ಮತ್ತಾಯ 22 - ಕೊಡವ ಬೈಬಲ್ಮಂಗಲತ್ರ ಗದ್ದಾಳತ್‍ರ ಕಥೇರ ರೂಪ ( ಲೂಕ 14.15–24 ) 1 ಪರಲೋಕ ರಾಜ್ಯತ್‍ನ ಅರ್ಥ ಮಾಡಿ ಕೊಡ್‍ಪಕಾಯಿತ್, ಯೇಸು ಜನಕ್ ದುಂಬ ವಿಷಯತ್‍ನ, ಕಥೇರ ರೂಪತ್‌ಲ್ ಎಣ್ಣಿಯಂಡಿಂಜತ್. 2 ಪರಲೋಕ ರಾಜ್ಯ ಎನ್ನನೆ ಎಣ್ಣ್‌ಚೇಂಗಿ, ಒರ್ ರಾಜ ತಾಂಡ ಮೋಂವೊಂಡ ಮಂಗಲಕ್ ಗದ್ದಾಳ ತಯಾರ್ ಮಾಡ್‍ನನೆಕೆ. 3 ಅಡಿಗೆಯೆಲ್ಲಾ ತಯಾರಾನ ಪಿಂಞ, ಕಾಕ್‍ನಯಿಂಗಕ್ ಪೋಯಿತ್ ಗದ್ದಾಳ ತಯಾರಾಯಿತುಂಡೂಂದು, ನಿಂಗ ಬಪ್ಪಕ್ ಸಮಯ ಆಚೀಂದು ಎಣ್ಣ್‌ವಕ್ ಅಂವೊಂಡ ಆಳ್‍ವಳ ಅಯಿಚತ್. ಆಚೇಂಗಿ ಮಂಗಲಕ್ ಬಪ್ಪಕುಳ್ಳಯಿಂಗ ಬಪ್ಪ್‌ಲೇಂದ್ ಎಣ್ಣ್‌ಚಿ. 4 ಪಿಂಞ ಅಂವೊ ಇಂಞು ಚೆನ್ನ ಆಳ್‍ವಳ ಅಯಿಚಿತ್: ನಾಡ ಅಡಿಗೆ ತಯಾರಾಯಿತ್ ಉಂಡ್ ಪುಷ್ಟಿಯಾನ ಎತ್ತ್ ಪಿಂಞ ಪೈಯುರ ಅಡಿಗೆ ಮಾಡಿತುಂಡ್, ಮಂಗಲತ್‍ರ ಗದ್ದಾಳಕ್ ಬಾರೀಂದ್ ಎಣ್ಣ್‌ವಕ್ ಅಯಿಚತ್. 5 ಆಚೇಂಗಿ ಕಾಕ್‌ನಯಿಂಗ ಅದ್‍ನ ಮನಸ್ಸ್‌ಕ್ ಎಡ್‍ಕತೆ ಒಬ್ಬ ಬೇಲ್‍ಕ್, ಇಂಞೊಬ್ಬ ಅಂವೊಂಡ ವ್ಯಾಪಾರಕ್ ಪೋಚಿ. 6 ಇಂಞು ಚೆನ್ನ ಜನ ಈ ಆಳುವಳ ಪುಡಿಪಂಜಿ ಅಯಿಂಗಳ ಕೊಂದ್‍ರ್‌ತ್. 7 ರಾಜಂಗ್ ದುಂಬ ಚೆಡಿ ಬಾತ್. ಅಂವೊ ಅಂವೊಂಡ ಸಿಪಾಯಿಯಳ ಅಯಿಪಂಜಿ, ದಾರ್ ಅಂವೊಂಡ ಆಳ್‍ವಳ ಕೊಂದತೋ, ಅಯಿಂಗಳ ನಾಶ ಮಾಡಿತ್, ಅಯಿಂಗಡ ಪಟ್ಟಣತ್‍ನ ಚುಟ್ಟ್‌ರ್‌ತ್. 8 ಅಕ್ಕ ರಾಜ ಅಂವೊಂಡ ಆಳ್‍ವಳ ನೋಟಿತ್: ಮಂಗಲತ್‍ರ ಅಡಿಗೆ ತಯಾರಾಯಿತ್ ಉಂಡ್, ನಾನ್ ಕಾಕ್‍ನಯಿಂಗಕ್ ಅದ್ಂಗ್ ಯೋಗ್ಯತೆ ಇಲ್ಲತೆ ಪೋಚಿ. 9 ಆನಗುಂಡ್ ಇಕ್ಕ ನಿಂಗ, ಬೀದಿರ ಮೂಲೆಕ್ ಪೋಯಿತ್, ಅಲ್ಲಿ ದಾರ್‍ನೆಲ್ಲಾ ನಿಂಗ ಕಾಂಬಿರೋ ಅಯಿಂಗಳೆಲ್ಲ ಉಂಬಕ್ ಕಾಕಿಯಂಡ್ ಬಾರೀಂದ್ ಎಣ್ಣ್‌ಚಿ. 