ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 9 - ಕೊಡವ ಬೈಬಲ್ಯೇಸು ತಾಂಡ ಪನ್ನೆರಂಡ್ ಶಿಷ್ಯಂಗಳ ಅಯಿಚದ್ ( ಮತ್ತಾಯ 10.5–15 ; ಮಾರ್ಕ 6.7–13 ) 1 ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕಿತ್, ಕೂಳಿ ಪುಡ್‍ಚಯಿಂಗಡ ಮೇಲ್ಂಜ ಎಲ್ಲಾ ಕೂಳಿಯಳ ಬುಡ್‌ತ್‌ವಕು ಪಿಂಞ ರೋಗಿಯಳ ವಾಸಿ ಮಾಡ್‌ವಕು ಬೋಂಡಿತಾನ ಶಕ್ತಿ ಪಿಂಞ ಅದಿಕಾರತ್‍ನ ಅಯಿಂಗಕ್ ಕೊಡ್‌ತಿತ್, 2 ದೇವಡ ರಾಜ್ಯತ್‍ರ ವಿಷಯತ್‍ನ ಬೋದನೆ ಮಾಡ್‌ವಕು ಕಾಯಿಲಸ್ತಂಗಳ ವಾಸಿ ಮಾಡ್‌ವಕು ಅಯಿಂಗಳ ಅಯಿಚತ್. 3 ಯೇಸು ಅಯಿಂಗಳ ನೋಟಿತ್: ನಿಂಗ ಪೋಪಕ ಕೋಲ್, ಚೀಲ, ಉಂಬಕ್ ಒಟ್ಟಿ, ದುಡ್ಡ್ ಒಂದು ಎಡ್‍ತಂಡ್ ಪೋಕತಿ. ದಂಡ್ ಬಟ್ಟೇನ ಸಹ ಎಡ್‍ತಂಡ್ ಪೋಕತೀಂದ್ ಎಣ್ಣ್‌ಚಿ. 4 ಏದ್ ಮನೆಲ್ ನಿಂಗಳ ಸ್ವಾಗತ ಮಾಡ್‌ವ ಅಲ್ಲಿಯೇ ಆ ಮನೆಲ್ ನಿಂಗ ಪೋಕಣೆಕ್ ಇರಿ. 5 ದಾರ್ ನಿಂಗಳ ಸ್ವಾಗತ ಮಾಡ್‌ಲೆಯೋ, ಅಯಿಂಗಡ ಊರ್‌ನ ಬುಟ್ಟಿತ್ ನಿಂಗ ಬಪ್ಪಕ, ಅಯಿಂಗಕ್ ಎಚ್ಚರಿಕೆಯಾಯಿತ್ ನಿಂಗಡ ಕಾಲ್‌ಲ್ ಉಳ್ಳ ದೂಳ್‍ನ ಕೊಡ್‍ಕಿತ್ ಬಾರಿ. 6 ಯೇಸುರ ಶಿಷ್ಯಂಗ ಒರ್ ಊರಿಂಜ ಇಂಞೊರ್ ಊರ್‌ಕ್ ಪೋಯಿತ್, ಎಲ್ಲಾ ಜಾಗತ್‍ಲ್ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡಿತ್, ಕಾಯಿಲಸ್ತಂಗಳ ವಾಸಿ ಮಾಡ್‍ಚಿ. ಹೆರೋದಂಡ ಪ್ರಶ್ನೆ ( ಮತ್ತಾಯ 14.1–12 ; ಮಾರ್ಕ 6.14–29 ) 7 ಗಲಿಲಾಯತ್‍ಲ್ ಹೆರೋದ ಅಂತಿಪ ರಾಜನಾಯಿತ್ಂಜತ್. ಅಂವೊ ಇದ್‍ನೆಲ್ಲ ಕ್‍ೕಪಕ ಗಲಿಬಿಲಿ ಆಚಿ, ಎನ್ನಂಗೆಣ್ಣ್‌ಚೇಂಗಿ ಚೆನ್ನ ಜನ, ಇಂವೊ ಚತ್ತ್‌ಪೋನ ಯೋಹಾನ, ಚಾವ್‍ಯಿಂಜ ಬದ್‌ಕಿತ್ ಬಾತ್‍ೕಂದ್ ಎಣ್ಣ್‌ಚಿ. 