ಅಪೊಸ್ತಲ 8 - ಕೊಡವ ಬೈಬಲ್ದೇವಡ ಮಕ್ಕಕ್ ಸೌಲ ಕೊಡ್‍ತ ಕಷ್ಟ 1 ಸೌಲ ಸಹ ಸ್ತೆಫನನ ಕೊಲ್ಲ್‌ವಕ್ ಒತ್ತಂಡಿಂಜತ್. ಅದೇ ದಿವಸತ್ ಯೆರೂಸಲೇಮ್‍ಲ್ ಇಂಜ ಸಬೇಕ್ ಬಲ್ಯ ಹಿಂಸೆ ಸುರ್ ಆಚಿ. ಅಪೊಸ್ತಲಂಗ ಅಲ್ಲತೆ, ಬೋರೆ ಎಲ್ಲಾ ಶಿಷ್ಯಂಗಳು ಯೂದಾಯ ಪಿಂಞ ಸಮಾರ್ಯ ಪ್ರಾಂತ್ಯತ್‍ಲ್ ಚದ್‌ರಿ ಪೋಚಿ. 2 ಚೆನ್ನ ಬಕ್ತಿಯುಳ್ಳ ದೇವಡ ಮಕ್ಕ ಸ್ತೆಫನಂಡ ಚಾವ್ ತಡೀನ ಕೊಂಡ್ ಪೋಯಿತ್ ಪೂತ್ತತ್. ಅಂವೊಂಗಾಯಿತ್ ಅಯಿಂಗ ದುಂಬ ಮೊರಟಿತ್ ದುಃಖ ಪಟ್ಟತ್. 3 ಇದ್‍ಲ್ಲತೆ ಸೌಲ, ಮನೆಮನೆಕ್ ಪೋಯಿತ್, ಕ್ರಿಸ್ತಂಡ ಮೇಲೆ ನಂಬಿಕೆ ಉಳ್ಳ ಆಣಾಳ್ ಪಿಂಞ ಪೊಣ್ಣಾಳ್‍ನ ಅಯಿಂಗಡ ಮನೇಯಿಂಜ ಪೊರಮೆ ಬಲ್‍ಚಿತ್, ಸೆರೆಮನೆಕ್ ಒಪ್ಪ್‌ಚಿಟ್ಟತ್. ಇನ್ನನೆ ಅಂವೊ ದೇವಡ ಸಬೇನ ಪಾಳ್ ಮಾಡಿಯಂಡಿಂಜತ್. ಫಿಲಿಪ್ಪ ಸಮಾರಿಯ ಪಟ್ಟಣತ್‍ಲ್ ಸೇವೆ ಮಾಡ್‍ನದ್ 4 ಚದ್‌ರಿ ಪೋನ ಚೆನ್ನ ಶಿಷ್ಯಂಗ, ಅಯಿಂಗ ಪೋನ ಎಲ್ಲಾ ಜಾಗತ್‍ಲ್ ಯೇಸುರ ಸುದ್ದಿನ ಬೋದನೆ ಮಾಡಿಯಂಡಿಂಜತ್. 5 ಫಿಲಿಪ್ಪ ಎಣ್ಣ್‌ವಂವೊ, ಸಮಾರ್ಯ ಪ್ರಾಂತ್ಯತ್‍ರ ಒರ್ ಪಟ್ಟಣಕ್ ಪೋಯಿತ್ ಅಲ್ಲಿಯತ್‍ರ ಜನಕ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಂಡ ವಿಷಯತ್‍ನ ಬೋದನೆ ಮಾಡ್‍ಚಿ. 6 ಫಿಲಿಪ್ಪ ಮಾಡ್‍ನ ಬೋದನೆನ ಕ್‍ೕಟಿತ್ ಪಿಂಞ ಅದ್ಬುತ ಕಾರ್ಯತ್‍ನ ಜನ ಕಾಂಬಕ, ಅಂವೊ ಎಣ್ಣ್‌ವಾನ ಎಲ್ಲಾರು ಒರೇ ಮನಸ್ಸ್‌ಲ್ ಕ್‍ೕಟಂಡಿಂಜತ್. 