ಮತ್ತಾಯ 26 - ಕೊಡವ ಬೈಬಲ್ಯೇಸುನ ಕೊಲ್ಲುವಕ್ ಆಲೋಚನೆ ( ಮಾರ್ಕ 14.1 , 2 ; ಲೂಕ 22.1 , 2 ; ಯೋಹಾನ 11.45–53 ) 1 ಇದೆಲ್ಲಾ ಎಣ್ಣಿತಾನ ಪಿಂಞ, ಯೇಸು ತಾಂಡ ಶಿಷ್ಯಂಗಕ್: 2 ಇಂಞು ದಂಡ್ ದಿನ ಆನ ಪಿಂಞ ಪಸ್ಕ ನಮ್ಮೆ ಬಪ್ಪಕುಳ್ಳದ್ ನಿಂಗಕ್ ಗೊತ್ತುಂಡ್. ಅಕ್ಕ ಮನುಷ್ಯಕುಮಾರನ ಶಿಲುಬೇಕ್ ಇಡ್‌ವಕ್ ನಿಂಗಡಲ್ಲಿ ಒಬ್ಬ ನನ್ನ ಒಪ್ಪ್‌ಚಿಡುವ. 3 ಅದೇ ಸಮಯತ್‍ಲ್ ಮುಕ್ಯ ಯಾಜಕಂಗಳು, ಜನಡ ಪೆರಿಯಯಿಂಗಳು ಕಾಯಫ ಎಣ್ಣುವ ಮಹಾ ಯಾಜಕಂಡ ಅರಮನೇಲ್ 4 ಯೇಸುನ ಎನ್ನನಾಚೇಂಗಿಯು ಪುಡ್‌ಚಿತ್ ಕೊಲ್ಲ್‌ವಕ್ ಆಲೋಚನೆ ಮಾಡ್‍ಚಿ. 5 ಆಚೇಂಗಿಯು ಈ ನಮ್ಮೆರ ದಿವಸತ್‍ಲ್ ಮಾಡ್‌ವಕ್ಕಾಗ, ಎನ್ನಂಗೆಣ್ಣ್‌ಚೇಂಗಿ, ನಮ್ಮೆರ ದಿವಸತ್‍ಲ್ ಮಾಡ್‍ಚೇಂಗಿ, ಜನ ನಂಗಡ ಮೇಲೆ ದಂಗೆ ಏವಾಂದ್ ಅಯಿಂಗ ತೀರ್ಮಾನ ಎಡ್‍ತತ್. ಬೇಥಾನ್ಯತ್‍ಲ್ ಯೇಸು ( ಮಾರ್ಕ 14.3–9 ; ಯೋಹಾನ 12.1–8 ) 6 ಆ ಸಮಯತ್‍ಲ್ ಯೇಸು ಬೇಥಾನ್ಯತ್‍ಲ್ ಕುಷ್ಟರೋಗಿಯಾಯಿತ್ಂಜ ಸೀಮೋನಂಡ ಮನೆಲ್ ಇಂಜತ್. 7 ಅಲ್ಲಿ ಅಂವೊ ಉಂಡಂಡ್ ಇಪ್ಪಕ ಒರ್ ಪೊಣ್ಣಾಳ್ ದುಂಬ ಬೆಲೆಯುಳ್ಳ ಸುಗಂದ ತೈಲತ್‌ನ ಅಲಬಸ್ಟರ್ ಎಣ್ಣುವ ಕುಪ್ಪಿಲ್ ಕೊಂಡ್ ಬಂದಿತ್ ಯೇಸುರ ಮಂಡೆರ ಮೇಲೆ ಬೂಕ್‍ಚಿ. 8 ಯೇಸುರ ಶಿಷ್ಯಂಗಕ್ ಚೆಡಿ ಬಾತ್, ಎನ್ನಂಗ್ ಇವ ಇನ್ನನೆ ಪಾಳ್ ಮಾಡ್‍ಚಿ. 9 ಇದ್‍ನ ಜಾಸ್ತಿ ಬೆಲೇಕ್ ಮಾರಿತ್, ಆ ದುಡ್ಡ್‌ನ ಗರೀಬಂಗಕ್ ಕೊಡ್‍ಪಕಿಂಜತಲ್ಲಾಂದ್ ಎಣ್ಣ್‌ಚಿ. 10 ಯೇಸುಕ್ ಇದ್ ಗೊತ್ತಾಯಿತ್, ಅಯಿಂಗಳ ನೋಟಿತ್: ನಿಂಗ ಎನ್ನಂಗ್ ಆ ಪೊಣ್ಣಾಳ್‍ನ ತೊಂದರೆ ಮಾಡ್‌ವಿರ, ಅವ ನಾಕ್ ನಲ್ಲ ಕಾರ್ಯತ್‍ನ ಮಾಡಿತುಂಡ್. 11 ಗರೀಬಂಗ ಎಕ್ಕಾಲು ನಿಂಗಡ ಕೂಡೆ ಇಪ್ಪ. ಆಚೇಂಗಿ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪುಲೆ. 12 ಇವ ಈ ಸುಗಂದ ತೈಲತ್‌ನ ಬೂಕಿತ್ ನಾಡ ತಡೀನ ಪೂಪಂಗ್ ತಯಾರ್ ಮಾಡಿತುಂಡ್. 