ಯೋಹಾನ 14 - ಕೊಡವ ಬೈಬಲ್ಯೇಸುವೇ ದೇವಡ ಪಕ್ಕ ಪೋಪಕುಳ್ಳ ಬಟ್ಟೆ 1 ನಿಂಗಡ ಹೃದಯ ಸಂಕಟ ಪಡತೆ ಇರಡ್; ದೇವನ ನಂಬಿ, ನನ್ನ ಸಹ ನಂಬಿ. 2 ನಾಡ ಅಪ್ಪಂಡ ಮನೆಲ್ ದುಂಬ ಕೋಂಬರೆ ಉಂಡ್; ಅನ್ನನೆ ಇಲ್ಲತ ಇಂಜತೇಂಗಿ ನಾನ್ ನಿಂಗಕ್ ಎಣ್ಣಿತಿಪ್ಪಿ. ನಾನ್ ಪೋಯಿತ್ ನಿಂಗಕಾಯಿತ್ ಒರ್ ಜಾಗತ್‍ನ ತಯಾರ್ ಮಾಡ್‌ವಿ. 3 ನಾನ್ ಪೋಯಿತ್ ನಿಂಗಕಾಯಿತ್ ಜಾಗತ್‍ನ ತಯಾರ್ ಮಾಡಿತ್, ನಾನ್ ಇಪ್ಪ ಜಾಗತ್‍ಲ್ ನಿಂಗಳು ಇಪ್ಪನೆಕೆ, ನಾನ್ ಪುನಃ ಬಂದಿತ್, ನಿಂಗಳ ಕಾಕಿಯಂಡ್ ಪೋಪಿ. 4 ನಾನ್ ಪೋಪ ಜಾಗ ನಿಂಗಕ್ ಗೊತ್ತುಂಡ್. ಅದ್ಂಡ ಬಟ್ಟೇಯು ಗೊತ್ತುಂಡ್‍ೕಂದ್ ಎಣ್ಣ್‌ಚಿ. 5 ತೋಮ ಅಂವೊನ ನೋಟಿತ್: ಒಡೆಯನೇ, ನೀನ್ ಎಲ್ಲಿ ಪೋಪಿಯಾಂದ್ ನಂಗಕ್ ಗೊತ್ತ್‌ಲ್ಲೆ, ಅನ್ನನೆ ಇಪ್ಪಕ, ಅದ್ಂಡ ಬಟ್ಟೆ ಎನ್ನನೆ ಗೊತ್ತಾಪಾಂದ್ ಎಣ್ಣ್‌ಚಿ. 6 ಅಂವೊಂಗ್ ಯೇಸು: ನಾನೇ ಬಟ್ಟೇಯು, ಸತ್ಯವು, ಜೀವವುವಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ. ನಾಡ ಮೂಲಕ ಅಲ್ಲತೆ ದಾರೂ ನಾಡ ಅಪ್ಪಂಡ ಪಕ್ಕ ಬಪ್ಪಕ್ ಕಯ್ಯುಲೆ. 7 ನಿಂಗಕ್ ನನ್ನ ಗೊತ್ತ್‌ಂಜತೇಂಗಿ, ನಾಡ ಅಪ್ಪನ ಸಹ ನಿಂಗಕ್ ಗೊತ್ತಿಪ್ಪ; ಇಕ್ಕಯಿಂಜ, ನಿಂಗಕ್ ಅಂವೊನ ಗೊತ್ತುಂಡ್; ಅಂವೊನ ನಿಂಗ ಕಂಡಿತು ಉಳ್ಳಿರಲ್ಲಾಂದ್ ಯೇಸು ಎಣ್ಣ್‌ಚಿ. 8 ಫಿಲಿಪ್ಪ ಅಂವೊನ ನೋಟಿತ್: ಒಡೆಯನೇ, ಅಪ್ಪನ ನಂಗಕ್ ಕಾಟ್, ಅದೇ ನಂಗಕ್ ಮದೀಂದ್ ಎಣ್ಣ್‌ಚಿ. 