ಪ್ರಕಟನೆ 15 - ಕೊಡವ ಬೈಬಲ್ಏಳ್ ದೂತಂಗಳು ಏಳ್ ಬಾದೆಯು 1 ಪಿಂಞ, ಪರಲೋಕತ್‍ಲ್ ಬಲ್ಯದಾಯಿತ್ ಆಶ್ಚರ್ಯವಾನ ಇಂಞೊರ್ ಗುರ್‌ತ್‌ನ ನಾನ್ ಕಂಡಿಯೆ. ಇದ್ ಆಕೀರ್ ಆಯಿತುಳ್ಳ ಏಳ್ ಬಾದೆನೆ ಬೆಚ್ಚಿತ್ಂಜ ಏಳ್ ದೂತಂಗಳಾಯಿತ್ಂಜತ್. ಇದ್‍ನಗುಂಡ್ ದೇವಡ ಚೆಡಿ ತ್‍ೕಂದ್ ಪೋಪ. 2 ತಿತ್ತ್ ಕಲ್‌ಕ್‌ನ ಗಾಜಿರ ಕಡಲ್‍ರನೆಕೆ ಇಂಜ ಒರ್ ಕಡಲ್‍ನ ನಾನ್ ಕಂಡಿಯೆ. ಮೃಗತ್‍ನ ಅದ್ಂಡ ವಿಗ್ರಹತ್‍ನ, ಅದ್ಂಡ ಮುದ್ರೆನೆ ಪಿಂಞ ಅಂವೊಂಡ ಪೆದತ್‍ರ ಲೆಕ್ಕಕ್ ಬಗ್ಗತೆ ಗೆದ್ದಯಿಂಗ ದೇವಡ ವೀಣೇನ ಕೈಯಿಲ್ ಪುಡ್‍ಚಂಡ್ ಗಾಜಿರ ಸಮುದ್ರತ್‍ರ ಪಕ್ಕ ನಿಂದಂಡ್ ಇಪ್ಪಾನ ಕಂಡಿಯೆ. 3 ಅಯಿಂಗ ದೇವಡ ಸೇವಕನಾನ ಮೋಶೇರ ಪಾಟ್ ಪಿಂಞ ಕೊರಿಕುಟ್ಟಿರ ಪಾಟ್‍ನ ಪಾಡಿಯಂಡ್ ಇಂಜತ್. ಸರ್ವ ಶಕ್ತಿವಂತ ದೇವಾದಿ ದೇವನೇ, ನೀಡ ಕ್ರಿಯೆ ಎಲ್ಲಾ ಮಹತ್ವ ದುಂಬ್‍ನದಾಯಿತು, ಆಶ್ಚರ್ಯವಾಯಿತು ಉಂಡ್. ಎಲ್ಲಾ ಜಾತಿಯಡ ರಾಜನೇ, ನೀಡ ಬಟ್ಟೆ ನೀತಿಯಾನದು ಸತ್ಯ ದುಂಬ್‍ನದಾಯಿತು ಉಂಡ್. 4 ಒಡೆಯನೇ, ನೀಕ್ ಬೊತ್ತತೆ, ನೀಡ ಪೆದಕ್ ಮಹಿಮೆ ತರತೆ ಇಪ್ಪಕ್ ದಾರ್‌ಕ್ ಕಯ್ಯು? ನೀನ್ ಒಬ್ಬನೇ ಪವಿತ್ರವಾನ ದೇವ, ನೀಡ ನೀತಿಯಾಯಿತುಳ್ಳ ತೀರ್ಪ್‌ರಗುಂಡ್ ಎಲ್ಲಾ ಜಾತಿಯಳು ಬಂದಿತ್, ನೀಡ ಮಿಂಞ ಆರಾದನೆ ಮಾಡ್‌ವಾಂದ್ ಎಣ್ಣ್‌ಚಿ. 5 ಇದಾನ ಪಿಂಞ ನಾನ್ ನೋಟ್‍ವಕ: ಪರಲೋಕತ್‍ಲ್ ಉಳ್ಳ ದೇವಡ ಸಾಕ್ಷಿರ ಗುಡಾರವಾನ ಆಲಯ ತೊರ್ಂದತ್. 6 ಆ ಆಲಯತ್ಂಜ ಏಳ್ ಬಾದೇರ ಆ ಏಳ್ ದೇವದೂತಂಗ ಪೊರಟಿತ್ ಬಾತ್. ಅಯಿಂಗ ಶುದ್ದವಾನ ಮಿನ್ನುವ ಬೊಳ್‍ತ ನಾರ್ ಬಟ್ಟೆ ಇಟ್ಟಂಡ್, ಪೊನ್ನ್‌ರ ಪಟ್ಟಿನ ಎದೇಲ್ ಕಟ್ಟಿಯಂಡ್ ಇಂಜತ್. 7 ಅಕ್ಕ, ಅಲ್ಲಿಯಿಂಜ ನಾಲ್ ಜೀವಿಯಡ ಕೂಟ್‌ಲ್ ಒಬ್ಬ, ಎಕ್ಕಾಲು ಬದ್‍ಕಿಯಂಡಿಪ್ಪ ದೇವಡ ಬಲ್ಯ ಚೆಡಿರಗುಂಡ್ ದುಂಬಿತ್ಂಜ ಪೊನ್ನ್‌ರ ಏಳ್ ಪಾತ್ರತ್‍ನ ಆ ಏಳ್ ದೂತಂಗಕ್ ಕೊಡ್‍ತತ್. 8 ದೇವಡ ಮಹಿಮೆ ಪಿಂಞ ದೇವಡ ಶಕ್ತಿಯಿಂಜ ಉಂಟಾನ ಪೊಗೇಲ್ ದೇವಾಲಯ ದುಂಬಿತ್ಂಜತ್. ಆ ಏಳ್ ದೇವದೂತಂಗಡ ಆ ಏಳ್ ಬಾದೆಯು ನೆರೆವೇರುವಕತ್ತನೆ, ದಾರೂ ದೇವಾಲಯತ್‍ರ ಒಳ್‍ಕ್ ಪೋಪಕ್ ಕಯಿಂಜಿತ್‌ಲ್ಲೆ. |
© 2017, New Life Literature (NLL)