ಎಸ್ತೆರ್‌ 1 - ಕೊಡವ ಬೈಬಲ್ಆಹಷ್ವೇರೋಷ ರಾಜ ಬಲ್ಯ ಗದ್ದಾಳ ತಯಾರ್‌ ಮಾಡ್‌ನದ್‌ 1 ಹಿಂದುಸ್ಥಾನ ದೇಶತ್‌ಂಜ ಕೂಷ್ ದೇಶಕತ್ತನೆ ಉಳ್ಳ ನೂಟ್ಯ ಇರ್ವತೇಳ್‌ ಪ್ರಾಂತ್ಯತ್‌ನ ಆಳಿಯಂಡಿಂಜ ಅಹಷ್ವೇರೋಷ ಎಣ್ಣುವ ಪಾರಸಿಯ ರಾಜಂಡ ಕಾಲತ್‌ಲ್‌ ನಡ್‌ಂದ ಘಟನೆ ಇದ್. 2 ಆ ಕಾಲತ್‌ಲ್‌ ಅಹಷ್ವೇರೋಷ ರಾಜ, ಶೂಷನ್‌ ಪಟ್ಟಣತ್‌ರ ಅರಮನೆಲ್‌ ತಾಂಡ ಸಿಂಹಾಸನತ್‌ಂಜ ಆಳಿಯಂಡಿಂಜತ್. 3 ತಾಂಡ ಆಳ್‌ವಿಕೆರ ಮೂಂದನೆ ಕಾಲತ್‌ಲ್‌ ಅಂವೊಂಡ ಅರಮನೆರ ಪ್ರಬುವಯಂಗಕ್‌ ಪಿಂಞ ಸೇವಕಂಗಕ್‌ ಬಲ್ಯ ನಮ್ಮೇರ ಗದ್ದಾಳ ಏರ್ಪಾಡ್‌ ಮಾಡ್‌ಚಿ . ಅಕ್ಕ ಪಾರಸಿಯ ಪಿಂಞ ಮೇದ್ಯ ದೇಶತ್‌ರ ಸೇನಾಧಿಪತಿಯಳು, ಮುಕ್ಯಪಟ್ಟಯಿಂಗಳು, ದೇಶತ್‌ರ ಅದಿಕಾರಿಯಳು ಬಂದಿತ್‌ಂಜತ್. 4 ಅಂವೊ ಸುಮಾರ್‌ ದಿವಸತ್‌ಂಜ, ಎಣ್ಣ್‌ಚೇಂಗಿ ನೂಟ್ಯ ಎಂಬದ್‌ ದಿವಸಕತ್ತನೆ ಅಯಿಂಗಕ್‌ ತಾಂಡ ರಾಜ್ಯತ್‌ ಉಳ್ಳ ಬಲ್ಯ ಐಶ್ವರ್ಯತ್‌ನ, ಮಹಿಮೆನ, ತಾಂಗುಳ್ಳ ಘನತ್‌ನ ಪಿಂಞ ವೈಬವತ್‌ನ ಕಾಟಿಕೊಡ್‌ತಂಡಿಂಜತ್. 5 ಆ ದಿವಸಯೆಲ್ಲ ಕಯಿಂಜಪಿಂಞ ರಾಜ ಶೂಷನ್‌ ಅರಮನೆಲ್‌ ಇಂಜ ಬಲ್ಯಯಿಂಗಯಿಂಜ ಚೆರಿಯಯಿಂಗಕತ್ತನೆ ಎಲ್ಲಾ ಜನಾಂಗಕು ಅರಮನೆರ ತೋಟತ್‌ಲ್‌ ಏಳ್‌ ದಿವಸಕತ್ತನೆ ಗದ್ದಾಳ ಮಾಡ್‌ಚಿ. 6 ಆ ಅರಮನೆರ ಪಾಕಲ್ಲ್‌ರ ಕಂಬತ್‌ಲ್‌ ಅಂಟ್‌ಚಿಟ್ಟ ಬೊಳ್ಳಿ ಮೋಯಿರತ್‌ಲ್‌ ನೈಸಾನ ಪಿಂಞ ಚೋಂದ ನೂಲ್‌ಲ್‌ ಮಾಡ್‌ನ ಬೊಳ್‌ತ ಬಟ್ಟೆ, ಪಚ್ಚೆ ಬಟ್ಟೆ ಪಿಂಞ ನೀಲಿ ಬಟ್ಟೆರ ಪಡಿ ಬಟ್ಟೆನ ಇಟ್ಟ್‌ತಿಂಜತ್. ಚೋಂದ, ನೀಲಿರ, ಬೋಳ್‌ತ್‌ತ ಪಿಂಞ ಕರ್ತಿತಿಂಜ ಬೆಲೆಯುಳ್ಳ ಪಾಕಲ್ಲ್‌ನ ನೆಲಕ್‌ ಅಂಟ್‌ಚಿಟ್ಟ್‌ತ್‌ಂಜತ್. ಆದಂಡ ಮೇಲೆ ಪೊನ್ನ್‌ ಪಿಂಞ ಬೊಳ್ಳಿಲ್‌ ಮಾಡ್‌ನ ರೇಶ್ಮೆ ಪಟ್ಟಿರ ಮೆತ್ತೆ ಬೆಚ್ಚಿತಿಂಜತ್. 