10 ಆ ಆಳ್‍ವ, ಕೆಟ್ಟಯಿಂಗಳ ನಲ್ಲಯಿಂಗಳ ಮಾತ್ರ ಅಲ್ಲತೆ, ದಾರ್‍ನೆಲ್ಲಾ ಕಂಡತೋ ಅಯಿಂಗಳೆಲ್ಲ ಉಂಬಕ್ ಕಾಕಿಯಂಡ್ ಬಾತ್. ಅನ್ನನೆ ಮಂಗಲತ್‍ರ ಮನೆಲ್ ಜನ ದುಂಬ್‍ಚಿ. 11 ರಾಜ ಅಲ್ಲಿ ಮಂಗಲಕ್ ಬಂದಯಿಂಗಳ ನೋಟ್‍ವಕ್ ಬಪ್ಪಕ ಮಂಗಲತ್‍ರ ಬಟ್ಟೆ ಇಡತೆ ಬಂದಿತುಳ್ಳ ಒಬ್ಬನ ಕಂಡತ್. 12 ರಾಜ ಅಂವೊನ: ಮಂಗಲತ್‍ರ ಬಟ್ಟೆ ಇಡತೆ ನೀನ್ ಇಲ್ಲಿಕ್ ಎನ್ನನೆ ಬಂದಿಯಾಂದ್ ಕ್‍ೕಟತ್? ಅಂವೊ ಮುಂಡತೆ ಇಂಜತ್. 13 ಅಕ್ಕ ರಾಜ ಅಂವೊಂಡ ಆಳ್‍ವಕ್, ಅಂವೊಂಡ ಕೈಕಾಲ್ ಕೆಟ್ಟ್‌ವಂಜಿ ಅಂವೊನ ಪೊರಮೆ ಇರ್‌ಟ್‌ಲ್ ಇಡಿ, ಅಲ್ಲಿ ಅಂವೊ ಪಲ್ಲ್‌ಕಡ್‌ಚಂಡ್ ಗೋಳಾಡಿಯಂಡ್ ಇಪ್ಪಾಂದ್ ಯೇಸು ಎಣ್ಣ್‌ಚಿ. 14 ಇನ್ನನೆ ಕಾಕ್‌ನಯಿಂಗ ದುಂಬ ಇಪ್ಪ, ಆಚೇಂಗಿ ಅದ್‍ಲ್ ಆಯ್ಕೆ ಆನಯಿಂಗ ಚೆನ್ನ ಜನಳೇಂದ್ ಯೇಸು ಎಣ್ಣ್‌ಚಿ. ಕಂದಾಯ ಕೆಟ್ಟ್‌ವ ವಿಷಯತ್ ಪ್ರಶ್ನೆ ( ಮಾರ್ಕ 12.13–17 ; ಲೂಕ 20.20–26 ) 15 ಫರಿಸಾಯಂಗೆಲ್ಲಾ ಒಂದ್ ಕೂಡಿತ್ ಯೇಸುನ ಅಂವೊಂಡ ತಕ್ಕ್‌ಲ್ ಪುಡಿಪಕಾಯಿತ್ ಗೇನ ಮಾಡ್‍ಚಿ. 16 ಅಯಿಂಗ ಹೆರೋದ ರಾಜಂಡ ಜನಡ ಕೂಡೆ ಅಯಿಂಗಡ ಶಿಷ್ಯಂಗಳ ಅಯಿಚತ್. ಅಯಿಂಗ ಬಂತ್, ಉಪಾದ್ಯನೇ, ನೀನ್ ಸತ್ಯ ಉಳ್ಳಂವೊನು, ದೇವಡ ಚಿತ್ತತ್‍ರ ವಿಷಯತ್ ಜನಕ್ ಸತ್ಯವಾಯಿತ್ ಬೋದನೆ ಮಾಡ್‍ವಿಯಾಂದೂ, ದಾರ್‌ಕು ಬೊತ್ತ್‌ವಂವೊ ಅಲ್ಲಾಂದು, ಪಕ್ಷಪಾತ ಇಲ್ಲತಂವೋಂದು ನಂಗಕ್ ಗೊತ್ತುಂಡ್. 17 ಇಕ್ಕ ಎಣ್ಣ್, ಕೈಸರಂಗ್ ಕಂದಾಯ ಕೊಡ್‍ಪದ್ ಸರಿಯಾ ತಪ್ಪಾಂದ್ ಕ್‍ೕಟತ್. 18 ಅಯಿಂಗಡ ಕೆಟ್ಟ ಗುಣತ್‍ನ ಅರ್ಥ ಮಾಡಿಯಂಡ್: ಕಪಟಿಯಳೇ! ನಿಂಗ ಎನ್ನಂಗ್ ನನ್ನ ಕೆಣಿಪಕ್ ನೋಟ್‍ವಿರ? 19 ಕಂದಾಯ ಕೊಡ್‍ಪ ನಾಣ್ಯತ್‍ನ ಕಾಟೀಂದ್ ಎಣ್ಣ್‌ಚಿ. ಅಯಿಂಗ ಎಡ್‌ತ ಬಂದಿತ್ ಕೊಡ್‍ತತ್. 