ಯೋಹಾನ 20 - ಕೊಡವ ಬೈಬಲ್ಕಾಲಿಯಾನ ಗೋರಿ ( ಮತ್ತಾಯ 28.1–8 ; ಮಾರ್ಕ 16.1–8 ; ಲೂಕ 24.1–12 ) 1 ವಾರತ್‍ರ ಆದ್ಯ ನಾಳಾನ ನಾರಾಚೆ ಪೊಲಾಕ ನೇರತೆ, ಸೂರ್ಯ ಉದಿಪಕ್ ಮಿಂಞಲೇ, ಮಗ್ದಲ ಮರಿಯ ಗೋರಿರ ಪಕ್ಕ ಬಪ್ಪಂಜಿ, ಗೋರಿನ ಮುಚ್ಚಿತ್‌ಂಜ ಕಲ್ಲ್, ಗೋರಿರ ಪಡಿಯಿಂಜ ಎಡ್‌ತಿತಿಪ್ಪಾನ ಕಂಡತ್. 2 ಅಕ್ಕ ಅವ ಸೀಮೋನ ಪೇತ್ರ ಪಿಂಞ ಯೇಸು ದುಂಬ ಪ್ರೀತಿ ಬೆಚ್ಚಿತ್ಂಜ ಶಿಷ್ಯಂಗಡ ಪಕ್ಕ ಓಡಿ ಪೋಯಿತ್ ನಂಗಡ ಒಡೆಯನ ಗೋರಿಯಿಂಜ ದಾರೋ ಎಡ್‍ತಂಡ್ ಪೋಯಿರ್‌ತ್. ಅಂವೊನ ಎಲ್ಲಿ ಬೆಚ್ಚತ್‍ೕಂದ್ ನಂಗಕ್ ಗೊತ್ತ್‌ಲ್ಲೇಂದ್ ಎಣ್ಣ್‌ಚಿ. 3 ಅಕ್ಕ, ಪೇತ್ರ ಪಿಂಞ ಆ ಬೋರೆ ಶಿಷ್ಯ ಗೋರಿಕ್ ಪೋಪಕ್ ಪೊರಟತ್. ದಂಡಾಳು ಒಕ್ಕಚೆ ಓಡ್‍ಚಿ. 4 ಪೇತ್ರಕಿಂಜ ಆ ಬೋರೆ ಶಿಷ್ಯ ಜೋರಾಯಿತ್ ಓಡಿತ್, ಅಂವೊಂಗ್ ಮಿಂಞಲೇ ಗೋರಿಕ್ ಎತ್ತ್‌ಚಿ. 5 ಆ ಶಿಷ್ಯ ಗೋರಿರ ಒಳ್‍ಕ್ ಬಗ್ಗಿತ್ ನೋಟ್‍ವಕ, ಅಲ್ಲಿ ಬರಿ ಯೇಸುನ ಸುತ್ತ್‌ನ ಬೊಳ್‍ತ ಬಟ್ಟೆ ಮಾತ್ರ ಇಪ್ಪದ್‍ನ ಕಂಡತ್; ಆಚೇಂಗಿಯು ಅದ್ಂಡ ಒಳ್‍ಕ್ ಪೋಯಿತ್‌ಲ್ಲೆ. 6 ಸೀಮೋನ ಪೇತ್ರ ಅಂವೊಂಡ ಬಯ್ಯಕ್ ಬಾತ್. ಅಂವೊ ನೇರೆ ಗೋರಿರ ಒಳ್‍ಕ್ ಪೋಚಿ. ಅಲ್ಲಿ ಅಂವೊ ಯೇಸುರ ಮೇಲೆ ಇಟ್ಟಿತ್ಂಜ ನಾರ್ ಬಟ್ಟೆ ಅಲ್ಲಿ ಇಪ್ಪಾನ ಕಂಡತ್. 7 ಅಂವೊ ಯೇಸುನ ಸುತ್ತ್‌ನ ಬಟ್ಟೆ ಅಲ್ಲಿ ಇಂಜದ್‍ನ ಪಿಂಞ ಯೇಸುರ ಮಂಡೆಕ್ ಸುತ್ತ್‌ನ ಬಟ್ಟೇನ ಬೋರೆ ಬಟ್ಟೆಯಿಂಜ ಬೋರೆ ಮಾಡಿತ್ ಅಲ್ಲಿ ಸುತ್ತಿತ್ ಇಂಜಾನ ಕಂಡತ್. 