ಆದ್ಯತ್‌ರ ಪುಸ್ತಕ 44 - ಕೊಡವ ಬೈಬಲ್ಯೋಸೇಫ ಅಂವೊಂಡ ಅಣ್ಣ ತಮ್ಮಣನ ಚಿಕ್ಕಿಚ್ಚಿಡುವದ್‌ 1 ಅಲ್ಲಿಂಜ ಯೋಸೇಫ ತಾಂಡ ಮನೆರ ಕಾರ್ಯಕಾರನ ಕಾಕಿತ್: ಅಯಿಂಗಕ್ ಎಚ್ಚಕ್‌ ಪೊರ್ತಂಡ್‌ ಪೋಪಕ್‌ ಕಯ್ಯುವ ಅಚ್ಚಕ್‌ ಅಯಿಂಗಡ ಚೀಲತ್‌ನ ದುಂಬಿತ್, ಪ್ರತಿಯೊಬ್ಬಂಡ ಪಣತ್‌ನ ಅಯಿಂಗಯಿಂಗಡ ಚೀಲತ್‌ರ ಬಾಯಿಕ್‌ ಇಡಿ. 2 ಎಳೆಯಂವೊಂಡ ಚೀಲತ್‌ಲ್‌ ನಾನ್‌ ಕುಡಿಪ ಬೊಳ್ಳಿ ಪಾತ್‌ರತ್‌ನ ಪಿಂಞ ಅಂವೊ ಆಹಾರ ದಾನ್ಯಕ್‌ ಕೊಡ್‌ತ ಪಣತ್‌ನ ಸಹ ಅಂವೊಂಡ ಚೀಲತ್‌ಲ್‌ ಬೆಯ್ಯಿಂದ್‌ ಆಜ್ಞೆ ಮಾಡ್‌ಚಿ. ಯೋಸೇಫ ಎಣ್ಣ್‌ನನೆಕೆ ಆ ಕಾರ್ಯಕಾರ ಮಾಡ್‌ಚಿ. 3 ಪೊಲಾಕ ಆಪಕ ಎಲ್ಲಾ ಅಣ್ಣತಮ್ಮಣಂಗಳ ಅಯಿಂಗಡ ಕತ್ತೆಯಡ ಕೂಡೆ ಅಯಿಚಿ ಕೊಡ್‌ತತ್. 4 ಅಯಿಂಗ ಪಟ್ಟಣತ್‌ಂಜ ದುಂಬ ದೂರ ಪೋಪಕ್‌ ಮಿಂಞಲೇ, ಯೋಸೇಫ ತಾಂಡ ಮನೇರ ಕಾರ್ಯಕಾರನ ನೋಟಿತ್: ನೀನ್‌ ಇಕ್ಕಲೆ ಪೊರ್‌ಟಿತ್‌ ಆ ಜನಡ ಬಯ್ಯತ್‌ ಪೋಯಿತ್ ಅಯಿಂಗಳ ಪುಡಿ. ಅಯಿಂಗ ಕ್‌ಟ್ಟ್‌ನದು: ನಿಂಗಕ್ ನಲ್ಲದ್‌ ಮಾಡ್‌ನಂಗ್‌ ತಿರಿತ್‌ ಎನ್ನಂಗ್‌ ನಿಂಗ ಕೆಟ್ಟದ್‌ ಮಾಡಿರ? 5 ಅದ್‌ ನಾಡ ಎಜಮಾನ ಕುಡಿಪ ಪಾತ್‌ರ ಅಲ್ಲಾ? ಅದ್‌ನ ಭವಿಷ್ಯ ಅರಿಯೊಕ್‌ ಉಪಯೋಗ ಮಾಡ್‌ವಲ್ಲಾ? ಇನ್ನನೆ ಮಾಡಿತ್‌ ನಿಂಗ ಬಲ್ಯ ತಪ್ಪ್‌ ಕೆಲಸ ಮಾಡಿರಾಂದ್‌ ಎಣ್ಣ್‍ೕಂದ್‌ ಅಯಿಂಗಕ್ ಎಣ್ಣಿತ್‌ ಅಯಿಚತ್. 6 ಆ ಮನುಷ್ಯ ಅಯಿಂಗಡ ಬಯ್ಯ ಪೋಯಿತ್ ಅಯಿಂಗಳ ಕಂಡ್‌ ಪುಡ್ಚಿತ್, ಈ ತಕ್ಕ್‌ನ ಅಯಿಂಗಕ್ ಎಣ್ಣ್‌ಚಿ. 