ಆದ್ಯತ್‌ರ ಪುಸ್ತಕ 35 - ಕೊಡವ ಬೈಬಲ್ದೇವ ಯಾಕೋಬನ ಆಶೀರ್ವಾದ ಮಾಡ್‌ನದ್‌ 1 ಪಿಂಞ ದೇವ ಯಾಕೋಬಂಗ್: ನೀನ್‌ ಈ ಜಾಗತ್‌ನ ಬುಟ್ಟಿತ್ ಬೇತೇಲ್‌ಕ್‌ ಪೋಯಿತ್‌ ಅಲ್ಲಿಯೇ ವಾಸಮಾಡ್. ನೀನ್‌ ನೀಡ ಅಣ್ಣನಾನ ಏಸಾವಂಡಿಂಜ ಓಡಿಪೋಪಕ, ನೀಕ್‌ ತನ್ನ ಕಾಂಬ್‌ಚಿಟ್ಟ ದೇವಕ್‌ ನೀನ್‌ ಅಲ್ಲಿ ಒರ್‌ ಬಲಿಪೀಠತ್‌ನ ಕಟ್ಟ್‌ಂದ್‌ ಎಣ್ಣ್‌ಚಿ. 2 ಅಕ್ಕ ಯಾಕೋಬ ತಾಂಡ ಮನೆಕಾರಳ ಪಿಂಞ ತಾಂಡ ಕೂಡೆ ಉಳ್ಳ ಎಲ್ಲಾ ಜನಳ ಕಾಕಿತ್: ನಿಂಗಡ ಪಕ್ಕ ಉಳ್ಳ ಪರದೇಶಿಯಡ ಮೂರ್ತಿಯಳ ಚಾಡಿತ್, ನಿಂಗಳ ಶುದ್ದಮಾಡಿಯಂಡ್, ಬಟ್ಟೆ ಬದ್‌ಲ್‌ ಮಾಡಿ. 3 ಬಾರಿ, ನಂಗ ಇಕ್ಕ ಬೇತೇಲ್‌ಕ್‌ ಪೊರ್‌ಟ್ ಪೋಕನ. ನಾಡ ಕಷ್ಟತ್‌ರ ಕಾಲತ್‌ಲ್‌ ನಾಡ ಬೋಡಿಕೆಕ್‌ ಉತ್ತರ ತಂದಿತ್, ನಾನ್‌ ಪೋನ ಬಟ್ಟೆಲೆಲ್ಲಾ ನಾಡ ಕೂಡೆ ಇಂಜ ದೇವಕ್‌ ಅಲ್ಲಿ ಒರ್‌ ಬಲಿಪೀಠತ್‌ನ ಕೆಟ್ಟ್‌ವೀಂದ್‌ ಎಣ್ಣ್‌ಚಿ. 4 ಅಕ್ಕ ಅಯಿಂಗೆಲ್ಲ ಅಯಿಂಗಡ ಪಕ್ಕ ಇಂಜ ಪರದೇಶಿಯಡ ಮೂರ್ತಿಯಳ, ಅಯಿಂಗಡ ಕೆಮಿಲ್ಯಿಂಜ ಓಲೆನೆ ಎಲ್ಲಾ ಯಾಕೋಬಂಗ್ ಕೊಡ್‌ತತ್. ಅಂವೊ ಅದ್‌ನೆಲ್ಲಾ ಶೆಕೆಮ್‌ ಊರ್‌ರ ಪಕ್ಕತ್‌ಲ್‌ ಉಳ್ಳ ಏಲಾ ಮರತ್‌ರ ಅಡಿಲ್‌ ಪೂತತ್. 5 ಅಲ್ಲಿಂಜ ಅಯಿಂಗ ಪೊರ್‌ಡುವಕ, ಅಯಿಂಗಡ ಸುತ್ತ್‌ಮುತ್ತ್‌ಲ್‌ ಇಂಜ ಊರ್‌ರ ಜನಡ ಮೇಲೆ ದೇವಡ ಪೋಡಿ ಇಳ್‌ಂಜಿ ಬಾತ್. ಆನಗುಂಡ್, ಅಯಿಂಗ ದಾರು ಯಾಕೋಬಂಡ ಕ್‌ಣ್ಣ ಮಕ್ಕಡ ಬಯ್ಯತ್‌ ಪೋಯಿತ್‌ಲ್ಲೆ. 6 ಯಾಕೋಬ ಪಿಂಞ ಅಂವೊಂಡ ಕೂಡೆ ಇಂಜ ಎಲ್ಲಾ ಜನಳು ಕಾನಾನ್‌ ದೇಶತ್‌ಲ್‌ ಉಳ್ಳ ಬೇತೇಲ್‌ ಎಣ್ಣುವ ಲೂಜಿಕ್‌ ಎತ್ತ್‌ಚಿ. 