8 ಚೆನ್ನ ಜನ ಎಲೀಯ ಬಾತ್ ಕಾಂಬಾಂದ್ ಎಣ್ಣ್‌ಚಿ, ಬೋರೆ ಚೆನ್ನ ಜನ ಪಂಡತ ಪ್ರವಾದಿ ಒಬ್ಬ ಬದ್‌ಕಿತ್ ಬಾತ್ ಕಾಂಬಾಂದ್ ಎಣ್ಣ್‌ನಗುಂಡ್ ಅಂವೊಂಗ್ ದುಂಬ ಗಾಬರಿ ಆಚಿ. 9 ನಾನ್ ಯೋಹಾನಂಡ ಮಂಡೆನ ಕೆತ್ತಿತುಳ್ಳ, ಆಚೇಂಗಿ ನಾನ್ ಕ್‍ೕಟಂಡುಂಡಳ್ಳ ಈ ಮನುಷ್ಯ ದಾರಾಯಿತಿಕ್ಕೂಂದ್ ಎಣ್ಣಿಯಂಡ್ ಯೇಸುನ ಕಾಂಬಕ್ ಪಾರಕಾತಂಡ್ ಇಂಜತ್. ಯೇಸು ಅಂಜಾಯಿರ ಜನಕ್ ಉಂಬಕ್ ಕೊಡ್‌ತದ್ ( ಮತ್ತಾಯ 14.13–21 ; ಮಾರ್ಕ 6.30–44 ; ಯೋಹಾನ 6.1–14 ) 10 ಅಪೊಸ್ತಲಂಗ ವಾಪಸ್ ಬಂದಿತ್, ಅಯಿಂಗ ಮಾಡ್‍ನ ಎಲ್ಲಾ ವಿಷಯತ್‍ನ ವಿವರಿಚಿಟ್ಟತ್. ಅಕ್ಕ ಯೇಸು, ಅಂವೊಂಡ ಶಿಷ್ಯಂಗಳ ಕಾಕಿಯಂಡ್, ಒಂಟಿಯಾಯಿತ್‌ಪ್ಪಕ್ ಬೇತ್ಸಾಯಿದ ಎಣ್ಣುವ ಪಟ್ಟಣತ್‍ರ ಪಕ್ಕ ಉಳ್ಳ ಮಣಬೂಮಿಕ್ ಪೋಚಿ. 11 ಇದ್ ಜನಕ್ ಗೊತ್ತಾನಗುಂಡ್, ಜನಯೆಲ್ಲ ಯೇಸುರ ಬಯ್ಯ ಪೋಚಿ. ಯೇಸು ಅಯಿಂಗಳ ಸ್ವೀಕಾರ ಮಾಡಿತ್, ದೇವಡ ರಾಜ್ಯತ್‍ರ ವಿಷಯತ್‍ನ ಪರ್ಂದಿತ್, ವಾಸಿಯಾಂಡೂಂದ್ ಇಂಜಯಿಂಗಳ ವಾಸಿ ಮಾಡ್‍ಚಿ. 12 ಸೂರ್ಯ ಮುಳ್‌ಗಿಯಂಡ್ ಬಪ್ಪಕಾಪಕ, ಪನ್ನೆರಂಡ್ ಶಿಷ್ಯಯಂಗಳು ಒಮ್ಮಕೆ ಅಂವೊಂಡ ಪಕ್ಕ ಬಂದಿತ್, ಇದ್ ಮಣಬೂಮಿ, ಆನಗುಂಡ್, ಈ ಜನಳ ಬಯ್ಯಕ್ ಅಯಿಚಿರ್, ಅಯಿಂಗ ಸುತ್ತ್‌ಮುತ್ತ್‌ಲ್ ಉಳ್ಳ ಊರ್‌ಕ್ ಪೋಯಿತ್ ಉಂಬಕು ಪಿಂಞ ಇಪ್ಪಕ್ ಜಾಗವು ಅಯಿಂಗಳೇ ಏರ್ಪಾಡ್ ಮಾಡಡ್‍ೕಂದ್ ಎಣ್ಣ್‌ಚಿ. 13 ಅದ್ಂಗ್ ಯೇಸು: ನಿಂಗಳೇ ಅಯಿಂಗಕ್ ಉಂಬಕ್ ಕೊಡೀಂದ್ ಎಣ್ಣ್‌ಚಿ. ಅದ್ಂಗ್ ಶಿಷ್ಯಂಗ: ನಂಗಡ ಪಕ್ಕ ಅಂಜ್ ಒಟ್ಟಿ ದಂಡ್ ಮೀನು ಮಾತ್ರ ಉಂಡ್. ಈ ಜನಕೆಲ್ಲ ಉಂಬಕ್ ಕೊಡ್‍ಕಂಡೂಂದ್ ಎಣ್ಣ್‌ಚೇಂಗಿ, ನಂಗ ಪೋಯಿತ್ ಎಡ್‌ತ ಬರಡೂಂದ್ ಎಣ್ಣ್‌ಚಿ. 14 ಆಣಾಳ್ ಮಾತ್ರ ಸುಮಾರ್ ಅಂಜ್ ಆಯಿರ ಇಂಜತ್. ಈ ಜನಯೆಲ್ಲ ಗುಂಪಾಯಿತ್ ಸುಮಾರ್ ಐಂಬದಯಿಂಬದ್ ಜನಳಾಯಿತ್ ಅಳ್‌ಪಕ್ ಎಣ್ಣೀಂದ್ ಯೇಸು ಶಿಷ್ಯಂಗಕ್ ಎಣ್ಣ್‌ಚಿ. 