ಮಾರ್ಕ 10 - ಕೊಡವ ಬೈಬಲ್ಮಂಗಲತ್ರ ಬೋದನೆ ( ಮತ್ತಾಯ 19.1–9 ; ಲೂಕ 16.18 ) 1 ಯೇಸು ಆ ಜಾಗತ್‍ನ ಬುಟ್ಟಿತ್ ಯೊರ್ದನ್ ಎಣ್ಣುವ ಕೆರೆನ ದಾಟಿತ್ ಯೆಹೂದ್ಯ ಪ್ರಾಂತ್ಯಕ್ ಬಾತ್. ದುಂಬ ಜನ ಕೂಡಿತ್ ಯೇಸುರ ಪಕ್ಕ ಬಪ್ಪಕ್ ಸುರು ಮಾಡ್‍ಚಿ. ಅಯಿಂಗಕೆಲ್ಲ ಎಕ್ಕಲೂ ಮಾಡ್‌ವನೆಕೆ ಬೋದನೆ ಮಾಡಿಯಂಡಿಂಜತ್. 2 ಚೆನ್ನ ಫರಿಸಾಯಂಗ ಯೇಸುನ ಕೆಣಿಪಕಾಯಿತ್ ಅಂವೊಂಡ ಪಕ್ಕ ಬಂದಿತ್: ಒರ್ ಮನುಷ್ಯ ಅಂವೊಂಡ ಪೊಣ್ಣ್‌ನ ಬೋಂಡಾಂದ್ ಬುಡ್‌ವದ್ ನ್ಯಾಯಪ್ರಮಾಣತ್‍ರ ಪ್ರಕಾರ ನ್ಯಾಯವಾಂದ್ ಕ್‍ೕಟತ್. 3 ಅದ್ಂಗ್ ಯೇಸು: ಮೋಶೆ ನಿಂಗಕ್ ಎಂತ ಆಜ್ಞೆ ಕೊಡ್‌ತತ್‍ೕಂದ್ ಅಯಿಂಗಳ ಕ್‍ೕಟತ್. 4 ಅದ್ಂಗ್ ಅಯಿಂಗ: ವಡಿಯ ತಾಂಡ ಪೊಣ್ಣ್‌ನ ಬುಡುವದಾಚೇಂಗಿ ಬುಡುವಕುಳ್ಳ ಪತ್ರತ್‍ನ ಒಳ್‍ದಿ ಕೊಡ್‌ತಿತ್ ಅಯಿಕಲೂಂದ್ ಮೋಶೆ ಎಣ್ಣಿತುಂಡ್‍ೕಂದ್ ಎಣ್ಣ್‌ಚಿ. 5 ಅದ್ಂಗ್ ಯೇಸು: ನಿಂಗಡ ಕಠಿಣ ಹೃದಯತ್‍ರಗುಂಡ್ ಎಚ್ಚಕ್ ಬೋದನೆ ಕ್‍ೕಟತೇಂಗಿಯು ನಿಂಗ ಕೆಮಿ ಕೊಡ್‍ಪ್‍ಲೇಂದ್ ಮೋಶೇಕ್ ಗೊತ್ತ್ಂಜಗುಂಡ್ ಈ ಕಾನೂನ್‌ನ ನಿಂಗಕ್ ಒಳ್‍ದಿ ಕೊಡ್‌ತತ್‍ೕಂದ್ ಎಣ್ಣ್‌ಚಿ. 6 ಆಚೇಂಗಿ ಆದಿಲ್ ಮನುಷ್ಯಂಗಳ ಸೃಷ್ಟಿ ಮಾಡ್‍ನಂವೊ ಅಯಿಂಗಳ ಆಣಾಳ್ ಪೊಣ್ಣಾಳಾಯಿತ್ ಸೃಷ್ಟಿ ಮಾಡ್‍ಚಿ. 