ಯೋಹಾನ 19 - ಕೊಡವ ಬೈಬಲ್ಯೇಸುನ ಶಿಲುಬೇಲ್ ಇಡ್‌ವಕ್ ತೀರ್ಮಾನ ಮಾಡ್‍ವದ್ 1 ಅಲ್ಲಿಂಜ ಪಿಲಾತ ಯೇಸುನ ಒಳ್‍ಕ್ ಕೊಂಡ್ ಪೋಯಿತ್ ಕೊರಡ್‍ಲ್ ಪೊಯ್ಯುವಕ್ ಎಣ್ಣ್‌ಚಿ. 2 ಪಿಂಞ ಸಿಪಾಯಿಯಂಗ ಮುಳ್ಳ್ ಕಿರೀಟತ್‍ನ ಮಾಡ್‌ವಂಜಿ ಅಂವೊಂಡ ಮಂಡೆಕ್ ಬೆಚ್ಚತ್. ಪಿಂಞ ಅಂವೊಂಡ ಮೇಲ್‌ಕ್ ಒರ್ ಚೋಂದ ರಂಗ್‍ರ ಬಟ್ಟೇನ ಇಟ್ಟತ್. 3 ಈಂಗೆಲ್ಲಾ ಯೇಸುರ ಪಕ್ಕ ಪುನಃ ಪುನಃ ಬಂದಿತ್ ಯೆಹೂದ್ಯಂಗಡ ರಾಜನೇ ಕಾಲಕಾಲಕ್ ಬದ್‌ಕ್‍ೕಂದ್ ಎಣ್ಣಿಯಂಡ್ ಅಂವೊಂಡ ದವಡೆಕ್ ಪೊಜ್ಜತ್. 4 ಪಿಲಾತ ಪುನಃ ಪೊರಮೆ ಜನಡ ಪಕ್ಕ ಬಂದಿತ್, ನೋಟಿ, ಇಂವೊಂಡ ಮೇಲೆ ಒರ್ ತಪ್ಪು ನಾನ್ ಕಂಡಂಡಿಲ್ಲೆ. ಇಂವೊನ ಇಕ್ಕ ಪೊರಮೆ ಕಾಕಿಯಂಡ್ ಬಪ್ಪೀಂದ್ ಎಣ್ಣ್‌ಚಿ. 5 ಅಕ್ಕ, ಯೇಸು ಮುಳ್ಳ್ ಕಿರೀಟ ಇಟ್ಟಂಡ್, ನೀಲಿ ಪಿಂಞ ಚೋಂದ ರಂಗ್‍ರ ಉಡ್‍ಪ್‍ನ ಇಟ್ಟಂಡ್ ಪೊರಮೆ ಬಾತ್. ಅಕ್ಕ ಪಿಲಾತ, ಈ ಮನುಷ್ಯನ ನೋಟೀಂದ್ ಎಣ್ಣ್‌ಚಿ. 6 ಮುಕ್ಯ ಯಾಜಕಂಗ ಪಿಂಞ ಅದಿಕಾರಿಯಂಗ ಯೇಸುನ ಕಾಂಬಕ, ಇಂವೊನ ಶಿಲುಬೇಕ್ ಇಡಿ, ಇಂವೊನ ಶಿಲುಬೇಕ್ ಇಡೀಂದ್ ಕೂತ್ ಕೊಡ್‍ತತ್. ಅಕ್ಕ ಪಿಲಾತ: ನಿಂಗಳೇ ಇಂವೊನ ಕೊಂಡ್ ಪೋಯಿತ್ ನಿಂಗಳೇ ಶಿಲುಬೇಕ್ ಇಡಿ, ನಾಕ್ ಅಂವೊಂಡ ಮೇಲೆ ಒರ್ ತಪ್ಪು ಕಾಂಬಕ್ ಕಯಿಂಜಿತ್‌ಲ್ಲೇಂದ್ ಎಣ್ಣ್‌ಚಿ. 7 ಯೆಹೂದ್ಯಂಗ ಪಿಲಾತನ ನೋಟಿತ್: ನಂಗಕ್ ಒರ್ ನ್ಯಾಯಪ್ರಮಾಣ ಉಂಡ್. ಅದ್ಂಡ ಪ್ರಕಾರ ಇಂವೊ ಚಾವಂಡು. ಎನ್ನಂಗೆಣ್ಣ್‌ಚೇಂಗಿ ಇಂವೊ ತಾನ್ ದೇವಡ ಮೋಂವೋಂದ್ ಎಣ್ಣ್‌ಚೀಂದ್ ಎಣ್ಣ್‌ಚಿ. 