15 ಆ ಜನ ನೂರ್ ನೂರ್ ಪಿಂಞ ಐಂಬದ್ ಐಂಬದ್ ಜನಳಾಯಿತ್ ಅಳ್‌ತತ್. ಶಿಷ್ಯಂಗ ಯೇಸು ಎಣ್ಣ್‌ನ ಪ್ರಕಾರ ಅಳ್‍ಪಚಿಟ್ಟ ಪಿಂಞ, 16 ಯೇಸು, ಅಂಜ್ ಒಟ್ಟಿ ಪಿಂಞ ದಂಡ್ ಮೀನ್‌ನ ಎಡ್‍ತಿತ್, ಕೊಡಿಕ್ ಪರಲೋಕತ್‌ನ ನೋಟುವಂಜಿ ದೇವಕ್ ವಂದನೆ ಮಾಡಿತ್, ಒಟ್ಟಿನ ಮುರಿಪಂಜಿ ಅಂವೊಂಡ ಶಿಷ್ಯಂಗಕ್ ಕೊಡ್‌ತಿತ್, ಜನಕೆಲ್ಲ ಕೊಡೀಂದ್ ಎಣ್ಣ್‌ಚಿ. 17 ಜನಯೆಲ್ಲ ಕೆಲ ದುಂಬ ತಿಂದಿತ್ ತೃಪ್ತಿಯಾನ ಪಿಂಞ, ಶಿಷ್ಯಂಗ ಪನ್ನೆರಂಡ್ ಕುಕ್ಕೆರಚ್ಚಕ್ ಒಟ್ಟಿಯು ಮೀನು ಬಾಕಿ ಆನದ್‍ನ ಒಟ್ಟ್ ಕೂಟ್‌ಚಿ. ಪೇತ್ರ ಯೇಸುನ ಕ್ರಿಸ್ತ ಎಣ್ಣಿಯಂಡ್ ಒತ್ತಂಡದ್ ( ಮತ್ತಾಯ 16.13–19 ; ಮಾರ್ಕ 8.27–30 ) 18 ಒರ್ ದಿವಸ ಯೇಸು ಒಬ್ಬನೇ ಪ್ರಾರ್ಥನೆ ಮಾಡಿಯಂಡಿಪ್ಪಕ, ಅಂವೊಂಡ ಶಿಷ್ಯಂಗ ಯೇಸುರ ಕೂಡೆ ಇಂಜತ್. ಯೇಸು: ನಾನ್ ದಾರ್‍ೕಂದ್ ಈ ಜನ ಎಣ್ಣುವ? ಎಣ್ಣಿಯಂಡ್ ಶಿಷ್ಯಂಗಳ ಕ್‍ೕಟತ್. 19 ಅದ್ಂಗ್: ಚೆನ್ನ ಜನ ನೀನ್ ದೀಕ್ಷಾಸ್ನಾನ ತಪ್ಪ ಯೋಹಾನಾಂದೂ, ಚೆನ್ನ ಜನ ನೀನ್ ಎಲೀಯಾಂದೂ, ಇಂಞು ಚೆನ್ನ ಜನ ನೀನ್ ದಾರೋ ಒರು ಪೂರ್ವ ಕಾಲತ್‍ರ ಪ್ರವಾದೀಂದೂ ಎಣ್ಣಿಯಂಡುಂಡ್‍ೕಂದ್ ಅಯಿಂಗ ಜವಾಬ್ ಕೊಡ್‍ತತ್. 20 ಪಿಂಞ ಯೇಸು ಅಯಿಂಗಳ ನೋಟಿತ್: ಆಚೇಂಗಿ ನಿಂಗ ನನ್ನ ದಾರ್‍ೕಂದ್ ಎಣ್ಣುವಿರಾಂದ್ ಕ್‍ೕಟತ್. ಅದ್ಂಗ್ ಪೇತ್ರ: ನೀನ್ ದೇವ ಗೊತ್ತ್ ಮಾಡಿತ್ ಅಯಿಚ ದೇವಡ ಕ್ರಿಸ್ತಾಂದ್ ಎಣ್ಣ್‌ಚಿ. ಯೇಸು ತಾಂಡ ಕಷ್ಟತ್‍ರ ಪಿಂಞ ಚಾವ್‍ರ ವಿಷಯತ್‍ನ ಎಣ್ಣುವದ್ ( ಮತ್ತಾಯ 16.20–28 ; ಮಾರ್ಕ 8.31–9.1 ) 21 ನಾನ್ ದಾರ್‍ಂದ್ ನಿಂಗ ದಾರ್‌ಕು ಎಣ್ಣತೀಂದ್ ಅಯಿಂಗಕ್ ಆಜ್ಞೆ ಮಾಡ್‍ಚಿ. 