20 ಈ ನಾಣ್ಯತ್‌ಲ್ ಉಳ್ಳ ಮೂಡ್ ಪಿಂಞ ಪೆದ ದಾಡದ್‍ೕಂದ್ ಕ್‍ೕಟತ್. 21 ಅಯಿಂಗ: ಇದ್‍ಲ್ ಕೈಸರಂಡದ್ ಉಂಡ್‍ೕಂದ್ ಅಯಿಂಗ ಎಣ್ಣ್‌ಚಿ. ಅಕ್ಕ ಅಂವೊ: ಅಕ್ಕುವ, ಅನ್ನನಾಚೇಂಗಿ ಕೈಸರಂಡದ್‍ನ ಕೈಸರಂಗ್ ಕೊಡಿ, ದೇವಡದ್‌ನ ದೇವಕ್ ಕೊಡೀಂದ್ ಉತ್ತರ ಕೊಡ್‍ತತ್. 22 ಅಂವೊ ಕೊಡ್‍ತ ಉತ್ತರತ್‍ನ ಕ್‍ೕಪಕ ಅಯಿಂಗಕೆಲ್ಲ ದುಂಬ ಆಶ್ಚರ್ಯ ಆಯಿತ್, ಅಂವೊನ ಬುಟ್ಟಿತ್ ಪೋಚಿ. ಚಾವ್‍ಯಿಂಜ ಜೀವವಾಯಿತ್ ಬಪ್ಪ ವಿಷಯತ್ ಪ್ರಶ್ನೆ ( ಮಾರ್ಕ 12.18–27 ; ಲೂಕ 20.27–40 ) 23 ಅದೇ ದಿವಸತ್‍ಲ್, ಚತ್ತ್ ಪೋನಯಿಂಗ ದಾರೂ ಜೀವವಾಯಿತ್ ಏವುಲೇಂದ್ ಎಣ್ಣುವ ಸದ್ದುಕಾಯಂಗ ಯೇಸುರ ಪಕ್ಕ ಬಾತ್. ಅಯಿಂಗ ಯೇಸುಕ್: 24 ಉಪಾದ್ಯನೇ, ಒರ್ ಮನುಷ್ಯ, ಮಕ್ಕ ಇಲ್ಲತೆ ಪೊಣ್ಣ್‌ನ ಬುಟ್ಟಿತ್ ಚತ್ತ್ ಪೋನಕ, ಚತ್ತ್ ಪೋನಂವೊಂಡ ತಮ್ಮಣ ಅಂವೊಂಡ ಅಣ್ಣಂಡ ಪೊಣ್ಣ್‌ನ ಮಂಗಲ ಕಯಿಕಲು. ಅಕ್ಕ ಅಯಿಂಗಕ್ ಮಕ್ಕ ಆನಕ, ಆ ಮಕ್ಕ ಚತ್ತ್ ಪೋನಂವೊಂಡ ಮಕ್ಕ ಆಪಾಂದ್ ಮೋಶೆ ನಂಗಕ್ ಎಣ್ಣ್‌ಚಿ. 25 ಒಮ್ಮ ಏಳ್ ಅಣ್ಣತಮ್ಮಣಂಗ ಇಂಜತ್. ಪೆರಿಯಂವೊ ಮಂಗಲ ಕಯಿಚತ್. ಅಂವೊಂಗ್ ಮಕ್ಕ ಇಲ್ಲತೆ ಚತ್ತ್ ಪೋನಗುಂಡ್ ದಂಡನೆಯಂವೊ ಅವಳ ಮಂಗಲ ಕಯಿಚತ್, 26 ಅಂವೊಂಗು ಮಕ್ಕ ಆಯಿತ್‌ಲ್ಲೆ, ಅಂವೊ ಸಹ ಚತ್ತ್ ಪೋಚಿ. ಅನ್ನನೆ ಮೂಂದನೆಂವೊಂಗೂ ಆಚಿ. ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚತ್ ಆಚೇಂಗಿ ಮಕ್ಕ ಆಕತೆ ಏಳಾಳು ಚತ್ತ್ ಪೋಚಿ 27 ಆಕೀರ್‌ಕ್ ಆ ಪೊಣ್ಣಾಳು ಚತ್ತ್ ಪೋಚಿ. 