ಆದ್ಯತ್‌ರ ಪುಸ್ತಕ 25 - ಕೊಡವ ಬೈಬಲ್1 ಅಬ್ರಹಾಮ ಪುನಃ ಕೆಟೂರ ಎಣ್ಣುವವಳ ಮಂಗಲ ಕಯಿಚಂಡತ್. 2 ಅವ ಅಂವೊಂಗ್ ಜಿಮ್ರಾನ, ಯೊಕ್ಷಾನ, ಮೆದಾನ, ಮಿದ್ಯಾನ, ಇಷ್ಬಾಕ, ಶೂಹ ಎಣ್ಣುವಯಿಂಗಳ ಪೆತ್ತತ್. 3 ಯೊಕ್ಷಾನ, ಶೆಬಾ ಪಿಂಞ ದೆದಾನ ಎಣ್ಣುವಯಿಂಗಕ್‌ ಅಪ್ಪನಾಯಿತ್‌ಂಜತ್. ದೆದಾನಂಡ ಕ್‌ಣ್ಣ ಮಕ್ಕ, ಅಶ್ಶೂರ್ಯಯಂಗ, ಲೆಟೂಶ್ಯಂಗ ಪಿಂಞ ಲೆಯುಮ್ಯಂಗ ಎಣ್ಣುವಯಿಂಗಳೇ. 4 ಮಿದ್ಯಾನಂಡ ಕ್‌ಣ್ಣ ಮಕ್ಕ ಗೇಫಾ, ಗೇಫೆರ್, ಹನೋಕ, ಅಬೀದಾ, ಎಲ್ದಾಯ ಎಣ್ಣುವಯಿಂಗಳೇ. ಈಂಗೆಲ್ಲಾ ಕೆಟೂರಳಂಡ ಮಕ್ಕ ಆಯಿತ್‌ಂಜತ್. 5 ಅಬ್ರಹಾಮ ತಾಂಡ ಎಲ್ಲಾ ಆಸ್ತಿನ ಇಸಾಕಂಗ್‌ ಕೊಡ್‌ತತ್. 6 ಅಬ್ರಹಾಮ ಬದ್‌ಕಿಯಂಡಿಪ್ಪ ಕಾಲತ್‌ಲೇ, ತಾಂಡ ಉಪ ಪೊಣ್ಣ್‌ಕ್ ಪುಟ್ಟ್‌ನ ಕ್‌ಣ್ಣ್‌ ಮಕ್ಕಕ್‌ ಇನಾಮ್‌ನ ಕೊಡ್‌ತಿತ್‌ ತಾಂಡ ಮೋಂವೊ ಇಸಾಕಡಿಂಜ ಕ್‍ೕಕ್‌ ದಿಕ್ಕ್‌ಲ್‌ ಕ್‍ೕಕ್‌ ದೇಶಕ್‌ ಅಯಿಚತ್. 7 ಅಬ್ರಹಾಮ ನೂಟ್ಯ ಎಳುವತಂಜ್ ಕಾಲ ಬದ್‌ಕ್‌ಚಿ. 8 ಅಂವೊ ದುಂಬ ವಯಸ್ಸಾಯಿತ್‌ ಪ್ರಾಣ ಬುಟ್ಟಿತ್‌ ತಾಂಡ ಜನತ್‌ರ ಕೂಡೆ ಕೂಡ್‌ಚಿ. 9 ಅಂವೊಂಡ ಮಕ್ಕಳಾನ ಇಸಾಕ ಪಿಂಞ ಇಷ್ಮಾಯೇಲ ಹಿತ್ತಿಯನಾನ ಚೋಹರಂಡ ಮೋಂವೊನಾನ ಎಫ್ರೋನಂಡ ಬೂಮಿಲ್‌ ಉಳ್ಳ ಮಕ್ಪೇಲ ಎಣ್ಣುವ ಗುವೆಲ್‌ ಅಂವೊನ ಪೂತತ್. ಅದ್‌ ಮಮ್ರೆಕ್‌ ಪಕ್ಕತ್‌ ಇಂಜತ್. 10 ಈ ಬೂಮಿನ ಅಬ್ರಹಾಮ ಹಿತ್ತಿಯರಯಿಂಗಡಯಿಂಜ ಕ್ರಯಕ್‌ ಎಡ್‌ತಿತ್‌ಂಜತ್. ಈ ಜಾಗತ್‌ಲ್‌ ಅಬ್ರಹಾಮನ ಪಿಂಞ ಅಂವೊಂಡ ಪೊಣ್ಣ್‌ ಸಾರಳನ ಪೂತತ್. 