22 ಅದಲ್ಲತೆ, ಮನುಷ್ಯಕುಮಾರ ದುಂಬ ಕಷ್ಟಪಡಂಡು, ಪೆರಿಯಯಿಂಗಡ, ಮುಕ್ಯ ಯಾಜಕಂಗಡ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಮಿಂಞತ್‍ಲ್ ತ್‍ಕ್ಕಾರ ಆಕಂಡು ಪಿಂಞ ಅಂವೊನ ಕೊಂದ್‌ರ್‌ವ ಆಚೇಂಗಿ ಮೂಂದ್ ದಿವಸ ಆನ ಪಿಂಞ ಚಾವ್‍ಯಿಂಜ ಅಂವೊ ಜೀವವಾಯಿತ್ ಏವಂಡೂಂದ್ ಎಣ್ಣ್‌ಚಿ. 23 ದಾರೇಂಗಿ ನಾಡ ಶಿಷ್ಯನಾಯಿತ್ ಇಪ್ಪಕ್ ಕುಶಿ ಇಂಜತೇಂಗಿ, ಅಂವೊ ಅಂವೊಂಡ ಆಸೆನೆಲ್ಲಾ ಬುಟ್ಟಿತ್, ದಿನಾಲು ತಾಂಡ ಶಿಲುಬೇನ ನೇತಿಯಂಡ್ ನಾಡ ಬೆಂಬರತ್ ಬರಡ್. 24 ದಾರ್‌ಕ್ ತಾಂಡ ಜೀವತ್‍ನ ಕಾಪಾಡ್‌ವಕ್ ಆಸೆ ಉಂಡೋ ಅಂವೊ ಅದ್‍ನ ಕಳೆಯುವ. ಆಚೇಂಗಿ ದಾರ್ ನಾಕಾಯಿತ್ ಅಂವೊಂಡ ಬದ್‍ಕ್‍ನ ಕಳೆಯುವ ಅಂವೊ ಅದ್‍ನ ಕಾಪಾಡ್‌ವ. 25 ಮನುಷ್ಯ ಈ ಲೋಕತ್‍ಲ್ ಉಳ್ಳಾನೆಲ್ಲಾ ತಾಂಗ್ ಸ್ವಂತವಾಯಿತ್ ಮಾಡ್‍ಚೇಂಗಿಯು, ತಾಂಡ ಜೀವನತ್‌ನ ಪಾಳ್ ಮಾಡ್‍ಚೇಂಗಿ, ಅಂವೊಂಗ್ ಎಂತ ಪ್ರಯೋಜನ? 26 ದಾರ್ ನಾಕಾಯಿತ್ ನಾಡ ಬೋದನೆಕಾಯಿತ್ ಞಾಣ ಪಡ್‍ವ, ಮನುಷ್ಯಕುಮಾರನು ಅಂವೊಂಡ ಮಹಿಮೆಲ್, ಅಂವೊಂಡ ಅಪ್ಪಂಡ ಕೀರ್ತಿಲ್ ಪಿಂಞ ಅಂವೊಂಡ ಪವಿತ್ರ ದೂತಂಗಡ ಕೀರ್ತಿಲ್ ಬಪ್ಪಕ ಇನ್ನತಂವೊಂಡ ವಿಷಯತ್ ಞಾಣ ಪಡ್‌ಪಾಂದ್ ಎಣ್ಣ್‌ಚಿ. 27 ಇಲ್ಲಿ ಉಳ್ಳ ಚೆನ್ನ ಜನ ದೇವಡ ರಾಜ್ಯತ್‍ನ ಕಾಂಗತೆ ಚಾವ್‍ಲೇಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣ್‌ವೀಂದ್ ಎಣ್ಣ್‌ಚಿ. ಯೇಸು ಬದ್‍ಲಾನದ್ ( ಮತ್ತಾಯ 17.1–8 ; ಮಾರ್ಕ 9.2–8 ) 28 ಈ ತಕ್ಕ್‌ನ ಎಣ್ಣಿ ಸುಮಾರ್ ಎಟ್ಟ್ ದಿನ ಕಯಿಂಜ ಪಿಂಞ ಪೇತ್ರ, ಯೋಹಾನ ಪಿಂಞ ಯಾಕೋಬನ ಯೇಸು ಕುಂದ್‌ರ ಕೊಡಿಕ್ ಪ್ರಾರ್ಥನೆ ಮಾಡ್‌ವಕ್ ಕಾಕಿಯಂಡ್ ಪೋಚಿ. 29 ಯೇಸು ಪ್ರಾರ್ಥನೆ ಮಾಡಿಯಂಡ್ ಇಪ್ಪಕ ಅಂವೊಂಡ ಮೂಡ್‌ರ ರೂಪ ಬದ್‍ಲಾಚಿ, ಅಂವೊ ಇಟ್ಟ ಬಟ್ಟೆ ಬೊಳ್‌ತಿತ್ ಮಿನ್ನುವಕ್ ಸುರು ಆಚಿ. 