2 ಕೊರಿಂಥ 8 - ಕೊಡವ ಬೈಬಲ್ದಾರಾಳ ಮನಸ್ಸ್‌ಲ್ ಕೊಡ್‍ಕಂಡು 1 ನಾಡ ಅಣ್ಣತಮ್ಮಣಂಗಳೇ, ಮಕೆದೋನ್ಯ ಪ್ರಾಂತ್ಯತ್‍ರ ಸಬೇಕ್ ದೇವ ಕೊಡ್‍ತ ಕೃಪೇನ ನಿಂಗಕ್ ಅರಿಚಿಟ್ಟಂಡುಂಡ್. 2 ಅಯಿಂಗ ದುಂಬ ಹಿಂಸೇಲ್ ಪರೀಕ್ಷೆ ಪಟ್ಟಂಡಿಪ್ಪಕ, ಅಯಿಂಗ ದುಂಬ ಗರಿಬಂಗಳಾಯಿತ್ ಇಂಜತೇಂಗಿಯು, ಅಯಿಂಗಡ ತ್‍ೕರ ಕುಶೀಲ್ ದುಂಬ ದಾರಾಳವಾಯಿತ್ ಕೊಡ್‍ತತ್. 3 ಅದಲ್ಲತೆ, ಅಯಿಂಗ ಅಯಿಂಗಡ ಶಕ್ತಿಕ್ ತಕ್ಕಂತೆ ಪಿಂಞ ಅಯಿಂಗಡ ಶಕ್ತಿಕ್ ಜಾಸ್ತಿಯಾಯಿತು ಕೊಡ್‍ಪಕ್ ಮನಸ್ಸ್ ಉಳ್ಳಯಿಂಗಳಾಯಿತ್ ಇಂಜಾಂಗ್ ನಾನ್ ಸಾಕ್ಷಿಯಾಯಿತುಳ್ಳ. 4 ಅಯಿಂಗಡ ಸಹಾಯತ್‍ನ ಪಿಂಞ ದೇವಡ ಮಕ್ಕಕ್ ದಾನ ಮಾಡ್‌ವಕ್ ಕ್‍ಟ್ಟ್‌ನ ಐಕ್ಯತ್‍ಲ್ ಪಾಲ್‍ದಾರಂಗಳಾನದ್‌ನ, ಸ್ವೀಕಾರ ಮಾಡಂಡೂಂದ್ ಅಯಿಂಗ ನಂಗಳ ದುಂಬ ಬೋಡಿಯಂಡತ್. 5 ಅದಲ್ಲತೆ, ನಂಗ ಗೇನಮಾಡ್‍ನನೆಕೆ ಮಾತ್ರ ಮಾಡತೆ, ದೇವಡ ಚಿತ್ತತ್‍ರನೆಕೆ, ಆದ್ಯವಾಯಿತ್ ಅಯಿಂಗಳ ಒಡೆಯಂಗು, ಬಯ್ಯ ಅಯಿಂಗಳ ನಂಗಕು ಒಪ್ಪ್‌ಚಿಟ್ಟತ್. 6 ಆನಗುಂಡ್, ತೀತ ಈ ದಾನತ್‍ರ ಸೇವೇನ ನಿಂಗಡಲ್ಲಿ ಸುರು ಮಾಡ್‍ನನೆಕೆ, ಅದ್‍ನ ಪೂರ್ತಿ ಮಾಡಂಡೂಂದ್ ನಂಗ ಅಂವೊನ ಬೋಡ್‍ಚಿ. 7 ಅನ್ನನೆ, ನಂಬಿಕೇಲ್, ಬೋದನೆಲ್, ಬುದ್ದಿಲ್, ಎಲ್ಲಾ ಜಾಗ್ರತೆಲ್, ನಂಗಡ ಮೇಲೆ ಬೆಚ್ಚಿತುಳ್ಳ ಪ್ರತಿಲ್ ಪಿಂಞ ಬೋರೆ ಎಲ್ಲಾ ವಿಷಯತ್‍ಲು ನಿಂಗ ಚಾಯಿತೆ ಬೊಳ್‌ಂದಿತುಳ್ಳನೆಕೆ, ಈ ದಾನ ಮಾಡ್‌ವ ವಿಷಯತ್‍ಲು ದಾರಳವಾಯಿತ್ ಇರಿ. 8 ನಾನ್ ಇದ್‍ನ ಆಜ್ಞೆಯಾಯಿತ್ ಎಣ್ಣತೆ, ಬೋರೆಯಿಂಗಡ ಜಾಗ್ರತೆನ ಎಣ್ಣಿತ್, ನಿಂಗ ಪ್ರೀತಿಲ್ ಸತ್ಯವಂತಯಿಂಗಳಾಂದ್ ಪರೀಕ್ಷೆ ಮಾಡ್‌ವಕಾಯಿತೇ ಇನ್ನನೆ ಎಣ್ಣಿಯಂಡುಂಡ್. 