ಎಸ್ತೆರ್‌ 7 - ಕೊಡವ ಬೈಬಲ್ಹಾಮಾನ ಚಾವದ್‌ 1 ಆನಗುಂಡ್‌ ರಾಜ ಪಿಂಞ ಹಾಮಾನ ದಂಡನೆ ಕುರಿ ಎಸ್ತೇರ್ ರಾಣಿರ ಕೂಡೆ ಉಂಬಕ್‌ ಅವ ತಯಾರ್‌ ಮಾಡಿತ್‌ಂಜ ಗದ್ದಾಳಕ್‌ ಬಾತ್. 2 ದ್ರಾಕ್ಷಿರಸ ಬಳಂಬ್‌ವ ನೇರತ್‌ ರಾಜ ಎಸ್ತೇರಳ ನೋಟಿತ್: ಎಸ್ತೇರ್ ರಾಣಿಯೇ, ನೀಕ್‌ ಎಂತ ಬೋಂಡು? ಅದ್‌ನ ನೆರವೇರಿಚಿಡುವಿ. ನೀಡ ಬೋಡಿಕೆ ಎಂತ? ನೀನ್‌ ಈ ರಾಜ್ಯತ್‌ರ ಪಾದಿ ಬಾಗತ್‌ನ ಕ್‍ೕಟತೇಂಗಯು, ಅದ್‌ ನೀಕ್‌ ಕ್‌ಟ್ಟ್‌ವಾಂದ್‌ ಎಣ್ಣ್‌ಚಿ. 3 ಅದ್‌ಂಗ್‌ ಎಸ್ತೇರ್ ರಾಣಿ: ರಾಜನೇ, ನಾಕ್‍ ನಿಂಗಡ ದಯೆ ಕ್‍ಟ್ಟಿತ್, ನಿಂಗಕ್‌ ಕುಶಿ ಉಂಡೇಂಗಿ, ದಯಬೆಚ್ಚಿತ್‌ ನಾಡ ಜೀವತ್‌ನ ಉಳ್‌ಚಿಡಿ. ಇದೇ ನಾಡ ಬೋಡಿಕೆ. ಇಂಞು ನಾಡ ಜನಡ ಜೀವತ್‌ನ ಸಹ ಉಳ್‌ಚಿಡಿ. ಇದೇ ನಾಕ್‍ ಬೋಂಡಿಯೇಂದ್‌ ಎಣ್ಣ್‌ಚಿ. 4 ಎನ್ನಂಗೆಣ್ಣ್‌ಚೇಂಗಿ ನನ್ನ ಪಿಂಞ ನಾಡ ಜನಳ ನಾಶ ಮಾಡಿತ್, ಕೊಂದಿತ್, ಪಾಳ್‌ ಮಾಡ್‌ವಕಾಯಿತ್‌ ನಂಗಳ ಮಾರಿರ್‌ತ್. ನಂಗಡ ಆಣಾಳ್‌ ಪೊಣ್ಣಾಳ್‌ನ ಅಡಿಯಾಳಾಯಿತ್‌ ಮಾತ್‌ರ ಮಾರಿತಿಂಜತೇಂಗಿ ನಾನ್‌ ಮುಂಡತೆ ಇಪ್ಪಕಿಂಜತ್; ಇಕ್ಕ ನಂಗಕ್‌ ಆಪ ಕಷ್ಟತ್‌ರಗುಂಡ, ಈ ವಿರೋದಿಯ ಮಾಡುವ ಸಂಬಾದನೆ ರಾಜಂಗ್‌ ಆಪ ನಷ್ಟಕಿಂಜ ಎಚ್ಚಕೋ ಬಲ್ಯದ್‌ಂದ್‌ ಎಣ್ಣ್‌ಚಿ. 5 ಅಕ್ಕ ರಾಜನಾನ ಅಹಷ್ವೇರೋಷ ರಾಣಿಯಾನ ಎಸ್ತೇರಳ ನೋಟಿತ್: ಇಂತ ಒರ್‌ ಕಾರ್ಯತ್‌ನ ಮಾಡವಕ್‌ ಪೊರ್‌ಟಂವೊ ದಾರ್? ಅಂವೊ ಎಲ್ಲಿ ಉಂಡ್‍ೕಂದ್‌ ಕ್‍ೕಟತ್. 6 ಅದ್‌ಂಗ್‌ ಎಸ್ತೇರ್: ನಂಗಳ ನಾಶ ಮಾಡವಕುಳ್ಳ ವಿರೋದಿ ಈ ಕೆಟ್ಟಂವೊನಾನ ಹಾಮಾನನೇಂದ್‌ ಎಣ್ಣ್‌ಚಿ. ಅಕ್ಕ ಹಾಮಾನ ರಾಜ ಪಿಂಞ ರಾಣಿರ ಮಿಂಞತ್‌ ಬೊತ್ತಿಂಯಂಡ್‌ ಇಂಜತ್. 