ಜ್ಞಾನತ್‌ರ ಪಡಿಮ 8 - ಕೊಡವ ಬೈಬಲ್ಜ್ಞಾನ ಜನಡ ಕೂಡೆ ತಕ್ಕ್‌ ಪರಿವದ್‌ 1 ಜ್ಞಾನ ಕಾಕಿಯಂಡಿಲ್ಲೆಯಾ? ಬುದ್ದಿ ಕೂತ್‌ ಕೊಡ್‌ತಂಡಿಲ್ಲೆಯಾ? 2 ಅದ್‌ ಬಟ್ಟೆಲ್‌ ಉಳ್ಳ ಎತ್ತರವಾನ ಜಾಗತ್‌ಲು, ಅಡ್ಡ ರಸ್ತೆಲು ನಿಪ್ಪ. 3 ಅದ್‌ ಊರ್‌ರ ಪಡಿರ ಬಾಯಿ ಕಂಡಿರ ಬರಿಯು, ಪಟ್ಟಣತ್‌ರ ಬಾಯಿಕಂಡಿಲು ನಿಂದಿತ್‌ ಜೋರಾಯಿತ್: 4 ಜನಳೇ, ನಿಂಗಳ ನೋಟಿತ್‌ ನಾನ್‌ ಕಾಕಿಯಂಡುಳ್ಳ. ಎಲ್ಲಾ ಜನಕು ನಾನ್‌ ಕೂತ್‌ ಕೊಡ್‌ತಂಡುಳ್ಳ. 5 ಸಾದು ಜನಳೇ, ವಿವೇಕತ್‌ನ ಪಡ್‌ಚೊಳಿ. ಮೂಡಂಗಳೇ, ಅರ್ಥಮಾಡುವಕ್‌ ಪ್ಯತ್ತಮಾಡಿ. 6 ಕ್‍ೕಳಿ, ಯೋಗ್ಯವಾನ ಕಾರ್ಯತ್‌ನ ನಾನ್‌ ಎಣ್ಣುವಿ. ನಾನ್‌ ಎಣ್ಣ್‌ವದೆಲ್ಲ ಸೆರಿಯಾನದಾಯಿತಿಪ್ಪ. 7 ನಾಡ ಬಾಯಿ ನೇರಾನದ್‌ನ ತಕ್ಕ್‌ ಪರಿವ. ದುಷ್ಟತನ ನಾಡ ಕಿರಿಕ್‌ ಅಸಹ್ಯವಾನದಾಯಿತ್‌ಪ್ಪ. 8 ನಾಡ ಬಾಯಿರ ತಕ್ಕ್‌ಯೆಲ್ಲಾ ನೀತಿವಂತದಾಯಿತ್‌ಪ್ಪ. ಅದ್‌ಲ್‌ ಪೊಟ್ಟ್‌ ತಕ್ಕ್‌ ಆಡ್, ಬಟ್ಟೆ ತಪ್ಪುವ ತಕ್ಕ್‌ ಆಡ್ ಇಲ್ಲವೇ ಇಲ್ಲೆ. 9 ಅರ್ಥ ಮಾಡ್‌ವಂವೊಂಗ್‌ ಅದೆಲ್ಲಾ ತೆಳ್‌ಂಗ್‌ನದಾಯಿತು, ಅರಿವುನ ಪಡ್‌ಂದಯಿಂಗಕ್‌ ಅದೆಲ್ಲಾ ಕಳಂಗ ಇಲ್ಲತದಾಯಿತು ಇಪ್ಪ. 10 ಬೊಳ್ಳಿಕಿಂಜ ನಾಡ ಬುದ್ದಿತಕ್ಕ್‌ನ ಪಿಂಞ ಶುದ್ದ ಪೊನ್ನ್‌ಕಿಂಜ ನಾಡ ಜ್ಞಾನತ್‌ನ ಸ್ವೀಕಾರ ಮಾಡಿಯೊಳಿ. 11 ಪವಳಕಿಂಜಿ ಜ್ಞಾನ ನಲ್ಲದ್. ನಿಂಗ ಆಸೆ ಪಡುವದ್‌ ಏದು ಅದ್‌ಂಗ್‌ ಸಮವಾಯಿತ್‌ ಇಲ್ಲೆ. 12 ಜ್ಞಾನ ಆನ ನಾನ್‌ ವಿವೇಕತ್‌ರ ಕೂಡೆ ವಾಸ ಮಾಡಿತ್, ಅರಿವು ಪಿಂಞ ನಲ್ಲ ಆಲೋಚನೆನ ಪಡಂದಿತುಳ್ಳ. 13 ಯೆಹೋವಂಗ್‌ ಪೋಡಿಚಿಡುವಯಿಂಗ ಪಾಪತ್‌ನ ದ್ವೇಷ ಮಾಡುವ. ನಾನ್‌ ಹಮ್ಮ್‌ನ, ಗರ್ವತ್‌ನ, ಕ್‍ೕಡಾನ ಬಟ್ಟೆನ, ಕಪಟ ತಕ್ಕ್‌ನ ದ್ವೇಷ ಮಾಡುವಿ. 