7 ಎನ್ನಂಗೆಣ್ಣ್‌ಚೇಂಗಿ ದುಂಬ ಕೂಳಿಯ, ಜನಡ ಒಳ್‌ಳಿಂಜ ಜೋರಾಯಿತ್ ಕೂತ್ ಕೊಡ್‌ತಂಡ್ ಪೊರಮೆ ಬಾತ್; ಅದಲ್ಲತೆ, ಪಾರ್ಶ್ವವಾಯುಲ್ ಇಂಜ ದುಂಬ ಜನ ಪಿಂಞ ದುಂಬ ಕುಂಟಂಗ ಸಹ ವಾಸಿ ಆಚಿ. 8 ಆನಗುಂಡ್, ಪಟ್ಟಣತ್‍ಲ್ ದುಂಬ ಕುಶಿಯಿಂಜತ್. 9 ಆಚೇಂಗಿ, ಆ ಪಟ್ಟಣತ್‍ಲ್ ಸೀಮೋನ ಎಣ್ಣುವ ಒಬ್ಬ ಇಂಜತ್. ಅಂವೊ, ಚೆನ್ನ ಕಾಲತ್ಂಜ ಬಲ್ಯ ಬಲ್ಯ ಮಾಟಮಂತ್ರ ಮಾಡಿಯಂಡ್, ಅಲ್ಲಿಯತ್‍ರ ಜನ ಆಶ್ಚರ್ಯ ಪಡುವನೆಕೆ ಮಾಡಿತ್, ಅಂವೊ ಒರ್ ಬಲ್ಯ ಮನುಷ್ಯಾಂದ್ ಎಣ್ಣಿಯಂಡಿಂಜತ್. 10 ಆ ಪಟ್ಟಣತ್‍ಲ್ ಇಂಜ ಚೆರಿಯಯಿಂಗ ಬಲ್ಯಯಿಂಗ ಎಲ್ಲಾರು ಅಂವೊ ಎಣ್ಣ್‌ವಾನ ಕ್‍ೕಟಂಡಿಂಜತ್. ಇಂವೊ ಮನುಷ್ಯಂಗಕ್ ಕಯ್ಯತದ್‍ನೆಲ್ಲ ಮಾಡಿಯಂಡುಂಡ್, ಆನಗುಂಡ್ ಇಂವೊಂಡ ಕೂಡೆ ದೇವಡ ಬಲ್ಯ ಶಕ್ತಿ ಉಂಡ್‍ೕಂದ್ ಎಣ್ಣಿಯಂಡಿಂಜತ್. 11 ದುಂಬ ಕಾಲತ್ಂಜ ಅಂವೊ ಮಾಟಮಂತ್ರ ಮಾಡಿತ್ ಅಲ್ಲಿ ಉಳ್ಳಯಿಂಗೆಲ್ಲ ಆಶ್ಚರ್ಯ ಆಪನೆಕೆ ಮಾಡಿಯಂಡಿಂಜಗುಂಡ್, ಅಲ್ಲಿಯತ್‍ರ ಜನ ಅಂವೊ ಎಣ್ಣ್‌ವಾಂಗ್ ದುಂಬ ಕೆಮಿ ಕೊಡ್‍ತತ್. 12 ಆಚೇಂಗಿ ಇಕ್ಕ, ಫಿಲಿಪ್ಪ ದೇವಡ ರಾಜ್ಯತ್‍ರ ನಲ್ಲ ಸುದ್ದಿನ ಪಿಂಞ ಯೇಸು ಕ್ರಿಸ್ತಂಡ ಪೆದತ್‍ನ ಪ್ರಚಾರ ಮಾಡ್‌ವಾನ ಆ ಪಟ್ಟಣತ್‍ರ ಜನ ಕ್‍ೕಪಕ, ಅಯಿಂಗ ಅದ್‍ನ ನಂಬಿತ್, ಆಣಾಳ್ ಪಿಂಞ ಪೊಣ್ಣಾಳುವ ದೀಕ್ಷಾಸ್ನಾನ ಎಡ್‍ತತ್. 13 ಅಕ್ಕ ಸೀಮೋನ ಸಹ, ನಂಬಿತ್, ದೀಕ್ಷಾಸ್ನಾನ ಎಡ್‍ತತ್. ಪಿಂಞ ಫಿಲಿಪ್ಪಂಡ ಕೂಡೆ ಎಕ್ಕಾಲು ಇಂಜಂಡ್, ಫಿಲಿಪ್ಪ ಮಾಡ್‍ನ ಬಲ್ಯ ಗುರ್‌ತ್ ಪಿಂಞ ಅದ್ಬುತ ಕಾರ್ಯತ್‍ನೆಲ್ಲ ಕಂಡಿತ್, ಆಶ್ಚರ್ಯ ಪಟ್ಟತ್. 14 ಸಮಾರ್ಯತ್‍ರ ಜನ ದೇವಡ ವಾಕ್ಯತ್‍ನ ಸ್ವೀಕಾರ ಮಾಡ್‍ಚೀಂದ್ ಉಳ್ಳ ವಿಷಯತ್‍ನ, ಯೆರೂಸಲೇಮ್‍ಲ್ ಉಳ್ಳ ಅಪೊಸ್ತಲಂಗ ಕ್‍ೕಟಿತ್, ಪೇತ್ರ ಪಿಂಞ ಯೋಹಾನನ ಅಯಿಂಗಡ ಪಕ್ಕ ಅಯಿಚತ್. 15 ಈಂಗ ಅಲ್ಲಿಕ್ ಬಂದಿತ್, ಅಯಿಂಗಕ್ ಪವಿತ್ರಾತ್ಮ ಕ್‍ಟ್ಟಂಡೂಂದ್ ಅಯಿಂಗಕಾಯಿತ್ ಪ್ರಾರ್ಥನೆ ಮಾಡ್‍ಚಿ. 16 ಎನ್ನಂಗೆಣ್ಣ್‌ಚೇಂಗಿ, ಅಯಿಂಗಡಡೆಲ್ ಪವಿತ್ರಾತ್ಮ ಒಬ್ಬಂಗು ಇಲ್ಲಿಕತ್ತನೆ ಕ್‍ಟ್ಟಿತ್ತ್‌ಲ್ಲೆ. ಅಯಿಂಗ ಒಡೆಯನಾನ ಯೇಸುರ ಪೆದತ್‍ಲ್ ದೀಕ್ಷಾಸ್ನಾನ ಮಾತ್ರ ಎಡ್‍ತಿತ್ಂಜತ್. 17 ಅಪೊಸ್ತಲಂಗ ಅಯಿಂಗಡ ಮೇಲೆ ಕೈ ಬೆಪ್ಪಕ ಅಯಿಂಗಕ್ ಪವಿತ್ರಾತ್ಮ ಕ್‍ಟ್ಟ್‌ಚಿ. 18 ಅಪೊಸ್ತಲಂಗ ಕೈ ಬೆಪ್ಪಕ, ಅಯಿಂಗಕ್ ಪವಿತ್ರಾತ್ಮ ಕ್‍ಟ್ಟ್‌ನದ್‍ನ ಸೀಮೋನ ನೋಟಿತ್, ಅಯಿಂಗಕ್ ಪಣತ್‍ನ ಕೊಂಡ್‌ಬಂತ್ ಕೊಡ್‍ಪಕ್ ನೋಟಿತ್: 19 ನಾನ್ ದಾಡ ಮೇಲೆ ಕೈ ಬೆಪ್ಪಿ, ಅಂವೊಂಗ್ ಇನ್ನನೆ ಪವಿತ್ರಾತ್ಮ ಕ್‍ಟ್ಟ್‌ವನೆಕೆ ನಾಕು ಈ ಅದಿಕಾರತ್‍ನ ತಾರೀಂದ್ ಕ್‍ೕಟತ್. 20 ಅದ್ಂಗ್ ಪೇತ್ರ ಅಂವೊನ ನೋಟಿತ್: ದೇವಡ ವರತ್‍ನ ದುಡ್ಡ್‌ಕ್ ಎಡ್‍ಪಕ್ ನೀನ್ ಗೇನ ಮಾಡಿಯ? ಆನಗುಂಡ್, ನೀಡ ದುಡ್ಡ್ ನೀಡ ಕೂಡೆ ನಾಶ ಆಯಿ ಪೋಡ್. 21 ನೀಡ ಹೃದಯ ದೇವಡ ಮಿಂಞತ್ ನೇರಾಯಿತ್ ಇಲ್ಲತಗುಂಡ್ ನೀಕ್ ಈ ಸೇವೇಲ್ ಏದ್ ಒರ್ ಪಾಲೂ ಇಲ್ಲೆ ಬಾಗವು ಇಲ್ಲೆ. 