7 ಅಯಿಂಗ ಆ ಮನುಷ್ಯಂಗ್: ಸ್ವಾಮಿ, ನಿಂಗ ಎಂತ ತಕ್ಕ್‌ ಪರ್‌ಂದಂಡುಳ್ಳಿರ? ನೀಡ ಆಳ್‌ವ ಇಂತ ಒರ್‌ ಕಾರ್ಯತ್‌ನ ಎಕ್ಕಾಲೂ ಮಾಡುಲೆ. 8 ನಂಗಡ ಚೀಲತ್‌ಲ್‌ ಕ್‌ಟ್ಟ್‌ನ ಪಣತ್‌ನ ನಂಗ ತಿರಿತ್‌ ಎಡ್‌ತಂಡ್‌ ಬಂದಿತ್‌ಲ್ಲೆಯಾ? ನಿಂಗಡ ಯಜಮಾನಂಡ ಮನೆಯಿಂಜ ನಂಗ ಎನ್ನಂಗ್‌ ಪೊನ್ನ್‌ ಬೊಳ್ಳಿ ಕಕ್ಕಂಡು? 9 ನೀಡ ಸೇವಕಂಗಡಡೆಲ್‌ ದಾಡ ಪಕ್ಕ ಆ ಪಾತ್‌ರ ಉಂಡೋ ಅಂವೊ ಚತ್ತ್‌ ಪೋಡ್. ಉಳ್‌ಂಜಯಿಂಗ ನೀಡ ಯಜಮಾನಂಡ ಅಡಿಯಾಳಾಯಿತ್‌ಪ್ಪಾಂದ್‌ ಉತ್ತರ ಕೊಡ್‌ತತ್. 10 ಅದ್‌ಂಗ್‌ ಅಂವೊ: ಅನ್ನನೆ ಆಡ್. ಅದ್‌ ದಾಡ ಪಕ್ಕ ಉಂಡೋ, ಅಂವೊ ಅಡಿಯಾಳಾಯಿತ್‌ಪ್ಪ. ಉಳ್‌ಂಜಯಿಂಗ ಓರ್‌ ಕುತ್ತಯಿಲ್ಲತೆ ಪೋಲೂಂದ್‌ ಎಣ್ಣ್‌ಚಿ. 11 ಅಕ್ಕ ಅಯಿಂಗ ಒಬ್ಬೊಬ್ಬನು ಬೆರಿಯ ಚೀಲತ್‌ನ ಅಡಿಕ್‌ ಉಳ್‌ಪಿತ್‌ ಅಯಿಂಗಯಿಂಗಡ ಚೀಲತ್‌ನ ತೊರ್‌ಂದತ್. 12 ಯೋಸೇಫಂಡ ಆಳ್‌ ಬಲ್ಯಂವೊಂಡ ಚೀಲತ್‌ನ ಪುಡ್ಚಿತ್ ಚೆರಿಯಂವೊಂಡ ಚೀಲಕತ್ತನೆ ತ್‍ೕಡ್‌ಚಿ. ಆ ಪಾತ್‌ರ ಬೆನ್ಯಾಮೀನಂಡ ಚೀಲತ್‌ ಕ್‌ಟ್ಟ್‌ಚಿ. 13 ಇದ್‌ನ ಕಂಡದು ಅಯಿಂಗ ದುಃಖತ್‌ ಅಯಿಂಗಡ ಬಟ್ಟೆನ ಕೀತಿಯಂಡ್, ಒಬ್ಬೊಬ್ಬನ ತಾಂಡ ಕತ್ತೆರ ಮೇಲೆ ಚೀಲತ್‌ನ ಕೆಟ್ಟಿತ್‌ ಪಟ್ಟಣಕ್‌ ತಿರಿತ್‌ ಪೊರ್‌ಟತ್. 14 ಯೆಹೂದ ಪಿಂಞ ಅಂವೊಂಡ ಅಣ್ಣತಮ್ಮಣಂಗ ಯೋಸೇಫಂಡ ಮನೆಕ್‌ ಪೋಚಿ. ಅಲ್ಲಿಕತ್ತನೆ ಯೋಸೇಫ ಮನೆಲ್ ಇಂಜತ್. ಅಯಿಂಗೆಲ್ಲಾರು ಅಂವೊಂಗ್‌ ಅಡ್ಡ ಬುದ್ದತ್. 