14 ಆಲೋಚನೆಯು, ನೇರಾನ ಜ್ಞಾನವು ನಾಡದೇ. ಬುದ್ದಿಯು, ಶಕ್ತಿಯು ನಾಡ ಪಕ್ಕ ಉಂಡ್. 15 ನಾಡಗೊಂಡ್‌ ರಾಜಂಗ ರಾಜ್ಯತ್‌ನ ಆಳುವ, ನ್ಯಾಯವಾನ ಕಾನೂನ್ನ ಕೊಂಡ ಬಪ್ಪ. 16 ನಾಡಗೊಂಡ್‌ ಪ್ರಬುವ, ಅದಿಪತಿಯ ಆಳುವ, ಪಿಂಞ ಈ ಲೋಕತ್‌ಲ್‌ ಉಳ್ಳ ಎಲ್ಲಾ ನ್ಯಾಯಾದಿಪತಿಯ ಆಳ್‌ವಿಕೆ ಮಾಡುವ. 17 ನನ್ನ ಪ್ರೀತಿಚಿಡುವಯಿಂಗಳ ನಾನ್‌ ಪ್ರೀತಿಚಿಡುವಿ. ನನ್ನ ನೇರಾಯಿತು ತ್‍ೕಡ್‌ವಯಿಂಗ ನನ್ನ ಕಂಡಿತವಾಯಿತ್‌ ಕಂಡ್‌ಪುಡಿಪ. 18 ಐಶ್ವರ್ಯವು, ಗನವು ನಡ ಪಕ್ಕ ಉಂಡ್, ಪಾಳಾಕತ ವಸ್ತುವು, ನೀತಿಯು ನಾಡ ಪಕ್ಕ ಉಂಡ್. 19 ನಾನ್‌ ನಿಂಗಕ್‌ ತಪ್ಪ ಫಲ ಪೊನ್ನ್‌ಕಿಂಜಲು, ಅಕ್ಕು ಶುದ್ದ ಪೊನ್ನಕಿಂಜಲು ನಲ್ಲದ್. ಶುದ್ದ ಬೊಳ್ಳಿಕಿಂಜಲೂ ನಾಡ ಆದಾಯ ನಲ್ಲದ್. 20 ನನ್ನ ಪ್ರೀತಿಚಿಡುವಯಿಂಗ ಐಶ್ವರ್ಯತ್‌ನ ಪಡೆಯುವಕು, ಅಯಿಂಗಡ ಬಂಡಾರತ್‌ನ ದುಂಬ್‌ಚಿಡುವಕು, 21 ನಾನ್‌ ಅಯಿಂಗಳ ನೀತಿರ ಬಟ್ಟೆಲು, ನ್ಯಾಯತ್‌ರ ಬಟ್ಟೆಲು ನಡ್‌ತ್‌ವಿ. 22 ಯೆಹೋವ ತಾಂಡ ಸೃಷ್ಟಿ ಕಾರ್ಯಕ್‌ ಮಿಂಞ, ಆದಿಯಿಂಜಲೇ ಜ್ಞಾನವಾನ ನನ್ನ ತಾಂಡ ಕೃಯೇರ ತೊಡಕವಾಯಿತ್‌ ಬೆಚ್ಚಂಡಿಂಜತ್. 23 ಈ ಬೂಮಿ ಉಂಟಾಪಕ್‌ ಮಿಂಞಲೇ, ಆದ್ಯತ್‌ಲೇ ನನ್ನ ನೇಮಿಚ್ಚಿಟ್ಟತ್‌ ಮಾಡ್‌ಚಿ. 24 ಸಮುದ್ರತ್‌ರ ಆಳತ್‌ಲ್‌ ನೀರ್‌ ಉಂಟಾಪಕ್‌ ಮಿಂಞ ಬುಗ್ಗೆಯೆಲ್ಲಾ ನೀರ್‌ ಉಕ್ಕಿ ಬಪ್ಪಕ್‌ ಮಿಂಞಲೇ ನಾನ್‌ ಪುಟ್ಟತ್‌ ಪಬ್ಬನೆಕೆ ಮಾಡ್‌ಚಿ. 25 ಬೆಟ್ಟ ನೆಲೆ ಆಪಕ್‌ ಮಿಂಞಲು, ಕುಂದೆಲ್ಲಾ ಉಂಟಾಪಕ್‌ ಮಿಂಞಲು, 26 ಯೆಹೋವ ಬೂಮಿನ, ಅದ್‌ಂಡ ಬಯಲ್‌ನ ಪಿಂಞ ಬೂಮಿಲ್‌ ಉಳ್ಳ ಮಣ್ಣ್‌ನ ಉಂಟ್ ಮಾಡ್‌ವಕ್‌ ಮಿಂಞಲೇ ನಾನ್‌ ಪುಟ್ಟಿತ್‌ ಬಬ್ಬನೆಕೆ ಮಾಡ್‌ಚಿ. 