30 ಅದಲ್ಲತೆ ಮೋಶೆ ಪಿಂಞ ಎಲೀಯ ಎಣ್ಣುವ ದಂಡ್ ಮನುಷ್ಯಂಗ ದುಂಬ್‍ನ ಮಹಿಮೆಲ್ ಪಿಂಞ ಕೀರ್ತಿಲ್ ಕಾಂಬ್‌ಚಿಟ್ಟಿತ್, ಯೇಸುರ ಕೂಡೆ ತಕ್ಕ್ ಪರ್‌ದಂಡ್, 31 ಅಂವೊ ಯೆರೂಸಲೇಮ್‍ಲ್ ಪೂರ್ತಿ ಮಾಡ್‌ವ ಅಂವೊಂಡ ಚಾವ್‍ರ ವಿಷಯತ್‍ನ ತಕ್ಕ್ ಪರ್ಂದಂಡಿಂಜತ್. 32 ಪೇತ್ರ ಪಿಂಞ ಅಂವೊಂಡ ಕೂಡೆ ಬಂದಯಿಂಗ ವರೀರ್‌ತ್ಂಜತ್, ಆಚೇಂಗಿಯು ಅಯಿಂಗ ಎದ್ದಿತ್ ಅಂವೊಂಡ ಮಹಿಮೆನ ಪಿಂಞ ಅಂವೊಂಡ ಕೂಡೆ ಇಂಜ ದಂಡ್ ಮನುಷ್ಯಂಗ ನಿಂದಂಡುಳ್ಳದ್‍ನ ಕಂಡತ್. 33 ಆ ದಂಡ್ ಮನುಷ್ಯಂಗ ಅಲ್ಲಿಂಜ ಪೋಯಂಡಿಪ್ಪಕ, ಪೇತ್ರ: ಉಪಾದ್ಯನೇ, ನಂಗ ಇಲ್ಲಿ ಇಪ್ಪದ್ ನಲ್ಲದ್, ಇಲ್ಲಿ ನೀಕ್ ಒರ್ ಗುಡಾರ, ಎಲೀಯಂಗ್ ಒರ್ ಗುಡಾರ, ಮೋಶೇಕ್ ಒರ್ ಗುಡಾರಾಂದ್ ಮೂಂದ್ ಗುಡಾರ ಮಾಡನಾಂದ್ ಎಣ್ಣ್‌ಚಿ. ಆಚೇಂಗಿ ಪೇತ್ರ ಎಂತ ತಕ್ಕ್ ಪರ್ಂದಂಡುಂಡ್‍ೕಂದ್ ಗೊತ್ತಿಲ್ಲತೆ ಇನ್ನನೆ ಎಣ್ಣ್‌ಚಿ. 34 ಅಂವೊ ಅನ್ನನೆ ತಕ್ಕ್ ಪರ್‌ದಂಡ್ ಇಪ್ಪಕ ಮೋಡ ಬಂದಿತ್, ಅದ್ಂಡ ನೆಳಳ್‍ಲ್ ಅಯಿಂಗಳ ಆವರಿಚಿಟ್ಟತ್. ಮೋಡ ಅಯಿಂಗಡ ಮೇಲೆ ಬಪ್ಪಕ ಶಿಷ್ಯಂಗಕ್ ದುಂಬ ಪೋಡಿ ಆಚಿ. 35 ಅಕ್ಕ: ಇಂವೊ ನಾನ್ ಗೊತ್ತ್ ಮಾಡ್‍ನ ನಾಡ ಕೊದಿರ ಮೋಂವೊ, ಇಂವೊ ಎಣ್ಣುವಾನ ನಿಂಗ ಕ್‍ೕಳೀಂದ್ ಒರ್ ವಾಣಿ ಮೋಡತ್‍ರ ಒಳ್‌ಳಿಂಜ ತಕ್ಕ್ ಪರ್ಂದತ್. 36 ಆ ವಾಣಿ ಕ್‍ೕಟ ಪಿಂಞ, ಪೇತ್ರ, ಯೋಹಾನ ಪಿಂಞ ಯಾಕೋಬ ಯೇಸು ಒಬ್ಬನೇ ಅಲ್ಲಿ ಇಂಜಾನ ಕಂಡತ್. ಯೇಸುರ ಶಿಷ್ಯಂಗ ಅಯಿಂಗ ಎಂತ ಕಂಡಿಯೆ ಎಂತ ಕ್‍ೕಟಿಯೇಂದ್ ದಾರ್‌ಕು ಒಂದು ಎಣ್ಣತೆ ಮುಂಡತೆ ಇಂಜತ್. ಕೂಳಿ ಪುಡ್‌ಚ ಕ್‍ಣ್ಣ ಕುಂಞಿನ ಯೇಸು ವಾಸಿ ಮಾಡ್‍ನದ್ ( ಮತ್ತಾಯ 17.14–18 ; ಮಾರ್ಕ 9.14–27 ) 37 ಪಿತ್ಯಾಂದ್ ಯೇಸು ಕುಂದ್ಂಜ ಅಡಿಕ್ ಬಾತ್, ದುಂಬ ಜನ ಯೇಸುನ ಕಾಂಬಕ್ ಬಂದಿತ್ಂಜತ್. 