7 ಅಂವೊ ಅಲ್ಲಿ ಒರ್‌ ಬಲಿಪೀಠತ್‌ನ ಕೆಟ್ಟಿತ್, ಯಾಕೋಬ ತಾಂಡ ಅಣ್ಣಂಡಿಂಜ ಓಡಿಪೋಪಕ, ಅಲ್ಲಿ ದೇವ ಅಂವೊಂಗ್‌ ಪ್ರತ್ಯಕ್ಷ ಆನಗುಂಡ್, ಆ ಜಾಗಕ್‌ ಏಲ್‌ ಬೇತೇಲ್‌ ಎಣ್ಣಿಯಂಡ್ ಪೆದಬೆಚ್ಚತ್. 8 ಅಲ್ಲಿ ರೆಬೆಕ್ಕಡ ಆರೈಕೆಕಾರ್ತಿಯಾನ ದೆಬೋರ ಚತ್ತ್‌ ಪೊಚಿ. ಅಯಿಂಗ ಅವಳ ಬೇತೇಲ್‌ರ ಪಕ್ಕತ್‌ ಒರ್‌ ತಗ್ಗ್‌ನ ಜಾಗತ್‌ ಉಳ್ಳ ಅಲ್ಲೋನ್ ಮರತ್‌ರ ಅಡಿಲ್‌ ಪೂತಿತ್, ಅದ್‌ಂಗ್ ಅಲ್ಲೋನ್ ಬಾಕೂತ್ ಎಣ್ಣಿಯಂಡ್ ಪೆದಬೆಚ್ಚತ್. ದೇವ ಅಬ್ರಹಾಮ ಪಿಂಞ ಇಸಾಕಂಗ್‌ ಮಾಡ್‌ನ ವಾಗ್ದಾನತ್‌ನ ಯಾಕೋಬಂಗು ಮಾಡ್‌ನದ್‌ 9 ಯಾಕೋಬ ಪದ್ದನ್‌ ಅರಾಮ್ಯಿಂಜ ಬೇತೇಲ್‌ಕ್‌ ಎತ್ತುವಕ ದೇವ ಪುನಃ ಅಂವೊಂಗ್‌ ಕಾಂಬ್‌ಚಿಟ್ಟಿತ್, ಅಲ್ಲಿ ಅಂವೊನ ಆಶೀರ್ವಾದ ಮಾಡಿತ್: 10 ಇಕ್ಕ ನೀಡ ಪೆದ ಯಾಕೋಬ, ಇಂಞು ಮಿಂಞಕ್‌ ನಿನ್ನ ಯಾಕೋಬಾಂದ್‌ ಕಾಕತೆ, ಇಸ್ರಾಯೇಲ್‌ಾಂದ್‌ ಕಾಕುವಾಂದ್‌ ಎಣ್ಣಿತ್, ಅಂವೊಂಗ್‌ ಇಸ್ರಾಯೇಲ್‌ ಎಣ್ಣಿಯಂಡ್ ಪೆದ ಬೆಚ್ಚತ್. 11 ಇಂಞು ದೇವ ಅಂವೊನ ನೋಟಿತ್: ನಾನ್‌ ಸರ್ವಶಕ್ತನಾನ ದೇವ. ನೀನ್‌ ಅಬಿವೃದ್ದಿ ಪೊಂದಿತ್‌ ಲೆಕ್ಕ ಮಾಡ್‌ವಕ್‌ ಕಯ್ಯತಚ್ಚಕ್‌ ಜಾಸ್ತಿ ಆಪಿಯ. ನಿನ್ನಿಂಜ ಒರ್‌ ಜನಾಂಗಳು, ದುಂಬ ಗುಂಪ್ರ ಜನಾಂಗಳು ಬಪ್ಪ; ರಾಜಂಗಳು ನೀಡ ಸಂತಾನತ್‌ಂಜ ಪುಟ್ಟುವ. 12 ನಾನ್‌ ಅಬ್ರಹಾಮಂಗು ಇಸಾಕಂಗು ಕೊಡ್‌ತ ದೇಶತ್‌ನ ನೀಕು ತಪ್ಪಿ. ಅಕ್ಕು ನೀಕು, ಬಯ್ಯ ನೀಡ ಸಂತಾನಕು ತಪ್ಪೀಂದ್‌ ಎಣ್ಣ್‌ಚಿ. 