8 ಮಿಂಞಕ್ ಬಂದ ಶಿಷ್ಯ ಸಹ ಇಕ್ಕ ಒಳ್‍ಕ್ ಪೋಯಿತ್, ಇದ್‍ನೆಲ್ಲ ಕಂಡಿತ್ ನಂಬ್‍ಚಿ. 9 ಯೇಸು ಚತ್ತಯಿಂಗ ಮದ್ಯತ್ಂಜ ಪುನಃ ಜೀವವಾಯಿತ್ ಬರಂಡೂಂದ್ ಉಳ್ಳ ದೇವಡ ವಾಕ್ಯ ಇಲ್ಲಿಕತ್ತನೆ ಗೇನಬಂದಿತ್‌ಲ್ಲೆ. 10 ಪಿಂಞ ಆ ದಂಡ್ ಶಿಷ್ಯಂಗಳು ಅಯಿಂಗಡ ಜಾಗಕ್ ಪೋಚಿ. ಯೇಸು ಮಗ್ದಲ ಮರಿಯಕ್ ಅಂವೊನ ಕಾಂಬ್‍ಚಿಡುವದ್ ( ಮತ್ತಾಯ 28.9 , 10 ; ಮಾರ್ಕ 16.9–11 ) 11 ಇಕ್ಕ, ಮರಿಯ ಗೋರಿರ ಪೊರಮೆ ಮೊರಟಂಡ್ ಇಂಜತ್; ಅನ್ನನೆ ಅವ ಮೊರಟಂಡ್ ಇಪ್ಪಕಾಪಕ ಅವ ಬಗ್ಗಿತ್ ಗೋರಿರ ಒಳ್‍ಲ್ ನೋಟ್‌ಚಿ. 12 ಅಕ್ಕ, ಯೇಸುರ ತಡೀನ ಬೆಚ್ಚಿತ್ಂಜ ಜಾಗತ್‍ಲ್, ಬೊಳ್‍ತ ಬಟ್ಟೆ ಇಟ್ಟಿತ್ಂಜ ದಂಡ್ ದೇವದೂತಂಗ ಅಳ್‌ತಿತ್‌ಪ್ಪದ್‍ನ ಕಂಡತ್. ಒಬ್ಬ ಯೇಸುರ ಮಂಡೆ ಬೆಚ್ಚಿತ್ಂಜ ಜಾಗತ್‍ಲ್, ಇಂಞೊಬ್ಬ ಯೇಸುರ ಕಾಲ್ ಇಂಜ ಜಾಗತ್‍ಲ್ ಅಳ್‍ತಂಡಿಂಜತ್. 13 ಅಯಿಂಗ ಅವಳ ನೋಟಿತ್: ಅವ್ವ, ನೀನ್ ಎನ್ನಂಗ್ ಮೊರಟಂಡ್ ಉಳ್ಳಿಯಾಂದ್ ಕ್‍ೕಟತ್. ಅಯಿಂಗಕ್ ಅವ: ನಾಡ ಒಡೆಯನ ದಾರೋ ಎಡ್‍ತಂಡ್ ಪೋಯಿರ್‌ತ್, ಅಯಿಂಗ ಎಲ್ಲಿ ಇಟ್ಟತೋ ನಾಕ್ ಗೊತ್ತಿಲ್ಲೇಂದ್ ಅವ ಎಣ್ಣ್‌ಚಿ. 14 ಇನ್ನನೆ ಎಣ್ಣಿತ್ ಅವ ತಿರಿತ್ ನೋಟ್‌ವಕಾಪಕ, ಯೇಸು ನಿಂದಿತ್ಂಜಾನ ಕಂಡತ್. ಆಚೇಂಗಿ ಅವಕ್ ಅಂವೊ ಯೇಸೂಂದ್ ಗೊತ್ತಾಯಿತ್‌ಲ್ಲೆ. 