7 ಇದ್ಂಗಾಯಿತ್ ವಡಿಯ ಅಂವೊಂಡ ಅಪ್ಪವ್ವನ ಬುಟ್ಟಿತ್ ತಾಂಡ ಪೊಣ್ಣ್‌ರ ಕೂಡೆ ಒಂದಾಯಿತ್ ಇಪ್ಪ, ಅಯಿಂಗ ದಂಡಾಳು ಒರೇ ತಡಿಯಾಯಿತ್‌ಪ್ಪ. 8 ದೇವ ಇನ್ನನೆ ಮಾಡ್‍ನಗುಂಡ್, ಅಯಿಂಗ ದಂಡಾಳು ದಂಡಾಳಾಯಿತ್ ಇಲ್ಲತೆ ಒರೇ ತಡಿಯಾಯಿತ್ ಇಪ್ಪ. 9 ಆನಗುಂಡ್ ದೇವ ಒಂದ್ ಮಾಡ್‍ನಯಿಂಗಳ, ಮನುಷ್ಯ ಬೋರೆ ಬೋರೆ ಮಾಡ್‌ವಕ್ ಆಗಾಂದ್ ಎಣ್ಣ್‌ಚಿ. 10 ಅಯಿಂಗ ಮನೆಕ್ ಪೋನ ಪಿಂಞ ಶಿಷ್ಯಂಗ ಯೇಸುರ ಪಕ್ಕ ಈ ವಿಷಯತ್‍ನ ಪುನಃ ಕ್‍ೕಟತ್ 11 ಅದ್ಂಗ್ ಅಂವೊ: ಏದ್ ಒರ್ ಮನುಷ್ಯನು ಅಂವೊಂಡ ಪೊಣ್ಣ್‌ನ ಬುಟ್ಟಿತ್ ಬೋರೆ ಪೊಣ್ಣಾಳ್‍ನ ಮಂಗಲ ಕಯಿಚತೇಂಗಿ, ಅದ್ ಮಿಂಞತ್‍ರ ಪೊಣ್ಣ್‌ಕ್ ವಿರೋದವಾಯಿತ್ ವ್ಯಬಿಚಾರ ಮಾಡ್‍ನನೆಕೆ. 12 ಅನ್ನನೆ ಏದ್ ಒರ್ ಪೊಣ್ಣಾಳ್ ತಾಂಡ ವಡಿಯನ ಬುಟ್ಟಿತ್ ಬೋರೆ ಒಬ್ಬನ ಮಂಗಲ ಕಯಿಚತೇಂಗಿ, ಅದ್ ವ್ಯಬಿಚಾರ ಮಾಡ್‌ನನೆಕೇಂದ್ ಎಣ್ಣ್‌ಚಿ. ಯೇಸು ಚೆರಿಯ ಮಕ್ಕಕ್ ಆಶೀರ್ವಾದ ಮಾಡ್‍ನದ್ ( ಮತ್ತಾಯ 19.13–15 ; ಲೂಕ 18.15–17 ) 13 ಯೇಸು ಮುಟ್ಟ್‌ವಕಾಯಿತ್ ಚೆನ್ನ ಜನ ಚೆರಿಯ ಮಕ್ಕಳ ಕಾಕಿಯಂಡ್ ಬಾತ್. ಆಚೇಂಗಿ ಯೇಸುರ ಶಿಷ್ಯಂಗ ಅಯಿಂಗಕ್ ಜೋರ್ ಮಾಡ್‍ಚಿ. 14 ಯೇಸುಕ್ ಅದ್‍ನ ಕಂಡಿತ್ ಚೆಡಿ ಬಾತ್. ಚೆರಿಯ ಮಕ್ಕ ನಾಡ ಪಕ್ಕ ಬರಡ್ ಅಯಿಂಗಳ ತಡೆ ಮಾಡ್‌ವಕ್ಕಾಗ. ದೇವಡ ರಾಜ್ಯ ಈಂಗಡನೆಕೆ ಉಳ್ಳಯಿಂಗಕೇಂದ್ ಎಣ್ಣ್‌ಚಿ 15 ದಾರಾಚೇಂಗಿಯು ಚೆರಿಯ ಮಕ್ಕಡನೆಕೆ ದೇವಡ ರಾಜ್ಯತ್‍ನ ಸ್ವೀಕಾರ ಮಾಡತೆ ಪೋಚೇಂಗಿ, ಅಯಿಂಗ ಅದ್ಂಡ ಒಳ್‍ಕ್ ಪೋಪ್‌ಲೇಂದ್ ನಾನ್ ನಿಂಗಕ್ ನೇರಾಯಿತ್ ಎಣ್ಣ್‌ವೀಂದ್ ಎಣ್ಣಿತ್, 16 ಕುಂಞಿಯಳೆಲ್ಲಾ ಎಡ್‍ತಂಡ್, ಅಯಿಂಗಡ ಮೇಲೆ ಕೈ ಬೆಚ್ಚಿತ್ ಅಯಿಂಗಳ ಆಶೀರ್ವಾದ ಮಾಡ್‍ಚಿ. ಯೇಸು ಐಶ್ವರ್ಯತ್‍ರ ವಿಷಯತ್ ಎಣ್ಣಿ ಕೊಡ್‌ತದ್ ( ಮತ್ತಾಯ 19.16–30 ; ಲೂಕ 18.18–30 ) 17 ಯೇಸು ಅಲ್ಲಿಂಜ ಪೋಪಕ್ ಪೊರಟತ್. ಪೋಯಂಡಿಪ್ಪಕ ಒರ್ ಮನುಷ್ಯ ಓಡಿ ಬಂದಿತ್ ಅಂವೊಂಡ ಮಿಂಞಕ್ ಮೊಣಕಾಲ್ ಇಟ್ಟಿತ್; ನಲ್ಲ ಉಪಾದ್ಯನೇ, ನಿತ್ಯ ಜೀವ ಕ್‍ಟ್ಟ್‌ವಕ್ ನಾನ್ ಎಂತ ಮಾಡಂಡೂಂದ್ ಕ್‍ೕಟತ್. 18 ಅದ್ಂಗ್ ಯೇಸು: ನೀನ್ ನನ್ನ ನಲ್ಲಂವೋಂದ್ ಎನ್ನಂಗ್ ಕಾಕ್‌ವಿಯ? ದೇವನ ಬುಟ್ಟಿತ್ ಬೋರೆ ದಾರೂ ನಲ್ಲಂವೊ ಇಲ್ಲೆ. 19 ಕೊಲೆ ಮಾಡ್‌ವಕ್ಕಾಗ, ವ್ಯಬಿಚಾರ ಮಾಡ್‌ವಕ್ಕಾಗ, ಕಪ್ಪಕ್ಕಾಗ, ದಾರ್‌ನು ಮುಂಡತೆ ನಿಂದನೆ ಮಾಡ್‌ವಕ್ಕಾಗ, ಅಪ್ಪವ್ವಂಗಕ್ ಮರ್ಯಾದೆ ಕೊಡ್‍ಕಂಡೂಂದ್ ಉಳ್ಳ ನ್ಯಾಯಪ್ರಮಾಣ ನೀಕ್ ಗೊತ್ತುಂಡಲ್ಲಾಂದ್ ಯೇಸು ಎಣ್ಣ್‌ಚಿ. 20 ಅದ್ಂಗ್ ಅಂವೊ: ಉಪಾದ್ಯನೇ, ನಾನ್ ಚೆರಿಯಂವೊನಾಯಿತಿಪ್ಪಕಿಂಜಿಲೆ ಇದ್‍ನೆಲ್ಲಾ ಮಾಡಿಯೇಂದ್ ಜವಾಬ್ ಕೊಡ್‍ತತ್. 21 ಯೇಸು ಅಂವೊನ ಪ್ರೀತಿಲ್ ನೋಟಿತ್: ನೀಕ್ ಒರ್ ವಿಷಯ ಮಾತ್ರ ಕಮ್ಮಿಯುಂಡ್, ನೀಡ ಪಕ್ಕ ಉಳ್ಳದ್‍ನೆಲ್ಲ ಮಾರ್‌ವಂಜಿ ಆ ಪಣತ್‍ನ ಗರೀಬಂಗಕ್ ಕೊಡ್, ಅಕ್ಕ ಪರಲೋಕತ್‍ಲ್ ನೀಕ್ ಐಶ್ವರ್ಯ ದುಂಬಿತ್ ಕ್‍ಟ್ಟುವ, ಪಿಂಞ ನಾಡ ಬಯ್ಯ ಬಾಂದ್ ಯೇಸು ಎಣ್ಣ್‌ಚಿ. 