ಆದ್ಯತ್‌ರ ಪುಸ್ತಕ 32 - ಕೊಡವ ಬೈಬಲ್ಯಾಕೋಬ ಏಸಾವನ ಕಾಂಬಕ್‌ ತಯಾರ್‌ ಆಪದ್‌ 1 ಯಾಕೋಬ ಮಿಂಞಕ್‌ ಪ್ರಯಾಣ ಮಾಡಿಯಂಡ್‌ ಪೋಪಕ ದೇವದೂತಂಗ ಅಂವೊಂಡ ಮಿಂಞತ್‌ ಬಾತ್. 2 ಅಯಿಂಗಳ ಕಂಡದು ಯಾಕೋಬ: ಇದ್ ದೇವಡ ಸೈನ್ಯಾಂದ್‌ ಎಣ್ಣಿತ್, ಆ ಜಾಗಕ್‌ ಮಹನಯಿಮ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್. 3 ಅಲ್ಲಿಂಜ ಯಾಕೋಬ ಅಂವೊಂಗಿಂಜ ಮಿಂಞ ಎದೋಮ್ಯಂಡ ದೇಶವಾನ ಸೇಯಿರ್‌ ಸೀಮೆಕ್‌ ತಾಂಡ ಅಣ್ಣ ಆನ ಏಸಾವಂಡ ಪಕ್ಕ ತಾಂಡ ಆಳ್‌ನ ಅಯಿಚತ್. 4 ಅಯಿಂಗಳ ಅಯಿಪಕ: ನಾಡ ಯಜಮಾನನಾನ ನಾಡ ಅಣ್ಣನಾನ ಏಸಾವಂಡ ಪಕ್ಕ ಪೋಯಿತ್, ನೀಡ ಸೇವಕನಾನ ಯಾಕೋಬ ಇಲ್ಲಿಕತ್ತನೆ ನೀಡ ಮಾವನಾನ ಲಾಬಾನಂಡ ಕೂಡೆ ವಾಸ ಮಾಡಿಯಂಡಿಂಜತ್. 5 ಇಕ್ಕ ಅಂವೊಂಡ ಪಕ್ಕ ಎತ್ತ್, ಕತ್ತೆ, ಕೊರಿ ಪಣಿಕಾರಂಗ ಪಿಂಞ ಪಣಿಕಾರ್ತಿಯ ಎಲ್ಲಾ ಉಂಡ್. ಅಂವೊಂಗ್‌ ನೀಡ ದಯೆ ಕ್‌ಟ್ಟಂಡೂಂದ್‌ ನೀಕ್‌ ಎಣ್ಣ್‌ವಕಾಯಿತ್‌ ನಂಗಳ ನೀಡ ಪಕ್ಕ ಅಯಿಚಿತುಂಡ್‍ೕಂಡ್‍ೕಂದ್‌ ಎಣ್ಣೀಂದ್‌ ಎಣ್ಣ್‌ಚಿ. 6 ಅಂವೊಂಡ ಸುದ್ದಿನ ಎಡ್‌ತಂಡ್‌ ಪೋನಯಿಂಗ ತಿರಿತ್‌ ಬಂದಿತ್: ನಂಗ ನೀಡ ಅಣ್ಣ ಏಸಾವಂಡ ಪಕ್ಕ ಪೋಯಿತಿಂಜತ್. ಇಕ್ಕ ಅಂವೊ ನಾನೂರ್‌ ಆಣಾಳ್‌ವಡ ಕೂಡೆ ನಿನ್ನ ನೋಟ್‌ವಕ್‌ ಬಂದಂಡುಂಡ್‍ೕಂದ್‌ ಎಣ್ಣ್‌ಚಿ. 