ಆದ್ಯತ್‌ರ ಪುಸ್ತಕ 33 - ಕೊಡವ ಬೈಬಲ್ಯಾಕೋಬ ಏಸಾವನ ಕಾಂಬದ್‌ 1 ಯಾಕೋಬ ಕಣ್ಣೆಡ್‌ತಿತ್‌ ನೋಟ್‌ವಕ, ಇದಾ ಏಸಾ ನಾನೂರ್‌ ಜನಡ ಕೂಡೆ ಬಪ್ಪದ್‌ನ ಕಂಡತ್. ಅಕ್ಕ ಅಂವೊ ತಾಂಡ ಮಕ್ಕಳ ಬೋರೆ ಬೋರೆ ಮಾಡಿತ್, ಲೇಯಾಳಡ ಪಕ್ಕ, ರಾಹೇಲಂಡ ಪಕ್ಕ ಪಿಂಞ ದಂಡ್‌ ಪಣಿಕಾರ್ತಿಯಡ ಪಕ್ಕ ಒಪ್ಪಿಚಿಟ್ಟಿತ್, 2 ಮಿಂಞತ್‌ ದಂಡ್‌ ಪಣಿಕಾರ್ತಿಯಳ ಪಿಂಞ ಅಯಿಂಗಡ ಮಕ್ಕಳ, ಮದ್ಯತ್‌ಲ್‌ ಲೇಯಾಳ ಪಿಂಞ ಅವಡ ಮಕ್ಕಳ, ಕಡೇಲ್‌ ರಾಹೇಲಳ ಪಿಂಞ ಯೋಸೇಫನ ನಿಪ್ಪಿಚಿಟ್ಟತ್. 3 ಅಲ್ಲಿಂಜ ಯಾಕೋಬ ಅಯಿಂಗಡ ಮಿಂಞತ ಪೋಯಿತ್, ಏಳ್‌ ಕುರಿ ನೆಲಕ್‌ ಅಡ್ಡ ಬುದ್ದಿತ್‌ ನಮಸ್ಕಾರ ಮಾಡಿತ್ ಅಂವೊಂಡ ಅಣ್ಣಂಡ ಪಕ್ಕ ಪೋಚಿ. 4 ಆಚೇಂಗಿ ಏಸಾ ಓಡಿ ಬಂತ್‌ ಅಂವೊನ ತಬ್ಬಿಯಂಡ್‌ ಬೋಳೆಕ್‌ ಮುತ್ತ್‌ ಕೊಡ್‌ತತ್; ದಂಡಾಳು ಮೊರ್‌ಟತ್. 5 ಅಲ್ಲಿಂಜ ಏಸಾವ ಕಣ್ಣೆಡ್‌ತಿತ್‌ ನೋಟ್‌ವಕ ಪೊಣ್ಣಾಳ್‌ವಳ ಪಿಂಞ ಮಕ್ಕಳ ಕಂಡಿತ್: ನೀಡ ಕೂಡೆ ಉಳ್ಳ ಈಂಗೆಲ್ಲಾ ದಾರ್‌ಂದ್‌ ಕ್‍ೕಟತ್. ಅದ್‌ಂಗ್‌ ಯಾಕೋಬ: ಈಂಗೆಲ್ಲ ದೇವ ನಾಕ್‍ ದಯೆ ಬೆಚ್ಚಿತ್‌ ತಂದ ಮಕ್ಕಾಂದ್‌ ಎಣ್ಣ್‌ಚಿ. 6 ಅಕ್ಕ ಅಂವೊಂಡ ಪಣಿಕಾರ್ತಿ ದಂಡಾಳು ಅಯಿಂಗಡ ಮಕ್ಕಳ ಕಾಕಿಯಂಡ್‌ ಮಿಂಞಕ್‌ ಬಂದಿತ್‌ ಅಂವೊಂಗ್‌ ಬಗ್ಗಿತ್‌ ನಮಸ್ಕಾರ ಮಾಡ್‌ಚಿ. 7 ಅಲ್ಲಿಂಜ ಲೇಯಾಳ ತಾಂಡ ಮಕ್ಕಡ ಕೂಡೆ ಬಂದಿತ್‌ ಬಗ್ಗಿತ್‌ ನಮಸ್ಕಾರ ಮಾಡ್‌ಚಿ. ಕಡೇಕ್, ಯೋಸೇಫ ರಾಹೇಲಂಡ ಪಕ್ಕ ಬಂದಿತ್‌ ದಂಡಾಳು ಬಗ್ಗಿತ್‌ ನಮಸ್ಕಾರ ಮಾಡ್‌ಚಿ. 