15 ಯೋಸೇಫ ಅಯಿಂಗಕ್: ನಿಂಗ ಎಂತ ಕೆಲಸ ಮಾಡಿರ? ನಾಡಂತ ಮನುಷ್ಯಂಗ್ ಭವಿಷ್ಯ ಅರಿಂಜಿತ್‌ ಈ ಕಾರ್ಯತ್‌ನ ದಾರ್‌ ಮಾಡಿಯೇಂದ್‌ ನಾಕ್‍ ಗೊತ್ತಾಪಾಂದ್‌ ನಿಂಗಕ್ ಗೊತ್ತಿಲ್ಲೆಯಾ? 16 ಅಕ್ಕ ಯೆಹೂದ: ನಂಗಡ ಸ್ವಾಮಿಕ್‌ ನಂಗ ಎಂತ ಎಣ್ಣಡ್? ಎಂತ ತಕ್ಕ್‌ ಪರಿಯುಡ್? ನಂಗ ಸತ್ಯವಂತಂಗಾಂದ್‌ ಎನ್ನನೆ ನಿಂಗಕ್ ಗೊತ್ತ್‌ ಮಾಡ್‌ಚಿಡಡ್? ನಿಂಗಡ ಆಳ್‌ವಡ ಪಾಪತ್‌ರ ಕಾರ್ಯತ್‌ನ ದೇವ ಪೊರ್ಮೆ ಕಾಟಿತುಂಡ್. ಪಾತ್‌ರತ್‌ನ ಬೆಚ್ಚಂಡುಳ್ಳಂವೊನು, ನಂಗೆಲ್ಲಾರು ಇಕ್ಕ ನಿಂಗಡ ಅಡಿಯಾಳಂಗಾಂದ್‌ ಎಣ್ಣ್‌ಚಿ. 17 ಅದ್‌ಂಗ್‌ ಯೋಸೇಫ: ಅಂತ ಒರ್‌ ಕಾರ್ಯ ನಾನ್‌ ಮಾಡುಲೆ. ದಾಡ ಪಕ್ಕ ಪಾತ್‌ರ ಉಂಡೋ ಅಂವೊ ಮಾತ್‌ರ ನಾಡ ಅಡಿಯಾಳಾಯಿತ್‌ಪ್ಪ. ಮಿಕ್ಕ್‌ನಯಿಂಗೆಲ್ಲಾ ಸಮಾದಾನತ್‌ಲ್‌ ನಿಂಗಡ ಅಪ್ಪಂಡ ಮನೆಕ್‌ ಪೋಲೂಂದ್‌ ಎಣ್ಣ್‌ಚಿ. ಯೆಹೂದ ಬೆಂಜಮೀನನ ಬುಡುವಕ್ಕಾಯಿತ್‌ ತಕ್ಕ್‌ ಪರಿಯುವದ್‌ 18 ಅಕ್ಕ ಯೆಹೂದ ಅಂವೊಂಡ ಪಕ್ಕ ಬಂದಿತ್: ಸ್ವಾಮಿ, ನಾನ್‌ ನಿಂಗಡ ಕೂಡೆ ತಕ್ಕ್‌ ಪರಿಯುವಕ್‌ ನನ್ನ ಬುಡೀಂದ್‌ ಬೋಡುವಿ. ನಿಂಗಡ ಆಳ್‌ರ ಮೇಲೆ ಚೆಡಿ ಮಾಡತಿ. ನಿಂಗ ಫರೋಹನಂಗ ಸರಿಸಮವಾಯಿತ್‌ ಉಳ್ಳಿರ. 19 ಸ್ವಾಮಿ, ನಿಂಗಕ್ ಅಪ್ಪ ಪಿಂಞ ತಮ್ಮಣ ಉಂಡಾಂದ್‌ ಕ್‍ೕಟಿರ. 20 ಅಕ್ಕ ನಂಗ: ಅಕ್ಕು, ನಂಗಕ್‌ ವಯಸ್ಸಾನ ಅಪ್ಪನು ಉಂಡ್, ಅಂವೊಂಡ ವಯಸ್ಸಾನ ಕಾಲತ್‌ಲ್‌ ಪುಟ್ಟ್‌ನ ಒರ್‌ ಚುಮ್ಮಿ ಮೋಂವೊ ಉಂಡ್‍ೕಂದು, ಅಂವೊಂಡ ಅಣ್ಣ ಚತ್ತ್‌ಪೋಚೀಂದು, ಅಂವೊನ ಪೆತ್ತ ಅವ್ವಂಗ್‌ ಅಂವೊ ಒಬ್ಬನೇ ಬದ್‌ಕಿತುಳ್ಳಂಗ್, ಅಪ್ಪ ಅಂವೊಂಡ ಮೇಲೆ ದುಂಬ ಪ್ರೀತಿಲ್‌ ಉಂಡ್‍ೕಂದು ನಂಗಡ ಯಜಮಾನನಾನ ನಿಂಗಕ್ ಎಣ್ಣಿಯೆ. 21 ಅಕ್ಕ ನಿಂಗ ಅಂವೊನ ಕಾಕಿಯಂಡ್‌ ಬಾರಿ, ನಾಡ ಕಣ್ಣ್‌ಲ್‌ ಅಂವೊನ ನೋಟಂಡೂಂದ್‌ ಎಣ್ಣಿರ. 22 ಅಕ್ಕ ನಂಗ ನಿಂಗಕ್: ಆ ಕ್‌ಣ್ಣ ಅಪ್ಪನ ಬುಟ್ಟಿತ್‌ ಬಪ್ಪಕಾಪುಲೆ, ಅನ್ನನೆ ಮಾಡ್‌ಚೇಂಗಿ ನಂಗಡ ಅಪ್ಪ ಚತ್ತ್‌ ಪೋಕೂಂದ್‌ ಎಣ್ಣ್‌ಚಿ. 23 ಅದ್‌ಂಗ್‌ ನಿಂಗ: ನಿಂಗಡ ತಮ್ಮಣನ ಕಾಕಿಯಂಡ್‌ ಬಕ್ಕತೆ ಪೋಚೇಂಗಿ ನಿಂಗ ನಾಡ ಮೂಡ್‌ ನೋಟ್‌ವಕ್ಕಾಗಾಂದ್‌ ಎಣ್ಣಿರ. 24 ನಂಗ ತಿರಿತ್‌ ಪೋಯಿತ್ ನಿಂಗಡ ಆಳಾನ ನಂಗಡ ಅಪ್ಪಂಡ ಪಕ್ಕ ಪೋಯಿತ್, ನಿಂಗ ಎಣ್ಣ್‌ನ ತಕ್ಕ್‌ನ ಎಣ್ಣ್‌ಚಿ. 25 ನಂಗಡ ಅಪ್ಪ ನಂಗಳ ನೋಟಿತ್: ನಿಂಗ ಪುನಃ ಪೋಯಿತ್ ಇಂಞು ಚೆನ್ನ ಆಹಾರ ದಾನ್ಯ ಕೊಂಡ ಬಾರೀಂದ್‌ ಎಣ್ಣ್‌ಚಿ. 26 ಅದ್‌ಂಗ್‌ ನಂಗ: ನಂಗಡ ತಮ್ಮಣನ ನಂಗಡ ಕೂಡೆ ಅಯಿಕತೆ ಪೋಚೇಂಗಿ ನಂಗ ಪೋಪ ಕಯ್ಯುಲೆ. ನಂಗಡ ಕೂಡೆ ತಮ್ಮಣ ಇಲ್ಲತೆ ಪೋಚೇಂಗಿ ಆ ಮನುಷ್ಯಂಡ ಮೂಡ್‌ ನೋಟ್‌ವಕ್‌ ಆಪುಲೇಂದ್‌ ನಂಗ ಎಣ್ಣ್‌ಚಿ. 27 ಅಕ್ಕ ನಿಂಗಡ ಆಳಾನ ನಂಗಡ ಅಪ್ಪ: ನಾಡ ಪೊಣ್ಣ್‌ ನಾಕ್‍ ದಂಡ್‌ ಕ್‌ಣ್ಣ ಮಕ್ಕಳ ಪೆತ್ತತ್. 28 ಅದ್‌ಲ್‌ ಒಬ್ಬ ನನ್ನ ಬುಟ್ಟಿತ್‌ ಪೋಚಿ. ಅಂವೊನ ಕಾಡ್‌ ಪ್ರಾಣಿಯ ಕೊಂದಿತಿಕ್ಕು. ಇಲ್ಲಿಕತ್ತನೆ ಅಂವೊನ ಕಂಡಿತೇ ಇಲ್ಲೆ. ಇದೆಲ್ಲಾ ನಿಂಗಕ್ ಗೊತ್ತುಂಡ್. 