13 ಬೂಲೋಕತ್‍ಲ್ ಎಲ್ಲೆಲ್ಲಾ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಅಲ್ಲಿ ಎಲ್ಲಾ ಇವ ಮಾಡ್‌ನದು ಇವಡ ನೆನಪ್‍ಲ್ ಎಣ್ಣುವಾಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ. ಯೂದ ಯೇಸುನ ಕಾಟಿ ಕೊಡ್‍ಪಕ್ ಒತ್ತಂಡದ್ ( ಮಾರ್ಕ 14.10 , 11 ; ಲೂಕ 22.3–6 ) 14 ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಒಬ್ಬನಾನ ಇಸ್ಕರಿಯೋತ ಯೂದ ಎಣ್ಣ್‌ವಂವೊ ಮುಕ್ಯ ಯಾಜಕಂಗಡ ಪಕ್ಕ ಪೋಯಿತ್, 15 ನಾನ್ ಯೇಸುನ ಕಾಟಿ ಕೊಡ್‍ತಕ ನಿಂಗ ನಾಕ್ ಎಂತ ತಪ್ಪಿರಾಂದ್ ಕ್‍ೕಟತ್? ಅಯಿಂಗ ನುಪ್ಪದ್ ಬೊಳ್ಳಿರ ನಾಣ್ಯತ್‍ನ ಕೊಡ್‍ತತ್ 16 ಆ ಸಮಯತ್ಂಜ, ಅಂವೊ ಯೇಸುನ ಕಾಟಿ ಕೊಡ್‍ಪಕ್ ಸಂದರ್ಪ ನೋಟಿಯಂಡ್ ಇಂಜತ್. ಒಡೆಯಂಡ ಕಡೆ ಗದ್ದಾಳ ( ಮಾರ್ಕ 14.12–21 ; ಲೂಕ 22.7–13 , 21–23 ; ಯೋಹಾನ 13.21–30 ) 17 ಪುಳಿಯಿಲ್ಲತ ಒಟ್ಟಿ ತಿಂಬ ನಮ್ಮೆರ ಆದ್ಯ ದಿವಸತ್‍ಲ್ ಯೇಸುರ ಶಿಷ್ಯಂಗ ಅಂವೊಂಡ ಪಕ್ಕ ಬಂದಿತ್: ನಿಂಗ ಪಸ್ಕ ತಿಂಬಕ್ ನಂಗ ಎಲ್ಲಿ ಪೋಯಿತ್ ತಯಾರ್ ಮಾಡನಾಂದ್ ಕ್‍ೕಟತ್. 18 ಅದ್ಂಗ್ ಯೇಸು: ನಿಂಗ, ಪಟ್ಟಣತ್‍ಲ್ ಒರ್ ಮನುಷ್ಯಂಡ ಪಕ್ಕ ಪೋಯಿತ್, ಉಪಾದ್ಯ ಎಣ್ಣ್‌ಚಿ, ನಾಡ ಸಮಯ ಪಕ್ಕ ಉಂಡ್, ನಾನು ನಾಡ ಶಿಷ್ಯಂಗಳು ನೀಡ ಮನೆಲ್ ನಮ್ಮೆ ಮಾಡ್‌ವಾಂದ್ ಎಣ್ಣೀಂದ್ ಎಣ್ಣ್‌ಚಿ. 19 ಶಿಷ್ಯಂಗ ಅಂವೊ ಎಣ್ಣ್‌ನನೆಕೆ ಪಸ್ಕ ನಮ್ಮೆರ ಅಡಿಗೆನ ತಯಾರ್ ಮಾಡ್‍ಚಿ. 20 ಬಯಿಟಾಪಕ ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಡ ಕೂಡೆ ಉಂಬಕ್ ಅಳ್‌ತತ್. 21 ಅಕ್ಕ ಅಯಿಂಗೆಲ್ಲಾರು ಅಳ್‌ತಿತ್ ಉಂಬಕಾಪಕ ಯೇಸು: ನಿಂಗಡ ಕೂಟ್‌ಲ್ ಒಬ್ಬ ನನ್ನ ಪುಡ್‌ಚಿತ್ ಕೊಡ್‍ಪಾಂದ್ ನೇರಾಯಿತು ನಾನ್ ಎಣ್ಣ್‌ವೀಂದ್ ಎಣ್ಣ್‌ಚಿ. 22 ಶಿಷ್ಯಂಗಕ್ ದುಂಬ ಬೇಜಾರಾಯಿತ್ ಒಬ್ಬೊಬ್ಬನು, ನಾನಾ, ನಾನಾಂದ್ ಯೇಸುನ ಕ್‍ೕಟತ್. 