ಆದ್ಯತ್‌ರ ಪುಸ್ತಕ 12 - ಕೊಡವ ಬೈಬಲ್ದೇವ ಆಬ್ರಾಮ್‌ನ ಕಾಕ್‌ನದ್‌ 1 ಯೆಹೋವ ಅಬ್ರಾಮಂಗ್: ನೀನ್‌ ನೀಡ ಸ್ವಂತ ದೇಶತ್‌ನ, ಮನೆಕಾರಳ ಪಿಂಞ ನೀಡ ಅಪ್ಪಂಡ ಮನೆನ ಬುಟ್ಟಿತ್‌ ನಾನ್‌ ನೀಕ್‌ ಕಾಟಿತಪ್ಪ ದೇಶಕ್‌ ಪೋಪಿಯ. 2 ನಾನ್‌ ನಿನ್ನ ಬಲ್ಯ ಜನಾಂಗವಾಯಿತ್‌ ಮಾಡುವಿ. ನಾನ್‌ ನಿನ್ನ ಆಶೀರ್ವಾದ ಮಾಡಿತ್, ನೀಡ ಪೆದತ್‌ನ ಬಲ್ಯದ್‌ ಮಾಡುವಿ; ನೀನ್‌ ನೇರಾಯಿತು ಆಶೀರ್ವಾದ ಬಡಂತವನಾಯಿತ್‌ಪ್ಪಿಯ. 3 ನಿನ್ನ ಆಶೀರ್ವಾದ ಮಾಡುವಯಿಂಗಳ, ನಾನ್‌ ಆಶೀರ್ವಾದ ಮಾಡುವಿ, ನೀಕ್‌ ಶಾಪ ಇಡ್‌ವಯಿಂಗಳ ನಾನ್‌ ಶಾಪ ಇಡುವಿ. ಈ ಬೂಮಿಲ್‌ ಉಳ್ಳ ಎಲ್ಲಾ ವಂಶವು ನೀಡ ಮೂಲಕ ಆಶೀರ್ವಾದ ಪೊಂದುವಾಂದ್‌ ಎಣ್ಣ್‌ಚಿ. 4 ಯೆಹೋವ ಎಣ್ಣ್‌ನ ಪ್ರಕಾರ ಅಬ್ರಾಮ ಅಲ್ಲಿಂಜ ಪೊರ್‌ಟ್ ಪೋಚಿ. ಅಂವೊಂಡ ಕೂಡೆ ಲೋಟನು ಪೊರ್‌ಟ್ ಪೋಚಿ. ಅಬ್ರಾಮ ಹಾರಾನ್‌ ಪಟ್ಟಣತ್‌ನ ಬುಟ್ಟಿತ್‌ ಪೋಪಕ ಅಂವೊಂಗ್‌ ಎಳ್‌ವತಂಜಿ ವಯಸ್ಸ್‌ ಆಯಿತ್‌ಂಜತ್. 5 ಅಂವೊ ತಾಂಡ ಪೊಣ್ಣ್‌ ಸಾರಯ್, ತಮ್ಮಣನಂಡ ಮೋಂವೊನಾನ ಲೋಟನ ಪಿಂಞ ಹಾರಾನ್‌ಲ್‌ ಸಂಪಾದನೆ ಮಾಡಿತ್‌ಂಜ ಎಲ್ಲಾ ಸೊತ್ತ್‌ನ, ಪಣಿಕಾರಳ ಪಿಂಞ ಪಣಿಕಾರ್ತಿಯಳ ಕೂಟಿಯಂಡ್‌ ಕಾನಾನ್‌ ದೇಶಕ್‌ ಪೊರ್‌ಟ್ ಪೋಚಿ. ಅಯಿಂಗ ಕಾನಾನ್‌ ದೇಶಕ್‌ ಎತ್ತ್‌ಚಿ. 6 ಅಬ್ರಾಮ ಆ ದೇಶತ್‌ಲ್‌ ಎಲ್ಲಾ ಪ್ರಯಾಣ ಮಾಡಿತ್ ಶೆಕೆಮ್‌ಲ್‌ ಉಳ್ಳ ಮೋರೆ ಎಣ್ಣುವ ಜಾಗತ್‌ಲ್‌ ಇಂಜ ಪುನ್ಯ ಮರತ್‌ರ ಪಕ್ಕ ಬಾತ್. ಆ ಕಾಲತ್‌ ಕಾನಾನ್ಯರಯಿಂಗ ಆ ದೇಶತ್‌ಲ್‌ ಇಂಜತ್. 