8 ಪಿಲಾತ ಇನ್ನತ ತಕ್ಕ್‌ನ ಕ್‍ೕಪದು ಇಂಞು ಅಂವೊಂಗ್ ಪೋಡಿ ಆಚಿ. 9 ಅಂವೊ ಪುನಃ ಅರಮನೆರ ಒಳ್‍ಕ್ ಪೋಪಂಜಿ, ನೀನ್ ಎಲ್ಲಿಂಜ ಬಾತ್‍ೕಂದ್ ಯೇಸುನ ಕ್‍ೕಟತ್? ಯೇಸು ಅಂವೊಂಡ ಪ್ರಶ್ನೆಕ್ ಉತ್ತರ ಕೊಡ್‍ಕತೆ ಇಂಜತ್. 10 ನೀನ್ ನಾಕ್ ಉತ್ತರ ತಪ್ಪ್‌ಲೆಯಾ? ನಿನ್ನ ನಾನ್ ಬುಡುಗಡೆ ಮಾಡ್‌ವಕು, ನಿನ್ನ ಶಿಲುಬೇಕ್ ಇಡ್‌ವಕು ನಾಕ್ ಅದಿಕಾರ ಉಂಡ್‍ೕಂದ್ ನೀಕ್ ಗೊತ್ತ್‌ಲ್ಲೆಯಾಂದ್ ಪಿಲಾತ ಯೇಸುನ ಕ್‍ೕಟತ್. 11 ಅಕ್ಕ ಯೇಸು ಅಂವೊಂಗ್: ದೇವ ನೀಕ್ ನಾಡ ಮೇಲೆ ಅದಿಕಾರ ಕೊಡ್‍ಕತೆ ಪೋನಕ ನೀಕ್ ನಾಡ ಮೇಲೆ ಏದ್ ಅದಿಕಾರವು ಇಲ್ಲೆ; ಆನಗುಂಡ್ ನನ್ನ ನೀಡ ಕೈಯಿಲ್ ಪುಡ್‌ಚಿತ್ ಕೊಡ್‍ತಯಿಂಗಕ್ ನೀಕಿಂಜ ದುಂಬ ಪಾಪ ಉಂಡ್‍ೕಂದ್ ಎಣ್ಣ್‌ಚಿ. 12 ಈ ತಕ್ಕ್‌ನ ಕ್‍ೕಟ ಪಿಂಞ, ಪಿಲಾತ ಯೇಸುನ ಎನ್ನನಾಚೇಂಗಿಯು ಬುಡುಗಡೆ ಮಾಡ್‌ವಕ್ ಬಟ್ಟೆ ನೋಟಿಯಂಡ್ ಇಂಜತ್. ಆಚೇಂಗಿ ಯೆಹೂದ್ಯ ಜನಡ ಗುಂಪ್, ನೀನ್ ಅಂವೊನ ಬುಟ್ಟ್‌ರ್‍ತೇಂಗಿ ನೀನ್ ಕೈಸರಂಗ್ ವಿರೋದವಾಯಿತ್ ಮಾಡ್‌ವಿಯ. ದಾರ್ ಒಬ್ಬ ಅಂವೊನ ರಾಜಾಂದ್ ಎಣ್ಣಿಯಂಡ್ ಉಂಡೋ, ಅಂವೊ ಕೈಸರಂಗ್ ವಿರೋದಿ ಆಯಿತಿಪ್ಪಾಂದ್ ಎಣ್ಣಿಯಂಡ್ ಇಂಜತ್. 13 ಪಿಲಾತ ಇದ್‍ನ ಕ್‍ೕಟದು, ಅಂವೊ ಯೇಸುನ ಪೊರಮೆ ಕಾಕಿಯಂಡ್ ಪೋಯಿತ್, ಅಂವೊ ನ್ಯಾಯತೀರ್ಪ್ ಕೊಡ್‍ಪಕ್ ಅಳ್‌ಪ, ಗಬ್ಬಥಾ ಎಣ್ಣಿಯಂಡ್ ಅರಾಮಿಯ ತಕ್ಕ್‌ಲ್ ಕಾಕುವ ಕಲ್ಲ್ ಇಟ್ಟಿತುಳ್ಳ ವೇದಿಕೆರ ಮೇಲೆ ಅಳ್‌ತತ್. 