9 ಅದ್ಂಗ್ ಯೇಸು: ಫಿಲಿಪ್ಪನೇ, ನಾನ್ ಇಚ್ಚಕ್ ಕಾಲ ನಿಂಗಡ ಕೂಡೆ ಇಂಜಿಯೆ, ಅಂತು ನಿಂಗಕ್ ನನ್ನ ಗೊತ್ತ್‌ಲ್ಲೆಯಾ? ನನ್ನ ಕಂಡಂವೊ ನಾಡ ಅಪ್ಪನ ಸಹ ಕಂಡಿತುಂಡ್; ಅನ್ನನೆ ಇಪ್ಪಕ, ಅಪ್ಪನ ಕಾಟಿತಾಂದ್ ನಿಂಗ ಎಣ್ಣ್‌ವದ್ ಎನ್ನನೆ? 10 ನಾನ್ ಅಪ್ಪಂಡಲ್ಲಿ, ಅಪ್ಪ ನಾಡಲ್ಲಿ ಇಪ್ಪದ್‍ನ ನೀನ್ ನಂಬ್‍ಲೆಯಾ? ನಾನ್ ನಿಂಗಡ ಕೂಡೆ ಎಣ್ಣ್‌ನದೆಲ್ಲ, ನಾಡ ಇಷ್ಟ ಪ್ರಕಾರ ಎಣ್ಣಿಯಂಡಿಲ್ಲೆ. ನಾಡಲ್ಲಿ ವಾಸ ಮಾಡಿಯಂಡುಳ್ಳ ಅಪ್ಪನೇ ಈ ಕ್ರಿಯೇನೆಲ್ಲಾ ಮಾಡಿಯಂಡುಂಡ್. 11 ನಾನ್ ಅಪ್ಪಂಡಲ್ಲಿ, ಅಪ್ಪ ನಾಡಲ್ಲಿ, ಇಪ್ಪಾನ ನಂಬಿ; ಅನ್ನನೆ ನನ್ನ ನಂಬತೆ ಪೋಚೇಂಗಿಯು, ನಾನ್ ಮಾಡ್‌ವ ಕ್ರಿಯೇಯಿಂಜ ನನ್ನ ನಂಬಿ. 12 ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ; ನಾನ್ ನಾಡ ಅಪ್ಪಂಡ ಪಕ್ಕ ಪೋಪಗುಂಡ್, ನನ್ನ ನಂಬ್‍ವಂವೊ, ನಾನ್ ಮಾಡ್‌ವ ಕ್ರಿಯೇನ ಅಂವೊನು ಮಾಡ್‌ವ, ನಾಕಿಂಜ ಬಲ್ಯ ಕ್ರಿಯೇಯು ಮಾಡ್‌ವ. 13 ನಿಂಗ ನಾಡ ಪೆದತ್‍ಲ್ ಏದೆಲ್ಲಾ ಕ್‍ೕಪಿರೋ, ಅದ್‍ನ ನಾನ್ ಮಾಡ್‌ವಿ. ಅನ್ನನೆ ನಾಡ ಮೂಲಕ ಅಪ್ಪಂಗ್ ಮಹಿಮೆ ಕ್‍ಟ್ಟುವ. 14 ನಾಡ ಪೆದತ್‍ಲ್ ನಿಂಗ ಎಂತ ಕ್‍ೕಟತೇಂಗಿಯು, ಅದ್‍ನ ನಾನ್ ನಿಂಗಕ್ ಮಾಡಿತಪ್ಪಿ. ಯೇಸು ಪವಿತ್ರಾತ್ಮತ್‍ರ ವಿಷಯತ್ ವಾಕ್ ಕೊಡ್‌ತದ್ 15 ನಿಂಗಕ್ ನಾಡ ಮೇಲೆ ಪ್ರೀತಿ ಉಂಡೇಂಗಿ ನಾಡ ಆಜ್ಞೆಂಗಕ್ ಬಗ್ಗಿತ್ ನಡ್‍ಪಿರ. 16 ಅಕ್ಕ ನಾನ್ ನಾಡ ಅಪ್ಪಂಡ ಪಕ್ಕ ಬೋಡುವಿ, ಅಂವೊ ನಿಂಗಕ್ ಆಲೋಚನೆ ತಪ್ಪ ಇಂಞೊಬ್ಬನ ತಪ್ಪ. ಅಂವೊ ಎಕ್ಕಾಲು ನಿಂಗಡ ಕೂಡೆ ಇಪ್ಪ. 17 ಅಂವೊ ಸತ್ಯತ್‍ರ ಆತ್ಮ. ಈ ಲೋಕತ್‍ರ ಜನಕ್ ಅಂವೊ ಕ್‍ಟ್ಟುಲೆ, ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ಅಂವೊನ ಕಂಡಿತು ಇಲ್ಲೆ, ಗೊತ್ತಾಯಿತು ಇಲ್ಲೆ. ಆಚೇಂಗಿ ನಿಂಗಕ್ ಅಂವೊ ದಾರ್‍ೕಂದ್ ಗೊತ್ತುಂಡ್, ಎನ್ನಂಗೆಣ್ಣ್‌ಚೇಂಗಿ, ಅಂವೊ ನಿಂಗಡ ಕೂಡೆ ವಾಸ ಮಾಡಿಯಂಡ್ ನಿಂಗಡಲ್ಲಿ ಉಂಡ್. 18 ನಾನ್ ನಿಂಗಳ ತಬ್ಬಲಿಯಂಗಡನೆಕೆ ಬುಡುಲೆ. ನಾನ್ ನಿಂಗಡ ಪಕ್ಕ ಬಪ್ಪಿ. 19 ಇಂಞು ಚೆನ್ನ ಸಮಯ ಆನ ಪಿಂಞ ಈ ಲೋಕತ್‍ರ ಜನ ನನ್ನ ಕಾಂಬುಲೆ. ಆಚೇಂಗಿ ನಿಂಗ ಕಾಂಬಿರ. ನಾನ್ ಬದ್‍ಕಿಯಂಡುಳ್ಳಗುಂಡ್, ನಿಂಗಳು ಬದ್‍ಕ್‍ವಿರ. 20 ನಾನ್ ನಾಡ ಅಪ್ಪಂಡಲ್ಲಿ, ನಿಂಗ ನಾಡಲ್ಲಿ, ನಾನ್ ನಿಂಗಡಲ್ಲಿ ಇಪ್ಪದ್‍ನ ಆ ದಿವಸತ್‍ಲ್ ನಿಂಗ ಅರ್ಥಮಾಡ್‍ವಿರ. 21 ನಾಡ ಆಜ್ಞೆನ ಪಡ್ಂದಿತ್ ಅದ್ಂಡ ಪ್ರಕಾರ ನಡ್‍ಪಯಿಂಗಳೇ ನನ್ನ ಪ್ರೀತಿ ಮಾಡ್‌ವಯಿಂಗ; ನನ್ನ ಪ್ರೀತಿ ಮಾಡ್‌ವಯಿಂಗಳ ನಾಡ ಅಪ್ಪ ಪ್ರೀತಿ ಮಾಡ್‌ವ. ನಾನ್ ಸಹ ಅಯಿಂಗಳ ಪ್ರೀತಿ ಮಾಡಿತ್, ನನ್ನ ಅಯಿಂಗಕ್ ಕಾಂಬ್‌ಚಿಡ್‍ವೀಂದ್ ಎಣ್ಣ್‌ಚಿ. 22 ಇಸ್ಕರಿಯೋತ ಅಲ್ಲತ ಯೂದ ಎಣ್ಣ್‌ವಂವೊ ಯೇಸುನ ನೋಟಿತ್: ಒಡೆಯನೇ, ನೀನ್ ನಿನ್ನ ಈ ಲೋಕಕ್ ಕಾಂಬ್‌ಚಿಡತೆ, ನಂಗಕ್ ಮಾತ್ರ ಕಾಂಬ್‍ಚಿಡ್‍ವಕ್ ಕಾರಣ ಎಂ‍ತಾಂದ್ ಕ್‍ೕಟತ್. 23 ಯೇಸು ಅಂವೊಂಗ್: ನಾಡ ಮೇಲೆ ಪ್ರೀತಿ ಉಳ್ಳಂವೊ, ನಾಡ ತಕ್ಕ್‌ರ ಪ್ರಕಾರ ನಡ್‍ಪ, ನಾಡ ಅಪ್ಪ ಅಂವೊನ ಪ್ರೀತಿಚಿಡ್‍ವ. ನಂಗ ಬಂದಿತ್ ಅಂವೊಂಡ ಕೂಡೆ ವಾಸ ಮಾಡ್‌ವ. 24 ದಾರ್ ನನ್ನ ಪ್ರೀತಿಚಿಡುಲೆ ಅಂವೊ ನಾಡ ತಕ್ಕ್‌ರ ಪ್ರಕಾರ ನಡ್‍ಪ್‍ಲೆ. ನಿಂಗ ಕ್‍ೕಪ ತಕ್ಕ್ ನಾಡದಲ್ಲ, ನನ್ನ ಅಯಿಚ ನಾಡ ಅಪ್ಪಂಡದಾಯಿತ್ ಉಂಡ್. 