8 ಏಸಾವ: ನಾನ್‌ ಬಟ್ಟೆಲ್‌ ಬಪ್ಪಕ ಕಂಡ ಈ ಪ್ರಾಣಿಯಡ ವಿಷಯ ಎಂತಂದ್‌ ಕ್‍ೕಟತ್. ಅದ್‌ಂಗ್‌ ಯಾಕೋಬ: ನಾಡ ಯಜಮಾನಂಡ ಕಣ್ಣ್‌ಲ್‌ ನಾಕ್‍ ದಯೆ ಕ್‌ಟ್ಟಡ್‍ೕಂದ್‌ ನಾನ್‌ ಅಯಿಚಂದ್‌ ಎಣ್ಣ್‌ಚಿ. 9 ಆಚೇಂಗಿ ಏಸಾವ: ಓ ನಾಡ ತಮ್ಮಣನೇ! ನಾಡ ಪಕ್ಕ ಬೋಂಡಿಯಚ್ಚಕ್‌ ಉಂಡ್, ನೀಕ್‌ ಕೂಡ್‌ನದ್‌ ನೀನ್‌ ಬೆಚ್ಚಾಂದ್‌ ಎಣ್ಣ್‌ಚಿ. 10 ಅದ್‌ಂಗ್‌ ಯಾಕೋಬ: ಇಲ್ಲೆ, ನೀಡ ದಯೆ ನಾನ್‌ ಕ್‌ಟ್ಟಿತುಂಡೇಂಗಿ ಈ ಇನಾಮ್‌ನ ನೀನ್‌ ಸ್ವೀಕಾರ ಮಾಡಂಡು. ನೀನ್‌ ನನ್ನ ಎಚ್ಚಕ್‌ ಪ್ರೀತಿಲ್‌ ಸ್ವೀಕಾರ ಮಾಡಿಯ. ನಿನ್ನ ಕಂಡದ್‌ ನಾಕ್‍ ದೇವಡ ಮೂಡ್‌ನ ಕಂಡನೆಕೆ ಆಚಿ. 11 ದಯಬೆಚ್ಚಿತ್‌ ನಾಡ ಇನಾಮ್‌ನ ಸ್ವೀಕಾರ ಮಾಡ್. ನಾಡ ಮೇಲೆ ದೇವ ದುಂಬ ಕನಿಕರ ಬೆಚ್ಚನಗುಂಡ್‌ ನಾಕ್‍ ಬೋಂಡಿಯದೆಲ್ಲ ಉಂಡ್‍ೕಂದ್‌ ಎಣ್ಣ್‌ಚಿ. ಯಾಕೋಬ ದುಂಬ ಒತ್ತಾಯ ಮಾಡ್‌ನಂಗ್, ಏಸಾವ ಸ್ವೀಕಾರ ಮಾಡ್‌ಚಿ. 12 ಅಲ್ಲಿಂಜ ಏಸಾವ: ಅನ್ನನೆ ಆಡ್, ನಂಗ ಪೊರ್‌ಡನ. ನಾನ್‌ ನೀಡ ಮಿಂಞತ್‌ ಪೋಯಿತ್ ಬಟ್ಟೆ ಕಾಟ್‌ವೀಂದ್‌ ಎಣ್ಣ್‌ಚಿ. 13 ಆಚೇಂಗಿ, ಯಾಕೋಬ: ನಾಕ್‍ ಚೆರಿಯ ಕುಂಞಿಯ ಉಂಡ್. ಪಿಂಞ ನಾಕ್‍ ಇಕ್ಕ ನಾಕ್‍ ಪಾಲ್‌ ಕುಡಿಚ್ಚಂಡಿಪ್ಪ ಎಳೆಯ ಪ್ರಾಣಿಯಳು ಉಂಡ್, ಅದನ ನಾನ್‌ ನೋಟ್ಟಂಡು. ಅಯಿಂಗಳ ಒರೇ ದಿವಸತ್‌ಲ್‌ ದುಂಬ ದೂರ ಅಟ್ಟಿಯಂಡ್‌ ಪೋಚೇಂಗಿ, ಅಯಿಂಗ ಚತ್ತ್‌ಪೋಕು. 