14 ಅಕ್ಕ ಮಜ್ಜಣತ್‍ರ ನೇರ ಆಯಿತ್ಂಜತ್. ಆ ದಿವಸ ಪಸ್ಕ ನಮ್ಮೆಕ್ ತಯಾರಾಪ ನಾಳಾಯಿತ್ಂಜತ್. ಇಲ್ಲಿ ನೋಟಿ, ನಿಂಗಡ ರಾಜಾಂದ್ ಪಿಲಾತ ಯೆಹೂದ್ಯಂಗಕ್ ಎಣ್ಣ್‌ಚಿ. 15 ಅಕ್ಕ ಜನ: ಇಂವೊನ ಕೊಂಡ್ ಪೋ, ಕೊಂಡ್ ಪೋ, ಇಂವೊನ ಶಿಲುಬೇಕ್ ಇಡೀಂದ್ ಜನಡ ಗುಂಪ್ ಕೂತ್ ಕೊಡ್‍ತತ್. ಅದ್ಂಗ್: ನಿಂಗಡ ರಾಜನ ನಾನ್ ಶಿಲುಬೇಕ್ ಇಡ್‌ವದಾಂದ್ ಪಿಲಾತ ಕ್‍ೕಟತ್. ಅಕ್ಕ, ಮುಕ್ಯ ಯಾಜಕಂಗ: ಕೈಸರ ಅಲ್ಲತೆ ನಂಗಕ್ ಬೋರೆ ರಾಜ ಇಲ್ಲೇಂದ್ ಎಣ್ಣ್‌ಚಿ. 16 ಅಕ್ಕ ಪಿಲಾತ ಯೇಸುನ ಶಿಲುಬೇಕ್ ಇಡ್‌ವಕ್ ಜನಡ ಪಕ್ಕ ಒಪ್ಪ್‌ಚಿಟ್ಟತ್. ಸಿಪಾಯಿಯಂಗ ಯೇಸುರ ಮೇಲೆ ಅದಿಕಾರ ಎಡ್‍ತಂಡ್ ಕೊಂಡ್ ಪೋಚಿ. ಯೇಸುನ ಶುಲುಬೇಕ್ ಇಟ್ಟದ್ ( ಮತ್ತಾಯ 27.32–44 ; ಮಾರ್ಕ 15.21–32 ; ಲೂಕ 23.26–43 ) 17 ಯೇಸು ಅಂವೊಂಡ ಶಿಲುಬೇನ ಪೊರ್‍ತಂಡ್ ಗೊಲ್ಗೊಥಾ ಎಣ್ಣುವ ಜಾಗಕ್ ಪೋಚಿ. ಗೊಲ್ಗೊಥಾ ಎಣ್ಣ್‌ಚೇಂಗಿ ಮಂಡೆರ ಓಡ್‍ೕಂದ್ ಅರಾಮಿಯ ತಕ್ಕ್‌ಲ್ ಅರ್ಥ ಆಪ. 18 ಅಲ್ಲಿ ಅಂವೊನ ಶಿಲುಬೇಕ್ ಆಣಿ ಅಡಿಚಿತ್ ಇಟ್ಟತ್; ಅಂವೊಂಡ ಕೂಡೆ ಇಂಞು ದಂಡಾಳ್‌ನ ಯೇಸುರ ಅಪ್ಪರ ಇಪ್ಪರ ಶಿಲುಬೇಕ್ ಇಟ್ಟತ್. ಯೇಸು ಅಯಿಂಗಡ ಮದ್ಯತ್‍ಲ್ ಶಿಲುಬೇಲ್ ಇಂಜತ್. 19 ಪಿಲಾತ ಜ್ಞಾಪನೇನ ಶಿಲುಬೇರ ಮೇಲೆ ಇಟ್ಟತ್. ಅದ್‍ಲ್ ನಜರೇತ್‍ರ ಯೇಸು ಯೆಹೂದ್ಯಂಗಡ ರಾಜ ಎಣ್ಣಿಯಂಡ್ ಒಳ್‍ದಿತ್ಂಜತ್. 