7 ಯಾಕೋಬ ಈ ಸುದ್ದಿನ ಕ್‍ೕಟಿತ್‌ ಬೊತ್ತಿ ಪೋಚಿ. ಅಂವೊ ತಾಂಡ ಕೂಡೆ ಇಂಜ ಜನಳ, ಆಡ್‌ಕೊರಿಯಡ ಹಿಂಡ್‌ನ ಒಂಟೆಯಳ ಎಲ್ಲಾನು ದಂಡ್‌ ಬಾಗ ಮಾಡಿತ್: 8 ಏಸಾವ ಒರ್‌ ಬಾಗತ್‌ನ ಆಕ್ರಮಣ ಮಾಡ್‌ಚೇಂಗಿಯು, ಇಂಞೊರ್‌ ಬಾಗ ಬಚಾವ್‌ ಆಪಾಂದ್‌ ಗೇನ ಮಾಡ್‌ಚಿ. 9 ಅಲ್ಲಿಂಜ ಯಾಕೋಬ: ಓ ದೇವ, ನಾಡ ಅಪ್ಪನಾನ ಅಬ್ರಹಾಮಂಡ ದೇವನೇ, ನಾಡ ಅಪ್ಪನಾನ ಇಸಾಕಂಡ ದೇವನೇ, ನಾಡ ದೇಶಕು, ನಾಡ ಬೆಂದ್‌ಕ ಉಳ್ಳ ಜಾಗಕು ತಿರಿತ್‌ ಪೋಂದ್‌ ಎಣ್ಣಿಯ ಯೆಹೋವ ನೀನೆ. ನೀನ್ ನಾಕ್‍ ನಲ್ಲದ್‌ನ ಮಾಡ್‌ವಿಯಾಂದ್‌ ತಕ್ಕ್‌ ತಂದಿತುಳ್ಳಿಯ. 10 ನೀಡ ಸೇವಕನಾನ ನಾಡ ಮೇಲೆ ನೀನ್ ಕಾಟ್‌ನ ಎಲ್ಲಾ ಪ್ರೀತಿಕು, ನೀನ್ ಬೆಚ್ಚಿತುಳ್ಳ ಎಲ್ಲಾ ನಂಬಿಕೆಕು ನಾನ್‌ ಎಚ್ಚಕು ಯೋಗ್ಯನಲ್ಲ . ಮಿಂಞ ನಾನ್‌ ಈ ಯೊರ್ದನ್‌ ಪೊಳೆನ ದಾಟ್‌ವಕ ನಾಡ ಕೈಯಿಲ್‌ ಬರಿ ಕೋಲ್‌ ಮಾತ್‌ರ ಇಂಜತ್. ಇಕ್ಕ ನಾನ್‌ ದಂಡ್‌ ಗುಂಪ್‌ಕ್‌ ಎಜಮಾನನಾಯಿತುಳ್ಳ. 11 ಓ ಯೆಹೋವನೇ, ನಾಡ ಅಣ್ಣ ಏಸಾವಯಿಂಜ ನನ್ನ ಕಾಪಾಡ್. ಅಂವೊ ನನ್ನ ಪಿಂಞ ನಾಡ ಪೊಣ್ಣ್‌ ಮಕ್ಕಳ ಕೊಲ್ಲುವಕ್‌ ಬಂದಂಡುಂಡ್‍ೕಂದ್‌ ನಾಕ್‍ ಪೋಡಿ ಆಯಂಡುಂಡ್. 12 ಆಚೇಂಗಿ ನೀನ್ ನಲ್ಲದ್‌ನ ಮಾಡ್‌ವಿಯಾಂದ್‌ ನಾಕ್‍ ತಕ್ಕ್‌ ತಂದಿತುಳ್ಳಿಯ. ಪಿಂಞ ನಾಡ ಸಂತಾನತ್‌ನ ಕಡಕರೆಲ್‌ ಉಳ್ಳ ಮಣತ್‌ರನೆಕೆ ಲೆಕ್ಕ ಮಾಡ್‌ವಕಯ್ಯತಚ್ಚಕ್‌ ಮಾಡ್‌ವಿಯಾಂದ್‌ ತಕ್ಕ್‌ ತಂದಿತುಳ್ಳಿಯಾಂದ್‌ ಪ್ರಾರ್ಥನೆ ಮಾಡ್‌ಚಿ. 