38 ಆ ಜನಡ ಗುಂಪ್‍ಯಿಂಜ ಒರ್ ಮನುಷ್ಯ ಕೂತ್ ಕೊಡ್‍ತತ್: ನಾಡ ಮೋಂವೊನ ಕಾಪಾಡ್, ನಾಕ್ ಅಂವೊ ಒರೇ ಮೋಂವೊ. 39 ಒರ್ ಕೂಳಿ ಅಂವೊನ ಪುಡಿಪ, ಅಕ್ಕ ಅಂವೊ ಕೆಟ್ಟ ಕೂತ್ ಕೊಡ್‍ಪ, ಅದ್ ಅಂವೊನ ತೊಂದರೆ ಮಾಡಿತ್ ಅಡಿಕ್ ತಳ್ಳ್‌ವ, ಅಂವೊಂಡ ಬಾಯಿಲ್ ನೊರೆ ಬಂದಿತ್ ಅಂವೊನ ದುಂಬ ನೊಂಬಲ ಮಾಡ್‍ಚೇಂಗಿಯು ಅಂವೊನ ಬುಟ್ಟಿತ್ ಪೋಪದ್ ದುಂಬ ಕಷ್ಟ. 40 ನಾನ್ ನೀಡ ಶಿಷ್ಯಂಗಕ್ ಎಣ್ಣಿಯೆ, ಆಚೇಂಗಿ ಅಯಿಂಗಕ್ ಆ ಕೂಳಿನ ಬುಡ್‌ತುವಕ್ ಕಯಿಂಜಿತ್‌ಲ್ಲೇಂದ್ ಎಣ್ಣ್‌ಚಿ. 41 ಯೇಸು ಶಿಷ್ಯಂಗಕ್: ನಂಬಿಕೆ ಇಲ್ಲತ ಮೋಸವಾನ ಸಂತಾನಕಾರಳೇ, ನಿಂಗಡ ಕೂಡೆ ಎಚ್ಚಕ್ ಕಾಲ ನಾನ್ ತಾಳ್ಮೆಯಾಯಿತ್ ಇಪ್ಪಕ್ ಕಯ್ಯು? ನೀಡ ಮೋಂವೊನ ಇಲ್ಲಿ ಕಾಕಿಯಂಡ್ ಬಾಂದ್ ಆ ಕ್‍ಣ್ಣಂಡ ಅಪ್ಪಂಗ್ ಎಣ್ಣ್‌ಚಿ. 42 ಆ ಕ್‌ಣ್ಣನ ಕಾಕಿಯಂಡ್ ಬಪ್ಪಕ, ಅಂವೊಂಡ ಮೇಲ್‌ಲ್ ಉಳ್ಳ ಕೂಳಿ ಅಂವೊನ ಅಡಿಕ್ ತಳ್ಳಿತ್ ಅಂವೊನ ದುಂಬ ಕುಲ್‌ಕ್‍ಚಿ. ಯೇಸು ಕೂಳಿನ ಚೂಕಿತ್, ಕುಂಞಿನ ವಾಸಿ ಮಾಡಿತ್ ಅಂವೊಂಡ ಅಪ್ಪಂಡ ಪಕ್ಕ ಅಯಿಚತ್. 43 ಅಕ್ಕ ಎಲ್ಲಾ ಜನಳು ದೇವಡ ಮಹತ್ವತ್‌ನ ಕಂಡಿತ್ ಆಶ್ಚರ್ಯ ಪಟ್ಟತ್. ಯೇಸು ಮಾಡ್‍ನ ಎಲ್ಲಾ ಅದ್ಬುತತ್‌ನ ಕಂಡ ಜನ ಎಲ್ಲಾ ಆಶ್ಚರ್ಯ ಪಟ್ಟಂಡಿಪ್ಪಕ, ಯೇಸು ಅಂವೊಂಡ ಶಿಷ್ಯಂಗಕ್: ಯೇಸು ತಾಂಡ ಚಾವ್‍ರ ವಿಷಯತ್‍ನ ಎಣ್ಣುವದ್ ( ಮತ್ತಾಯ 17.22 , 23 ; ಮಾರ್ಕ 9.30–32 ) 44 ಈ ತಕ್ಕ್‌ನ ಚಾಯಿತೆ ಕ್‍ೕಳಿ; ಮನುಷ್ಯಕುಮಾರನ ಪುಡ್‌ಚಿತ್ ಮನುಷ್ಯಂಗಡ ಕೈಕ್ ಕೊಡ್‍ಪಾಂದ್ ಎಣ್ಣ್‌ಚಿ. 