22 ಆ ಮನುಷ್ಯ ದುಂಬ ಆಸ್ತಿ ಉಳ್ಳಂವೊನಾಯಿತ್ ಇಂಜಗುಂಡ್ ಈ ತಕ್ಕ್‌ನ ಕ್‍ೕಟದು ಅಂವೊಂಡ ಮೂಡ್ ಬಾಡಿ ಪೋಯಿತ್, ಅಲ್ಲಿಂಜ ಬೇಜಾರತ್‍ಲ್ ಪೋಚಿ. 23 ಯೇಸು ಸುತ್ತ್‌ಮುತ್ತ್ ನೋಟುವಂಜಿ, ತಾಂಡ ಶಿಷ್ಯಂಗಳ ನೋಟಿತ್, ಪಣಕಾರಂಗ ದೇವಡ ರಾಜ್ಯತ್‍ಲ್ ಎತ್ತ್‌ವಕ್ ಎಚ್ಚಕ್ ಕಷ್ಟ ಉಂಡ್‍ೕಂದ್ ಎಣ್ಣ್‌ಚಿ. 24 ಯೇಸುರ ಈ ತಕ್ಕ್‌ನ ಕ್‍ೕಪದು ಶಿಷ್ಯಂಗಕ್ ದುಂಬ ಆಶ್ಚರ್ಯ ಆಚಿ. ನಾಡ ಮಕ್ಕಳೇ ದೇವಡ ರಾಜ್ಯಕ್ ಪೋಪಕ್ ಎಚ್ಚಕ್ ಕಷ್ಟ ಉಂಡ್! 25 ಪಣಕಾರಂಗ ದೇವಡ ರಾಜ್ಯಕ್ ಪೋಪಗಿಂಜ ಚೂದ್‌ರ ಕಣ್ಣ್‌ಲ್ ಒರ್ ಒಂಟೆ ನುಗ್ಗ್‌ವದ್ ಎಚ್ಚಕೋ ಸುಲಬ ಆಪ. 26 ಇದ್‍ನೆಲ್ಲ ಕ್‍ೕಟ ಶಿಷ್ಯಂಗಕ್ ದುಂಬ ಆಶ್ಚರ್ಯ ಆಯಿ ಪೋಯಿತ್: ಅನ್ನನೆ ಆಚೇಂಗಿ ದಾರ್‌ಕ್ ರಕ್ಷಣೆ ಕ್‌ಟ್ಟೂಂದ್ ಶಿಷ್ಯಂಗ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್. 27 ಯೇಸು ಅಯಿಂಗಳ ನೋಟಿತ್: ಇದ್ ಮನುಷ್ಯಂಗಕ್ ಕಯ್ಯುಲೆ ಆಚೇಂಗಿ ದೇವಕ್ ಕಯ್ಯು. ದೇವಕ್ ಎಲ್ಲಾ ಕಯ್ಯೂಂದ್ ಎಣ್ಣ್‌ಚಿ. 28 ಅಕ್ಕ ಪೇತ್ರ ಅಂವೊನ ನೋಟಿತ್: ನೋಟ್, ನಂಗ ಎಲ್ಲಾನ ಬುಟ್ಟಿತ್ ನೀಡ ಬಯ್ಯ ಬಂದಂಡುಂಡ್‍ೕಂದ್ ಎಣ್ಣುವಕ್ ಸುರು ಮಾಡ್‍ಚಿ. 