7 ಅಲ್ಲಿ ಯೆಹೋವ ಅಬ್ರಾಮಂಗ್ ಕಾಂಬ್‌ಚಿಟ್ಟಂಡ್: ಈ ದೇಶತ್‌ನ ನೀಡ ಸಂತಾನಕಾರಂಗಕ್‌ ತಪ್ಪೀಂದ್‌ ಎಣ್ಣ್‌ಚಿ. ಅಕ್ಕ ಅಂವೊ ತಾಂಗ್‌ ಕಾಂಬ್‌ಚಿಟ್ಟ ಯೆಹೋವಂಗ್‌ ಒರ್‌ ಬಲಿಪೀಠತ್‌ನ ಕೆಟ್ಟ್‌ಚಿ. 8 ಅಲ್ಲಿಂಜ ಅಂವೊ ಪೊರ್‌ಟಿತ್‌ ಬೇತೇಲ್‌ರ ಕ್‍ೕಕ್‌ ದಿಕ್ಕ್‌ಲ್‌ ಉಳ್ಳ ಕುಂದ್ರ ಪಕ್ಕ ಬಂದಿತ್‌ ಗುಡಾರ ಇಟ್ಟತ್. ಅದ್‌ಂಡ ಪಡ್‌ಞಾರ್‌ ದಿಕ್ಕಲ್‌ ಬೇತೇಲು ಕ್‍ೕಕ್‌ ದಿಕ್ಕ್‌ಲ್‌ ಆಯಿ ಎಣ್ಣುವ ಊರು ಇಂಜತ್. ಅಲ್ಲಿ ಯೆಹೋವಂಗ್‌ ಒರ್‌ ಬಲಿಪೀಠತ್‌ನ ಕೆಟ್ಟಿತ್‌ ಯೆಹೋವಂಡ ಪೆದ ಎಣ್ಣಿತ್‌ ಆರಾದನೆ ಮಾಡ್‌ಚಿ. 9 ಅಕ್ಕಣೆಕ್ ಅಬ್ರಾಮ ಅಲ್ಲಿಂಜ ಪೊರ್‌ಟಿತ್‌ ತೆಕ್ಕ್‌ ದಿಕ್ಕ್‌ಲ್‌ ಪ್ರಯಾಣ ಮಾಡಿಯಂಡ್‌ ಪೋಚಿ. 10 ಈ ಸಮಯತ್‌ಲ್‌ ಆ ದೇಶತ್‌ಲ್‌ ಬರಗಾಲ ಇಂಜತ್. ಅಲ್ಲಿ ಬರಗಾಲ ಕಠಿಣವಾಯಿತ್‌ ಇಂಜನಗುಂಡ್‌ ಚೆನ್ನಕಾಲ ಐಗುಪ್ತ ದೇಶತ್‌ಲ್‌ ಇಪ್ಪಕ್‌ ಪೋಚಿ. 11 ಅಂವೊ ಐಗುಪ್ತ ದೇಶತ್‌ರ ಪಕ್ಕ ಎತ್ತುವಕ ತಾಂಡ ಪೊಣ್ಣ್‌ ಸಾರಯಂಗ್‌ ಇನ್ನನೆ ಎಣ್ಣ್‌ಚಿ: ನೀನ್‌ ಕಾಂಬಕ್‌ ಚಾಯಿಕಾರ್ತೀಂದ್‌ ನಾಕ್‍ ಗೊತ್ತುಂಡ್. 12 ಐಗುಪ್ತ ದೇಶತ್‌ರ ಜನ ನಿನ್ನ ಕಂಡಿತ್, ಇವ ಇಂವೊಂಡ ಪೊಣ್ಣ್‌ಂದ್‌ ಎಣ್ಣಿತ್‌ ನನ್ನ ಕೊಂದಿತ್‌ ನಿನ್ನ ಜೀವಂತವಾಯಿತ್‌ ಬುಡುವ. 13 ಆಂಗಾಯಿತ್‌ ನೀಡಗುಂಡ್‌ ನಾಕ್‍ ನಲ್ಲದ್‌ ಆಪಕಾಯಿತು, ನೀಡಗುಂಡ್‌ ನಾನ್‌ ಚಾವತೆ ಬದ್‌ಕ್‌ವಕಾಯಿತು ದಯಬೆಚ್ಚಿತ್‌ ನೀನ್‌ ನಾಡ ತಂಗೇಂದ್‌ ಅಯಿಂಗಡ ಪಕ್ಕ ಎಣ್ಣ್‌ಂದ್‌ ಅಂವೊ ಎಣ್ಣ್‌ಚಿ. 