22 ಆನಗುಂಡ್ ಇಕ್ಕ ನೀನ್ ಕ್‍ೕಟದ್‍ನೆಲ್ಲ ಬುಟ್ಟಿತ್ ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್ ಒಡೆಯಂಡ ಪಕ್ಕ ಪ್ರಾರ್ಥನೆ ಮಾಡ್; ನೀಡ ಹೃದಯತ್‍ರ ಗೇನತ್‍ನ ಅಂವೊ ಮನ್ನಿಚಿಡ್‌ವಕ್ ಆಪ. 23 ನೀಡ ಹೃದಯ ದುಂಬ ಕಯಿಪಾಯಿತ್ ಉಳ್ಳದ್‍ನ ಪಿಂಞ ನೀನ್ ಪಾಪತ್‍ಲ್ ಚಿಕ್ಕಿತುಳ್ಳದ್‍ನ ನಾನ್ ಕಂಡಂಡುಳ್ಳ್‌ೕಂದ್ ಎಣ್ಣ್‌ಚಿ. 24 ಅದ್ಂಗ್ ಸೀಮೋನ: ನಿಂಗ ಎಣ್ಣ್‌ನ ಒರ್ ವಿಷಯವು ನಾಡ ಮೇಲೆ ಬಕ್ಕತನೆಕೆ, ನಾಕಾಯಿತ್ ಒಡೆಯಂಡ ಪಕ್ಕ ಬೋಡಿಯೊಳೀಂದ್ ಎಣ್ಣ್‌ಚಿ. 25 ಪೇತ್ರ ಪಿಂಞ ಯೋಹಾನ ಒಡೆಯಂಡ ವಾಕ್ಯತ್‍ನ ಸಾಕ್ಷಿಯಾಯಿತ್ ಎಣ್ಣಿತಾನ ಪಿಂಞ, ಸಮಾರ್ಯ ಪ್ರಾಂತ್ಯತ್‍ರ ಊರ್ ಊರ್‌ಕ್ ಕ್ರಿಸ್ತಂಡ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್, ಯೆರೂಸಲೇಮ್‌ಕ್ ವಾಪಸ್ ಬಾತ್. ಫಿಲಿಪ್ಪ ಪಿಂಞ ಐಥಿಯೋಪ್ಯ ರಾಜ್ಯತ್‍ರ ಮಂತ್ರಿ 26 ಪಿಂಞ, ಒರ್ ದಿವಸ ಒಡೆಯಂಡ ದೂತ ಫಿಲಿಪ್ಪಂಗ್: ನೀನ್ ದಕ್ಷಿಣ ದಿಕ್ಕ್‌ಲ್, ಯೆರೂಸಲೇಮ್ಂಜ ಗಾಜ ಪಟ್ಟಣಕ್ ಪೋಪ ಮಣಬೂಮಿರ ಬಟ್ಟೇಲ್ ಪೋಂದ್ ಎಣ್ಣ್‌ಚಿ. 27 ಅಂವೊ ಅನ್ನನೆ ಪೊರಟಿತ್ ಪೋಚಿ. ಅಂವೊ ಆ ಬಟ್ಟೇಲ್ ಪೋಯಂಡಿಪ್ಪಕ, ಐಥಿಯೋಪ್ಯ ದೇಶಕ್ ರಾಣಿಯಾಯಿತ್ಂಜ ಕಂದಾಕೆಯ ಎಣ್ಣ್‌ವವಡ ಮುಕ್ಯಪಟ್ಟ ಅದಿಕಾರಿನ ಕಂಡತ್. ಅಂವೊ ಆ ರಾಣಿರ ಖಜಾನಕೆಲ್ಲ ಅದಿಕಾರಿಯಾಯಿತ್ಂಜತ್. ಅಂವೊ ದೇವನ ಆರಾದನೆ ಮಾಡ್‌ವಕಾಯಿತ್ ಯೆರೂಸಲೇಮ್‌ಕ್ ಪೋಯಿತ್ಂಜತ್. 