29 ಅದ್ಂಗ್ ಯೇಸು: ಅಕ್ಕು! ದಾರ್ ನಾಕಾಯಿತ್, ನಲ್ಲ ಸುದ್ದಿಕಾಯಿತ್, ಅಪ್ಪವ್ವನ, ಅಣ್ಣತಮ್ಮಣಂಗಳ ಅಕ್ಕತಂಗೆಯಳ, ಮನೆನ, ತೋಟ ಬೇಲ್‍ನ ಬುಟ್ಟ್‌ರ್‌ವ, 30 ಈ ಬದ್‌ಕ್‌ಲೇ, ದೇವಡ ವಿಷಯಕಾಯಿತ್ ಕಷ್ಟತ್‍ರ ಕೂಡೆ ಅಂವೊಂಗ್ ನೂರ್‌ರಚ್ಚಕ್ ಜಾಸ್ತಿ ಮನೆಮಠ, ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅಪ್ಪವ್ವ, ಮಕ್ಕ, ತೋಟ ಬೇಲ್ ಎಲ್ಲಾ ಕ್‍ಟ್ಟುವ ಪಿಂಞ ಮಿಂಞತ್‍ರ ಲೋಕತ್‍ಲ್ ನಿತ್ಯ ಜೀವವು ಕ್‍ಟ್ಟ್‌ವಾಂದ್ ಎಣ್ಣ್‌ಚಿ. 31 ಮಿಂಞತ್‍ಲ್ ಇಪ್ಪ ದುಂಬ ಜನ ಬಯ್ಯತ್ ಆಪ, ದಾರ್ ಬಯ್ಯತ್‌ಲ್ ಇಪ್ಪ ಅಯಿಂಗ ಮಿಂಞಕ್ ಬಪ್ಪ ಎಣ್ಣಿಯಂಡ್ ಯೇಸು ಎಣ್ಣ್‌ಚಿ. ಯೇಸು ತಾಂಡ ಮರಣತ್‌ರ ವಿಷಯತ್ ಮೂಂದನೆ ಕುರಿ ಎಣ್ಣ್‌ನದ್ ( ಮತ್ತಾಯ 20.17–19 ; ಲೂಕ 18.31–34 ) 32 ಅಯಿಂಗ ಯೆರೂಸಲೇಮ್‌ಕ್ ಪೋಯಂಡಿಪ್ಪಕ, ಯೇಸು ಶಿಷ್ಯಂಗಕಿಂಜ ಚೆನ್ನ ಮಿಂಞ ಪೋಯಂಡ್ ಇಂಜತ್. ಶಿಷ್ಯಂಗ ಆಶ್ಚರ್ಯತ್‍ಲ್ ಪಿಂಞ ಪೋಡಿಲ್ ಅಂವೊಂಡ ಬೆಂಬರತ್‌ಲ್ ಪೋಯಂಡಿಂಜತ್. ಅಕ್ಕ ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ, ಅಂವೊಂಗ್ ಮಿಂಞಕ್ ಎಂತಲ್ಲಾ ಆಪಾಂದ್ ಎಣ್ಣ್‌ವಕ್ ಸುರು ಮಾಡ್‍ಚಿ. 33 ನೋಟಿ, ಇಕ್ಕ ನಂಗ ಯೆರೂಸಲೇಮ್‌ಕ್ ಪೋಯಂಡುಂಡ್. ಅಲ್ಲಿ ಮನುಷ್ಯಕುಮಾರನ ಮುಕ್ಯ ಯಾಜಕಂಗಡ ಕೈಯಿಕೂ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಕೈಯಿಕೂ ಪುಡ್‌ಚಿತ್ ಕೊಡ್‍ಪ. ಅಯಿಂಗ ಅಂವೊನ ಕೊಲ್ಲ್‌ವಕ್ ಕಂಡನೆ ಮಾಡಿತ್ ಪರದೇಶಿಯಂಗಡ ಕೈಕ್ ಒಪ್ಪ್‌ಚಿಡುವ, 34 ಅಯಿಂಗ ನಾನಾತರ ಬೈಗಳ ಬೈಯುವ, ಚಾಟಿಲ್ ಪೊಯ್ಯುವ, ಮೂಡ್‍ಕ್ ತುಪ್ಪ್‌ವ ಪಿಂಞ ಕೊಲ್ಲುವ; ಆಚೇಂಗಿ ಮೂಂದ್ ದಿನ ಆನ ಪಿಂಞ ನಾನ್ ಚಾವ್‍ಯಿಂಜ ಜೀವವಾಯಿತ್ ಏವೀಂದ್ ಎಣ್ಣ್‌ಚಿ. ಯೋಹಾನ ಪಿಂಞ ಯಾಕೋಬಂಡ ಆಸೆ ( ಮತ್ತಾಯ 20.20–28 ) 35 ಅಲ್ಲಿಂಜ ಜೆಬೆದಾಯಂಡ ಕ್‌ಣ್ಣ ಮಕ್ಕ ಯಾಕೋಬ ಪಿಂಞ ಯೋಹಾನ ಯೇಸುರ ಪಕ್ಕ ಬಂತ್ ಉಪಾದ್ಯನೇ, ನಂಗಕ್ ಒರ್ ನಲ್ಲ ಕಾರ್ಯ ನೀನ್ ಮಾಡಂಡೂಂದ್ ಕ್‍ೕಟತ್. 36 ಅಂವೊ ಅಯಿಂಗಳ ನೋಟಿತ್: ಎಂತ ಕಾರ್ಯ ಎಣ್ಣೀಂದ್ ಕ್‍ೕಟತ್. 37 ಅದ್ಂಗ್ ಅಯಿಂಗ: ನೀನ್ ನೀಡ ಮಹಿಮೇರ ರಾಜ್ಯತ್‍ರ ಸಿಂಹಾಸನತ್‍ಲ್ ಅಳ್‌ಪಕ, ಒಬ್ಬನ ನೀಡ ಬಲ್‌ತೆ ಬರಿಲ್ ಇಂಞೊಬ್ಬನ ನೀಡ ಎಡ್‍ತೆ ಬರಿಲ್ ಅಳ್‍ಪನೆಕೆ ಮಾಡ್‍ೕಂದ್ ಎಣ್ಣ್‌ಚಿ. 38 ಯೇಸು ಅಯಿಂಗಳ ನೋಟಿತ್: ನಿಂಗ ಎಂತ ಕ್‍ೕಟಂಡುಳ್ಳೀರಾಂದ್ ನಿಂಗಕೇ ಗೊತ್ತ್‌ಲ್ಲೆ. ನಾನ್ ಕುಡಿಪ ಈ ಪಾತ್ರತ್‍ಲ್ ನಿಂಗ ಕುಡಿಪಕಯ್ಯುವಾ? ನಾನ್ ಎಡ್‌ಪ ಈ ದೀಕ್ಷಾಸ್ನಾನ ನಿಂಗ ಎಡ್‌ಪಕಯ್ಯುವಾಂದ್ ಕ್‍ೕಟತ್. 39 ಅಕ್ಕು ನಂಗಕ್ ಕಯ್ಯೂಂದ್ ಜವಾಬ್ ಕೊಡ್‍ತತ್. ಅದ್ಂಗ್ ಯೇಸು: ನಾನ್ ಕುಡಿಪ ಈ ಪಾತ್ರತ್‍ಲ್ ನಿಂಗ ಕುಡಿಪಿರ, ನಾನ್ ಎಡ್‌ಪ ಈ ದೀಕ್ಷಾಸ್ನಾನ ನಿಂಗ ಎಡ್‌ಪಿರ. 40 ಆಚೇಂಗಿ ದಾರ್ ನಾಡ ಬಲ್‌ತೆ ಬರಿಲ್ ಪಿಂಞ ಎಡ್‍ತೆ ಬರಿಲ್ ಅಳ್‌ಪಾಂದ್ ಎಣ್ಣ್‌ವಕ್ ನಾಕ್ ಹಕ್ಕ್ ಇಲ್ಲೆ. ದಾರ್ ಎಲ್ಲಿ ಅಳ್‌ಪಾಂದ್ ದೇವ ತಯಾರ್ ಮಾಡಿತುಂಡೋ ಅಯಿಂಗಕ್ ದೇವನೇ ಅದ್‍ನ ಕೊಡ್‍ಪ. 41 ಬಾಕಿ ಪತ್ತ್ ಶಿಷ್ಯಂಗಕ್ ಇದ್‍ನ ಕ್‍ೕಟದು ಯಾಕೋಬ ಪಿಂಞ ಯೋಹಾನಂಡ ಮೇಲೆ ಚೆಡಿ ಬಾತ್. 42 ಯೇಸು ಅಯಿಂಗಳೆಲ್ಲ ತಾಂಡ ಪಕ್ಕ ಕಾಕುವಂಜಿ, ಈ ಲೋಕತ್‍ನ ಆಳುವಯಿಂಗ ಅಯಿಂಗಯಿಂಗಡ ಜನಡಮೇಲೆ ಬಲತ್ಕಾರತ್‌ಲ್ ಅದಿಕಾರ ಮಾಡಿಯಂಡುಂಡ್, ಅಯಿಂಗಡ ಅದಿಕಾರಿಯಂಗ ಅಯಿಂಗಡ ಮೇಲೆ ಬಲತ್ಕಾರತ್‌ಲ್ ಅದಿಕಾರ ಮಾಡ್‍ವದ್ ನಿಂಗಕ್ ಗೊತ್ತುಂಡ್. 43 ನಿಂಗಡ ಒಳ್‍ಲ್ ಅನ್ನನೆ ಇಪ್ಪಕ್ಕಾಗ. ನಿಂಗಡಲ್ಲಿ ದಾರ್‌ಕ್ ಬಲ್ಯಂವೊನಾಯಿತ್ ಇಪ್ಪಕ್ ಕುಶಿಯುಂಡೋ ಅಂವೊ ಎಲ್ಲಾರ್‌ಕು ಅಡಿಯಾಳಾಯಿತ್ ಸೇವೆ ಮಾಡ್‌ವನೆಕೆ ಇಕ್ಕಂಡು. 44 ಪಿಂಞ ನಿಂಗಡಲ್ಲಿ ದಾರ್‌ಕ್ ಮಿಂಞತ್ ಇಪ್ಪಕ್ ಕುಶಿ ಉಂಡೋ, ಅಯಿಂಗ ಎಲ್ಲಾರ್‌ಕು ಅಡಿಯಾಳಾಯಿತ್ ಇಕ್ಕಂಡು. 45 ಅನ್ನನೆ, ಮನುಷ್ಯಕುಮಾರ ಸಹ ಬೋರೆಯಿಂಗಡಿಂಜ ಸೇವೆ ಮಾಡ್‌ಚಿಟ್ಟ್‌ವಕಾಯಿತ್ ಬಂದಿತ್‌ಲ್ಲೆ. ಆಚೇಂಗಿ ಸೇವೆ ಮಾಡ್‌ವಕಾಯಿತು, ದುಂಬ ಜನಳ ಬುಡ್‍ಗಡೆ ಮಾಡ್‌ವಕ್ ತಾಂಡ ಜೀವತ್‍ನ ಕೊಡ್‍ಪಕಾಯಿತು ಬಾತ್ೕದ್ ಎಣ್ಣ್‌ಚಿ. ಯೇಸು ಬಾರ್ತಿಮಾಯ ಎಣ್ಣ್‌ವ ಒಬ್ಬ ಕುರ್‌ಡಂಗ್ ದೃಷ್ಟಿ ಕೊಡ್‌ತದ್ ( ಮತ್ತಾಯ 20.29–34 ; ಲೂಕ 18.35–43 ) 46 ಪಿಂಞ ಅಯಿಂಗ ಎರಿಕೋ ಪಟ್ಟಣಕ್ ಬಾತ್. ಅಂವೊ ಅಂವೊಂಡ ಶಿಷ್ಯಂಗ ಪಿಂಞ ಬಲ್ಯ ಗುಂಪ್ ಜನ ಎರಿಕೋನ ಬುಟ್ಟಿತ್ ಪೊರಡ್‍ವಕ, ತಿಮಾಯ ಎಣ್ಣುವವಡ ಮೋಂವೊನಾಯಿತ್ಂಜ ಕುರ್‌ಡನಾನ ಬಾರ್ತಿಮಾಯ ಬಟ್ಟೇರ ಬರಿಲ್ ಅಳ್‌ತಂಡ್ ಬೋಡಿಯಂಡಿಂಜತ್. 