27 ಅಂವೊ ಬಾನ ಮಂಡಲತ್‌ನ ಸೃಷ್ಟಿ ಮಾಡ್‌ವಕ ನಾನ್‌ ಅಲ್ಲಿ ಇಂಜ. ಅಂವೊ ಸಮುದ್ರತ್‌ರ ಗಡಿನ ಗೊತ್ತ್‌ಮಾಡ್‌ವಕ ನಾನ್‌ ಅಲ್ಲಿ ಇಂಜ. 28 ಎತ್ತರತ್‌ ಮೋಡತ್‌ನ ಸೃಷ್ಟಿ ಮಾಡಿತ್, ಸಮುದ್ರತ್‌ ಬುಗ್ಗೆನ ಬದ್ರವಾಯಿತ್‌ ಅಡೆಪಕ ನಾನ್‌ ಅಲ್ಲಿ ಇಂಜ. 29 ಸಮುದ್ರತ್‌ರ ನೀರ್‌ ಕರೆನ ದಾಟಿತ್‌ ಬಕ್ಕತನೆಕೆ ಅದ್‌ಂಗ್‌ ಮಿತಿನ ಆಜ್ಞೆ ಮಾಡಿತ್, ಬೂಮಿಕ್‌ ಅಡಿಪಾಯತ್‌ನ ಇಡುವಕಲು ನಾನ್‌ ಅಲ್ಲಿ ಇಂಜ. 30 ನಾನ್‌ ಅಂವೊಂಡ ಕೂಡೆ ಕೆತ್ತ್‌ವ ಪಣಿಕಾರಂಡನೆಕೆ ಇಂಜ. ನಾನ್‌ ಎಕ್ಕಾಲು ಅಂವೊಂಡ ಕುತೂಹಲವಾಯಿತ್‌ ಇಂಜಿತ್, ಎಕ್ಕಾಲು ಅಂವೊಂಡ ಪ್ರಸನ್ನತೆಲ್‌ ಕೊಂಡಾಡಿಯಂಡಿಂಜ. 31 ಅಂವೊಂಡ ಬೂಲೋಕತ್‌ಲ್‌ ಕೊಂಡಾಡಿತ್, ಮನುಷ್ಯ ಕುಲತ್‌ರ ಕೂಡೆ ಕುಶಿಪಟ್ಟಂಡಿಂಜ. 32 ಆನಗುಂಡ್‌ ಮಕ್ಕಳೇ, ನಾಡ ತಕ್ಕ್‌ನ ಕ್‍ೕಳಿ. ನಾನ್‌ ಎಣ್ಣ್‌ವಾನ ಕ್‍ೕಟಿತ್‌ ಅದ್‌ಂಗ್‌ ಬಗ್ಗಿತ್‌ ನಡ್‌ಪಯಿಂಗ ಆಶೀರ್ವಾದ ಪಡ್‌ಂದಯಿಂಗ. 33 ನಾಡ ಬೋದನೆನ ಕ್‍ೕಟಿತ್‌ ಜ್ಞಾನವಂತಯಿಂಗಳಾಯಿ. ಅದ್‌ನ ಬುಟ್ಟಿತ್‌ ಪೋಕತಿ. 34 ನಾಡ ಮನೆರ ಪಡಿರ ಪಕ್ಕ ಪಾರಕಾತಂಡ್, ನಾಡ ಪಡಿರ ಪಕ್ಕ ಎಕ್ಕಾಲು ನಿರೀಕ್ಷೆಲ್‌ ಕಾತಂಡ್, ನಾಕ್‍ ಕೆಮಿ ಕೊಡ್‌ಪಂವೊ ಆಶೀರ್ವಾದ ಪಡ್‌ಂದಂವೊ. 35 ನನ್ನ ಕಂಡ್‌ಪುಡಿಪಂವೊ ಜೀವತ್‌ನ ಕಂಡ್‌ಪುಡಿಪ. ಒಡೆಯಂಡ ದಯೆ ಸಹ ಅಂವೊಂಗ್‌ ಕ್‌ಟ್ಟುವ. 36 ನನ್ನ ಕಂಡ್‌ಪುಡಿಪ್ಪಕ್‌ ಕೈಯಾತಂವೊ, ತಾಂಡ ಆತ್ಮಕ್‌ ಕ್‍ೕಡ್‌ ಮಾಡಿಯೊವ. ನನ್ನ ದ್ವೇಷ ಮಾಡುವಯಿಂಗೆಲ್ಲಾ, ಚಾವುನ ಪ್ರೀತಿಮಾಡುವ. |
© 2017, New Life Literature (NLL)