ಎಸ್ತೆರ್‌ 6 - ಕೊಡವ ಬೈಬಲ್1 ಅಂದ್‌ ಬಯಿಟ್ ರಾಜಂಗ್‌ ವರಿಯೊಕ್‌ ಕಯಿಂಜಿತ್‌ಲ್ಲೆ. ಅದ್‌ಂಗ್‌ ಅಂವೊ ಅಂವೊಂಡ ಆಳ್‌ವಿಕೆರ ಕಾಲತ್‌ಲ್‌ ನಡ್‌ಂದ ಮುಕ್ಯಪಟ್ಟ ವಿಷಯತ್‌ನ ಒಳ್‌ದಿ ಬೆಪ್ಪ ಪುಸ್ತಕತ್‌ನ ಎಡ್‌ತ ಬಪ್ಪಕ್‌ ಆಜ್ಞೆ ಮಾಡ್‌ಚಿ. ಅದ್‌ನ ಅಂವೊಂಡ ಮಿಂಞತ್ ಓದ್ವಕ್‌ ಮಾಡ್‌ಚಿ. 2 ಅಕ್ಕ ಪಡಿಕಾಪಯಂಗಳಾನ ಬಿಗೆತಾನ ಪಿಂಞ ತೆರೆಷ ಎಣ್ಣುವ ರಾಜಂಡ ದಂಡ್‌ ಸೇವಕಂಗ ರಾಜನಾನ ಅಹಷ್ವೇರೋಷನ ಕೊಲ್ಲಂಡೂಂದ್‌ ಚದಿ ಮಾಡ್‌ನ ವಿಷಯತ್‌ನ ಮೋರ್ದೆಕೈ ಅರಿಚಿಟ್ಟತ್‍ೕಂದ್‌ ಉಳ್ಳ ವಿಷಯತ್‌ನ ಆ ಪುಸ್ತಕತ್‌ಲ್‌ ಒಳ್‌ದಿತಿಂಜನ ಓದ್‌ಚಿ. 3 ಅಕ್ಕ ರಾಜ: ಇದ್‌ಂಗಾಯಿತ್‌ ಮೊರ್ದೆಕೈಕ್‌ ಏದ್‌ ಪ್ರತಿಫಲ ಕ್‌ಟ್ಟ್‌ಚೀಂದ್‌ ಕ್‍ೕಟತ್. ಅದ್‌ಂಗ್‌ ರಾಜಂಡ ಸೇವಕಂಗ: ಅಂವೊಂಗ್‌ ಒಂದೂ ಮಾಡಿತ್‌ಲ್ಲೆಂದ್‌ ಎಣ್ಣ್‌ಚಿ. 4 ಹಾಮಾನ ತಾನ್‌ ತಯಾರ್‌ ಮಾಡಿತ್‌ ಬೆಚ್ಚಿತುಳ್ಳ ತೂಕ್‌ಮರತ್‌ಲ್‌ ಅಂವೊನ ಇಡಂಡೂಂದ್‌ ತಕ್ಕ್‌ ಪರಿಯುವಕಾಯಿತ್‌ ಅರಮನೆರ ಪೊರ್ಮೆ ಉಳ್ಳ ಒರ್‌ ಚಾವಡಿಲ್‌ ಬಂದಿತ್‌ ನಿಂದತ್. ಅಕ್ಕ ರಾಜ: ಅರಮನೆರ ಬಾಯಿಕಂಡೀರ ಕೈಯಾಲೆಲ್‌ ದಾರ್‌ ಬಂದತ್‌ಂದ್‌ ಕ್‍ೕಟತ್. 5 ಅದ್‌ಂಗ್‌ ರಾಜಂಡ ಸೇವಕಂಗ: ಇದಾ ಹಾಮಾನ ಬಾಯಿಕಂಡೀರ ಕೈಯಾಲೆರ ಪಕ್ಕ ನಿಂದಂಡುಂಡ್‍ೕಂದ್‌ ಎಣ್ಣ್‌ಚಿ. ಅಕ್ಕ ರಾಜ: ಅಂವೊನ ಒಳ್‌ಕ್‌ ಬಪ್ಪಕ್‌ ಬುಡೀಂದ್‌ ಎಣ್ಣ್‌ಚಿ. 