14 ಅನ್ನನೆ ಅಬ್ರಾಮ ಐಗುಪ್ತ ದೇಶಕ್‌ ಬಪ್ಪಕ, ಐಗುಪ್ತ ದೇಶತ್‌ರ ಜನ ಅಂವೊಂಡ ಕೂಡೆ ಇಂಜ ಆ ಪೊಣ್ಣಾಳ್‌ ದುಂಬ ಚಾಯಿಕಾರ್ತೀಂದ್‌ ಕಂಡತ್. 15 ಫರೋಹನಂಡ ಅದಿಕಾರಿಯ ಅವಳ ಕಂಡಿತ್ ಫರೋಹನಂಡ ಮಿಂಞತ್‌ಲ್‌ ಅವಳ ಕೊಂಡಾಡ್‌ಚಿ. ಅಕ್ಕ ಆ ಪೊಣ್ಣಾಳ್‌ನ ಫರೋಹನಂಡ ಅರಮನೆಕ್‌ ಕಾಕಿಯಂಡ್‌ ಪೋಚಿ. 16 ಅವಳಗುಂಡ್‌ ಫರೋಹನ ಅಬ್ರಾಮನ ತಕ್ಕರಿಚಿಟ್ಟತ್. ಅಬ್ರಾಮಂಗ್ ಕೊರಿ, ಎತ್ತ್‌ಕಡ್‌ಚಿಯ, ಆಣ್‍ ಪೊಣ್ಣ್‌ ಕತ್ತೆಯ ಪಣಿಕಾರಂಗ ಪಣಿಕಾರ್ತಿಯಳ ಪಿಂಞ ಒಂಟೆಯಳ ಕೊಡ್‌ತತ್. 17 ಆಚೇಂಗಿ ಯೆಹೋವ ಅಬ್ರಹಾಮಂಡ ಪೊಣ್ಣಾನ ಸಾರಯಳಗುಂಡ್‌ ಫರೋಹನ ಪಿಂಞ ಅಂವೊಂಡ ಮನೆಕಾರಕ್‌ ಬಲ್ಯ ಬಾದೆ ಕೊಡ್‌ತಿತ್‌ ಕಷ್ಟ ಬಪ್ಪ್‌ಚಿಟ್ಟತ್. 18 ಅಕ್ಕ ಫರೋಹನ ಅಬ್ರಾಮನ ಕಾಕಿತ್: ನೀನ್‌ ಎನ್ನಂಗ್‌ ನಾಕ್‍ ಇನ್ನನೆ ಮಾಡಿಯ? ಇವ ನೀಡ ಪೊಣ್ಣ್‌ಂದ್‌ ನಾಕ್‍ ಎನ್ನಂಗ್‌ ಎಣ್ಣಿತ್‌ಲ್ಲೆ? 19 ಇವ ನೀಡ ತಂಗೇಂದ್‌ ಎನ್ನಂಗ್‌ ಎಣ್ಣಿಯ? ಇನ್ನನೆ ಎಣ್ಣ್‌ನಗೊಂಡ್‌ ಅವಳ ನಾಡ ಪೊಣ್ಣ್‌ ಆಪನೆಕೆ ಎಡ್‌ತಂಡಲ್ಲ? ಇಕ್ಕ ನೀಡ ಪೊಣ್ಣ್‌ನ ಕಾಕಿಯಂಡ್‌ ಪೋಂದ್‌ ಎಣ್ಣ್‌ಚಿ. 20 ಪಿಂಞ ಫರಹೋನ ತಾಂಡ ಕೆಲಸಕಾರಕ್‌ ಅಮ್ರಾಮಂಡ ವಿಷಯತ್‌ಲ್‌ ಆಜ್ಞೆ ಕೊಡ್‌ತತ್. ಅಯಿಂಗ ಅಬ್ರಾಮನ, ಅಂವೊಂಡ ಪೊಣ್ಣ್‌ನ ಪಿಂಞ ಅಂವೊಂಗ್‌ ಇಂಜ ಎಲ್ಲಾನ ಅಯಿಚಿ ಕೊಡ್‌ತತ್. |
© 2017, New Life Literature (NLL)