28 ಅನ್ನನೆ ಅಂವೊ ವಾಪಸ್ ಪೋಯಂಡಿಪ್ಪಕ, ತಾಂಡ ರಥತ್‍ಲ್ ಅಳ್‌ತಂಡ್ ಯೆಶಾಯ ಪ್ರವಾದಿರ ಪುಸ್ತಕತ್‍ನ ಓದಿಯಂಡ್ ಇಂಜತ್. 29 ಅಕ್ಕ, ಪವಿತ್ರಾತ್ಮ ಫಿಲಿಪ್ಪಂಡ ಪಕ್ಕ, ನೀನ್ ಅಂವೊಂಡ ರಥತ್‍ರ ಪಕ್ಕ ಪೋಯಿತ್ ಅದ್ಂಡಕೂಡೆ ನಡೇಂದ್ ಎಣ್ಣ್‌ಚಿ. 30 ಅಕ್ಕ, ಫಿಲಿಪ್ಪ ಓಡಿ ಪೋಯಿತ್ ಆ ಮನುಷ್ಯ ಯೆಶಾಯ ಪ್ರವಾದಿರ ಪುಸ್ತಕತ್‍ನ ಓದ್‍ವಾನ ಕ್‍ೕಟಿತ್, ಅಂವೊನ ನೋಟಿತ್: ನೀನ್ ಓದಿಯಂಡುಳ್ಳದ್ ನೀಕ್ ಅರ್ಥ ಆಯಂಡುಂಡಾಂದ್ ಕ್‍ೕಟತ್. 31 ಅದ್ಂಗ್ ಅಂವೊ: ದಾರೇಂಗಿ ನಾಕ್ ಅದ್ಂಡ ಅರ್ಥತ್‍ನ ಎಣ್ಣ್‌ಚೇಂಗಿ ಮಾತ್ರ ಅದ್ ಗೊತ್ತಾಪ, ಇಲ್ಲತೆಪೋಚೇಂಗಿ ಎನ್ನನೆ ಗೊತ್ತಾಪಾಂದ್ ಕ್‍ೕಟತ್. ಆನಗುಂಡ್ ಫಿಲಿಪ್ಪನ ತಾಂಡಕೂಡೆ ಅಳ್‌ಪಕ್ ಎಣ್ಣ್‌ಚಿ. 32 ಅಂವೊ ಓದಿಯಂಡ್ ಇಂಜ ದೇವಡ ವಾಕ್ಯ ಇನ್ನನೆ ಇಂಜತ್: ಕೊಲ್ಲ್‌ವಕ್ ಕೊಂಡ್ ಪೋಪ ಒರ್ ಕೊರಿರನೆಕೆ ಅಂವೊನ ಕೊಂಡ್ ಪೋಚಿ; ಒರ್ ಕೊರಿ ಕುಟ್ಟಿರನೆಕೆ ತಾಂಡ ರೋಮತ್‍ನ ಮುರಿಪಂವೊಂಡ ಮಿಂಞತ್ ಮೌನತ್‍ಲ್ ಇಪ್ಪ, ಅನ್ನನೆ ಅಂವೊ ತಾಂಡ ಬಾಯಿನ ತೊರಕತಂವೊನಾಯಿತ್ಂಜತ್. 33 ಅಂವೊ ಅಂವೊನ ತಗ್ಗ್‌ಚಿಟ್ಟಂಡಿಪ್ಪಕ, ಅಂವೊಂಗ್ ನ್ಯಾಯ ಕ್‍ಟ್ಟಿತ್‌ಲ್ಲೆ; ಅಂವೊಂಡ ಜೀವ ಈ ಲೋಕತ್ಂಜ ಪೋಯಿರ್‌ತ್; ಅಂವೊಂಡ ಸಂತಾನತ್‍ರ ಲೆಕ್ಕತ್‍ನ ದಾರ್‌ಕ್ ವಿವರಿಚಿಡ್‌ವಕ್ ಕಯ್ಯು. 34 ಆ ಅದಿಕಾರಿ ಫಿಲಿಪ್ಪನ ನೋಟಿತ್, ಇಲ್ಲಿ ಪ್ರವಾದಿ ದಾಡ ವಿಷಯತ್‍ನ ಎಣ್ಣಿಯಂಡುಂಡ್, ಪ್ರವಾದಿರ ವಿಷಯವ? ಅಥವ ಬೋರೆ ಒಬ್ಬಂಡ ವಿಷಯವ? ನಾಕ್ ಎಣ್ಣಿತಾಂದ್ ಕ್‍ೕಟತ್. 