9 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಕ್ ಗೊತ್ತುಂಡ್; ಅಂವೊ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು, ಅಂವೊಂಡ ಗರೀಬತನತ್‍ರಗುಂಡ್ ನಿಂಗ ಐಶ್ವರ್ಯವಂತಯಿಂಗಳಾಯಿತ್ ಆಪನೆಕೆ ಅಂವೊ ನಿಂಗಕಾಯಿತ್ ಗರೀಬನಾಚಿ. 10 ಈ ವಿಷಯತ್‍ಲ್ ನಾಡ ಆಲೋಚನೆನ ಎಣ್ಣ್‌ವಿ; ಇದ್‍ನ ಮಾಡಂಡೂಂದ್ ಒರ್ ಕಾಲಕ್ ಮಿಂಞ ಸುರು ಮಾಡ್‍ನದ್‍ಲ್ ಪಿಂಞ ಅದ್‍ನ ಮಾಡಂಡೂಂದ್ ಮಿಂಞಕ್ ಎಡ್‍ತಂಡ್ ಪೋಪದ್‍ಲ್ ಕುಶಿಪಡ್‌ವಕು ನಿಂಗಕ್ ಯೋಗ್ಯವಾಯಿತ್‌ಪ್ಪ. 11 ಆನಗುಂಡ್, ಅದ್‍ನ ಇಕ್ಕ ಪೂರ್ತಿ ಮಾಡಿ. ದಾನಮಾಡಂಡೂಂದ್ ಉಳ್ಳ ಆಸೆ ಉಳ್ಳನೆಕೆ, ನಿಂಗಕ್ ಉಳ್ಳದ್‍ಲ್ ಕೊಡ್‌ತಿತ್ ಅದ್‍ನ ಪೂರ್ತಿ ಮಾಡಿ. 12 ಒಬ್ಬಂಗ್ ಮನಸ್ಸ್ ಇಂಜತೇಂಗಿ, ಅಂವೊಂಗ್ ಇಲ್ಲತ ಅಳ್‌ತೆರಚ್ಚಕ್ ಅಲ್ಲ, ಅಂವೊಂಗ್ ಉಳ್ಳಚ್ಚಕ್ ಕೊಡ್‍ತತೇಂಗಿ ಅದ್ಂಗ್ ಅಂಗಿಕಾರ ಕ್‍ಟ್ಟುವ. 13 ಬೋರೆಯಿಂಗಕ್ ಸಹಾಯವು ನಿಂಗಕ್ ಬಾರವು ಕೊಡ್‍ಪಕಾಯಿತ್ ಅಲ್ಲ, ಎಲ್ಲಾರು ಸಮವಾಯಿತ್ ಇಪ್ಪಕೇ ಎಣ್ಣಿಯಂಡುಳ್ಳ. 14 ಎನ್ನನೆ ಎಣ್ಣ್‌ಚೇಂಗಿ, ದುಂಬ ಗುಡ್ಡೆ ಕೂಟ್‍ನಂವೊಂಗ್ ದುಂಬ ಕ್‍ಟ್ಟಿತು ಇಲ್ಲೆ, ಚೆನ್ನ ಗುಡ್ಡೆ ಕೂಟ್‍ನಂವೊಂಗ್ ಕಮ್ಮಿಯಾಯಿತ್ ಕ್‍ಟ್ಟಿತು ಇಲ್ಲೇಂದ್ ಒಳ್‍ದಿತುಳ್ಳನೆಕೆ, 15 ಸಮವಾಯಿತ್ ಇಕ್ಕಂಡೂಂದ್ ಉಳ್ಳ ಪ್ರಮಾಣತ್‍ರ ಪ್ರಕಾರ, ಅಯಿಂಗಡ ಐಶ್ವರ್ಯ ನಿಂಗಡ ಬಡತನಕ್ ಸಹಾಯ ಆಪಕಾಯಿತು, ಇಕ್ಕ ನಿಂಗಡ ಐಶ್ವರ್ಯ ಅಯಿಂಗಡ ಬಡತನಕು ಸಹಾಯ ಆಡ್. ತೀತ ಪಿಂಞ ಅಂವೊಂಡ ಕೂಟ್‍ಕಾರ 16 ಆಚೇಂಗಿ, ನಿಂಗಕಾಯಿತ್ ತೀತಂಡ ಹೃದಯತ್‍ಲ್ ಈ ಪುರಡ್‍ನ ಉಂಟ್‍ಮಾಡ್‍ನ ದೇವಕ್ ವಂದನೆ. 17 ನಂಗ ಬೋಡ್‍ನದ್‍ನ ಅಂವೊ ಅಂಗಿಕಾರ ಮಾಡ್‍ನದ್ ಮಾತ್ರವಲ್ಲತೆ, ಅಂವೊ ದುಂಬ ಎಚ್ಚರತ್‍ಲ್ ತಾಂಡ ಮನಸ್ಸ್‌ಲ್ ದುಂಬ ಕುಶಿಪಟ್ಟಿತ್ ನಿಂಗಡ ಪಕ್ಕ ಬಪ್ಪಕ್ ಪೊರಟತ್. 