7 ಪೊನ್ನ್‌ಲ್ ಮಾಡ್‌ನ ನಾನಾತರ ಪಾತ್‌ರೆಲ್‌ ಕುಡಿಪಕ್‌ ಕೊಡ್‌ಪಯಿಂಜತ್. ರಾಜ ಕುಡಿಪ್ಪ ದ್ರಾಕ್ಷಿರಸತ್‌ರ ರುಚಿರನೆಕೆ ಬೊಂಡಿಯಚ್ಚಕ್‌ ಜನಕ್‌ ಬೊಳಂಬಿಯಂಡಿಂಜತ್. 8 ಪ್ರತಿಯೊಬ್ಬನು ಅಂವೊಂಗ್‌ ಬೋಂಡಿಯಚ್ಚಕ್‌ ಕೊಡಿಕಲೂಂದ್‌ ರಾಜ ತಾಂಡ ಅರಮನೇರ ಜನಕ್ಕೆಲ್ಲಾ ಆಜ್ಞೆ ಕೊಡ್‌ತಿತ್‌ಂಜತ್. ಆನಗುಂಡ್‌ ಕುಡಿಪ ವಿಷಯತ್‌ ದಾರ್‌ನೂ ಒತ್ತಾಯ ಮಾಡಿತಿಲ್ಲೆ. 9 ರಾಜಂಡ ಪೊಣ್ಣಾಯಿತಿಂಜ ವಷ್ಟಿ ರಾಣಿ ಸಹ ಅಹಷ್ವೇರೋಷ ರಾಜಂಡ ಅರಮನೆಲ್‌ ಉಳ್ಳ ಪೊಣ್ಣಾಳ್‌ವಕ್‌ ನಮ್ಮೆರ ಗದ್ದಾಳ ಮಾಡ್‌ಚಿಟ್ಟತ್. ರಾಣಿಯಾನ ವಷ್ಟಿ ರಾಜಂಡ ಕೋರಿಕೆನ ತ್‌ಕ್ಕಾರ ಮಾಡ್‌ನದ್‌ 10-11 ಏಳನೇ ದಿವಸತ್‌ಲ್‌ ರಾಜನಾನ ಅಹಷ್ವೇರೋಷ ದ್ರಾಕ್ಷಿರಸ ಕುಡ್‌ಚಿತ್‌ ಬಾರಿ ಕುಶೀಲ್‌ ಇಪ್ಪಕ, ನೋಟ್ಟುವಕ್‌ ಬಾರಿ ಸೌಂದರ್ಯವಾಯಿತ್‌ಂಜ ತಾಂಡ ರಾಣಿಯಾನ ವಷ್ಟಿರ ಚಾಯಿನ ಜನಕು, ಅದಿಕಾರಿಯಕು ಕಾಂಬ್‌ಚಿಡ್‌ವಕ್‌ ಕುಶಿಪಟ್ಟತ್. ರಾಜಕಿರೀಟತ್‌ನ ಇಟ್ಟಿತ್‌ ವಷ್ಟಿ ರಾಣಿನ ತಾಂಡ ಮಿಂಞತ್ ಕಾಕಿಯಂಡ್‌ ಬರಂಡೂಂದ್, ಅಹಷ್ವೇರೋಷ ರಾಜಂಡ ಸನ್ನಿದಾನತ್‌ಲ್‌ ಸೇವೆ ಮಾಡ್‌ವ ಮೆಹೂಮಾನ, ಬಿಜೆತಾ, ಹರ್ಬೋನಾ, ಬಿಗೆತಾ, ಅಬಗೆತಾ, ಜೇತರ, ಕರ್‌ಕಸ ಎಣ್ಣುವ ಏಳ್‌ ಪ್ರಬುಕ್ಕಳಾನ ಶಿಕಂಡಿಯಕ್‌ ಆಜ್ಞೆ ಕೊಡ್‌ತತ್. 12 ಆಚೇಂಗಿ ರಾಜಂಗ್‌ ಸೇವ ಮಾಡುವ ಶಿಕಂಡಿಯ ಪೋಯಿತ್‌ ರಾಜಂಡ ಆಜ್ಞೆನ ಎಣ್ಣ್‌ವಕ ವಷ್ಟಿ ರಾಣಿ, ಬಪ್ಪ್‌ಲೇಂದ್‌ ಉತ್ತರ ಕೊಡ್‌ತತ್. ಅಕ್ಕ ರಾಜಂಗ್‌ ದುಂಬ ಚೆಡಿ ಬಾತ್. 