35 ಅಕ್ಕ, ಫಿಲಿಪ್ಪ, ತಕ್ಕ್ ಪರಿಯುವಕ್ ಸುರು ಮಾಡಿತ್, ಈ ದೇವಡ ವಾಕ್ಯತ್‍ರ ಮೂಲಕವೇ, ಯೇಸುರ ನಲ್ಲ ಸುದ್ದಿನೆಲ್ಲ ಎಣ್ಣ್‌ಚಿ. 36 ಇನ್ನನೆ ಅಯಿಂಗ ಬಟ್ಟೇಲ್ ಪೋಯಂಡಿಪ್ಪಕ, ನೀರ್ ಇಂಜ ಜಾಗಕ್ ಬಾತ್. ಅಕ್ಕ ಆ ಅದಿಕಾರಿ: ನೋಟ್, ಇಲ್ಲಿ ನೀರ್ ಉಂಡ್, ನಾಕ್ ದೀಕ್ಷಾಸ್ನಾನ ತಪ್ಪಕ್ ತಡೆ ಏದೇಂಗಿ ಉಂಡಾಂದ್ ಕ್‍ೕಟತ್. 37 ಅದ್ಂಗ್ ಫಿಲಿಪ್ಪ: ನೀನ್ ತ್‍ೕರ ಹೃದಯತ್‍ಲ್ ನಂಬ್‍ಚೇಂಗಿ ತಡೆ ಒಂದು ಇಲ್ಲೆ, ಅಕ್ಕ ಅಂವೊ, ಯೇಸು ಕ್ರಿಸ್ತ ದೇವಡ ಮೋಂವೋಂದ್ ನಾನ್ ನಂಬುವೀಂದ್ ಎಣ್ಣ್‌ಚಿ. 38 ಅಂವೊ ರಥತ್‍ನ ನಿಪ್ಪ್‌ಚಿಡುವಕ್ ಎಣ್ಣಿತ್, ಪಿಂಞ ದಂಡಾಳು ನೀರ್‌ಕ್ ಇಳ್ಂಜಿತ್. ಫಿಲಿಪ್ಪ ಅಂವೊಂಗ್ ದೀಕ್ಷಾಸ್ನಾನ ಕೊಡ್‍ತತ್. 39 ಅಯಿಂಗ ನೀರ್‌ನ ಬುಟ್ಟಿತ್ ಕರೆಕ್ ಬಪ್ಪಕ ಒಡೆಯಂಡ ಆತ್ಮ ಫಿಲಿಪ್ಪನ ಒಮ್ಮಕೆ ಎಡ್‍ತಂಡ್ ಪೋಯಿರ್‌ತ್. ಅದಿಕಾರಿ ಬಯ್ಯ ಫಿಲಿಪ್ಪನ ಕಂಡಿತ್‌ಲ್ಲೆ. ಆಚೇಂಗಿ, ಅಂವೊ ಕುಶೀಲ್ ತಾಂಡ ಬಟ್ಟೇಲ್ ಪೋಚಿ. 40 ಪಿಂಞ ಫಿಲಿಪ್ಪಂಗ್ ತಾನ್ ಅಜೋತ ಎಣ್ಣುವ ಜಾಗತ್‍ಲ್ ಉಂಡ್‍ೕಂದ್ ಗೊತ್ತಾಚಿ. ಅಲ್ಲಿಂಜ ಕೈಸರೈ ಪಟ್ಟಣಕ್ ಬಪ್ಪಕತ್ತನೆ, ಬಟ್ಟೇಲ್ ಇಂಜ ಎಲ್ಲಾ ಪಟ್ಟಣತ್‍ಲ್ ಯೇಸುರ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್ ಪೋಚಿ. |
© 2017, New Life Literature (NLL)