45 ಶಿಷ್ಯಂಗಕ್ ಯೇಸು ಎಂತ ಎಣ್ಣಿಯಂಡುಂಡ್‍ೕಂದ್ ಗೊತ್ತಾಯಿತ್‌ಲ್ಲೆ; ಅದ್ ಅಯಿಂಗಕ್ ಒರು ಗುಟ್ಟಾಯುತ್ಂಜತ್, ಎಂತ ವಿಷಯ ಎಣ್ಣಿಯಾಂದ್ ಯೇಸುನ ಕ್‍ೕಪಕು ಅಯಿಂಗಕ್ ಪೋಡಿ ಆಚಿ. ದಾರ್ ಬಲ್ಯಂವೊ? ( ಮತ್ತಾಯ 18.1–5 ; ಮಾರ್ಕ 9.33–37 ) 46 ಪಿಂಞ ದಾರ್ ಬಲ್ಯಂವೊ ಎಣ್ಣಿಯಂಡ್ ಅಯಿಂಗಯಿಂಗಳೇ ತರ್ಕ ಮಾಡ್‌ವಕ್ ಸುರು ಮಾಡ್‍ಚಿ. 47 ಯೇಸುಕ್ ಶಿಷ್ಯಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾನಗುಂಡ್, ಒರ್ ಕುಂಞಿನ ತಾಂಡ ಪಕ್ಕ ಕಾಕುವಂಜಿ ಅಂವೊಂಡ ಪಕ್ಕ ನಿಪ್ಪ್‌ಚಿಟ್ಟಿತ್, 48 ದಾರ್ ಈ ಕುಂಞಿನ ನಾಡ ಪೆದತ್‍ಲ್ ಸ್ವೀಕಾರ ಮಾಡ್‌ವ ಅಯಿಂಗ ನನ್ನ ಸ್ವೀಕಾರ ಮಾಡ್‌ವ. ನನ್ನ ಸ್ವೀಕಾರ ಮಾಡ್‌ವಂವೊ ನನ್ನ ಮಾತ್ರ ಅಲ್ಲ, ನನ್ನ ಅಯಿಚಂವೊನ ಸ್ವೀಕಾರ ಮಾಡ್‌ವಾಂದ್ ಎಣ್ಣ್‌ಚಿ. ನಿಂಗಡಲ್ಲಿ ದಾರ್ ಚೆರಿಯಂವೊನಾಯಿತಿಪ್ಪ ಅಂವೊ ನಿಂಗಕೆಲ್ಲಾ ಬಲ್ಯಂವೊನಾಯಿತಿಪ್ಪಾಂದ್ ಎಣ್ಣ್‌ಚಿ. ನಂಗಳ ವಿರೋದ ಮಾಡತಯಿಂಗಡ ವಿಷಯ ( ಮಾರ್ಕ 9.38–40 ) 49 ಉಪಾದ್ಯನೇ, ನೀಡ ಪೆದ ಎಣ್ಣಿಯಂಡ್ ಒಬ್ಬ ಕೂಳಿ ಬುಡ್‍ತಿಯಂಡಿಂಜದ್‍ನ ನಂಗ ಕಂಡತ್, ಆಚೇಂಗಿ ಅಂವೊ ನಂಗಡ ಗುಂಪ್‌ಲ್ ಇಲ್ಲತಗುಂಡ್ ನಂಗ ಅಂವೊನ ನಿಪ್ಪ್‌ಚಿಟ್ಟತ್‍ೕಂದ್ ಯೋಹಾನ ಎಣ್ಣ್‌ಚಿ. 50 ಅದ್ಂಗ್ ಯೇಸು: ಅಂವೊನ ನಿಪ್ಪ್‌ಚಿಡಂಡ; ನಿಂಗಕ್ ವಿರೋದವಾಯಿತಲ್ಲತಂವೊ ನಿಂಗಡ ಗುಂಪ್‌ಕ್ ಕೂಡ್‍ನಂವೊನೇಂದ್ ಎಣ್ಣ್‌ಚಿ. 51 ಪರಲೋಕಕ್ ಅಂವೊನ ಎಡ್‌ತ ಪೋಪಕ್ ಸಮಯ ಪಕ್ಕ ಬಂದಂಡಿಪ್ಪಕ, ಯೇಸು ಯೆರೂಸಲೇಮ್‌ಕ್ ಪೋಪಕ್ ಗೇನ ಮಾಡ್‍ಚಿ. 52 ಯೇಸು ತಾಂಡ ಮಿಂಞಕ್ ವರ್ತಮಾನ ಎಡ್‌ತ ಪೋಪಯಿಂಗಳ ಅಯಿಚತ್. ಅಯಿಂಗ ಪೋಯಿತ್, ಅಂವೊಂಗ್ ಜಾಗತ್‍ನ ತಯಾರ್ ಮಾಡ್‌ವಕ್ ಸಮಾರ್ಯ ನಾಡ್‍ರ ಒರು ಊರ್‌ಕ್ ಪೋಚಿ. 