13 ಯಾಕೋಬ ಅಂದ್‌ ಬಯಿಟ್ ಅಲ್ಲಿಯೇ ಒಳಿಂಜಿತ್, ಏಸಾವಂಗ್‌ ಕೊಡ್‌ಪಕ್‌ ಇನಾಮ್‌ನ ತಯಾರ್‌ ಮಾಡ್‌ಚಿ. 14 ಇರ್‌ನೂರ್‌ ಪೊಣ್ಣ್‌ ಆಡ್‌ವಳ, ಇರ್ವದ್‌ ಕೋಬಾಡ್‌ವಳ, ಇರ್‌ನೂರ್‌ ಪೊಣ್ಣ್‌ ಕೊರಿಯಳ, ಇರ್ವದ್‌ ಟಗರ್ವಳ, 15 ನುಪ್ಪದ್‌ ಪಾಲ್‌ ಕೊಡ್‌ಪ ಒಂಟೆಯಳ ಪಿಂಞ ಅದ್‌ಂಡ ಕುಟ್ಟಿಯಳ, ನಾಪ್ಪದ್‌ ಪಯ್ಯುವಳ, ಪತ್ತ್‌ ಎತ್ತ್‌ವಳ, ಇರ್ವದ್‌ ಪೊಣ್ಣ್‌ ಕತ್ತೆಯಳ ಪಿಂಞ ಪತ್ತ್‌ ಆಣ್‍ ಕತ್ತೆಯಳ 16 ಪ್ರತಿಯೋರ್‌ ಗುಂಪ್ನ ಚೆನ್ನ ಚೆನ್ನ ದೂರತ್‌ಲ್‌ ಬೆಚ್ಚಿತ್, ತಾಂಡ ಆಳ್‌ವಡ ಕೈಯಿಲ್‌ ಒಪ್ಪಿಚಿಟ್ಟಿತ್: ಓರೋರ್‌ ಗುಂಪ್‌ಕ್‌ ಮದ್ಯತ್‌ಲ್‌ ಜಾಗ ಬುಟ್ಟಿತ್, ನಾಕಿಂಜ ಮಿಂಞ ಅಟ್ಟಿಯಂಡ್‌ ಪೋಯೀಂದ್‌ ಎಣ್ಣ್‌ಚಿ. 17 ಆದ್ಯವಾಯಿತ್‌ ಪೋಯಂಡಿಂಜಂವೊನ ನೋಟಿತ್: ನೀನ್ ಏಸಾವನ ಕಾಂಬಕ, ನೀನ್ ದಾಡ ಆಳ್? ನೀನ್ ಎಲ್ಲಿಕ್‌ ಪೋಯಂಡುಳ್ಳಿಯ? ಈ ಪ್ರಾಣಿಯ ದಾಡದ್‌ ಎಣ್ಣಿಯಂಡ್‌ ಕ್‍ೕಟತೇಂಗಿ, 18 ನೀನ್: ಇದೆಲ್ಲ ನೀಡ ಸೇವಕನಾನ ಯಾಕೊಂಬಂಗ್‌ ಕೂಡ್‌ನದ್. ಅಂವೊಂಡ ಯಜಮಾನನಾನ ಏಸಾವಂಗ್‌ ಕೊಡ್‌ಪಕ್‌ ಉಳ್ಳ ಇನಾಮ್‌ ಇದ್. ಇದಾ, ಯಾಕೋಬ ಸಹ ನಂಗಡ ಬಯ್ಯತ್‌ ಬಂದಂಡುಂಡ್‍ೕಂದ್‌ ಎಣ್ಣಂಡೂಂದ್‌ ಯಾಕೋಬ ಅಯಿಂಗಕ್‌ ಎಣ್ಣ್‌ಚಿ. 19 ಅನ್ನನೆ ದಂಡನೆ, ಮೂಂದನೆ ಪಿಂಞ ಬಯ್ಯತ್‌ ಪೋಯಂಡಿಂಜ ಎಲ್ಲಾರ್‌ನ ನೋಟಿತ್: ಏಸಾವನ ಕಾಂಬಕ ನಿಂಗೆಲ್ಲಾರು ಇನ್ನನೆ ಎಣ್ಣಂಡು. 20 ನೀಡ ಸೇವಕನಾನ ಯಾಕೋಬ ನಂಗಡ ಬಯ್ಯತ್‌ ಬಂದಂಡುಂಡ್‍ೕಂದ್‌ ಎಣ್ಣಂಡೂಂದ್‌ ಆಜ್ಞೆ ಮಾಡ್‌ಚಿ. ಮಿಂಞ ಈ ಇನಾಮ್‌ನ ಅಯಿಚಿತ್, ಅಂವೊನ ಸಮಾದಾನ ಮಾಡಿತ್ ಬಯ್ಯ ಏಸಾವಂಡ ಮೂಡ್‌ ನೋಟ್‌ವಿ, ಅಕ್ಕ ಒರ್‌ ಸಮಯ ಅಂವೊ ನನ್ನ ಸ್ವೀಕಾರ ಮಾಡ್‌ವಾಂದ್‌ ಯಾಕೋಬ ಗೇನ ಮಾಡ್‌ಚಿ. 21 ಅನ್ನನೆ ಅಂವೊಂಡ ಇನಾಮ್‌ ಮಿಂಞ ಪೋಚಿ; ಯಾಕೋಬ ಗುಡಾರತ್‌ಲ್‌ ಆ ಬಯಿಟ್ ಕಯಿಚತ್. ಯಾಕೋಬ ದೇವಡ ಕೂಡ ಪೋರಾಡುವದ್‌ 22 ಆ ಬಯಿಟ್ ಎದ್ದಿತ್‌ ಅಂವೊಂಡ ದಂಡ್‌ ಪೊಣ್ಣಾಳ್‌ವಳ, ದಂಡ್‌ ಪಣಿಕಾರ್ತಿಯಳ ಪಿಂಞ ಪನ್ನಂದ್‌ ಮಕ್ಕಳ ಕಾಕಿಯಂಡ್‌ ಯಬ್ಬೋಕ್‌ ಎಣ್ಣುವ ಪೊಳೆನ ದಾಟ್‌ಚಿ. 23 ಅಯಿಂಗಳ ಪೊಳೆರ ಆ ಬರಿಕ್‌ ದಾಟ್‌ಚಿಟ್ಟಪಿಂಞ ಅಂವೊಂಗ್‌ ಕೂಡ್‌ನ ಆಸ್ತಿನೆಲ್ಲ ಅ ಬರಿಕ್‌ ಅಯಿಚತ್. 24 ಇದಾನ ಪಿಂಞ ಯಾಕೋಬ ಗುಡಾರತ್‌ ಒಂಟಿಯಾಯಿತ್‌ ದಾರ್‌ ಇಲ್ಲತ ಇಂಜತ್. ಅಕ್ಕ ಒರ್‌ ಮನುಷ್ಯ ಅಂವೊಂಡ ಕೂಡೆ ಪೊಲಾಕಕತ್ತನೆ ಪೋರಾಡ್‌ಚಿ. 25 ಆ ಮನುಷ್ಯಂಗ್‌ ಯಾಕೋಬನ ಗೆಲ್ಲ್‌ವಕ್‌ ಕಯ್ಯುಲೇಂದ್‌ ಗೊತ್ತಾಪಕ, ಯಾಕೋಬಂಡ ತೊಡೆರ ಕೀಲ್‌ನ ಮುಟ್ಟ್‌ಚಿ. ಯಾಕೋಬ ಅನ್ನನೆ ಪೋರಾಡ್‌ವಕ ಅಂವೊಂಡ ತೊಡೆ ಕೀಲ್‌ ಬಲ್‌ಚಂಡ್‌ ಬಾತ್. 