14 ದಯಬೆಚ್ಚಿತ್‌ ನಾಡ ಯಜಮಾನ ಆನ ನಿಂಗ ಮಿಂಞತ್‌ ಪೋಯಿ. ನಾನ್‌ ನಾಡ ಎತ್ತ್‌ಕಡ್‌ಚಿಯ ಪಿಂಞ ಮಕ್ಕಡ ಕೂಡೆ ಮೆಲ್ಲೆ ನಡ್‌ದಂಡ್‌ ಸೇಯಿರ್‌ ಸೀಮೆಕ್‌ ಬಂದಿತ್‌ ನಾಡ ಯಜಮಾನ ಆನ ನಿಂಗಳ ಕಾಂಬೀಂದ್‌ ಎಣ್ಣ್‌ಚಿ. 15 ಅದ್‌ಂಗ್‌ ಏಸಾವ: ನಾಡ ಕೂಡೆ ಉಳ್ಳ ಚೆನ್ನ ಜನಳ ನೀಡ ಪಕ್ಕ ಬುಟ್ಟಿತ್‌ ಪೋಪೀಂದ್‌ ಎಣ್ಣ್‌ಚಿ. ಅಕ್ಕ ಯಾಕೋಬ: ಅದೆಲ್ಲಾ ಬೋಂಡ ಸ್ವಾಮಿ, ನೀಡ ದಯೆ ನಾಕ್‍ ಕ್‌ಟ್ಟ್‌ಚೇಂಗಿ, ಅದೇ ಮದೀಂದ್‌ ಎಣ್ಣ್‌ಚಿ. 16 ಅದ್‌ಂಗ್‌ ಏಸಾವ ಆ ದಿವಸವೇ ಸೇಯಿರ್‌ ಸೀಮೆಕ್‌ ಪೊರ್‌ಟ್ ಪೋಚಿ. 17 ಆಚೇಂಗಿ ಯಾಕೋಬ ಸುಕ್ಕೋತ್‌ ಎಣ್ಣುವ ಊರ್‌ಕ್‌ ಪ್ರಯಾಣ ಮಾಡಿತ್, ಅಲ್ಲಿ ತಾನ್‌ ವಾಸ ಮಾಡ್‌ವಕಾಯಿತ್‌ ಒರ್‌ ಮನೆನ ಕೆಟ್ಟಿತ್, ಎತ್ತ್‌ಕಡ್‌ಚಿಕಾಯಿತ್‌ ಚಪ್ಪರತ್‌ನ ಕೆಟ್ಟ್‌ಚಿ. ಆನಗೊಂಡ್‌ ಆ ಜಾಗಕ್‌ ಸುಕ್ಕೋತ್‌ ಎಣ್ಣಿಯಂಡ್‌ ಪೆದ ಕ್‌ಟ್ಟ್‌ಚಿ. ಯಾಕೋಬ ಶೆಕೆಮ್‌ಕ್‌ ಎತ್ತ್‌ನದ್‌ 18 ಯಾಕೋಬ ಪದ್ದನ್‌ ಆರಾಮಿಂಜ ಬಂದ ಪಿಂಞ ಕಾನಾನ್‌ ದೇಶತ್‌ರ ಶಾಲೇಮ್‌ ಎಣ್ಣುವ ಶೆಕೆಮ್‌ ಪಟ್ಟಣನಕ್‌ ಎತ್ತ್‌ಚಿ. ಆ ಪಟ್ಟಣತ್‌ರ ಮಿಂಞತ್‌ ತಾಂಡ ಗುಡಾರತ್‌ನ ಇಟ್ಟತ್. 19 ಅಂವೊ ಗುಡಾರ ಇಟ್ಟ್‌ತ್‌ಂಜ ಬೂಮಿನ ಶೆಕೆಮಂಡ ಅಪ್ಪನಾನ ಹಮೋರನಂಡ ಮಕ್ಕಯಿಂಜ ನೂರ್‌ ಬೊಳ್ಳಿರ ನಾಣ್ಯ ಕೊಡ್‌ತಿತ್‌ ಎಡ್‍ತಂಡತ್. 20 ಅಲ್ಲಿ ಯಾಕೋಬ ಒರ್‌ ಬಲಿಪೀಠತ್‌ನ ಕೆಟ್ಟಿತ್ ಅದ್‌ಂಗ್‌ ಏಲ್‌ ಎಲೋಹೇ ಇಸ್ರಾಯೇಲ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್. |
© 2017, New Life Literature (NLL)