉಳ್ಳಯಿಂಗಾಳಾಯಿತ್ ಇಕ್ಕಂಡೂಂದ್ ಎಣ್ಣಿ ಕೊಡ್. 7 ನೀನ್ ನಲ್ಲದ್ ಮಾಡಿತ್, ಎಲ್ಲಾ ವಿಷಯತ್‍ಲ್ ಉದಾರಣೆಯಾಯಿತ್ ಅಯಿಂಗಕ್ ಇರಂಡು. ನೀನ್ ಬೋದನೆ ಮಾಡ್‌ವಕ ನೇರಾನ ಸತ್ಯವಾನ ಬೋದನೆನ ನೇರಾನಂವೊನಾಯಿತ್, ಗೌರವತ್‍ಲ್ ಮಾಡ್‌ವಂವೊನಾಯಿತ್ ಇರಂಡು. 8 ದೇವಡ ಸೇವೇನ ವಿರೋದ ಮಾಡ್‌ವಯಿಂಗ, ನಿನ್ನ ಕುತ್ತಪರಿವಕ್ ಒಂದು ಇಲ್ಲತೆ, ಅಯಿಂಗ ಞಾಣ ಪಡ್‌ವನೆಕೆ, ನೀಡ ಬೋದನೆ ಸತ್ಯವಾಯಿತ್ ಇರಂಡು. 9 ಆಳುವ, ಅಯಿಂಗಡ ಎಜಮಾನಂಗ್ ತಗ್ಗಿತ್ ನಡ್‌ಂದಿತ್, ಎಲ್ಲಾ ವಿಷಯತ್‍ಲು ಕುಶಿ ಪಡ್‍ತಿತ್, ಎದ್‍ರ್ ತಕ್ಕ್ ಪರಿಯತೆ, 10 ಎಜಮಾನಂಡ ಮನೆಲ್ ಒಂದು ಕಳ್ಳತ್ತನ ಮಾಡತೆ, ಎಲ್ಲಾ ವಿಷಯತ್‍ಲು ಎಜಮಾನಂಗ್ ನಂಬಿಕಸ್ತಂಗಳಾಯಿತ್ ಇಪ್ಪಕ್ ಅಯಿಂಗಕ್ ಬುದ್ದಿ ಎಣ್ಣ್. ಅನ್ನನೆ ಇಂಜತೇಂಗಿ, ನಂಗಡ ರಕ್ಷಕನಾನ ದೇವಡ ಬೋದನೆನ ಕ್‍ೕಪಯಿಂಗ ಎಲ್ಲಾರು ಅದ್ಂಗ್ ಕೆಮಿ ಕೊಡ್‌ತಿತ್ ಮರ್ಯಾದೆ ತಪ್ಪ. ದೇವಡ ಕರುಣೆ ಪಿಂಞ ನಂಗಡ ಪ್ರೀತಿರ ಬದ್‍ಕ್ 11 ಇಕ್ಕ, ಎಲ್ಲಾ ಜನಕ್ ರಕ್ಷಣೆ ಕ್‍ಟ್ಟ್‌ವಕುಳ್ಳ ಕೃಪೇನ ದೇವ ಕಾಂಬ್‍ಚಿಟ್ಟತ್. 12 ಆನಗುಂಡ್ ಈ ಕೃಪೆ ದೇವಡ ಮೇಲೆ ಬಕ್ತಿಲ್ ಬದ್‍ಕ್‍ವಕ್ ಪಿಂಞ ಈ ಲೋಕತ್‍ರ ಮೇಲೆ ಉಳ್ಳ ಆಸೇನ ಬುಟ್ಟಿತ್ ಬದ್‍ಕ್‍ವಕ್ ನಂಗಕ್ ಎಣ್ಣಿ ಕೊಡ್‍ಪ. ಪಾಪ ದುಂಬ್‍ನ ಈ ಲೋಕತ್‍ಲ್, ನಂಗ ಜ್ಞಾನ ಉಳ್ಳಯಿಂಗಳಾಯಿತ್, ನೀತಿ ಉಳ್ಳಯಿಂಗಳಾಯಿತ್ ದೇವಡ ಮೇಲೆ ಬಕ್ತಿ ಉಳ್ಳಯಿಂಗಳಾಯಿತ್ ಬದ್‍ಕ್‍ವಕ್ ಸಹಾಯ ಮಾಡ್‌ವ. 13 ಅನ್ನನೆ ಇಪ್ಪಕ, ನಂಗಡ ರಕ್ಷಕನಾನ ಯೇಸು ಕ್ರಿಸ್ತ ಎಣ್ಣುವ ಬಲ್ಯ ದೇವಡ ಮಹಿಮೆಲ್ ಬಪ್ಪ ಆ ಕುಶೀರ ದಿನಕಾಯಿತ್, ನಂಗ ಬಾರಿ ಕುಶೀಲ್, ಮಹಿಮೇರ ನಿರಿಕ್ಷೇಲ್ ಪಾರಕಾತಂಡ್ ಉಂಡ್. 14 ಅಂವೊ, ನಂಗಳ, ನಂಗಡ ಎಲ್ಲಾ ಪಾಪತ್ಂಜ ಬುಡ್‍ಗಡೆ ಮಾಡಿತ್, ಅಂವೊಂಡ ಸ್ವಂತ ಜನವಾಯಿತ್ ಮಾಡ್‌ವಕಾಯಿತ್, ಎಲ್ಲಾ ನಲ್ಲ ಕೆಲಸತ್‍ನ ಕುಶೀಲ್ ಮಾಡ್‌ವಕ್ ಅರ್ಪಿಚಿಟ್ಟಯಂಗಳಾಯಿತ್ ಪಿಂಞ ನಂಗಳ ಶುದ್ದ ಮಾಡ್‌ವಕಾಯಿತ್ ಅಂವೊನ ಅಂವೊನೇ ನಂಗಕಾಯಿತ್ ಒಪ್ಪ್‌ಚಿಟ್ಟತ್. 15 ಇದ್‍ನೆಲ್ಲಾ ನೀನ್ ಅಯಿಂಗಕ್ ಬೋದನೆ ಮಾಡಿತ್, ಎಲ್ಲಾ ಅದಿಕಾರತ್‍ಲ್ ಎಚ್ಚರ ಮಾಡ್ ಪಿಂಞ ಪುರ್‌ಡ್ ಕೊಡ್. ದಾರೂ ನೀಡ ಅದಿಕಾರತ್‍ನ ಅಲ್ಲಗೆಳೆಯುವನೆಕೆ ಬುಡತೆ. |
© 2017, New Life Literature (NLL)