23 ಅದ್ಂಗ್ ಯೇಸು: ನಾಡ ಕೂಡೆ ಈ ಪಾತ್ರತ್‍ಲ್ ಕೈ ಮುಳ್‍ಕುವಂವೊನೇ ನನ್ನ ಪುಡ್‍ಚಿ ಕೊಡ್‍ಪಾಂದ್ ಎಣ್ಣ್‌ಚಿ. 24 ದೇವಡ ವಾಕ್ಯತ್‍ಲ್ ಒಳ್‌ದ್‌ನನೆಕೆ ಮನುಷ್ಯಕುಮಾರ ಚಾವ. ಆಚೇಂಗಿ ಮನುಷ್ಯಕುಮಾರನ, ಏದ್ ಮನುಷ್ಯ ಪುಡ್‍ಚಿ ಕೊಡ್‍ಪ ಅಂವೊಂಗ್ ಅಯ್ಯೋ! ಆ ಮನುಷ್ಯ ಪುಟ್ಟತೆ ಇಂಜತೇಂಗಿ ಅಂವೊಂಗ್ ನಲ್ಲದಾಯಿತ್ಂಜತ್‍ೕಂದ್ ಎಣ್ಣ್‌ಚಿ. 25 ಕಾಟಿ ಕೊಡ್‍ಪಕುಳ್ಳ ಯೂದನು ಯೇಸುನ ನೋಟಿತ್, ಉಪಾದ್ಯನೇ, ನಾನಾಂದ್ ಕ್‍ೕಟತ್. ಅದ್ಂಗ್, ನೀನೇ ಎಣ್ಣಿತುಳ್ಳಿಯಾಂದ್ ಯೇಸು ಎಣ್ಣ್‌ಚಿ. ಒಡೆಯಂಡ ಗದ್ದಾಳ ( ಮಾರ್ಕ 14.22–26 ; ಲೂಕ 22.14–20 ; 1 ಕೊರಿಂಥ 11.23–25 ) 26 ಅಯಿಂಗೆಲ್ಲಾರು ಉಂಬಕಾಪಕ, ಯೇಸು ಒಟ್ಟಿನ ಎಡ್‌ಪಂಜಿ, ದೇವನ ತುದಿಚಿತ್, ಪೊಳಿಪಂಜಿ ಶಿಷ್ಯಂಗಕ್ ಕೊಡ್‌ತಿತ್: ಇದ್‍ನ ಎಡ್‌ತ್‌ ತಿನ್ನಿ, ಇದ್ ನಾಡ ತಡೀಂದ್ ಎಣ್ಣ್‌ಚಿ. 27 ಅಲ್ಲಿಂಜ ಅಂವೊ ದ್ರಾಕ್ಷಿರಸ ಉಳ್ಳ ಪಾತ್ರತ್‍ನ ಎಡ್‌ಪಂಜಿ ದೇವನ ತುದಿಚಿತ್ ಅಯಿಂಗಕ್ ಕೊಡ್‌ತಿತ್: ನಿಂಗೆಲ್ಲಾರು ಇದ್‍ಯಿಂಜ ಕುಡಿಯಿರಿ, 28 ಇದ್, ಪಾಪಕ್ ಮನ್ನಿಪ್ ಕ್‍ಟ್ಟ್‌ವಕ್, ದುಂಬ ಜನಕಾಯಿತ್ ಬೂಕ್‌ವ ಪುದಿಯ ಒಪ್ಪಂದತ್‍ರ ನಾಡ ಚೋರೆಯಾಯಿತುಂಡ್. 29 ನಾನ್ ಪರಲೋಕ ರಾಜ್ಯತ್‍ಲ್ ನಿಂಗಡ ಕೂಡೆ ಪುದಿಯ ದ್ರಾಕ್ಷಿರಸತ್‍ನ ಕುಡಿಪಕತ್ತನೆ ಇಂಞು ಮಿಂಞಕ್ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ. 30 ಪಿಂಞ ಅಯಿಂಗ ದೇವಡ ಪಾಟ್ ಪಾಡಿಯಂಡೇ ಆಲಿವ್ ಎಣ್ಣುವ ಕುಂದ್‌ಕ್ ಪೋಚಿ. ಪೇತ್ರ ತಕ್ಕ್ ಕೊಡ್‍ಪದ್ ( ಮಾರ್ಕ 14.27–31 ; ಲೂಕ 22.31–34 ; ಯೋಹಾನ 13.36–38 ) 31 ಅಕ್ಕ ಯೇಸು ಅಯಿಂಗಳ ನೋಟಿತ್: ಇಂದ್ ಬಯಿಟ್ ನನ್ನಗುಂಡ್ ನಿಂಗ ಓಡಿ ಪೋಪಿರ; ಎನ್ನಂಗೆಣ್ಣ್‌ಚೇಂಗಿ, ನಾನ್ ಕೊರಿ ಕಾಪಂವೊನ ಕೊಲ್ಲುವಿ, ಕೊರಿಯಳು ಚದ್‌ರಿ ಪೋಪಾಂದ್ ದೇವಡ ವಾಕ್ಯ ಎಣ್ಣುವ. 32 ಆಚೇಂಗಿಯು, ನಾನ್ ಚತ್ತಿತ್, ಚಾವ್‍ಯಿಂಜ ಎದ್ದಿತ್ ಬಂದ ಪಿಂಞ, ನಿಂಗಕ್ ಮಿಂಞ ಗಲಿಲಾಯಕ್ ಪೋಪೀಂದ್ ಎಣ್ಣ್‌ಚಿ. 