13 ರಾಜ್ಯತ್‌ರ ಕಾನೂನ್‌ ಪಿಂಞ ರಾಜ ನೀತಿನ ಗೊತ್ತುಳ್ಳಯಿಂಗಡ ಮಿಂಞತ್‌ಲ್‌ ಅರಮನೆರ ಸಂಗತಿನೆಲ್ಲ ಎಣ್ಣುವ ಪದ್ದತಿಯಿಂಜತ್. ಅಂವೊ ಕಾಲತ್‌ರ ನೇಮತ್‌ನ ಗೊತ್ತುಳ ಅಂವೊಂಡ ಆಲೋಚನೆಕಾರಂಗಡ ಕುಡ ತಕ್ಕ್‌ ಪರಂದಿತ್. 14 ರಾಜನಾನ ಅಹಷ್ವೇರಂಗ ದುಂವ ಬೋಂಡುನಯಿಂಗಳೂ ಅಮವೊಂಡ ಸನ್ನಿದಾನತ್‌ಲ್‌ ಎಕ್ಕ ಬೋಂಡುಚೇಂಗಿಯು ಪೋಪಕು ಕಯ್ಯುವ ರಾಜ್ಯತ್‌ರ ಪ್ರಬುಕ್ಕಳಾನ ಕರ್ಷೆನ, ಶೇತಾರ, ಅದ್ಮಾತ, ತರ್ಷಿಷ, ಮೆರೆಸ, ಮರ್ಸೆನ, ಮೆಮೂಕಾನ ಎಣ್ಣುವ ಈ ಏಳ್‌ ಜನ ಪಾರಸಿಯ ಪಿಂಞ ಮೇದ್ಯ ರಾಜ್ಯತ್‌ ಮುಕ್ಯಪಟ್ಟಯಿಂಗಳಾಯಿತ್‌ಂಜತ್. 15 ರಾಜನಾನ ಅಹಷ್ವೇರೋಷ ಸೇವಕಂಗಳಾನ ಶಿಕಂಡಿಯರ ಮೂಲಕ ಎಣ್ಣಿತ್‌ ಅಯಿಚ ರಾಜಂಡ ಆಜ್ಞೆರ ಪ್ರಕಾರ ವಷ್ಟಿ ರಾಣಿ ನಡ್‌ಕತೆ ಪೋನಗುಂಡ್, ಈ ರಾಜ್ಯತ್‌ರ ಕಾನೂನ್‌ರ ಪ್ರಕಾರ ಅವಕ್‌ ಎಂತ ಮಾಡಂಡೂಂದ್‌ ಕ್‍ೕಟತ್. 16 ಅಕ್ಕ ಮೆಮೂಕಾನ ಎಣ್ಣುವಣವೊ ರಾಜ ಪಿಂಞ ಪ್ರಬುವಯಿಂಗಡ ಮಿಂಞತ್: ವಷ್ಟಿ ರಾಣಿ ರಾಜಂಗ್‌ ಮಾತ್‌ರವಲ್ಲ ರಾಜನಾನ ಅಹಷ್ವೇರೋಷಂಡ ರಾಜ್ಯತ್‌ ಉಳ್ಳ ಎಲ್ಲಾ ಪ್ರಾಂತ್ಯರ ಪ್ರಬುವಯಿಂಗಕು ಪಿಂಞ ಎಲ್ಲಾ ಜನಕು ಅನ್ಯಾಯ ಮಾಡ್‌ಚಿ. 17 ರಾಜನಾನ ಅಹಷ್ವೇರೋಷ, ವಷ್ಟಿ ರಾಣಿನ ತಾಂಡ ಮಿಂಞತ್ ಕಾಕಿಯಂಡ್‌ ಬರಂಡೂಂದ್ ಎಣ್ಣ್‌ವಕ, ರಾಣಿ ಬಪ್ಪ್‌ಲೇಂದ್‌ ಎಣ್ಣ್‌ನ ಸುದ್ದಿ ಎಲ್ಲಾ ಪೊಣ್ಣಾಳ್‌ವಕು ಗೊತ್ತಾಚೇಂಗಿ, ಅಯಿಂಗ ಸಹ ತಾಂಡ ವಡಿಯಂಗಕ್‌ ಮರ್ಯಾದಿ ಕೊಡ್‌ಕತೆ ಪೋಕು. 