6 ಹಾಮಾನ ಒಳ್‌ಕ್‌ ಬಪ್ಪಕ ರಾಜ ಅಂವೊನ ನೋಟಿತ್: ರಾಜ ಸನ್ಮಾನ ಮಾಡಂಡೂಂದ್‌ ನೇರಾಯಿತ್‌ ಕುಶಿ ಪಡ್‌ವ ಮನುಷ್ಯಂಗ್ ಎಂತ ಮಾಡಂಡೂಂದ್‌ ಅಂವೊನ ಕ್‍ೕಟತ್. ಅಕ್ಕ ಹಾಮಾನ, ನನ್ನ ಬುಟ್ಟಿತ್‌ ರಾಜ ಬೋರೆ ದಾರ್‌ನ ಗೌರವ ಮಾಡುವಾಂದ್‌ ಅಂವೊಂಡ ಒಳಲ್‌ ಗೇನಮಾಡಿತ್, 7 ರಾಜನ ನೋಟಿತ್: ರಾಜ ಗಣಪಡುತ್ತಂಡೂಂದ್‌ ಕುಶಿಪಡ್‌ವ ಮನುಷ್ಯಂಗ್, 8 ತಾನ್‌ ಇಟ್ಟ ಒರ್‌ ರಾಜ ಉಡುಪ್ನ, ರಾಜ ಸವಾರಿ ಮಾಡ್‌ನ ಕುದುರೆನ ಪಿಂಞ ಅಂವೊಂಡ ರಾಜಕಿರೀಟತ್‌ನ ಅದಂಡ ಮೇಲ ಇಡುವಕ್‌ ಎಡ್‌ತ ಬರಂಡು. 9 ಆ ಉಡ್‌ಪ್‌ನ ಪಿಂಞ ಕುದುರೆನ ರಾಜಂಡ ಮುಕ್ಯ ಪ್ರಬು ಒಬ್ಬಂಡ ಕೈಯಿಲ್‌ ಕೊಡ್‌ಕಂಡು. ಆ ಅದಿಕಾರಿ ರಾಜ ಗೌರವ ಪಡ್‌ತಂಡೂಂದ್‌ ಗೇನ ಮಾಡಿತುಳ್ಳ ಮನುಷ್ಯಂಗ್ ಆ ರಾಜಬಟ್ಟೆನ ಇಡಂಡು. ಅಲ್ಲಿಂಜ ಅಂವೊನ ಆ ಕುದುರೆರ ಮೇಲೆ ಅಳ್‌ಪ್‌ಚಿಟ್ಟಿತ್‌ ಪಟ್ಟಣತ್‌ರ ಬೀದಿರ ಬಟ್ಟೇಲ್‌ ಕಾಕಿಯಂಡ್‌ ಪೋಯಿತ್, ರಾಜ ಸನ್ಮಾನ ಮಾಡವಕ್‌ ಕುಶಿಪಡ್‌ವ ಮನುಷ್ಯಂಗ್ ಇನ್ನನೆ ಮಾಡ್‌ವಾಂದ್‌ ಅಂವೊಂಡ ಮಿಂಞತ್ ಪ್ರಚಾರ ಮಾಡಂಡೂಂದ್‌ ಎಣ್ಣ್‌ಚಿ. 10 ಅಕ್ಕ ರಾಜ ಹಾಮಾನನ ನೋಟಿತ್: ನೀನ್‌ ಬೆರಿಯ ರಾಜ ಉಡ್‌ಪ್‌ನ ಪಿಂಞ ಕುದುರೆನ ಎಡ್‌ತಂಡ್‌ ಪೋಯಿತ್, ನೀನ್‌ ಎಣ್ಣ್‌ನನೆಕೆ ರಾಜಂಡ ಅರಮನೆರ ಪಡಿಲ್‌ ಅಳ್‌ತಂಡುಳ್ಳ ಯೆಹೂದ್ಯನಾನ ಮೊರ್ದಿಕೈಕ್‌ ಮಾಡ್. ನೀನ್‌ ಎಣ್ಣ್‌ನ ಒಂದನ ಸಹ ಬುಡತೆ ಮಾಡ್‍ೕಂದ್‌ ಎಣ್ಣ್‌ಚಿ. 