33 ಅದ್ಂಗ್ ಪೇತ್ರ, ಎಲ್ಲಾರು ನಿನ್ನ ಬುಟ್ಟಿತ್ ಪೋಚೇಂಗಿಯು ನಾನ್ ನಿನ್ನ ಬುಟ್ಟಿತ್ ಪೋಪುಲೇಂದ್ ಎಣ್ಣ್‌ಚಿ. 34 ಯೇಸು ಅಂವೊನ ನೋಟ್‌ವಂಜಿ, ಇಂದ್ ಬಯಿಟ್ ಮಲ್ಲಂಗೋಳಿ ಕೂವಾಂಗ್ ಮಿಂಞ, ನೀನ್ ನನ್ನ ಗೊತ್ತ್‌ಲೇಂದ್ ಮೂಂದ್ ಕುರಿ ಎಣ್ಣುವಿಯಾಂದ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ. 35 ಅದ್ಂಗ್ ಪೇತ್ರ: ನಾನ್ ನೀಡ ಕೂಡೆ ಚತ್ತ್ ಪೋಂಡೂಂದ್ ಇಂಜತೇಂಗಿಯು, ನಾನ್ ಅನ್ನನೆ ಎಣ್ಣುಲೇಂದ್ ಎಣ್ಣ್‌ಚಿ. ಅನ್ನನೆ ಎಲ್ಲಾ ಶಿಷ್ಯಂಗಳು ಅಂವೊ ಎಣ್ಣ್‌ನನೆಕೆ ಎಣ್ಣ್‌ಚಿ. ಯೇಸುರ ಗೆತ್ಸೇಮನೆ ಪ್ರಾರ್ಥನೆ ( ಮಾರ್ಕ 14.32–42 ; ಲೂಕ 22.39–46 ) 36 ಪಿಂಞ ಯೇಸು ಅಂವೊಂಡ ಶಿಷ್ಯಂಗಡ ಕೂಡೆ ಗೆತ್ಸೇಮನೆ ಎಣ್ಣುವ ಜಾಗಕ್ ಪೋಯಿತ್, ನಾನ್ ಅಲ್ಲಿ ಪೋಯಿತ್ ಪ್ರಾರ್ಥನೆ ಮಾಡ್‌ವಕ, ನಿಂಗ ಇಲ್ಲಿ ಅಳ್‌ತಂಡ್ ಇರೀಂದ್ ಎಣ್ಣ್‌ಚಿ. 37 ಯೇಸು, ಅಂವೊಂಡ ಕೂಡೆ ಪೇತ್ರನ ಪಿಂಞ ಜೆಬೆದಾಯಂಡ ದಂಡ್ ಕ್‌ಣ್ಣ ಮಕ್ಕಳ ಕಾಕಿಯಂಡ್ ಪೋಚಿ. ಅಂವೊಂಗ್ ದುಂಬ ದುಃಖ ಆಯಿತ್, ಮನಸ್ಸ್‌ಕ್ ದುಂಬ ಬೇಜಾರಾಚಿ. 38 ಯೇಸು ಅಯಿಂಗಕ್: ನಾನ್ ಚಾವ್‍ರ ನೊಂಬಲತ್‍ರಚ್ಚಕ್ ನಾಡ ಆತ್ಮ ದುಃಖಪಟ್ಟಂಡುಂಡ್. ನಿಂಗ ಇಲ್ಲೇ ಇಂಜಿತ್ ವರಿಯತೆ ಎಚ್ಚರವಾಯಿತಿರೀಂದ್ ಎಣ್ಣಿತ್, 39 ಚೆನ್ನ ದೂರ ಪೋಪಂಜಿ, ಅಂವೊಂಡ ಮೂಡ್‍ನ ಅಡಿಕ್ ಮಾಡಿತ್ ಮೊಣಕಾಲ್ ಇಟ್ಟಂಡ್: ಓ ನಾಡ ಅಪ್ಪನೇ, ನೀಕ್ ಕಯ್ಯುವೇಂಗಿ ಈ ಕಷ್ಟತ್‍ರ ಪಾತ್ರ ನನ್ನ ಬುಟ್ಟಿತ್ ಪೋಪಕ್ ಮಾಡ್; ಆಚೇಂಗಿಯು ನಾಡ ಚಿತ್ತ ಅಲ್ಲ, ನೀಡ ಚಿತ್ತವೇ ಆಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ. 