29 ನಿಂಗ ಇಂವೊನ ಸಹ ಕಾಕಿಯಂಡ್‌ ಪೋಯಿತ್ ಅಂವೊಂಗ್‌ ಎಂತೇಂಗಿ ಆಚೇಂಗಿ, ನಾಡ ಬೊಳ್‌ತ್‌ ಪೋನ ಮಂಡೆ ದಃಖತ್‌ಲ್‌ ತೂಟ್ಂಗಳಕ್‌ ಪೋಪಕ್‌ ನಿಂಗ ಕಾರಣ ಆಪಿರಾಂದ್‌ ಎಣ್ಣ್‌ಚಿ. 30 ಈ ಕ್‌ಣ್ಣಂಡ ಜೀವತ್‌ಲ್‌ ನಂಗಡ ಅಪ್ಪಂಡ ಜೀವ ಉಂಡ್. ಇಕ್ಕ ನಂಗ ಈ ಕ್‌ಣ್ಣ ಇಲ್ಲತೆ ನೀಡ ಆಳಾನ ನಾಡ ಅಪ್ಪಂಡ ಪಕ್ಕ ಪೋಪಕ, 31 ಈ ಕ್‌ಣ್ಣ ನಂಗಡ ಕೂಡೆ ಇಲ್ಲೇಂದ್‌ ಗೊತ್ತಾಪಕಲೇ, ನಂಗಡ ಅಪ್ಪ ಚತ್ತ್‌ಪೋಪ. ಇನ್ನನೆ ನೀಡ ಸೇವಕಂಗಳಾನ ನಂಗ ನಂಗಡ ಅಪ್ಪಂಡ ಬೊಳ್‌ತ ಮಂಡೆನ ದುಃಖತ್‌ಲ್‌ ತೂಟ್‌ಕಳಕ್‌ ಪೋಪಕ್‌ ನಂಗ ಕಾರಣ ಆಪ. 32 ಸ್ವಾಮಿ, ಈ ಕ್‌ಣ್ಣಂಗ್‌ ನಾನ್‌ ಜವ್ಬಾದಾರನಾಯಿತ್‌ಪ್ಪೀಂದ್‌ ನಾಡ ಅಪ್ಪಂಗ್‌ ಆಣೆ ಮಾಡಿತ್‌ ಬಂದಿಯೆ. ಅಂವೊಂಡ ವಿಷಯತ್‌ ನನ್ನ ಕ್‍ೕಳಿ ನಾನ್‌ ಅಂವೊನ ತಿರಿತ್‌ ಕಾಕಿಯಂಡ್‌ ಬಕ್ಕತೆ ಪೋಚೇಂಗಿ ಆ ಅಪರಾದ ಕಾಲಕಾಲಕು ನಾಡ ಮಂಡೆರ ಮೇಲೆ ಇರಡ್‍ೕಂದ್‌ ಎಣ್ಣ್‌ನ. 33 ಸ್ವಾಮಿ, ದಯಬೆಚ್ಚಿತ್‌ ಆ ಕ್‌ಣ್ಣಂಡ ಬದ್‌ಲ್‌ ನಾನ್‌ ಅಡಿಯಾಳಾಯಿತ್‌ ಇಪ್ಪಿ. ಆ ಕ್‌ಣ್ಣ ಅಂವೊಂಡ ಅಣ್ಣಂಗಡ ಕೂಡೆ ಪೋಡ್. 34 ಈ ಕ್‌ಣ್ಣ ಇಲ್ಲತೆ ನಾನ್‌ ಎನ್ನನೆ ನಾಡ ಅಪ್ಪಂಡ ಪಕ್ಕ ಪೋಡ್? ಅನ್ನನೆ ಪೋಚೇಂಗಿ, ನಾಡ ಅಪ್ಪಂಗ್‌ ಆಪಕುಳ್ಳ ಕ್‍ೕಡ್‌ನ ನೇರಾಯಿತು ನಾಕ್‍ ನೋಟ್‌ವಕ್‌ ಕಯ್ಯುಲೇಂದ್‌ ಎಣ್ಣ್‌ಚಿ. |
© 2017, New Life Literature (NLL)