20 ಯೇಸುನ ಶಿಲುಬೇಕ್ ಇಟ್ಟ ಜಾಗ ಪಟ್ಟಣತ್‍ರ ಪಕ್ಕ ಇಂಜಗುಂಡ್ ದುಂಬ ಯೆಹೂದ್ಯಂಗ ಈ ಜ್ಞಾಪನೇಲ್ ಒಳ್‌ದ್‌ನಾನ ಓದ್‌ಚಿ; ಇದ್‍ನ ಅರಾಮಿಯ, ಗ್ರೀಕ್ ಪಿಂಞ ಲ್ಯಾಟಿನ್ ತಕ್ಕ್‌ಲ್ ಒಳ್‍ದಿತ್ಂಜತ್. 21 ಅಕ್ಕ, ಯೆಹೂದ್ಯಂಗಡ ಮುಕ್ಯ ಯಾಜಕಂಗ ಪೋಯಿತ್, ಪಿಲಾತಂಡ ಪಕ್ಕ: ನಿಂಗ ಯೆಹೂದ್ಯ ಜನಡ ರಾಜ ಎಣ್ಣಿಯಂಡ್ ಒಳ್‌ದ್‍ವಕ್ಕಾಗ, ಇಂವೊ ನಾನ್ ಯೆಹೂದ್ಯ ಜನಡ ರಾಜಾಂದ್ ಎಣ್ಣ್‌ಚೀಂದ್ ಒಳ್‍ದ್‍ವಕ್ ಕ್‍ೕಟತ್. 22 ಪಿಲಾತ ಅಯಿಂಗಳ ನೋಟಿತ್: ನಾನ್ ಒಳ್‍ದ್‍ನದ್ ಒಳ್‍ದ್‍ನದೇ, ಅದ್‍ನ ಪುನಃ ಮಾತಿತ್ ಒಳ್‍ದ್‍ಲೇಂದ್ ಎಣ್ಣಿರ್‌ತ್. 23 ಯೇಸುನ ಸಿಪಾಯಿಯಂಗ ಶಿಲುಬೇಕ್ ಇಟ್ಟಿತಾನ ಪಿಂಞ, ಯೇಸುರ ಬಟ್ಟೇನ ಎಡ್‍ತಂಡ್, ನಾಲ್ ಬಾಗ ಮಾಡ್‍ಚಿ. ಆಚೇಂಗಿ ಅಂವೊಂಡ ಒಳ್‌ಲಿಂಜ ಬಟ್ಟೇನ ಬೋರೆ ಮಾಡಿತ್ ಬೆಚ್ಚತ್. ಅದ್‍ನ ಬಾಗ ಮಾಡ್‌ವಕ್ ಕಯಿಂಜಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ, ಆ ಬಟ್ಟೆ ಕೊಡಿಯಿಂಜ ಅಡಿಕತ್ತನೆ ಸವಂದಿತ್ಂಜತ್. 24 ಅಕ್ಕ ಸಿಪಾಯಿಯಂಗ: ಇದ್‍ನ ನಂಗ ಕೀತ್‌ವಕ್ಕಾಗ, ಈ ಬಟ್ಟೇಕ್ ನಂಗ ಚೀಟಿ ಇಡ್‌ವಂಜಿ ಆ ಚೀಟಿ ದಾರ್‌ಕ್ ಕ್‍ಟ್ಟ್‌ವ ಅಂವೊ ಇದ್‍ನ ಎಡ್‌ಕಡ್‍ೕಂದ್ ಎಣ್ಣ್‌ಚಿ. ನಾಡ ಬಟ್ಟೇನ ಪಾಲ್ ಮಾಡಿಯಂಡತ್, ನಾಡ ಬಟ್ಟೇಕಾಯಿತ್ ಚೀಟಿ ಇಟ್ಟತ್‍ೕಂದ್ ದೇವಡ ವಾಕ್ಯತ್‍ಲ್ ಒಳ್‍ದ್‍ನದ್ ನೆರವೇರ್‌ವನೆಕೆ ಸಿಪಾಯಿಯಂಗ ಇನ್ನನೆ ಮಾಡ್‍ಚಿ. 