25 ಈ ತಕ್ಕ್‌ನ ನಾನ್ ನಿಂಗಡ ಕೂಡೆ ಇಪ್ಪಕಾಪಕಲೇ ಎಣ್ಣಿಯೆ. 26 ನಾಡ ಪೆದತ್‍ಲ್ ನಾಡ ಅಪ್ಪ ನಿಂಗಕ್ ಅಯಿಪ ಪವಿತ್ರಾತ್ಮನಾನ ಆಲೋಚನೆಕಾರನೇ ನಿಂಗಕ್ ಬೋದನೆ ಮಾಡಿತ್, ನಾನ್ ನಿಂಗಕ್ ಎಣ್ಣ್‌ನ ಎಲ್ಲಾ ವಿಷಯತ್‍ನ ನಿಂಗಡ ಗೇನಕ್ ಕೊಂಡ್ ಬಪ್ಪ. 27 ಸಮಾದಾನತ್‍ನ ನಿಂಗಕ್ ಬುಟ್ಟಿತ್ ಪೋಪಿ, ನಾಡ ಸಮಾದಾನತ್‍ನೇ ನಿಂಗಕ್ ತಪ್ಪಿ; ಈ ಲೋಕ ತಪ್ಪ ಪ್ರಕಾರ ನಾನ್ ನಿಂಗಕ್ ತಪ್ಪುಲೆ. ನಿಂಗಡ ಹೃದಯ ಬೇಜಾರ್ ಪಡತೆ, ಗಾಬರಿ ಆಕತೆ ಇರಡ್. 28 ನಾನ್ ನಿಂಗಳ ಬುಟ್ಟಿತ್ ಪೋಪಿ ಆಚೇಂಗಿ ನಾನ್ ನಿಂಗಡ ಪಕ್ಕ ಪುನಃ ಬಪ್ಪೀಂದ್ ನಾನ್ ಎಣ್ಣ್‌ನದ್‍ನ ಕ್‍ೕಟಿರಲ್ಲ. ನಿಂಗ ನನ್ನ ಪ್ರೀತಿಚಿಟ್ಟತೇಂಗಿ, ನಾನ್ ಅಪ್ಪಂಡ ಪಕ್ಕ ಪೋಪೀಂದ್ ಎಣ್ಣ್‌ನ ವಿಷಯಕ್ ಕುಶಿ ಪಡುವಿರ, ಎನ್ನಂಗೆಣ್ಣ್‌ಚೇಂಗಿ ಅಪ್ಪ ನಾಕಿಂಜ ಬಲ್ಯಂವೊನಾಯಿತುಂಡ್. 29 ಇದೆಲ್ಲಾ ನಡ್‍ಪಕ, ನಿಂಗ ನನ್ನ ನಂಬಂಡೂಂದೇ, ಇದೆಲ್ಲಾ ನಡ್‍ಪಕ್ ಮಿಂಞ ಇದ್‍ನ ನಿಂಗಕ್ ಎಣ್ಣಿಯೆ. 30 ಇಂಞು ಮಿಂಞಕ್ ನಾನ್ ನಿಂಗಡ ಕೂಡೆ ದುಂಬ ತಕ್ಕ್ ಪರಿಯುವಕ್ ಕಯ್ಯುಲೆ. ಎನ್ನಂಗೆಣ್ಣ್‌ಚೇಂಗಿ, ಈ ಲೋಕತ್‍ರ ಅದಿಪತಿ ಬಂದಂಡುಂಡ್. ನಾಡ ಮೇಲೆ ಅಂವೊಂಗ್ ಏದ್ ಶಕ್ತಿಯು ಇಲ್ಲೆ. 31 ನಾನ್ ನಾಡ ಅಪ್ಪನ ಪ್ರೀತಿ ಮಾಡಿಯಂಡುಂಡ್‍ೕಂದು, ಅಪ್ಪ ನಾಕ್ ಆಜ್ಞೆ ಕೊಡ್‍ತನೆಕೆ ನಾನ್ ಮಾಡಿಯಂಡುಂಡ್‍ೕಂದು ಈ ಲೋಕತ್‍ರ ಜನಕ್ ಗೊತ್ತಾಪಕಾಯಿತ್ ಇದೆಲ್ಲಾ ಆಪ. ಬಾರಿ, ಈ ಜಾಗತ್‍ನ ಬುಟ್ಟಿತ್ ನಂಗ ಪೋಕಾಂದ್ ಎಣ್ಣ್‌ಚಿ. |
© 2017, New Life Literature (NLL)