40 ಅಲ್ಲಿಂಜ ಅಂವೊ ಶಿಷ್ಯಂಗಡ ಪಕ್ಕ ಬಾತ್. ಅಯಿಂಗ ವರಿಯಂಡಿಂಜಾನ ಕಂಡಿತ್ ಪೇತ್ರಂಗ್: ನಾಕಾಯಿತ್ ಒರ್ ಗಂಟೆ ವರಿಯತೆ ಇಪ್ಪಕ್ ಕಯ್ಯುಲೆಯಾಂದ್ ಎಣ್ಣ್‌ಚಿ. 41 ನಿಂಗ ಪರಿಕ್ಷೇಕ್ ಒಳಪಡತನೆಕೆ ಎಚ್ಚರ ಎಡ್‍ತಂಡ್ ಪ್ರಾರ್ಥನೆ ಮಾಡಿ; ಆತ್ಮಕ್ ಕುಶಿ ಉಂಡ್ ಆಚೇಂಗಿ ತಡಿ ತಳ್ಂದಿತ್ ಉಂಡ್‍ೕಂದ್ ಯೇಸು ಎಣ್ಣ್‌ಚಿ. 42 ಇಂಞೊಮ್ಮ ದಂಡನೆ ಕುರಿ ಅಂವೊ ಅಯಿಂಗಳ ಬುಟ್ಟಿತ್ ಪೋಯಿತ್: ನಾಡ ಅಪ್ಪನೇ! ಈ ಕಷ್ಟತ್‍ರ ಪಾತ್ರತ್‍ನ ನಾನ್ ಕುಡಿಚತೇಂಗಿ ಮಾತ್ರ, ಈ ಕಷ್ಟತ್‍ನ ನನ್ನಿಂಜ ಎಡ್‍ಪಕ್ ಕಯ್ಯೂಂದ್ ಇಂಜತೇಂಗಿ, ನೀಡ ಚಿತ್ತತ್‍ರನೆಕೆ ಆಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ. 43 ಅಂವೊ ಬಯ್ಯ ಬಂತ್ ನೋಟುವಕ, ಅಯಿಂಗ ಪುನಃ ವರಿಯಂಡಿಂಜಾನ ಕಂಡತ್. ಅಯಿಂಗಕ್ ಕಣ್ಣ್ ತೊರ್‌ಪಕ್ ಕಯ್ಯತಚ್ಚಕ್ ವರ್‌ಕ್ ಇಂಜತ್. 44 ಅಂವೊ ಪುನಃ ಅಯಿಂಗಳ ಬುಟ್ಟಿತ್ ಪೋಯಿತ್, ಮೂಂದನೆ ಕುರಿ ಅದೇ ತಕ್ಕ್ ಎಣ್ಣಿತ್ ಪ್ರಾರ್ಥನೆ ಮಾಡ್‍ಚಿ. 45 ಅಂವೊ ತಾಂಡ ಶಿಷ್ಯಂಗಡ ಪಕ್ಕ ಬಯ್ಯಕ್ ಬಂದಿತ್: ಇಂಞು ನಿಂಗ ವರಿಯಂಡ್, ಆರಾಮಾಯಿತ್ ಉಳ್ಳಿರ? ಅದಾ ನೋಟಿ! ಮನುಷ್ಯಕುಮಾರನ, ಪಾಪಿಯಂಗಡ ಕೈಕ್ ಒಪ್ಪ್‌ಚಿಡ್‌ವ ನೇರ ಬಂದ್‌ರ್‌ತ್. 46 ಏಳೀ, ನಂಗ ಪೋಕ, ನೋಟಿ ನನ್ನ ಪುಡ್‌ಚಿತ್ ಕೊಡ್‍ಪಂವೊ ಇಕ್ಕಲೆ ಬಾತ್‍ೕಂದ್ ಎಣ್ಣ್‌ಚಿ. ಯೇಸುನ ಪುಡಿಪದ್ ( ಮಾರ್ಕ 14.43–50 ; ಲೂಕ 22.47–53 ; ಯೋಹಾನ 18.3–12 ) 47 ಯೇಸು ಇದ್‍ನ ಎಣ್ಣಿಯಂಡಿಪ್ಪಕಲೇ, ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಒಬ್ಬನಾನ ಯೂದ ಬಾತ್. ಅಂವೊಂಡ ಕೂಡೆ ಮುಕ್ಯ ಯಾಜಕಂಗ ಪಿಂಞ ಜನಡ ಪೆರಿಯಯಿಂಗ ಅಯಿಚ ಬಲ್ಯ ಜನಡ ಗುಂಪ್ ಕತ್ತಿ ದೊಣ್ಣೆನೆಲ್ಲ ಎಡ್‍ತಂಡ್ ಬಂದಿತ್ಂಜತ್. 48 ಯೇಸುನ ಪುಡ್‌ಚಿತ್ ಕೊಡ್‍ಪಂವೊ: ನಾನ್ ದಾರ್‌ಕ್ ಮುತ್ತ್ ಕೊಡ್‍ಪಿ, ಅಂವೊನೇಂದ್ ಆ ಜನಡ ಗುಂಪ್‌ಕ್ ಸನ್ನೆ ಕೊಡ್‌ತಿತ್ಂಜತ್. 