1 ಪೇತ್ರ 3 - ಕೊಡವ ಬೈಬಲ್ಪೊಣ್ಣ್ ಪಿಂಞ ವಡಿಯ 1 ಅನ್ನನೆ, ಪೊಣ್ಣಾಳುವಳೇ, ನಿಂಗ ನಿಂಗಡ ಸ್ವಂತ ವಡಿಯಂಗಡ ಪಕ್ಕ ಅಡಕತ್‍ಲ್ ಇರಂಡು. ಅಕ್ಕ, ಅಯಿಂಗಡಲ್ಲಿ, ದಾರೇಂಗಿಯು ದೇವಡ ವಾಕ್ಯತ್‍ನ ನಂಬತಯಿಂಗಳಾಯಿತ್ ಇಂಜತೇಂಗಿ, ನಿಂಗಡ ತಕ್ಕ್‌ರಗುಂಡ್ ಅಲ್ಲ, ನಿಂಗಡ ಗುಣತ್‍ರಗುಂಡ್, 2 ಪಿಂಞ ಅಯಿಂಗ ನಿಂಗಡ ಪವಿತ್ರವಾನ ಬಕ್ತಿಯುಳ್ಳ ನಡತೇನ ಕಾಂಬಕ ಅಯಿಂಗಳ ದೇವಡ ಪಕ್ಕ ಬಲಿಪಕ್ ಆಪ. 3 ನಿಂಗಡ ಬೋಜ, ನಿಂಗ ಪೊರಮೆ ಇಡ್‌ವ ಆಬರಣತ್ಂಜ ಬಪ್ಪಕ್ಕಾಗ. ಅದ್ ಎಂತ ಎಣ್ಣ್‌ಚೇಂಗಿ: ನಿಂಗಡ ತೆಲ್‌ಮಿಲ್ ಮಾಡ್‌ವ ಅಲಂಗಾರ, ಪೊನ್ನ್‌ರ ಆಬರಣ ಪಿಂಞ ಅಲಂಗಾರವಾನ ಬಟ್ಟೆ. 4 ಅದ್ಂಡ ಬದ್‍ಲ್, ನಿಂಗಡ ಬೋಜ ನಿಂಗಡ ಒಳ್‍ಲಿಂಜ ಬಪ್ಪದಾಯಿತ್ ಇರಂಡು. ಅದ್ ಎಂತ ಎಣ್ಣ್‌ಚೇಂಗಿ: ಪಾಳಾಯಿ ಪೋಕತ ಅಲಂಗಾರವಾನ ಶಾಂತ ಮನಸ್ಸ್‌ಲ್ ನಿಂಗಡ ಹೃದಯತ್‍ಲ್ ಮುಚ್ಚಿತಿಪ್ಪ ಗುಣವೇ. ಅದ್ ದೇವಡ ನೋಟತ್‌ಲ್ ದುಂಬ ಬೆಲೆಯುಳ್ಳದಾಯಿತುಂಡ್. 5 ಇನ್ನನೆ ಪೂರ್ವ ಕಾಲತ್‍ಲ್, ದೇವಡ ಮೇಲೆ ನಿರೀಕ್ಷೆ ಇಟ್ಟಿತ್ಂಜ ಪವಿತ್ರವಾನ ಪೊಣ್ಣಾಳುವ, ಅಯಿಂಗಡ ವಡಿಯಂಗಡ ಪಕ್ಕ ಅಡಕತ್‍ಲ್ ಇಂಜಿತ್, ಅಯಿಂಗಳ ಈ ಗುಣತ್‍ರಗುಂಡ್ ಅಲಂಗಾರ ಮಾಡ್‍ಚಿ. 6 ಅನ್ನನೆ, ಸಾರಳ ತಾಂಡ ವಡಿಯನಾನ ಅಬ್ರಹಾಮನ, ಒಡೆಯಾಂದ್ ಕಾಕಿತ್, ಅಂವೊಂಗ್ ಬಗ್ಗಿತ್ ಇಂಜತ್. ನಿಂಗ ನಲ್ಲದ್ ಮಾಡಿತ್ ದಾರ್‌ಕು ಬೊತ್ತ್‌ವಕ್ ಜಾಗ ಕೊಡ್‍ಕತೆ ಇಂಜತೇಂಗಿ ನಿಂಗಳು ಅವಡ ಮೋಳಿಯಂಗಳಾಯಿತ್‌ಪ್ಪಿರ. 7 ಅನ್ನನೆ, ವಡಿಯಂಗಳೇ! ನಿಂಗಡ ಪೊಣ್ಣಾಳುವ ತಡೀಲ್ ಬೆಲ ಇಲ್ಲತಯಿಂಗಳಾಯಿತ್ ಉಳ್ಳಾಂಗ್, ನಿಂಗಡ ಪ್ರಾರ್ಥನೆಕ್ ತಡೆ ಬರತನೆಕೆ, ಜ್ಞಾನತ್‍ಲ್ ಅಯಿಂಗಡ ಕೂಡೆ ಬದ್‌ಕಿತ್, ನಿಂಗಡ ಕೂಡೆ ಅಯಿಂಗಳು ಕೃಪೇರ ನಿತ್ಯ ಜೀವಕ್ ಪಾಲ್‍ದಾರಂಗಳಾನಗುಂಡ್, ಅಯಿಂಗಕ್ ಬೋಂಡಿಯಾನ ಮರ್ಯಾದೆನ ಕೊಡ್‍ಕಂಡು. ನೀತಿ ಬದ್‍ಕ್‍ರ ಕಷ್ಟ 8 