18 ಇದ್‍ಲ್ಲತೆ ದೇವಡ ನಲ್ಲ ಸುದ್ದಿ ಎಣ್ಣುವ ಸೇವೇರ ವಿಷಯತ್‍ಲ್ ಎಲ್ಲಾ ಸಬೇಲು ಹೊಗಳಿಯಂಡುಳ್ಳ ಒರ್ ತಮ್ಮಣನ ಅಂವೊಂಡ ಕೂಡೆ ಅಯಿಚಿತುಂಡ್. 19 ಅದಲ್ಲತೆ, ಒಡೆಯಂಗ್ ಮಹಿಮೆ ಕ್‍ಟ್ಟುವಕಾಯಿತ್, ನಿಂಗಡ ಮನಸ್ಸ್‌ರ ಆಸೆ ಗೊತ್ತಾಪಕು, ನಂಗಡ ಸೇವೇರ ಮೂಲಕ ಕೂಟ್‍ನ ದಾನತ್‍ರ ಪಣತ್‍ನ ಕೊಂಡ್ ಪೋಪಕ, ನಂಗಡ ಕೂಡೆ ಬಟ್ಟೇಲ್ ಬಪ್ಪಕಾಯಿತು, ಅಂವೊನ ಸಬೆ ಗೊತ್ತ್ ಮಾಡಿತ್ ನೇಮಿಚಿಟ್ಟತ್. 20 ನಂಗಡ ಸೇವೇರ ಮೂಲಕ ದಾರಾಳವಾಯಿತ್ ಕೂಟ್‍ನ ಈ ದಾನ ಪಣತ್‍ರ ವಿಷಯತ್ ಒಬ್ಬನು ನಂಗಳ ಕುತ್ತ ಪರಿಯತನೆಕೆ, ನಂಗ ಎಚ್ಚರತ್‍ಲ್ ಉಂಡ್. 21 ಒಡೆಯಂಡ ಮಿಂಞತ್ ಮಾತ್ರ ಅಲ್ಲತೆ, ಮನುಷ್ಯಂಗಡ ಮಿಂಞತು ಯೋಗ್ಯವಾನ ವಿಷಯತ್‍ನ ಮಾಡ್‌ವಕ್ ಆಸೆ ಪಟ್ಟಂಡುಂಡ್. 22 ಈಂಗಡ ಕೂಡೆ ನಂಗಡ ಇಂಞೊಬ್ಬನ ಸಹ ನಂಗ ಅಯಿಚಂಡುಂಡ್. ಅಂವೊ ದುಂಬ ವಿಷಯತ್‍ಲ್ ಜಾಗ್ರತೆಲ್ ಉಳ್ಳಂವೊನಾಯಿತ್ ನಂಗ ದುಂಬ ಸಮಯ ಅಂವೊನ ಕಂಡಿತುಂಡ್. ಇಕ್ಕ ನಿಂಗಡ ಮೇಲೆ ಬೆಚ್ಚಿತುಳ್ಳ ಬಲ್ಯ ನಂಬಿಕೇಲ್ ಇಂಞು ದುಂಬ ಜಾಗ್ರತೆಲ್ ಉಂಡ್. 23 ತೀತಂಡ ವಿಷಯತ್ ದಾರ್ ಒಬ್ಬ ಕ್‍ೕಟತೇಂಗಿ, ಅಂವೊ ನಾಡ ಕೂಟ್‍ಕಾರಾಂದೂ, ನಿಂಗಕಾಯಿತ್ ನಾಡ ಕೂಡೆ ದೇವಡ ಸೇವೆ ಮಾಡ್‌ವಂವೊನಾಯಿತ್ ಉಂಡ್‍ೕಂದು ಗೊತ್ತಿರಡ್. ನಂಗಡ ಅಣ್ಣತಮ್ಮಣಂಗಡ ವಿಷಯತ್ ಕ್‍ೕಟತೇಂಗಿ: ಅಯಿಂಗ ಸಬೆರ ಸೇವಕಂಗಳು, ಕ್ರಿಸ್ತಂಗ್ ಮಹಿಮೆಯಾಯಿತು ಉಂಡ್‍ೕಂದ್ ಗೊತ್ತಿರಡ್. 24 ಆನಗುಂಡ್, ನಿಂಗಡ ಪ್ರೀತಿನ ಪಿಂಞ ನಿಂಗಡ ವಿಷಯವಾಯಿತ್ ನಂಗ ಕೊಂಡಾಡ್‍ನದ್‍ನ, ಸಬೆರ ಮಿಂಞತ್ ಅಯಿಂಗಕ್ ಕಾಂಬ್‍ಚಿಡಿ. |
© 2017, New Life Literature (NLL)