49 ಉಪಾದ್ಯನೇ, ಯೂದ ಯೇಸುರ ಪಕ್ಕ ಬಂದಿತ್, ಉಪಾದ್ಯನೇ ನೀಕ್ ವಂದನೇಂದ್ ಎಣ್ಣಿತ್ ಅಂವೊಂಗ್ ಮುತ್ತ್ ಕೊಡ್‍ತತ್. 50 ಅದ್ಂಗ್ ಯೇಸು: ನಾಡ ಕೂಟ್‌ಕಾರನೇ, ನೀನ್ ಎನ್ನಂಗ್ ಬಂದಿತುಳ್ಳಿಯಾಂದ್ ಕ್‍ೕಟತ್. ಅಕ್ಕ ಅಯಿಂಗ ಬಂತ್ ಯೇಸುನ ಬಂದನೆ ಮಾಡ್‍ಚಿ. 51 ಅಕ್ಕ ಯೇಸುರ ಕೂಟ್‌ಲ್ ಉಳ್ಳ ಒಬ್ಬ ಕತ್ತಿ ಎಡ್‌ಪಂಜಿ ಮಹಾ ಯಜಕಂಡ ಆಳ್‍ರ ಕೆಮಿನ ಕೆತ್ತಿರ್‌ತ್. 52 ಅಕ್ಕ ಯೇಸು ಅಂವೊಂಗ್: ನೀಡ ಕತ್ತಿನ ಅದ್ಂಡ ಕೊತ್ತೆಲ್ ಇಡ್. ಎನ್ನಂಗೆಣ್ಣ್‌ಚೇಂಗಿ ಕತ್ತಿನ ಎಡ್‍ಪಯಿಂಗ ಕತ್ತಿಯಿಂಜಲೇ ಚಾವಾಂದ್ ಎಣ್ಣ್‌ಚಿ. 53 ನಾನ್ ಇಕ್ಕ ನಾಡ ಅಪ್ಪಂಡ ಪಕ್ಕ ಬೋಡ್‍ಚೇಂಗಿ, ಅಂವೊ ಇಕ್ಕಲೆ ಪನ್ನೆರಂಡ್ ಗುಂಪ್‌ಕಿಂಜ ಜಾಸ್ತಿ ದೂತಂಗಳ ನಾಕ್ ಅಯಿಪಕಯ್ಯುಲೇಂದ್ ನೀನ್ ಗೇನ ಮಾಡ್‌ವಿಯಾ? 54 ಆಚೇಂಗಿ ನಾನ್ ಅನ್ನನೆ ಮಾಡ್‍ಚೇಂಗಿ, ಇನ್ನನೆಲ್ಲಾ ನಡ್‍ಕಂಡೂಂದ್ ಒಳ್‍ದಿತುಳ್ಳ ದೇವಡ ವಾಕ್ಯ ಎನ್ನನೆ ನೆರವೇರುವ? 55 ಅದೇ ಸಮಯತ್‍ಲ್ ಯೇಸು ಜನಡ ಗುಂಪ್‌ಕ್: ಕಳ್ಳನ ಪುಡಿಪಕ್ ಬಂದನೆಕೆ ಕತ್ತಿ ಪಿಂಞ ದೊಣ್ಣೆನೆಲ್ಲ ಎಡ್‌ತ ಬಂದಿತುಳ್ಳಿರಲ್ಲಾ? ನಾನ್ ದಿನಾಲು ನಿಂಗಡ ಕೂಡೆ ದೇವಾಲಯತ್‍ಲ್ ಬೋದನೆ ಮಾಡಿಯಂಡಿಂಜ್, ಅಕ್ಕ ನಿಂಗ ಪುಡ್‌ಚಿತ್‌ಲ್ಲೆ. 56 ಆಚೇಂಗಿಯು ಪ್ರವಾದಿಯಂಗ ಒಳ್‌ದಿತುಳ್ಳದೆಲ್ಲಾ ನೆರವೇರಿಚಿಡುವನೆಕೆ ಇದೆಲ್ಲ ಆಚೀಂದ್ ಯೇಸು ಎಣ್ಣ್‌ಚಿ. ಅಕ್ಕ ಅಂವೊಂಡ ಎಲ್ಲಾ ಶಿಷ್ಯಂಗ ಅಂವೊನ ಬುಟ್ಟಿತ್ ಓಡಿ ಪೋಯಿರ್‌ತ್. ಪೆರಿಯಯಿಂಗಡ ಸಬೆರ ಮಿಂಞತ್ ಯೇಸು ( ಮಾರ್ಕ 14.53–65 ; ಲೂಕ 22.54 , 55 ; 22.63–71 ; ಯೋಹಾನ 18.13 , 14 ; 18.19–24 ) 57 ಯೇಸುನ ಬಂದನೆ ಮಾಡ್‍ನ ಜನ ಮಹಾ ಯಾಜಕನಾನ ಕಾಯಫಂಡ ಪಕ್ಕ ಕೂಟಿಯಂಡ್ ಪೋಚಿ. ಅಲ್ಲಿ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು, ಪೆರಿಯಯಿಂಗಳು ಕೂಡಿತಿಂಜತ್. 58 ಆಚೇಂಗಿ ಪೇತ್ರ ಚೆನ್ನ ದೂರತ್ಂಜ ಯೇಸುರ ಬಯ್ಯಕ್ ಪೋಯಿತ್, ಮಹಾ ಯಾಜಕಂಡ ಅರಮನೆರ ಕಯ್ಯಾಲೆಕತ್ತನೆ ಬಂತ್, ಒಳ್‍ಕ್ ಪೋಯಿತ್, ಆಕೀರ್‌ಕ್, ಯೇಸುಕ್ ಎಂತ ಆಪಾಂದ್ ನೋಟ್‍ವಕ್ ಸಿಪಾಯಿಯಡ ಕೂಡೆ ಅಳ್‌ತತ್. 59 ಯೇಸುನ ಕೊಲ್ಲ್‌ವಕಾಯಿತ್ ಮುಕ್ಯ ಯಾಜಕಂಗಳು, ಯೆಹೂದ್ಯಂಗಡ ಆಲೋಚನೆ ಸಬೆರ ಜನಳು, ಅಂವೊಂಗ್ ವಿರೋದವಾಯಿತ್ ಪೊಟ್ಟ್ ಸಾಕ್ಷಿ ಎಣ್ಣ್‌ವಕ್ ಜನಳ ತೇಡಿಯಂಡಿಂಜತ್. 60 ದುಂಬ ಜನ ಯೇಸುಕ್ ವಿರೋದವಾಯಿತ್ ಪೊಟ್ಟ್ ಸಾಕ್ಷಿ ಎಣ್ಣ್‌ಚಿ, ಆಚೇಂಗಿ ಅಯಿಂಗ ಪರಿಯುವ ಪೊಟ್ಟ್ ಸಾಕ್ಷಿ ಸರಿ ಬಂತ್‌ಲೆ. ಕಡೇಕ್ ದಂಡ್ ಮನುಷ್ಯಂಗ ಮಿಂಞಕ್ ಬಂದಿತ್, 61 ಈ ದೇವಾಲಾಯತ್‌ನ ಪೊಳಿಪಕು, ಮೂಂದ್ ದಿವಸತ್‍ಲ್ ಇದ್‍ನ ಕೆಟ್ಟ್‌ವಕೂ ನಾಕ್ ಕಯ್ಯೂಂದ್ ಇಂವೊ ಎಣ್ಣ್‌ಚೀಂದ್ ಅಯಿಂಗ ಎಣ್ಣ್‌ಚಿ. 62 ಮಹಾ ಯಾಜಕ ಏವಂಜಿ, ಅಂವೊನ ನೋಟಿತ್: ಈಂಗ ನೀಕ್ ವಿರೋದವಾಯಿತ್ ಸಾಕ್ಷಿ ಎಣ್ಣ್‌ವಲ್ಲಾ? ಇದ್ಂಗ್ ನೀನ್ ಜವಾಬ್ ಕೊಡ್‍ಪ್‌ಲೆಯಾಂದ್ ಕ್‍ೕಟತ್. 63 ಆಚೇಂಗಿ ಯೇಸು ಒರ್ ತಕ್ಕು ಪರಿಯತೆ ಮುಂಡತೆ ಇಂಜತ್. ಪುನಃ ಮಹಾ ಯಾಜಕ ಯೇಸುಕ್: ನೀನ್ ದೇವಡ ಮೋಂವೊನಾನ ಕ್ರಿಸ್ತನಾಂದ್ ನಂಗಕ್ ಎಣ್ಣ್. ಇದ್‍ನ ಜೀವವಾಯಿತುಳ್ಳ ದೇವಡ ಪೆದತ್‍ಲ್ ಆಣೆ ಇಟ್ಟಿತ್ ನಾನ್ ಕ್‍ೕಟಂಡುಳ್ಳ್‌ಂದ್ ಎಣ್ಣ್‌ಚಿ. 64 ಅದ್ಂಗ್ ಯೇಸು: ಅಕ್ಕು, ನೀನ್ ಎಣ್ಣ್‌ನನೆಕೇಂದ್ ಯೇಸು ಎಣ್ಣ್‌ಚಿ. ಇಂಞು ಮಿಂಞಕ್ ಮನುಷ್ಯಕುಮಾರ ಸರ್ವ ಶಕ್ತಿಯುಳ್ಳಂವೊಂಡ ಬಲ್‌ತೆ ಬರಿಲ್ ಅಳ್‌ತಿತ್, ಬಾನತ್‍ರ ಮೋಡತ್‍ಲ್ ಬಪ್ಪದ್‍ನ ನಿಂಗೆಲ್ಲಾರು ಕಾಂಬಿರಾಂದ್ ಎಣ್ಣ್‌ಚಿ. 65 ಮಹಾ ಯಾಜಕ ಇದ್‍ನ ಕ್‍ೕಟದು, ತಾಂಡ ಬಟ್ಟೇನ ಕೀತಿತ್, ಇಂವೊ ದೇವ ದೂಷಣೆ ಮಾಡ್‍ಚಿ. ಇಂಞು ಏದ್ ಸಾಕ್ಷಿ ಬೋಂಡು? ನಿಂಗೆಲ್ಲಾರು ಅಂವೊಂಡ ದೇವ ದೂಷಣೆನ ಕ್‍ೕಟಿರಲ್ಲ! 66 ನಿಂಗ ಎಂತ ತೀರ್ಮಾನ ಮಾಡ್‌ವಿರಾಂದ್ ಕ್‍ೕಟತ್. ಅದ್ಂಗ್ ಅಯಿಂಗ: ಇಂವೊ ಕಂಡಿತವಾಯಿತ್ ಮರಣಕ್ ಯೋಗ್ಯನಾಯಿತುಂಡ್. 