11 ಅಬ್ರಹಾಮ ಚತ್ತ್‌ ಪೋನ ಪಿಂಞ ದೇವ ಅಂವೊಂಡ ಮೋಂವೊ ಇಸಾಕನ ಆಶೀರ್ವಾದ ಮಾಡ್‌ಚಿ. ಅಂವೊ ಲಹೈರೋಯಿ ಎಣ್ಣುವ ಕಣತರೆರ ಪಕ್ಕತ್‌ಲ್‌ ವಾಸಮಾಡಿಯಂಡಿಂಜತ್. ಇಷ್ಮಾಯೇಲಂಡ ವಂಶಕಾರಂಗ 12 ಇದ್‌ ಅಬ್ರಹಾಮಂಗ್‌ ಸಾರಳಂಡ ಪಣಿಕಾರ್ತಿಯಾನ ಐಗುಪ್ತ ದೇಶಕ್‌ ಕೂಡ್‌ನ ಹಾಗರಕ್‌ ಪುಟ್ಟ್‌ನ ಇಷ್ಮಾಯೇಲಂಡ ವಂಶಾವಳಿ. 13 ಇದ್‌ ಇಷ್ಮಾಯೇಲಂಡ ಮಕ್ಕಕು, ಅಯಿಂಗಡಿಂಜ ಪುಟ್ಟ್‌ನ ಕುಲತ್‌ರ ಪ್ರಕಾರ ಉಳ್ಳ ಪೆದ. ಇಷ್ಮಾಯೇಲಂಡ ಪೆರಿಯ ಮೋಂವೊಂಡ ಪೆದ ನೆಬಾಯೋತ, ಅಲ್ಲಿಂಜ ಪುಟ್ಟ್‌ನಂವೊ ಕೇದರ, ಅದ್ಬಯೇಲ, ಮಿಬ್ಸಾಮ, 14 ಮಿಷ್ಮಾ, ದೂಮಾ, ಮಸ್ಸಾ, 15 ಹದದ, ತೇಮಾ, ಯಟೂರ, ನಾಫೀಷ, ಕೇದ್ಮಾ ಎಣ್ಣುವಯಿಂಗಳೇ. 16 ತಂಗಡ ಊರ್‌ಲ್‌ ಪಿಂಞ ಗುಡಾರತ್‌ಲ್‌ ವಾಸಮಾಡಿಯಂಡಿಂಜ ತಂಗಡ ಮಕ್ಕಕ್‌ ಪನ್ನರೆಂಡ್‌ ರಾಜಕುಮಾರಂಗಳಾನ ಇಷ್ಮಾಯೇಲಂಡ ಕ್‌ಣ್ಣ ಮಕ್ಕ ಈಂಗಳೇ, ಇದೇ ಈಂಗಡ ಪೆದವು ಆಪ. 17 ಇಷ್ಮಾಯೇಲ ನೂಟ್ಯ ನುಪ್ಪತ್‍ೕಳ್‌ ಕಾಲ ಬದ್‌ಕ್‌ಚಿ. ಆ ವಯಸ್ಸ್‌ಲ್‌ ಅಂವೊ ಚತ್ತಿತ್, ತಾಂಡ ಜನತ್‌ರ ಕೂಡೆ ಕೂಡ್‌ಚಿ. 18 ಇಷ್ಮಾಯೇಲಂಡ ಸಂತಾನ ಹವೀಲಯಿಂಜ ಐಗುಪ್ತ ದೇಶಕ್‌ ಎದಿಕೆ ಅಶ್ಯೂರಿಕ್‌ ಪೋಪ ಬಟ್ಟೆಲ್‌ ಉಳ್ಳ ಶೂರಿಕತ್ತನೆ ವಾಸ ಇಂಜತ್. ಇದ್‌ ಇಷ್ಮಾಯೇಲ ಅಂವೊಂಡ ಅಣ್ಣತಮ್ಮಣಂಗಡ ಮಿಂಞತ್‌ ವಾಸ ಮಾಡ್‌ನ ಬೂಮಿ. ಆಬ್ರಹಾಮ್ರ ವಂಶಾವಳೀ 19 ಅಬ್ರಹಾಮಂಡ ಮೊಂವೊನಾನ ಇಸಾಕಂಡ ವಂಶಾವಳಿ. ಅಬ್ರಹಾಮ ಇಸಾಕನ ಪೆತ್ತತ್. 