15 ಯೇಸು ಅವಳ ನೋಟಿತ್: ಅವ್ವ, ನೀನ್ ಎನ್ನಂಗ್ ಮೊರಟಂಡ್ ಉಳ್ಳಿಯಾ? ನೀನ್ ದಾರ್‌ನ ತ್‍ೕಡಿಯಂಡ್ ಉಳ್ಳಿಯಾಂದ್ ಕ್‍ೕಟತ್. ಅಕ್ಕ ಅವ, ಯೇಸುನ ಆ ತೋಟಕಾರಾಂದ್ ಗೇನ ಮಾಡಿತ್: ಸ್ವಾಮೀ, ನೀನ್ ಅಂವೊನ ಎಡ್‍ತಿತ್ ಉಂಡೇಂಗಿ, ಅಂವೊನ ಎಲ್ಲಿ ಬೆಚ್ಚಿತುಳ್ಳಿಯಾಂದ್ ನಾಕ್ ಎಣ್ಣ್, ನಾನ್ ಪೋಯಿತ್ ಅಂವೊನ ಎಡ್‌ತ ಬಪ್ಪೀಂದ್ ಎಣ್ಣ್‌ಚಿ. 16 ಯೇಸು ಅವಳ ನೋಟಿತ್: ಮರಿಯಾಂದ್ ಕಾಕ್‍ಚಿ. ಅವ ಅಂವೊನ ತಿರಿತ್ ನೋಟುವಂಜಿ: ರಬ್ಬೂನೀಂದ್ ಎಣ್ಣ್‌ಚಿ. ಅದ್ಂಡ ಅರ್ಥ ಅರಾಮಿಯ ತಕ್ಕ್‌ಲ್ ಉಪಾದ್ಯನೇಂದ್ ಆಪ. 17 ಯೇಸು ಅವಳ ನೋಟಿತ್: ನೀನ್ ನನ್ನ ಮುಟ್ಟತೆ, ಎನ್ನಂಗೆಣ್ಣ್‌ಚೇಂಗಿ, ನಾನ್ ನಾಡ ಅಪ್ಪಂಡ ಪಕ್ಕ ಇಂಞು ಪೋಯಿತ್‌ಲ್ಲೆ; ನೀನ್ ನಾಡ ತಮ್ಮಣಂಗಡ ಪಕ್ಕ ಪೋಯಿತ್, ನಾನ್ ನಾಡ ಅಪ್ಪಂಡ ಪಕ್ಕವು ನಿಂಗಡ ಅಪ್ಪಂಡ ಪಕ್ಕವು, ನಾಡ ದೇವಡ ಪಕ್ಕವು, ನಿಂಗಡ ದೇವಡ ಪಕ್ಕವು ಪೋಯಂಡುಳ್ಳ್‌ಂದ್ ಎಣ್ಣ್‍ೕಂದ್ ಎಣ್ಣ್‌ಚಿ. 18 ಮಗ್ದಲ ಮರಿಯ, ಶಿಷ್ಯಂಗಡ ಪಕ್ಕ ಪೋಯಿತ್ ಅವ ಒಡೆಯನ ನೋಟ್‍ಚೀಂದ್ ಪಿಂಞ ಅಂವೊ ತಾಂಡ ಪಕ್ಕ ಎಣ್ಣ್‌ನಾನ ಎಣ್ಣ್‌ಚಿ. ಯೇಸು ಅಂವೊಂಡ ಶಿಷ್ಯಂಗಕ್ ಕಾಂಬ್‍ಚಿಟ್ಟದ್ ( ಮತ್ತಾಯ 28.16–20 ; ಮಾರ್ಕ 16.14–18 ; ಲೂಕ 24.36–49 ) 19 ಆ ದಿವಸ ವಾರತ್‍ರ ಆದ್ಯ ನಾಳಾನ ನಾರಾಚೆ ಆಯಿತ್ಂಜತ್. ಅಂದ್ ಬೈಟಾಪಕ, ಯೇಸುರ ಶಿಷ್ಯಂಗ ಒಟ್ಟ್ ಕೂಡಿತ್ ಇಂಜ ಜಾಗತ್‍ಲ್, ಯೆಹೂದ್ಯಂಗಕ್ ಬೊತ್ತಿಯಂಡಿಂಜಗುಂಡ್, ಪಡಿ ಇಟ್ಟಿತ್ ಒಳ್‍ಲ್ ಇಂಜತ್. ಅಕ್ಕ ಯೇಸು ಅಲ್ಲಿಕ್ ಬಪ್ಪಂಜಿ ಅಯಿಂಗಡ ಮದ್ಯತ್‍ಲ್ ನಿಂದಂಡ್: ನಿಂಗಕ್ ಸಮಾದಾನಾಂದ್ ಎಣ್ಣ್‌ಚಿ. 20 ಅಂವೊ ಇನ್ನನೆ ಎಣ್ಣ್‌ನ ಪಿಂಞ ಅಂವೊಂಡ ಕೈಯಿನ ಪಿಂಞ ಬಗ್ಗ್‌ರೀನ ಅಯಿಂಗಕ್ ಕಾಟ್‍ಚಿ. ಅಂವೊನ ಕಂಡಾಂಗ್ ಶಿಷ್ಯಂಗಕೆಲ್ಲ ಬಾರಿ ಕುಶಿ ಆಯಿಪೋಚಿ. 21 ಯೇಸು ಇಂಞೊರ್ ಕುರಿ ನಿಂಗಕ್ ಸಮಾದಾನ ಆಡ್; ನಾಡ ಅಪ್ಪ ನನ್ನ ಅಯಿಚನೆಕೆ ನಿಂಗಳ ನಾನು ಅಯಿಚಂಡುಳ್ಳ್‌ಂದ್ ಎಣ್ಣಿತ್, 22 ಅಯಿಂಗಡ ಮೇಲೆ ಊದಿತ್: ಪವಿತ್ರಾತ್ಮ ನಿಂಗಕ್ ಕ್‍ಟ್ಟಡ್, 23 ನಿಂಗ ದಾಡ ಪಾಪತ್‍ನ ಮನ್ನಿಚಿಡ್‌ವಿರ, ಆ ಪಾಪತ್ಂಜ ಅಯಿಂಗಕ್ ಮನ್ನಿಪ್ ಕ್‍ಟ್ಟುವ, ದಾಡ ಪಾಪತ್‍ನ ಮನ್ನಿಚಿಡುಲೆ ಅಯಿಂಗಕ್ ಆ ಪಾಪತ್ಂಜ ಮನ್ನಿಪ್ ಕ್‍ಟ್ಟ್‌ಲೇಂದ್ ಎಣ್ಣ್‌ಚಿ. ಯೇಸು ಪಿಂಞ ತೋಮ 24 ಯೇಸು ಬಂದಿತ್‌ಪ್ಪಕ, ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಇಂಜ ದಿದುಮ ಎಣ್ಣುವ ತೋಮ ಎಣ್ಣ್‌ವಂವೊ ಅಯಿಂಗಡ ಕೂಡೆ ಇಂಜಿತ್‌ಲ್ಲೆ. 25 ಬೋರೆ ಶಿಷ್ಯಂಗ: ತೋಮ ಬಂದ ಪಿಂಞ, ನಂಗ ಒಡೆಯನ ಕಂಡತ್‍ೕಂದ್ ಎಣ್ಣ್‌ಚಿ. ಅಕ್ಕ ಅಂವೊ: ನಾನ್ ಅಂವೊಂಡ ಆಣಿ ಅಡಿಚಿತ್ ತೂತ ಆನ ಕೈಯಿನ ನೋಟಿತ್, ಆ ಗಾಯತ್‍ನ ನಾನ್ ಮುಟ್ಟಿತ್, ನಾಡ ಕೈಯಿನ ಅಂವೊಂಡ ಬಗ್ಗ್‌ರೀಲ್ ಇಟ್ಟಿತ್ ನೋಟ್‍ಚೇಂಗಿ ಮಾತ್ರ ನಾನ್ ನಿಂಗ ಎಣ್ಣ್‌ನಾನ ನಂಬುವಿ ಇಲ್ಲತಪೋನಕ ನಾನ್ ನಂಬುಲೇಂದ್ ಎಣ್ಣ್‌ಚಿ. 