28 ಅಂದಕ, ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪಕ, ಏಳ್ ಆಣಾಳ್‌ಲ್ ಅವ ದಾಡ ಪೊಣ್ಣಾಯಿತ್‌ಪ್ಪ? ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚತಲ್ಲಾಂದ್ ಕ್‍ೕಟತ್. 29 ಯೇಸು ಅಯಿಂಗಕ್: ದೇವಡ ವಾಕ್ಯ ಪಿಂಞ ದೇವಡ ಶಕ್ತಿ ನಿಂಗಕ್ ಗೊತ್ತಿಲ್ಲತಗುಂಡ್ ನಿಂಗ ತಪ್ಪ್ ತಪ್ಪಾಯಿತ್ ಗೇನ ಮಾಡ್‌ವಿರ. 30 ಚತ್ತ್ ಪೋನಯಿಂಗ ಜೀವವಾಯಿತ್ ಎದ್ದಿತ್ ಬಪ್ಪಕ, ದಾರೂ ಮಂಗಲ ಕಯಿಪದು ಇಲ್ಲೆ, ಮಂಗಲ ಮಾಡಿ ಕೊಡ್‌ಪದು ಇಲ್ಲೆ. ಅಯಿಂಗ ಪರಲೋಕತ್‌ಲುಳ್ಳ ದೇವದೂತಂಗಡನೆಕೆ ಇಪ್ಪ. 31 ಚತ್ತ್ ಪೋನಯಿಂಗ ಜೀವವಾಯಿತ್ ಏವ ವಿಷಯತ್ ದೇವ: ನಾನ್ ಅಬ್ರಹಾಮಂಡ ದೇವ, ಇಸಾಕಂಡ ದೇವ ಪಿಂಞ ಯಾಕೋಬಂಡ ದೇವಾಂದ್, ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳದ್‍ನ ನಿಂಗ ಓದಿತ್ತ್‌ಲ್ಲೆಯಾ? 32 ಅನ್ನನಾಚೇಂಗಿ ಅಂವೊ ಚತ್ತ್ ಪೋನಯಿಂಗಕ್ ದೇವ ಅಲ್ಲ ಆಚೇಂಗಿ ಜೀವತ್‍ಲ್ ಉಳ್ಳಯಿಂಗಕ್ ದೇವನಾಯಿತುಂಡ್‍ೕಂದ್ ಎಣ್ಣ್‌ಚಿ. 33 ಜನಡ ಗುಂಪ್‌ಕ್ ಈ ಬೋದನೇನೆಲ್ಲಾ ಕ್‍ೕಪಕ, ಅಯಿಂಗಕ್ ದುಂಬ ಆಶ್ಚರ್ಯ ಆಚಿ. ಎಲ್ಲಾಂಕಿಂಜ ಮುಕ್ಯ ಆಜ್ಞೆ ( ಮಾರ್ಕ 12.28–34 ; ಲೂಕ 10.25–28 ) 34 ಯೇಸು, ಸದ್ದುಕಾಯಂಗಡ ಬಾಯಿನ ಮುಚ್ಚಿರ್‍ತ್‍ೕಂದ್ ಗೊತ್ತಾನ ಪಿಂಞ ಫರಿಸಾಯಂಗ ಕೂಡಿ ಬಂದಿತ್ ಪ್ರಶ್ನೆ ಇಡ್‌ವಕ್ ತಯಾರಾಚಿ. 35 ಅಯಿಂಗಡಡೆಲ್ ನ್ಯಾಯಪ್ರಮಾಣತ್‍ರ ಶಾಸ್ತ್ರಿ ಒಬ್ಬ, ಯೇಸುನ ಪುಡಿಪಕಾಯಿತ್ ಈ ಪ್ರಶ್ನೆ ಕ್‍ೕಟತ್: 36 ಉಪಾದ್ಯನೇ ನ್ಯಾಯಪ್ರಮಾಣತ್‍ಲ್ ಎಲ್ಲಾಕಿಂಜ ಮುಕ್ಯಪಟ್ಟ ಆಜ್ಞೆ ಏದ್‍ೕಂದ್ ಕ್‍ೕಟತ್. 37 ಯೇಸು ಅಂವೊನ ನೋಟಿತ್: ನೀಡ ದೇವನಾನ ಒಡೆಯನ ನೀಡ ತ್‍ೕರ ಹೃದಯತ್‍ಲ್, ನೀಡ ತ್‍ೕರ ಆತ್ಮತ್‍ಲ್, ನೀಡ ತ್‍ೕರ ಮನಸ್ಸ್‌ಲ್ ಪ್ರೀತಿಮಾಡ್. 