26 ಅಕ್ಕ ಆ ಮನುಷ್ಯ: ಪೊಲಾಕ ಆಚಿ, ನನ್ನ ಪೋಪಕ್‌ ಬುಡ್‍ೕಂದ್‌ ಎಣ್ಣ್‌ಚಿ. ಅಕ್ಕ ಯಾಕೋಬ: ನೀನ್ ನನ್ನ ಆಶೀರ್ವಾದ ಮಾಡ್‌ವಕತ್ತನೆ ನಿನ್ನ ಪೋಪಕ್‌ ಬುಡುಲೇಂದ್‌ ಎಣ್ಣ್‌ಚಿ. 27 ಆ ಮನುಷ್ಯ: ನೀಡ ಪೆದ ಎಂತಾಂದ್‌ ಕ್‍ೕಪಕ, ಅಂವೊ: ಯಾಕೋಬಾಂದ್‌ ಎಣ್ಣ್‌ಚಿ. 28 ಅಕ್ಕ ಆ ಮನುಷ್ಯ: ನೀನ್ ದೇವಡ ಕೂಡೆಯು ಮನುಷ್ಯಂಡ ಕೂಡೆಯು ಪೋರಾಡಿತ್‌ ಗೆದ್ದಗುಂಡ್, ನೀಡ ಪೆದ ಇಂಞು ಮಿಂಞಕ್‌ ಯಾಕೋಬಾಂದ್‌ ಇಕ್ಕತೆ ಇಸ್ರಾಯೇಲ್‌ಾಂದ್‌ ಇಪ್ಪಾಂದ್‌ ಎಣ್ಣ್‌ಚಿ. 29 ಅಕ್ಕ ಯಾಕೋಬ: ನೀಡ ಪೆದ ಎಂತಾಂದ್‌ ಕ್‍ೕಪಕ, ನೀನ್ ಎನ್ನಂಗ್‌ ನಾಡ ಪೆದತ್‌ನ ಕ್‍ೕಪಿಯಾಂದ್‌ ಎಣ್ಣಿತ್ ಅಲ್ಲಿ ಅಂವೊನ ಆಶೀರ್ವಾದ ಮಾಡ್‌ಚಿ. 30 ಅಕ್ಕ ಯಾಕೋಬ: ನಾನ್‌ ದೇವಡ ಮೂಡ್‌ನ ನೋಟ್‌ನ ಆಚೇಂಗಿಯು, ನಾಡ ಜೀವ ಉಳ್‌ಂಜತಲ್ಲಾಂದ್‌ ಎಣ್ಣಿತ್ ಆ ಜಾಗಕ್‌ ಪೆನೀಯೇಲ್‌ಂದ್‌ ಪೆದ ಬೆಚ್ಚತ್. 31 ತೊಡೆರ ನೊಂಬಲತ್‌ರಗುಂಡ್‌ ಅಂವೊ ಕುಂಟಿಯಂಡ್‌ ಪೆನೀಯೇಲ್‌ ಜಾಗತ್‌ನ ಬುಟ್ಟಿತ್ ಪೋಪಕ ಸೂರ್ಯ ಕೊಡಿಕ್‌ ಬಾತ್. 32 ಆ ಮನುಷ್ಯ ಯಾಕೋಬಂಡ ತೊಡೆರೆ ಕೀಲ್‌ರ ನರುನ ಮುಟ್ಟ್‌ನಗುಂಡ್‌ ಇಂದ್‌ ಸಹ ಇಸ್ರಾಯೇಲ್‌ ದೇಶತ್‌ರ ಜನ ತೊಡೆರ ಕೀಲ್‌ರ ನರುನ ಯರ್ಚಿನ ತಿಂಬ್‌ಲೆ. |
© 2017, New Life Literature (NLL)