20 ಇಸಾಕ ರೆಬೆಕ್ಕಳ ಮಂಗಲ ಕಯಿಪಕ ಅಂವೊಂಗ್ ನಾಪದ್‌ ವಯಸ್ಸಾಯಿತ್‌ಂಜತ್. ಇವ ಪದ್ದನ್‌ ಅರಾಮ್‌ ಎಣ್ಣುವ ಸಿರಿಯ ದೇಶಕ್‌ ಕೂಡ್‌ನಂವೊನಾನ ಬೆತೂವೇಲಂಗ್‌ ಮೋವಳು, ಸಿರಿಯ ದೇಶಕ್‌ ಕೂಡ್‌ನಂವೊನಾನ ಲಾಬಾನಂಡ ತಂಗೆಯು ಆಯಿತ್‌ಂಜತ್. 21 ಅವಕ್ ಮಕ್ಕ ಇಂಜಿತ್‌ಲ್ಲೆ, ಆಂಗ್‌ ಇಸಾಕ ಅವಕಾಯಿತ್, ಯೆಹೋವನ ಬೋಡಿಯಂಡತ್. ಯೆಹೋವ ಅಂವೊಂಡ ಪ್ರಾರ್ಥನೆನ ಕ್‍ೕಟ್‌ತ್. ಅಂವೊಂಡ ಪೊಣ್ಣ್‌ ರೆಬೆಕ್ಕ ಕುಳುಮೆಕಾರ್ತಿ ಆಚಿ. 22 ಆಚೇಂಗಿ, ಅವಡ ಕೆಲತ್‌ಲ್‌ ಕುಂಞಿಯ ಒಂದಂಗೊಂದ್‌ ನೂಕಿಯಂಡಿಪ್ಪಕ, ಅವ: ನಾಕ್‍ ಎನ್ನಂಗ್‌ ಇನ್ನನೆ ಆಯಂಡುಂಡ್‍ೕಂದ್‌ ಯೆಹೋವನ ಕ್‍ೕಪಕ್‌ ಪೋಚಿ. 23 ಯೆಹೋವ ಅವಕ್: ನೀಡ ಕೆಲತ್‌ಲ್‌ ದಂಡ್‌ ಜನಾಂಗ ಉಂಡ್; ದಂಡ್‌ ಜನಾಂಗ ನೀಡ ಕೆಲತ್‌ಂಜ ಬೋರೆ ಬೋರೆ ಆಯಿಪೋಪ. ಅದ್‌ಲ್‌ ಒಬ್ಬ ಇಂಞೊಬ್ಬಕಿಂಜಿ ಬಲಶಾಲಿ ಆಯಿತ್‌ಪ್ಪ. ಪೆರಿಯಂವೊ ಚೆರಿಯವಂಗ್‌ ಸೇವೆ ಮಾಡ್‌ವಾಂದ್‌ ಎಣ್ಣ್‌ಚಿ. 24 ಅವಕ್ ಪೆರುವ ಸಮಯ ಬಪ್ಪಕ ಎಣೆ ಮಕ್ಕಳ ಪೆತ್ತತ್. 25 ಮಿಂಞ ಪುಟ್ಟ್‌ನಂವೊ ಚೋಪಾಯಿತು, ಇಡಿ ದೇಹ ರೋಮತ್‌ಲ್‌ ಮಾಡ್‌ನ ಬಟ್ಟೆ ಇಟ್ಟಂಡುಳ್ಳಂವೊನೆಕೆಯು ಇಂಜತ್. ಅಂವೊಂಗ್ ಏಸಾವಾಂದ್‌ ಪೆದ ಬೆಚ್ಚತ್. 26 ದಂಡನೆ ಕುಂಞಿ ಏಸಾವಂಡ ಕಾಲ್‌ರ ಮುಡಿನ ಗಟ್ಟಿಯಾಯಿತ್‌ ಪುಡ್‌ಚಂಡ್‌ ಪುಟ್ಟ್‌ಚಿ. ಅಂವೊಂಗ್ ಯಾಕೋಬಾಂದ್‌ ಪೆದ ಬೆಚ್ಚತ್. ಈಂಗ ಪುಟ್ಟ್‌ವಕ ಇಸಾಕಂಗ್‌ ಅರ್ವದ್‌ ವಯಸ್ಸ್‌ ಆಯಿತ್‌ಂಜತ್. 27 ಆ ಕುಂಞಿಯ ಬಲ್ಯದಾನ ಪಿಂಞ ಏಸಾವ ನಲ್ಲ ಬೋಟೆಗಾರನಾಯಿತು, ಕಾಡ್‌ಲ್‌ ವಾಸಮಾಡ್‌ವಂವೊನಾಯಿತು ಇಂಜತ್. ಆಚೇಂಗಿ ಯಾಕೋಬ ದುಂಬ ಸಾದು ಮನುಷ್ಯನಾಯಿತು, ಗುಡಾರತ್‌ಲ್‌ ವಾಸಮಾಡ್‌ವಂವೊನಾಯಿತು ಇಂಜತ್. 