38 ಇದೇ ಮುಕ್ಯಪಟ್ಟ ನ್ಯಾಯಪ್ರಮಾಣ. 39 ಇದ್ಂಗ್ ಸಮವಾಯಿತುಳ್ಳ ದಂಡನೆ ಮುಕ್ಯಪಟ್ಟ ನ್ಯಾಯಪ್ರಮಾಣ ಎಂತ ಎಣ್ಣ್‌ಚೇಂಗಿ: ನೀನ್, ನಿನ್ನ ಪ್ರೀತಿ ಮಾಡ್‌ವಚ್ಚಕ್ ನೀಡ ನೆರಮನೆಕಾರಳೂ ಪ್ರೀತಿಮಾಡ್ ಎಣ್ಣ್‌ವದೇ. 40 ಮೋಶೇರ ಎಲ್ಲಾ ನ್ಯಾಯಪ್ರಮಾಣಕ್ ಪಿಂಞ ಪ್ರವಾದಿಯಂಗಡ ಬೋದನೆಕ್ ಈ ದಂಡ್ ನ್ಯಾಯಪ್ರಮಾಣವೇ ಆದಾರವಾಯಿತುಂಡ್. ಕ್ರಿಸ್ತಂಡ ವಿಷಯತ್ ಪ್ರಶ್ನೆ ( ಮಾರ್ಕ 12.35–37 ; ಲೂಕ 20.41–44 ) 41-42 ಫರಿಸಾಯಂಗ ಎಲ್ಲಾರು ಒಟ್ಟ್‌ಕೂಡಿತ್‌ಪ್ಪಕ, ಯೇಸು ಅಯಿಂಗಳ ನೋಟಿತ್: ನಿಂಗ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಂಡ ವಿಷಯತ್ ಎಂತ ಗೇನ ಮಾಡ್‌ವಿರ? ಅಂವೊ ದಾಡ ಮೋಂವೊ ಎಣ್ಣಿಯಂಡ್ ಕ್‍ೕಟತ್. ಅದ್ಂಗ್ ಅಯಿಂಗ: ಅಂವೊ ದಾವೀದಂಡ ಮೋಂವೊ ಎಣ್ಣಿಯಂಡ್ ಉತ್ತರ ಕೊಡ್‍ತತ್. 43 ಅದ್ಂಗ್ ಯೇಸು: ಅನ್ನನಾಚೇಂಗಿ ದಾವೀದ ಪವಿತ್ರಾತ್ಮತ್‍ರಗುಂಡ್ ಅಂವೊನ ಒಡೆಯನೇಂದ್ ಕಾಕ್‍ನದ್ ಎನ್ನನೆ? 44 ನಾಡ ಒಡೆಯನಾನ ದೇವ ನಾಡ ಒಡೆಯಂಗ್: ನಾನ್ ನೀಡ ಶತ್ರುವಳ ನೀಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ, ನೀನ್ ನಾಡ ಬಲ್‌ತೆ ಬರಿಲ್ ಅಳ್‌ತಾಂದ್ ಎಣ್ಣಿತುಂಡಲ್ಲ. 45 ದಾವೀದ, ಅಂವೊನ ಒಡೆಯನೇಂದ್ ಎಣ್ಣ್‌ವಕ, ಅಂವೊಂಗ್ ಅಂವೊ ಎನ್ನನೆ ಮೋಂವೊನಾಯಿತ್ ಇಪ್ಪಾಂದ್ ಕ್‍ೕಟತ್. 46 ದಾರ್‌ಕು ಜವಾಬ್ ಕೊಡ್‍ಪಕ್ ಕಯಿಂಜಿತ್ತ್‌ಲ್ಲೆ. ಅಂದಿಂಜ ದಾರ್‌ಕು ಅಂವೊಂಡ ಪಕ್ಕ ಪ್ರಶ್ನೆ ಕ್‍ೕಪಕ್ ದೈರ್ಯ ಇಂಜಿತ್‌ಲ್ಲೆ. |
© 2017, New Life Literature (NLL)