7 ರಾಜಂಗ್‌ ದುಂಬ ಚೆಡಿ ಬಂದಿತ್‌ ದ್ರಾಕ್ಷಿರಸ ಕುಡಿಪನ ಬುಟ್ಟಿತ್‌ ಅರಮನೆರ ತೋಟಕ್‌ ಪೋಚಿ. ರಾಜನಗುಂಡ್‌ ತಾಂಗ್‌ ನೇರಾಯಿತು ಕ್‍ೕಡ್‌ ಆಪಾಂದ್‌ ಹಾಮಾನ ಅರ್‌ಂಜಿತ್, ಪೊರಮೆ ಪೋಕತೆ, ರಾಣಿಯಾನ ಎಸ್ತೇರಳಡ ಪಕ್ಕ ಪೋಯಿತ್‌ ತಾಂಡ ಜೀವತ್‌ನ ಉಳ್‌ಚಿಡ್‌ವಕ್‌ ಬೋಡನಾಂದ್‌ ಅವಡ ಮಿಂಞತ್‌ ನಿಂದತ್. 8 ರಾಜ ಅರಮನೆರ ತೋಟತ್‌ಂಜ ದ್ರಾಕ್ಷಿರಸ ಕುಡ್‌ಚಂಡಿಂಜ ಜಾಗಕ್‌ ತಿರಿತ್‌ ಬಪ್ಪಕ, ಎಸ್ತೇರ್ ಅಳ್‌ತಂಡಿಂಜ ಮೆತ್ತೆರಮೇಲೆ ಹಾಮಾನ ಬುದ್ದಿತುಳ್ಳನ ಕಂಡತ್. ಅಕ್ಕ ರಾಜ: ನಾನ್‌ ಅರಮೆನೆಲ್‌ ಇಪ್ಪಕಲೇ ನಾಡ ಮಿಂಞತೇ ಇಂವೊ ರಾಣಿನ ಅವಮಾನ ಮಾಡಂಡೂಂದ್‌ ಗೇನ ಮಾಡಿತುಂಡಾಂದ್‌ ಕ್‍ೕಟತ್. ಈ ತಕ್ಕ್‌ ರಾಜಂಡ ಬಾಯಿಯಿಂಜ ಬಂದದ್‌ನ ಕ್‍ೕಪದು ಸೇವಕಂಗ ಹಾಮಾನಂಡ ಮೂಡ್‌ನ ಮುಚ್ಚಿರ್‌ತ್. 9 ಅಕ್ಕ ರಾಜಂಡ ಸನ್ನಿದಾನತ್‌ಲ್‌ ಸೇವ ಮಾಡಿಯಂಡಿಂಜ ಶಿಕಂಡಿಯತ್‌ ಒಬ್ಬನಾನ ಹರ್ಬೋನಾ: ಇದಾ, ರಾಜಂಡ ಜೀವತ್‌ನ ಕಾಪಾಡ್‌ವಕ್‌ ಸುದ್ದಿನ ಅರಿಚಿಟ್ಟ ಮೊರ್ದೆಕೈನ ನೇತುವಕ್‌ ಹಾಮಾನ ತಯಾರ್‌ ಮಾಡ್‌ನ ಐಂಬದ್‌ ಮೊಳ ಎತ್ತರವಾನ ತೂಕ್‌ಮರತ್‌ನ ಅಂವೊಂಡ ಮನೆರಪಕ್ಕ ನಿಪ್ಪಿಚಿಟ್ಟಿತುಂಡ್‍ೕಂದ್‌ ಎಣ್ಣ್‌ಚಿ. ಅದ್‌ಂಗ್‌ ರಾಜ: ಅನ್ನನಾಚೇಂಗಿ ಹಾಮಾನನ ಅದ್‌ಲ್‌ ಇಡೀಂದ್‌ ಆಜ್ಞೆ ಮಾಡ್‌ಚಿ. 10 ಅಯಿಂಗ ಮೊರ್ದೆಕೈಕಾಯಿತ್‌ ಹಾಮಾನ ತಯಾರ್‌ ಮಾಡ್‌ನ ತೂಕ್‌ಮರತ್‌ಲ್‌ ತೂಕ್‌ಚಿ. ಅಕ್ಕ ರಾಜಂಡ ಚೆಡಿ ಕಮ್ಮಿಯಾಚಿ. |
© 2017, New Life Literature (NLL)