67 ಅಯಿಂಗ ಯೇಸುರ ಮೂಡ್‍ಕ್ ತುಪ್ಪಿತ್, ಗುದ್ದ್‌ಚಿ. ಚೆನ್ನ ಜನ ಅಂವೊಂಗ್ ಪೊಜ್ಜಿತ್, 68 ನೀಕ್ ದಾರ್ ಪೊಜ್ಜತ್‍ೕಂದ್ ಪ್ರವಾದೆನ ಎಣ್ಣ್, ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನೇಂದ್ ಎಣ್ಣ್‌ಚಿ. ಪೇತ್ರ ಯೇಸುನ ಒತ್ತತೆ ಇಪ್ಪದ್ ( ಮಾರ್ಕ 14.66–72 ; ಲೂಕ 22.56–62 ; ಯೋಹಾನ 18.15–18 , 25–27 ) 69 ಅಕ್ಕ ಪೇತ್ರ ಪೊರಮೆ ಪಟ್ಟಿಲ್ ಅಳ್‌ತಿತ್‌ಪ್ಪಕ, ಒರ್ ಪಣಿಕರ್ತಿ ಅಂವೊಂಡ ಪಕ್ಕ ಬಂದಿತ್ ನೀನ್ ಸಹ ಗಲಿಲಾಯನಾನ ಯೇಸು ಕ್ರಿಸ್ತಂಡ ಕೂಡೆ ಇಂಜಂವೋಂದ್ ಎಣ್ಣ್‌ಚಿ. 70 ಆಚೇಂಗಿ ಪೇತ್ರ: ನೀನ್ ಎಂತ ತಕ್ಕ್ ಪರಿವಿಯಾಂದ್ ನಾಕ್ ಗೊತ್ತ್‌ಲ್ಲೇಂದ್ ಎಲ್ಲಾಡ ಎದಿಕೆ ಎಣ್ಣ್‌ಚಿ. 71 ಪಿಂಞ ಅಂವೊ ಪೊರಮೆ ಬಾಯಿಕಂಡಿಕ್ ಪೋಚಿ. ಬಯ್ಯ ಇಂಞೊರ್ ಪಣಿಕರ್ತಿ ಬಂದಿತ್, ಈ ಮನುಷ್ಯ, ನಜರೇತ್‍ಕಾರನಾನ ಯೇಸುರ ಕೂಡೆ ಇಂಜತ್‍ೕಂದ್ ಎಣ್ಣ್‌ಚಿ. 72 ಆಚೇಂಗಿ ಪೇತ್ರ: ಆ ಮನುಷ್ಯನ ನಾಕ್ ಗೊತ್ತ್‌ಲ್ಲೇಂದ್ ಆಣೆ ಇಟ್ಟಿತ್ ಇಂಞೊರ್ ಕುರಿ ಎಣ್ಣ್‌ಚಿ. 73 ಚೆನ್ನ ನೇರ ಕಯಿಂಜ ಪಿಂಞ ಅಲ್ಲಿ ನಿಂದಂಡಿಂಜ ಚೆನ್ನ ಜನ ಪೇತ್ರಂಡ ಪಕ್ಕ ಬಂದಿತ್ ನೇರಾಯಿತ್ ನೀನ್ ಅಯಿಂಗಡಲ್ಲಿ ಒಬ್ಬೊನಾಯಿತ್ ಇಕ್ಕು. ನೀಡ ತಕ್ಕ್ ನಿನ್ನ ಕಾಟಿ ಕೊಡ್‍ಪಾಂದ್ ಎಣ್ಣ್‌ಚಿ. 74 ಅಕ್ಕ ಅಂವೊ: ಸತ್ಯ ಮಾಡಿತ್, ನಾಕ್ ಅಂವೊನ ಗೊತ್ತ್‌ಲ್ಲೆ, ಅನ್ನನೆ ನಾನ್ ಪೊಟ್ಟ್‌ಪರಿಯುವೇಂಗಿ ನಾಡ ಮೇಲೆ ಶಾಪ ಬರಡ್‍ೕಂದ್ ಎಣ್ಣ್‌ಚಿ, ಅಕ್ಕಣೆಕ್ ಮಲ್ಲಂಗೋಳಿ ಕೂಂದತ್. 75 ಅಕ್ಕ ಪೇತ್ರಂಗ್: ಮಲ್ಲಂಗೋಳಿ ಕೂವಕ್ ಮಿಂಞ ನೀನ್ ನನ್ನ ಗೊತ್ತ್‌ಲೇಂದ್ ಮೂಂದ್ ಕುರಿ ಎಣ್ಣುವಿಯಾಂದ್ ಯೇಸು ಎಣ್ಣ್‌ನದ್ ಗೇನ ಬಾತ್. ಅಂವೊ ಪೊರಮೆ ಪೋಯಿತ್ ದುಂಬ ಬೇಜಾರತ್‍ಲ್ ಮೊರಟತ್. |
© 2017, New Life Literature (NLL)