13 ಅಲ್ಲಿಂಜ ದೇವ ಯಾಕೋಬಂಡ ಕೂಡೆ ತಕ್ಕ್‌ ಪರ್ದಂಡಿಂಜ ಜಾಗತ್‌ಂಜ ಕೊಡಿಕ್‌ ಪೋಚಿ. 14 ಯಾಕೋಬ ತಾಂಡ ಕೂಡೆ ದೇವ ತಕ್ಕ್‌ ಪರ್‌ಂದ ಜಾಗತ್‌ಲ್‌ ಒರ್‌ ಕಲ್ಲ್‌ರ ಕಂಬತ್‌ನ ನಿಪ್ಪ್‌ಚಿಟ್ಟಿತ್, ಅದ್‌ಂಡ ಮೇಲೆ ದೇವಂಗ್‌ ಕಾಣಿಕೆಯಾಯಿತ್‌ ದ್ರಾಕ್ಷಿರಸತ್‌ನ ಬೂಕಿತ್, ಆಲೀವ್‌ ಎಣ್ಣೇನ ಕಲ್‌ಲ್‌ ಕಂಬತ್‌ರ ಮೇಲೆ ಬೂಕ್‌ಚಿ. 15 ಅಂವೊ ತಾಂಡ ಕೂಡೆ ದೇವ ತಕ್ಕ್‌ ಪರ್‌ಂದಂಗ್‌ ಆ ಜಾಗಕ್‌ ಬೇತೇಲ್‌ಂದ್‌ ಪೆದಬೆಚ್ಚತ್. ರಾಹೇಲಂಡ ಚಾವ್‌ 16 ಪಿಂಞ ಬೇತೇಲ್‌ಂಜ ಪ್ರಯಾಣ ಮಾಡಿತ್ ಎಫ್ರಾತಂಗ್‌ ಎತ್ತುವಕ್‌ ಇಂಞು ಚೆನ್ನ ದೂರ ಇಪ್ಪಕ ರಾಹೇಲ ಪೆರುವಕ್‌ ಸುರುಮಾಡ್‌ಚಿ. ಅವ ನೊಂಬತ್‌ಲ್‌ ದುಂಬ ಕಷ್ಟಪಟ್ಟಂಡಿಂಜತ್. 17 ಅಕ್ಕ ಅವಡ ಆರೈಕೆಕಾರ್ತಿ ರಾಹೇಲಳ ನೋಟಿತ್: ನೀನ್‌ ಬೊತ್ತತೆ, ಈ ಕುರಿಯು ನೀನ್‌ ಒರ್‌ ಕ್‌ಣ್ಣ ಕುಂಞಿನ ಪೆರುವಿಯಾಂದ್‌ ಎಣ್ಣ್‌ಚಿ. 18 ಆಚೇಂಗಿ ರಾಹೇಲಂಡ ಉಸಿರ್‌ ಪೋಪಕ, ಅವ ಆ ಕುಂಞಿಕ್‌ ಬೆನೋನಿ ಎಣ್ಣಿಯಂಡ್ ಪೆದಬೆಚ್ಚತ್. ಆಚೇಂಗಿ ಕುಂಞಿರ ಅಪ್ಪ ಅಂವೊಂಗ್‌ ಬೆನ್ಯಾಮೀನ ಎಣ್ಣಿಯಂಡ್ ಪೆದಬೆಚ್ಚತ್. 19 ಅನ್ನನೆ ರಾಹೇಲ ಚತ್ತ್‌ಪೋಚಿ. ಅವಳ ಬೇತ್‌ಲೆಹೇಮ್‌ ಎಣ್ಣುವ ಎಫ್ರಾತಂಗ್‌ ಪೋಪ ಬಟ್ಟೆಲ್‌ ಅವಳ ಪೂತತ್. 20 ಯಾಕೋಬ ಅವಡ ಗೋರಿರ ಮೇಲೆ ಒರ್‌ ಕಲ್ಲ್‌ರ ಕಂಬತ್‌ನ ನಿಪ್ಪ್‌ಚಿಟ್ಟತ್. ಈ ದಿವಸಕತ್ತನೆ ಅದೇ ರಾಹೇಲಂಡ ಗೋರಿರ ಕಂಬವಾಯಿತ್‌ ಉಂಡ್. 