11 ಅನ್ನನೆ ಹಾಮಾನ ರಾಜಂಡ ಉಡ್‌ಪನ ಪಿಂಞ ರಾಜ ಸವಾರಿ ಮಾಡ್‌ನ ಕುದರೆನ ಕೊಂಡಪೋಯಿತ್, ಬಟ್ಟೆನ ಮೊರ್ದೆಕೈಕ್‌ ಇಟ್ಟಿತ್, ಅಂವೊನ ಕುದರೆನ ಮೇಲೆ ಅಳ್‌ಪ್‌ಚಿಟ್ಟಿತ್‌ ಪಟ್ಟಣತ್‌ರ ಬೀದಿರ ಬಟ್ಟೆಲ್‌ ಕೊಂಡಪೋಯಿತ್ ಅಂವೊಂಡ ಮಿಂಞತ್: ರಾಜ ಗೌರವ ಪಡ್‌ತಂಡೂಂದ್‌ ಕುಶಿಪಡ್‌ವ ಮನುಷ್ಯಂಗ್ ಇನ್ನನೆ ಮಾಡುವಾಂದ್‌ ಎಣ್ಣಿಯಂಡ್‌ ಪ್ರಚಾರ ಮಾಡ್‌ಚಿ. 12 ಮೊರ್ದೆಕೈ ತಿರಿತ್‌ ರಾಜಂಡ ಅರಮನೆರ ಪಡಿರ ಪಕ್ಕ ಪೋಚಿ. ಆಚೇಂಗಿ ಹಾಮಾನ ದುಃಖತ್‌ ಮಂಡೆನ ಮುಚ್ಚಿಯಂಡ್‌ ತಾಂಡ ಮನೆಕ್‌ ಬೆರಿಯ ಪೋಚಿ. 13 ಅಕ್ಕ ಹಾಮಾನ ತಾಂಡ ಪೊಣ್ಣ್‌ ಜೆರೆಷ ಪಿಂಞ ಅಂವೊಂಡ ಎಲ್ಲಾ ಸ್ನೇಹಿತಂಗಕ್‌ ತಾಂಗ್‌ ಆನ ಸಂಗತಿನೆಲ್ಲ ಎಣ್ಣ್‌ಚಿ. ಅಕ್ಕ ಅಂವೊಂಡ ಪುದ್ದಿವಂತ ಸ್ನೆಹಿತಂಗ ಪಿಂಞ ಅಂವೊಂಡ ಪೊಣ್ಣ್‌ ಜೆರೆಷ ಅಂವೊನ ನೋಟಿತ್: ನೀನ್‌ ಇಕ್ಕಲೆ ಮೊರ್ದೆಕೈಯಂಡ ಪಕ್ಕ ಚೋತ್‌ ಪೋಪಕ್‌ ಸುರ್ ಆಯಿತುಳ್ಳಿಯ. ಅಂವೊ ಒರ್‌ ಯೆಹೂದ್ಯನಾಯಿತ್‌ ಇಂಜತೇಂಗಿ ನೀನ್‌ ಅಂವೊನ ಗೆಲ್ಲ್‌ವಕಯ್ಯುಲೆ. ನೇರಾಯಿತು ಅಂವೊಂಡ ಮಿಂಞತ್ ನೀನ್‌ ಚೋತಿತ್‌ ಪಾಳಾಯಿ ಪೋಪಿಯಾಂದ್‌ ಎಣ್ಣ್‌ಚಿ. 14 ಅಂವೊ ಇಂಞು ಅಯಿಂಗಡ ಕೂಡೆ ತಕ್ಕ್‌ ಪರ್‌ಂದಂಡಿಪ್ಪಕಲೇ ರಾಜಂಡ ಶಿಕಂಡಿ ಸೇವಕಂಗ ಬಂದಿತ್‌ ಎಸ್ತೇರ್‌ ತಯಾರ್‌ ಮಾಡಿತುಳ್ಳ ಗದ್ದಾಳಕ್‌ ಬೆರಿಯ ಬರಂಡೂಂದ್‌ ಎಣ್ಣಿತ್‌ ಹಾಮಾನನ ಕಾಕಿಯಂಡ್‌ ಪೋಚಿ. |
© 2017, New Life Literature (NLL)