47 ನಜರೇತ್‍ರ ಯೇಸು ಬಂದಂಡುಂಡ್‍ೕಂದ್ ಗೊತ್ತಾನಗುಂಡ್, ದಾವೀದಂಡ ಮೋಂವೊನೇ ನಾಡ ಮೇಲೆ ಕನಿಕರ ಕಾಟ್ ಎಣ್ಣಿಯಂಡ್ ಕೂತ್ ಕೊಡ್‍ತತ್. 48 ಅಲ್ಲಿ ಉಳ್ಳ ಜನ ಎಲ್ಲಾ ಅಂವೊಂಗ್ ಮುಂಡತೆ ಇರ್‍ೕಂದ್ ಜೋರ್ ಮಾಡಿತ್ ಬಜ್ಜತ್. ಆಚೇಂಗಿ ಅಂವೊ ಇಂಞು ಜೋರಾಯಿತ್ ದಾವೀದಂಡ ಮೋಂವೊನೇ, ನಾಡ ಮೇಲೆ ದಯಕಾಟ್‍ೕಂದ್ ಕೂತ್ ಕೊಡ್‍ಪಕ್ ಸರುಮಾಡ್‌ಚಿ. 49 ಆ ಕುರ್‌ಡ ಕೂತ್ ಕೊಡ್‌ಪಾನ ಕ್‍ೕಟಿತ್, ಯೇಸು ಅಲ್ಲೇ ನಿಂದಿತ್: ಅಂವೊನ ಕಾಕ್ ಎಣ್ಣಿಯಂಡ್ ಎಣ್ಣ್‌ಚಿ. ಅಕ್ಕ ಶಿಷ್ಯಂಗ: ನಿನ್ನ ಯೇಸು ಕಾಕಿಯಂಡುಂಡ್ ಕುಶಿ ಪಡ್‍ೕಂದ್ ಅಂವೊಂಗ್ ಎಣ್ಣ್‌ಚಿ. 50 ಕುರ್‌ಡ ಕುಶಿ ತಡ್‌ಪಕಯ್ಯತೆ ಅಂವೊಂಡ ಕೋಟ್‍ನ ಉತ್ತಿತ್ ಕನಿಪಂಜಿ, ಪಾರಿತ್ ಯೇಸುರ ಪಕ್ಕ ಬಾತ್. 51 ಯೇಸು ಅಂವೊನ ನೋಟಿತ್: ನಾನ್ ನೀಕ್ ಎಂತ ಮಾಡಂಡೂಂದ್ ಕ್‍ೕಟತ್? ಅದ್ಂಗ್ ಅಂವೊ: ನಲ್ಲ ಉಪಾದ್ಯನೇ ನಾಕ್ ಕಣ್ಣ್ ಕಾಂಬನೆಕೆ ಮಾಡ್‍ೕಂದ್ ಎಣ್ಣ್‌ಚಿ. 52 ಅಕ್ಕ ಯೇಸು: ನೀನ್ ಇಲ್ಲಿಂಜ ಪೋ ನಾಡ ಮೇಲೆ ಉಳ್ಳ ನೀಡ ನಂಬಿಕೆ ನಿನ್ನ ಚಾಯಿ ಮಾಡ್‍ಚಿ. ಅಚ್ಚಕ್ ಬೆರಿಯ ಅಂವೊಂಡ ಕಣ್ಣ್ ಕಾಂಬನೆಕೆ ಆಚಿ, ಅಂವೊ ಯೇಸುರ ಕೂಡೆ ಬಟ್ಟೇಲ್ ಪೋಚಿ. |
© 2017, New Life Literature (NLL)