18 ರಾಣಿ ಮಾಡ್‌ನದ್‌ನ ಕ್‍ೕಟ ಪಾರಸಿಯ ಪಿಂಞ ಮೇದ್ಯ ಪ್ರಬುವಯಿಂಗಡ ಪೊಣ್ಣಾಳ್‌ವ ಈ ದಿವಸವೇ ರಾಜಂಡ ಎಲ್ಲಾ ಅದಿಕಾರಿಯಕು ಅಯಿಂಗ ಇನ್ನನೆ ಎಣ್ಣ್‌ವ. ಇನ್ನಾನಾಯಿತ್‌ ಇಡೀ ದೇಶತ್‌ಲ್‌ ಪೊಣ್ಣಾಳ್‌ವ ಅಯಿಂಗಡ ವಡಿಯಂಗಕ್‌ ಮರ್ಯಾದೆ ಕೊಡ್‌ಕತೆ ಇಪ್ಪ, ವಡಿಯಂಗ ಅಯಿಂಗಡ ಪೊಣ್ಣಾಳ್‌ರ ಕೂಡೆ ಚೆಡಿಲ್‌ ಇಪ್ಪ. 19 ರಾಜಂಗ್‌ ಕುಶಿ ಉಂಡೇಂಗಿ, ಇಂಞು ಮಿಂಞಕ್‌ ವಷ್ಟಿ ರಾಣಿ ಪುನಃ ಅಹಷ್ವೇರೋಷ ರಾಜಂಡ ಸನ್ನಿದಿಕ್‌ ಬಪ್ಪಕೇ ಆಗಾಂದ್‌ ರಾಜಾಜ್ಞೆ ಕೊಡ್‌ಕಂಡೂಂದು, ಆ ರಾಜಾಜ್ಞೆನ ಏದ್‌ ಕಾಲಕು ವಾಪಸ್ ಎಡ್‌ಕತನೆಕೆ ಪಾರಸಿಯ ಪಿಂಞ ಮೇದ್ಯ ಕಾನೂನ್‌ಲ್‌ ಒಳ್‌ದಿಚಿಡಂಡೂಂದು, ರಾಜನಾನ ಅಹಷ್ವೇರೋಷ ಅವಡ ಬಲ್ಯ ಸ್ತಾನತ್‌ರ ಪಟ್ಟತ್‌ನ ಅವಕಿಂಜ ಸತ್ಯವಂತ ಒಬ್ಬಕ್‌ ಕೊಡ್‌ಕಂಡೂಂದ್‌ ಎಣ್ಣ್‌ಚಿ. 20 ಇಂಞು ಅಂವೊ: ಇನ್ನನೆ ರಾಜ ತೀರ್ಮಾನ ಮಾಡ್‌ನ ಈ ರಜಾಜ್ಞೆ ತಾಂಡ ಬಲ್ಯ ರಾಜ್ಯತ್‌ಲೆಲ್ಲಾ ಗೊತ್ತಾಪಕ, ಬಲ್ಯಯಿಂಗಳು, ಕಮ್ಮಿಲ್‌ ಉಳ್ಳ ಎಲ್ಲಾ ಪೊಣ್ಣಾಳ್‌ವಳು ತಾಂಡ ವಡಿಯಂಗಕ್‌ ಮರ್ಯಾದಿ ಕೊಡ್‌ಪಾಂದ್‌ ಅಂವೊ ಎಣ್ಣ್‌ಚಿ. 21 ಈ ತಕ್ಕ್‌ ರಾಜಂಗು ಅಂವೊಂಡ ಪ್ರಬುವಯಿಂಗಕು ನಲ್ಲದಾಯಿತ್‌ ಕಂಡಂಗ್, ರಾಜನು ಮೆಮುಕಾನಂಡ ತಕ್ಕ್‌ರನೆಕೆ ಮಾಡ್‌ಚಿ. 22 ಅಂವೊ ಪ್ರತಿಯೋರ್‌ ಕುಟುಂಬತ್‌ಲ್‌ ವಡಿಯನೇ ಒಡೆಯನಾಯಿತಿರಡೂಂದು ಪಿಂಞ ಇದ್‌ನ ಎಲ್ಲಾ ಪ್ರಂದಿಯಕು ಅಯಿಂಗಯಿಂಗಡ ತಕ್ಕ್‌ರ ಎಳ್‌ತ್‌ಲ್ ಅರಿಚಿಡಂಡು ಎಣ್ಣಿಯಂಡ್, ರಾಜ್ಯತ್‌ರ ಎಲ್ಲಾ ಪ್ರಾಂತ್ಯಕ್‌ ಪತ್‌ರಿಕೆರ ಮೂಲಕ ಅರಿಚಿಟ್ಟತ್. |
© 2017, New Life Literature (NLL)