53 ಆಚೇಂಗಿ ಯೇಸು ಯೆರೂಸಲೇಮ್‌ಕ್ ಪೋಪಕ್ ತೀರ್ಮಾನ ಮಾಡ್‍ಚೀಂದ್ ಅಲ್ಲಿಯತ್‍ರ ಜನಕ್ ಗೊತ್ತಾನಗುಂಡ್ ಅಂವೊನ ಸತ್ಕಾರ ಮಾಡಿತ್‌ಲ್ಲೆ. 54 ಯಾಕೋಬ ಪಿಂಞ ಯೋಹಾನ ಇದ್‍ನ ಕಂಡದು: ಸ್ವಾಮೀ, ಅಯಿಂಗಳ ಪಾಳ್ ಮಾಡ್‌ವಕ್ ನಂಗ ಪರಲೋಕತ್ಂಜ ತಿತ್ತ್‌ನ ಅಡಿಕ್ ಕೊಂಡ್‍ಬರಂಡುವಾಂದ್ ಯೇಸುನ ಕ್‍ೕಟತ್. 55 ಯೇಸು ಅಯಿಂಗಳ ತಿರಿತ್ ನೋಟಿತ್ ಅಯಿಂಗಳ ಚೂಕ್‌ಚಿ. 56 ಮನುಷ್ಯಕುಮಾರ ಮನುಷ್ಯಂಗಡ ಜೀವತ್‍ನ ಪಾಳ್ ಮಾಡ್‌ವಕ್ ಅಲ್ಲ, ರಕ್ಷಣೆ ಮಾಡ್‌ವಕ್ ಬಾತ್‍ೕಂದ್ ಎಣ್ಣ್‌ಚಿ. ಅಲ್ಲಿಂಜ ಬೋರೆ ಊರ್‌ಕ್ ಅಯಿಂಗ ಪೋಚಿ. ಯೇಸುರ ಬಯ್ಯತ್ ಪೋಪಕ್ ಕೊಡ್‍ಪ ಬೆಲೆ ( ಮತ್ತಾಯ 8.19–22 ) 57 ಅಯಿಂಗ ಪೋಯಂಡಿಪ್ಪಕ ಒಬ್ಬ: ಸ್ವಾವಿ ನೀನ್ ಎಲ್ಲಿ ಪೋಚೇಂಗಿಯು ನಾನ್ ನೀಡ ಕೂಡೆ ಬಪ್ಪೀಂದ್ ಎಣ್ಣ್‌ಚಿ. 58 ಅದ್ಂಗ್ ಯೇಸು: ಕುರ್‌ಕಂಗ ವಾಸ ಮಾಡ್‌ವಕ್ ತೂತ ಉಂಡ್, ಬಾನತ್‍ರ ಪಕ್ಷಿಯಕ್ ಗೂಡ್ ಉಂಡ್, ಆಚೇಂಗಿ ಮನುಷ್ಯಕುಮಾರಂಗ್ ಮಂಡೆ ಬೆಪ್ಪಕ್ ಜಾಗ ಇಲ್ಲೇಂದ್ ಎಣ್ಣ್‌ಚಿ. 59 ಇಂಞೊರ್ ಮನುಷ್ಯಂಗ್: ನಾಡ ಬಯ್ಯ ಬಾಂದ್ ಎಣ್ಣ್‌ಚಿ. ಅದ್ಂಗ್ ಅಂವೊ: ಒಡೆಯನೇ, ನಾನ್ ಮಿಂಞ ಪೋಯಿತ್ ನಾಡ ಅಪ್ಪನ ಪೂತಿತ್ ಬಪ್ಪೀಂದ್ ಎಣ್ಣ್‌ಚಿ. 60 ಅದ್ಂಗ್ ಯೇಸು: ಚತ್ತಯಿಂಗ ಚತ್ತಯಿಂಗಳ ಪೂತಡ್; ನೀನ್ ಪೋಯಿತ್ ದೇವಡ ರಾಜ್ಯತ್‍ರ ವಿಷಯತ್‍ನ ಪ್ರಚಾರ ಮಾಡ್‍ೕಂದ್ ಎಣ್ಣ್‌ಚಿ. 61 ಬೋರೆ ಒರ್ ಮನುಷ್ಯ: ನಾನ್ ನೀಡ ಬಯ್ಯ ಬಪ್ಪಿ, ಆಚೇಂಗಿ ಅದ್ಂಗಿಂಜ ಮಿಂಞ ನಾನ್ ಪೋಯಿತ್ ನಾಡ ಮನೆಕಾರಕ್ ಎಣ್ಣಿತ್ ಬಪ್ಪೀಂದ್ ಎಣ್ಣ್‌ಚಿ. 62 ಅದ್ಂಗ್ ಯೇಸು: ದಾರ್ ನೇಂಗಿಲ್ ಕೈ ಇಟ್ಟ ಪಿಂಞ ಬಯ್ಯಕ್ ತಿರಿತ್ ನೋಟಿಯಂಡ್ ಇಪ್ಪ ಅಂವೊ ದೇವಡ ರಾಜ್ಯತ್‍ರ ಸೇವೇಕ್ ಯೋಗ್ಯನಾಯಿತ್‌ಪ್ಪುಲೇಂದ್ ಎಣ್ಣ್‌ಚಿ. |
© 2017, New Life Literature (NLL)