21 ಅಲ್ಲಿಂಜ ಇಸ್ರಾಯೇಲ್‌ ಪ್ರಯಾಣ ಮಾಡಿತ್, ಏದರ್‌ ಎಣ್ಣುವ ಗೋಪುರತ್‌ರ ಆಬರಿಲ್‌ ಗುಡಾರ ಇಟ್ಟತ್. 22 ಇಸ್ರಾಯೇಲ್‌ ಆ ದೇಶತ್‌ಲ್‌ ವಾಸಮಾಡಿಯಂಡ್‌ ಇಪ್ಪಕ ರೂಬೇನ ತಾಂಡ ಅಪ್ಪಂಡ ಉಪ ಪೊಣ್ಣಾನ ಬಿಲ್ಹಂಡ ಕೂಡೆ ಸಮ್ಮಂದ ಬೆಚ್ಚಿತ್‌ ಅವಡ ಕೂಡೆ ಬುದ್ದತ್. ಆ ಸಂಗತಿ ಇಸ್ರಾಯೇಲ್‌ಂಗ್‌ ಮುಟ್ಟ್‌ಚಿ. ಯಾಕೋಬಂಗ್ ಪನ್ನೆರಂಡ್‌ ಜನ ಕ್‌ಣ್ಣ ಮಕ್ಕ ಇಂಜತ್. 23 ಅಯಿಂಗ ದಾರ್‌ ಎಣ್ಣ್‌ಚೇಂಗಿ: ಯಾಕೋಬಂಡ ಪೆರಿಯ ಮೊಂವೊನಾನ ರೂಬೇನ, ಅಲ್ಲಿಂಜ ಸಿಮೆಯೋನ, ಲೇವಿ, ಯೆಹೂದ, ಇಸ್ಸಾಕಾರ್, ಜೆಬುಲೂನ ಎಣ್ಣುವಯಿಂಗ ಲೇಯಳಂಗ್‌ ಪುಟ್ಟ್‌ನಯಿಂಗ. 24 ಯೋಸೇಫ ಪಿಂಞ ಬೆನ್ಯಾಮೀನ್‌ ರಾಹೇಲಂಗ್‌ ಪುಟ್ಟ್‌ನಯಿಂಗ. 25 ದಾನ್‌ ಪಿಂಞ ನಫ್ತಾಲಿ ರಾಹೇಲಂಡ ಪಣಿಕಾರ್ತಿಯಾನ ಬಿಲ್ಹಳಂಗ್‌ ಪುಟ್ಟ್‌ನಯಿಂಗ. 26 ಗಾದ್‌ ಪಿಂಞ ಆಶೇರ್‌ ಲೇಯಳಂಡ ಪಣಿಕಾರ್ತಿಯಾನ ಜಿಲ್ಪಳಂಗ್‌ ಪುಟ್ಟ್‌ನಯಿಂಗ. ಪದ್ದನ್‌ ಅರಾಮ್‌ಲ್‌ ಯಾಕೋಬಂಗ್ ಪುಟ್ಟ್‌ನ ಮಕ್ಕ ಈಂಗಳೇ. 27 ಯಾಕೋಬ ಮಮ್ರೆಕ್‌ ತಾಂಡ ಅಪ್ಪನಾನ ಇಸಾಕಂಡ ಪಕ್ಕ ಬಾತ್. ಮಮ್ರೆ ಕಿರ್ಯತರ್ಬಕ್‌ (ಇಕ್ಕ ಹೆಬ್ರೋನ್‌ಂದ್‌ ಕಾಕುವ) ಪಕ್ಕತ್‌ಲ್‌ ಉಂಡ್. ಅಲ್ಲಿಯೇ ಅಬ್ರಹಾಮನು ಇಸಾಕನು ವಾಸಮಾಡ್‌ಚಿ. 28-29 ಇಸಾಕ ಪಣ್ಣ್‌ ಮುದುಕನಾಯಿತ್‌ ತಾಂಡ ನೂಟ್ಯ ಎಂಬದ್‌ ವಯಸ್ಸ್‌ಲ್‌ ಪ್ರಾಣ ಬುಟ್ಟಿತ್, ತಾಂಡ ಮುತ್ತಜ್ಜಂಗಡ ಕೂಡೆ ಕೂಡ್‌ಚಿ. ಅಂವೊಂಡ ಮಕ್ಕಳಾನ ಏಸಾವ ಪಿಂಞ ಯಾಕೋಬ ಅಂವೊನ ಪೂತತ್. |
© 2017, New Life Literature (NLL)