28 ಕಾಡ್‌ ಯರ್ಚಿ ಇಸಾಕಂಗ್‌ ದುಂಬ ಕುಶಿಯಾನಗುಂಡ್‌ ಅಂವೊ ಏಸಾವನ ಪ್ರೀತಿ ಮಾಡ್‌ಚಿ. ಆಚೇಂಗಿ ರೆಬೆಕ್ಕ ಯಾಕೋಬನ ಪ್ರೀತಿ ಮಾಡ್‌ಚಿ. 29 ಒರ್‌ ದಿವಸ ಯಾಕೋಬ ಚೋಪಾಯಿತುಳ್ಳ ರಸವುಳ್ಳ ಕರೀರ ಅಡಿಗೆ ಮಾಡಿಯಂಡಿಪ್ಪಕ ಏಸಾವ ಕಾಡಿಂಜ ದುಂಬ ಸುಸ್ತಾಯಿತ್‌ ಕೆಲಪೈಚಿತ್‌ ಮನೆಕ್‌ ಬಾತ್. 30 ಅಕ್ಕ ಏಸಾವ ಯಾಕೋಬಂಗ್: ನೀನ್‌ ಮಾಡ್‌ನ ಆ ಚೋಪಾಯಿತುಳ್ಳ ಆ ರಸವುಳ್ಳ ಕರಿನ ನಾಕ್‍ ಚೆನ್ನ ತಾಂದ್‌ ಕ್‍ೕಟತ್. (ಆಂಗಾಯಿತ್‌ ಏಸಾವಂಗ್‌ ಎದೋಮ ಎಣ್ಣಿಯಂಡ್‌ ಪೆದ ಬಾತ್.) 31 ಆಚೇಂಗಿ ಯಾಕೋಬ ಅಂವೊಂಗ್: ಮಿಂಞ ನೀನ್‌ ನೀಡ ಪೆರಿಯ ಮೋಂವೋಂದ್‌ ಉಳ್ಳ ಜನ್ಮ ಹಕ್ಕ್‌ನ ನಾಕ್‍ ಮಾರಿತ್‌ ಕೊಡ್‌ಪೀಂದ್‌ ಆಣೆ ಮಾಡಿತ್ ತಾಂದ್‌ ಎಣ್ಣ್‌ಚಿ. 32 ಅದ್‌ಂಗ್‌ ಏಸಾವ: ನೋಟ್, ನಾನ್‌ ಕೆಲಪೈಚಿತ್‌ ಚತ್ತ್‌ ಪೋಯಂಡುಳ್ಳ. ಪೆರಿಯ ಮೋಂವೋಂದ್‌ ಉಳ್ಳ ಹಕ್ಕ್‌ನ ಬೆಚ್ಚಂಡ್‌ ನಾಕ್‍ ಎಂತ ಪ್ರಯೋಜನಾಂದ್‌ ಎಣ್ಣ್‌ಚಿ. 33 ಅಕ್ಕ ಯಾಕೋಬ: ಅಂದಕ ನೀನ್‌ ಇಕ್ಕಲೆ ಆ ಹಕ್ಕ್‌ ನಾಡದ್‌ ಎಣ್ಣಿಯಂಡ್‌ ಆಣೆ ಮಾಡಿ ತಾಂದ್‌ ಎಣ್ಣ್‌ಚಿ. ಅದ್‌ಂಗ್‌ ಏಸಾವ ಆಣೆ ಮಾಡಿತ್, ಪೆರಿಯ ಮೋಂವೋಂದ್‌ ಉಳ್ಳ ತಾಂಡ ಜನ್ಮ ಹಕ್ಕ್‌ನ ಯಾಕೋಬಂಗ್ ಕೊಡ್‌ತ್‌ರ್‌ತ್. 34 ಅಕ್ಕ ಯಾಕೋಬ ಏಸಾವಂಗ್‌ ಒಟ್ಟಿನ ಪಿಂಞ ಕರಿನ ಕೊಡ್‌ತತ್. ಏಸಾವ ಅದ್‌ನ ತಿಂದಿತ್‌ ಕುಡ್‌ಚಿತ್‌ ಎದ್ದಿತ್‌ ಪೋಚಿ. ಇನ್ನನೆ ಅಂವೊ ತಾಂಡ ಜನ್ಮ ಹಕ್ಕ್‌ರ ವಿಷಯತ್‌ನ ಕಡೆಗಟ್ಟ್‌ಚಿ. |
© 2017, New Life Literature (NLL)