25 ಯೇಸುರ ಶಿಲುಬೇರ ಪಕ್ಕ ಯೇಸುರ ಅವ್ವ, ಯೇಸುರ ಅವ್ವಂಡ ತಂಗೆಯಾಯಿತ್ಂಜ ಕ್ಲೋಪಂಡ ಪೊಣ್ಣ್ ಮರಿಯ ಪಿಂಞ ಮಗ್ದಲದ ಮರಿಯ ನಿಂದಂಡಿಂಜತ್. 26 ಅಕ್ಕ, ಯೇಸು ತಾಂಡ ಅವ್ವ ಪಿಂಞ ಅಂವೊಂಡ ಪ್ರೀತಿರ ಶಿಷ್ಯನ ಕಂಡತ್. ಯೇಸು ಅಂವೊಂಡ ಅವ್ವನ ನೋಟಿತ್: ಅವ್ವ, ನೋಟಿ, ಅಂವೊನೇ ನೀಡ ಮೋಂವೋಂದ್ ಎಣ್ಣ್‌ಚಿ. 27 ಪಿಂಞ ಅಂವೊ ಆ ಶಿಷ್ಯಂಗ್: ನೋಟ್, ಇವ ನೀಡ ಅವ್ವಾಂದ್ ಎಣ್ಣ್‌ಚಿ. ಆ ಗಳಿಗೆಯಿಂಜ ಅಂವೊ ಅವಳ ಕಾಕಿಯಂಡ್ ಪೋಯಿತ್ ತಾಂಡ ಮನೆಕ್ ಕೂಟಿಯಂಡತ್. ಯೇಸುರ ಚಾವ್ ( ಮತ್ತಾಯ 27.45–56 ; ಮಾರ್ಕ 15.33–41 ; ಲೂಕ 23.44–49 ) 28 ಇಚ್ಚಕ್ ಎಲ್ಲಾ ಆನ ಪಿಂಞ, ಎಲ್ಲಾ ಆಚೀಂದ್ ಯೇಸುಕ್ ಗೊತ್ತಾಚಿ. ಆನಗುಂಡ್ ದೇವಡ ವಾಕ್ಯತ್‍ಲ್ ಒಳ್‍ದ್‍ನ ಪ್ರಕಾರ ನೆರೆವೇರ್‌ವಕಾಯಿತ್ ನಾಕ್ ಬಾಯರಿಕೆಯಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ. 29 ಅಲ್ಲಿ ಒರ್ ಪಾತ್ರತ್‍ಲ್ ಕಮ್ಮಿತರತ್‌ರ ದ್ರಾಕ್ಷಿರಸ ಇಂಜತ್; ಅಯಿಂಗ ಸಮುದ್ರತ್‍ಲ್ ಕ್‍ಟ್ಟುವ ಒರ್ ತರ ಪಾಚಿನ ಆ ಪುಳಿಯುಳ್ಳ ದ್ರಾಕ್ಷಿರಸಕ್ ಮುಕ್ಕಿತ್ ಹಿಸ್ಸೋಪ್ ಗಿಡತ್‌ರ ಕೋಲ್‍ಲ್ ಇಟ್ಟಿತ್, ಯೇಸುರ ಬಾಯಿಕ್ ನೇತಿತ್ ಬೆಚ್ಚತ್. 30 ಯೇಸು ದ್ರಾಕ್ಷಿರಸತ್‍ನ ಬಾಯಿಕ್ ಎಡ್‌ತ ಪಿಂಞ, ತ್‍ೕಂದತ್‍ೕಂದ್ ಎಣ್ಣಿತ್, ಮಂಡೆನ ಬಗ್ಗ್‌ಚಿಟ್ಟಿತ್ ಅಂವೊಂಡ ಜೀವತ್‍ನ ಬುಟ್ಟತ್. ಯೇಸುನ ಈಟಿಲ್ ಕುತ್ತ್‌ನದ್ 31 ಅಂದೆತ ದಿವಸ ನಮ್ಮೆಕ್ ಮಿಂಞತ್‍ರ ದಿವಸವಾಯಿತ್ಂಜತ್. ಪಿತ್ಯಾಂದ್ ಯೆಹೂದ್ಯಂಗಡ ಮುಕ್ಯ ಸಬ್ಬತ್ ದಿನವಾಯಿತ್ಂಜಗುಂಡ್, ಆ ದಿವಸತ್‍ಲ್ ಶಿಲುಬೇಲ್ ಚಾವ್ ತಡಿ ಇಪ್ಪಕ್ಕಾಗಾಂದ್, ಶಿಲುಬೇಲ್ ಉಳ್ಳಯಿಂಗಡ ಕಾಲ್‌ನ ಪೊಳಿಕಡಾಂದ್ ಯೆಹೂದ್ಯಂಗ ಪಿಲಾತನ ಕ್‍ೕಟತ್. ಎನ್ನಂಗೆಣ್ಣ್‌ಚೇಂಗಿ ಅಕ್ಕ ಅಯಿಂಗಕ್ ಬೆರಿಯ ಚಾವ್ ಬಪ್ಪ, ಪಿಂಞ ಶಿಲುಬೆಯಿಂಜ ಚಾವ್ ತಡೀನ ಆ ದಿವಸವೇ ಎಡ್‍ಪಕಾಪ. 32 ಅನ್ನನೆ ಸಿಪಾಯಿಯ ಅಂವೊಂಡ ಕೂಡೆ ಶಿಲುಬೇಲ್ ಇಂಜ ಮಿಂಞತ್‍ರ ಮನುಷ್ಯಂಡ ಕಾಲ್‌ನ ಪಿಂಞ ಇಂಞೊರ್ ಮನುಷ್ಯಂಡ ಕಾಲ್‌ನ ಮುರಿಚತ್. 33 ಅಯಿಂಗ ಯೇಸುರ ತಡೀರ ಪಕ್ಕ ಬಪ್ಪಕಾಪಕ ಅಂವೊ ಅಯಿಂಗ ಬಪ್ಪಕ್ ಮಿಂಞಲೇ ಚತ್ತ್ ಪೋಯಿರ್‌ತ್‍ೕಂದ್ ಗೊತ್ತಾಚಿ. ಅದ್ಂಗಾಯಿತ್ ಅಂವೊಂಡ ಕಾಲ್‌ನ ಅಯಿಂಗ ಮುರಿಚಿತ್‌ಲ್ಲೆ. 34 ಆಚೇಂಗಿಯು, ಒರ್ ಸಿಪಾಯಿ ಅಂವೊಂಡ ಈಟಿನ ಎಡ್‍ತಿತ್ ಅಂವೊಂಡ ಬಗ್ಗ್‌ರೀಕ್ ಕುತ್ತ್‌ಚಿ; ಅಕ್ಕ ಚೋರೆ ಪಿಂಞ ನೀರ್ ಪೊರಮೆ ಬಾತ್. 35 ಇದ್‍ನೆಲ್ಲಾ ಕಂಡ ಒಬ್ಬ ಇದ್ಂಡ ವಿಷಯತ್ ಸಾಕ್ಷಿ ಎಣ್ಣಿಯಂಡುಂಡ್; ಅಂವೊಂಡ ಸಾಕ್ಷಿ ಸತ್ಯ. ನಿಂಗಳು ನಂಬುವಕಾಯಿತ್ ಅಂವೊ ಎಣ್ಣ್‌ವದ್ ಸತ್ಯಾಂದ್ ಅಂವೊಂಗ್ ಗೊತ್ತುಂಡ್. 36 ಅಂವೊಂಡ ಮೂಳೆಲ್ ಒರ್ ಮೂಳೆಯು ಮುರಿಂಜಿ ಪೋಪುಲೇಂದ್ ದೇವಡ ವಾಕ್ಯತ್‍ಲ್ ಒಳ್‍ದ್‍ನದ್ ನೆರೆವೇರ್‌ವಕಾಯಿತ್ ಇನ್ನನೆಲ್ಲಾ ಆಚಿ. 