26 ಪುನಃ ಎಟ್ಟ್ ದಿವಸ ಆನ ಪಿಂಞ, ಯೇಸುರ ಶಿಷ್ಯಂಗ ಪಡಿ ಇಟ್ಟಂಡ್ ಒಳ್‍ಲ್ ಇಂಜತ್. ಅಯಿಂಗಡ ಕೂಡೆ ಇಕ್ಕ ತೋಮ ಸಹ ಇಂಜತ್. ಎಲ್ಲಾ ಪಡಿಕ್ ಬೀಗ ಇಟ್ಟಿತ್ಂಜತ್. ಅಕ್ಕ ಯೇಸು ಅಯಿಂಗಡ ಮದ್ಯತ್‍ಲ್ ಬಪ್ಪಂಜಿ, ನಿಂಗಕ್ ಸಮಾದಾನ ಇಕ್ಕಡ್‍ೕಂದ್ ಎಣ್ಣ್‌ಚಿ. 27 ಪಿಂಞ ಯೇಸು ತೋಮನ ಕಾಕಿತ್: ನೀಡ ಕೈ ಬೆರತ್‌ನ ಇಲ್ಲಿ ನ್‍ೕಟಿತ್ ನಾಡ ಕೈಯಿನ ನೋಟ್, ನೀಡ ಕೈಯಿನ ನೀಟುವಂಜಿ ನಾಡ ಬಗ್ಗ್‌ರೀಲ್ ಇಡ್. ನೀಡ ಅಪನಂಬಿಕೇನ ಬುಡ್, ನನ್ನ ನಂಬ್‍ೕಂದ್ ಯೇಸು ಎಣ್ಣ್‌ಚಿ. 28 ಅಕ್ಕ ತೋಮ: ನಾಡ ಒಡೆಯನೇ ನಾಡ ದೇವನೇಂದ್ ಎಣ್ಣ್‌ಚಿ. 29 ಯೇಸು ಅಂವೊಂಗ್: ನೀನ್ ನನ್ನ ನೋಟ್‍ನಗುಂಡ್ ನಂಬುವಿಯ, ನನ್ನ ಕಾಂಗತೆ ನಂಬುವಯಿಂಗ ಆಶೀರ್ವಾದ ಪಡ್ಂದಯಿಂಗಾಂದ್ ಎಣ್ಣ್‌ಚಿ. ಈ ಪುಸ್ತಕತ್‍ರ ಉದ್ದೇಶ 30 ಈ ಪುಸ್ತಕತ್‍ಲ್ ಒಳ್‍ದ್‍ನದ್ ಅಲ್ಲತೆ, ಇಂಞು ದುಂಬ ಅದ್ಬುತ ಕಾರ್ಯತ್‍ನ ತಾಂಡ ಶಿಷ್ಯಂಗಡ ಮಿಂಞತ್‍ಲ್ ಮಾಡಿತ್ಂಜತ್. 31 ಯೇಸು ದೇವಡ ಮೋಂವೊನಾನ ಕ್ರಿಸ್ತಾಂದ್ ನಿಂಗ ನಂಬುವಕಾಯಿತ್ ಪಿಂಞ ಅಂವೊನ ನಂಬುವಗುಂಡ್, ಅಂವೊಂಡ ಪೆದತ್‍ಲ್ ನಿಂಗಕ್ ನಿತ್ಯ ಜೀವ ಕ್‍ಟ್ಟುವಕಾಯಿತ್ ಇದ್‍ನೆಲ್ಲ ಒಳ್‍ದಿತುಂಡ್. |
© 2017, New Life Literature (NLL)