37 ಇದ್‍ಲ್ಲತೆ, ಅಂವೊನ ಕುತ್ತ್‌ನಯಿಂಗ ಸಹ ಅಂವೊನ ಕಾಂಬಾಂದ್ ಬೋರೆ ಒರ್ ಪ್ರವಾದನೆಯು ಉಂಡ್. ಯೇಸುರ ತಡೀನ ಪೂತದ್ ( ಮತ್ತಾಯ 27.57–61 ; ಮಾರ್ಕ 15.42–47 ; ಲೂಕ 23.50–56 ) 38 ಇದೆಲ್ಲಾ ಆನ ಪಿಂಞ, ಅರಿಮತಾಯ ಎಣ್ಣುವ ಊರ್‍ಕಾರನಾನ ಯೋಸೇಫ ಪಿಲಾತಂಡ ಪಕ್ಕ ಪೋಯಿತ್ ಯೇಸುರ ಚಾವ್ ತಡೀನ ಶಿಲುಬೆಯಿಂಜ ಎಡ್‍ತಂಡ್ ಪೋಪಕ್ ಅನುಮತಿ ಕ್‍ೕಟತ್. ಈ ಯೋಸೇಫ ಯೇಸುರ ಶಿಷ್ಯನಾಯಿತ್ಂಜತ್. ಅದ್ ದಾರ್‌ಕು ಗೊತ್ತ್‌ಂಜಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಯೆಹೂದ್ಯಂಗಕ್ ಇಂವೊ ಬೊತ್ತ್‌ವಕಿಂಜತ್. ಯೇಸುರ ತಡೀನ ಎಡ್‌ತ ಪೋಂದ್ ಪಿಲಾತ ಹುಕುಮ್ ಕೊಡ್‍ತತ್. ಆನಗುಂಡ್ ಅಂವೊ ಪೋಯಿತ್, ಯೇಸುರ ತಡೀನ ಎಡ್‍ತಂಡ್ ಪೋಚಿ. 39 ಇಂವೊಂಡ ಕೂಡೆ ನಿಕೊದೇಮ ಸಹ ಇಂಜತ್. ಇಂವೊ ಪಂಡ್ ಯೇಸುರ ಪಕ್ಕ ಒರ್ ಬಯಿಟ್ ನೇರತ್‍ಲ್ ಪ್ರಶ್ನೆ ಕ್‍ೕಪಕಾಯಿತ್ ಬಂದಿತ್ಂಜತ್. ಅಂವೊ ಸುಮಾರ್ ನುಪ್ಪತಂಜ್ ಕಿಲೋವಚ್ಚಕ್ ರಕ್ತಬೋಳ ಪಿಂಞ ಲೋಳಿಸರತ್‌ಂಜ ಮಾಡ್‍ನ ಸುಗಂದ ದ್ರವ್ಯತ್‍ನ ಎಡ್‌ತ ಬಾತ್. 40 ಅಯಿಂಗ ಯೇಸುರ ತಡೀನ ಎಡ್‍ತಂಡ್, ಯೆಹೂದ್ಯ ಜನಡ ಪದ್ದತಿರ ಪ್ರಕಾರ, ಅಂವೊಂಡ ತಡೀಲ್ ಸುಗಂದ ದ್ರವ್ಯತ್‍ನ ತ್‍ೕಟಿತ್, ಚತ್ತಂವೊನ ಪೂಪಕುಳ್ಳ ಬೊಳ್‍ತ ಬಟ್ಟೇಲ್ ಸುತ್ತ್‌ಚಿ. 41 ಯೇಸು ಚತ್ತ ಜಾಗತ್‍ಲ್ ಒರ್ ತೋಟ ಇಂಜತ್. ಅಲ್ಲಿ ದಾರ್‌ನು ಪೋಕತ ಒರ್ ಪುದಿಯ ಗೋರಿ ಇಂಜತ್. 42 ಸಬ್ಬತ್ ದಿವಸ ಸುರು ಆಪಕಿಂಜಗುಂಡ್, ಪಿಂಞ ಆ ಗೋರಿ ಪಕ್ಕತ್‍ಲ್ ಇಂಜಗುಂಡ್, ಯೇಸುರ ತಡೀನ ಅಲ್ಲಿಕ್ ಬೆಚ್ಚಿತ್ ಪೋಚಿ. |
© 2017, New Life Literature (NLL)