ಕಡೇಕ್ ನಾನ್ ಎಣ್ಣುವದ್ ಎಂತ ಎಣ್ಣ್‌ಚೇಂಗಿ: ನಿಂಗ ಎಲ್ಲಾರು ಒಬ್ಬ ಒಬ್ಬಂಡ ಕೂಡೆ ಐಕ್ಯತ್‍ಲ್ ಬದ್‍ಕಂಡು; ದಯೆ ಉಳ್ಳಯಿಂಗಳಾಯಿತ್, ಯೇಸುನ ನಂಬ್‍ನಯಿಂಗಡ ಪ್ರೀತಿ ಉಳ್ಳಯಿಂಗಳಾಯಿತ್, ಕನಿಕರ ಉಳ್ಳಯಿಂಗಳಾಯಿತ್, ಪೊರುಮೆ ಉಳ್ಳಯಿಂಗಳಾಯಿತ್ ಇಕ್ಕಂಡು. 9 ಕ್‍ೕಡ್ ಮಾಡ್‌ವಯಿಂಗಕ್ ಕ್‍ೕಡ್ ಮಾಡತಿ, ಅವಮಾನ ಮಾಡ್‌ವಯಿಂಗಳ ಅವಮಾನ ಮಾಡತಿ, ಆಚೇಂಗಿ, ನಿಂಗ ಆಶೀರ್ವಾದ ಪಡೆಯುವಕ್ ದೇವ ನಿಂಗಳ ಕಾಕಿತುಂಡ್‍ೕಂದ್ ಗೇನ ಮಾಡಿತ್ ಅಯಿಂಗಳ ಆಶೀರ್ವಾದ ಮಾಡಿ. 10 ದಾರ್ ಅಯಿಂಗಡ ಬದ್‍ಕ್‍ನ ಪ್ರೀತಿಚಿಡುವ, ಪಿಂಞ ನಲ್ಲ ಬವಿಷ್ಯ ಬರಂಡೂಂದ್ ಗೇನ ಮಾಡ್‌ವ, ಅಯಿಂಗ ಕೆಟ್ಟದ್ ಪರಿಯುವಕ್ ತಾಂಡ ನಾವ್‌ನ ಪಿಂಞ ಪೊಟ್ಟ್ ಪರಿಯುವಕ್ ತಾಂಡ ಕಿರಿನ ಅಡಕುವ. 11 ಕೆಟ್ಟದ್‍ನ ಬುಟ್ಟಿತ್, ನಲ್ಲದ್ ಮಾಡಂಡು; ಸಮಾದಾನತ್‍ನ ತ್‍ೕಡಿತ್ ಅದ್ಂಡ ಬಯ್ಯಕ್ ಪೋಂಡು. 12 ದೇವಡ ಕಣ್ಣ್ ನೀತಿವಂತಯಿಂಗಡ ಮೇಲೆ ಪಿಂಞ ಅಂವೊಂಡ ಕೆಮಿ ಅಯಿಂಗಡ ಪ್ರಾರ್ಥನೆನ ಕ್‍ೕಪಕ್ ದುಂಬ ಪಕ್ಕತ್‍ಲ್ ಉಂಡ್, ಆಚೇಂಗಿ ಕೆಟ್ಟದ್ ಮಾಡ್‌ವಯಿಂಗಡ ಮೇಲೆ ಅಂವೊಂಡ ಮೂಡ್ ವಿರೋದವಾಯಿತುಂಡ್. 13 ನಿಂಗ ನಲ್ಲದ್ ಮಾಡಂಡೂಂದ್ ಅರ್ಪಿಚಿಟ್ಟಯಿಂಗಳಾಯಿತ್ ಇಂಜತೇಂಗಿ, ನಿಂಗಕ್ ಕ್‍ೕಡ್ ಮಾಡ್‍ವದ್ ದಾರ್? 14 ಆಚೇಂಗಿ, ನೀತಿವಂತ ಕಾರ್ಯ ಮಾಡಿತ್ ಅದ್ಂಗಾಯಿತ್ ತೊಂದರೆ ಬಾತೇಂಗಿ, ನಿಂಗ ಆಶೀರ್ವಾದ ಪಡ್ಂದಯಿಂಗ. ಅಯಿಂಗ ಜೋರ್ ಮಾಡ್‌ವದ್‍ನ ನೋಟಿತ್ ನಿಂಗ ಬೊತ್ತತೆ, ಪೋಡಿ ಇಲ್ಲತೆ ಇಕ್ಕಂಡು. 15 ಆಚೇಂಗಿ, ಕ್ರಿಸ್ತಂಗ್ ನಿಂಗಡ ಹೃದಯತ್‍ಲ್ ಮರ್ಯಾದೆ ಕೊಡ್‍ಕಂಡು, ಅಂವೊನ ಒಡೆಯನಾಯಿತ್ ಗನಪಡ್‌ತಂಡು. ನಿಂಗಡ ನಿರಿಕ್ಷೇರ ವಿಷಯತ್ ದಾರಾಚೇಂಗಿ ಪ್ರಶ್ನೆ ಇಟ್ಟತೇಂಗಿ, ಅಯಿಂಗ ಎಲ್ಲಾರ್‌ಕು ಉತ್ತರ ಕೊಡ್‍ಪನೆಕೆ, ತಾಯಾರಾಯಿತ್ ಇರಿ. ಆಚೇಂಗಿ ಅದ್‍ನ ಮರ್ಯಾದೆಲ್ ಶಾಂತತ್‍ಲ್ ಮಾಡಂಡು. 16 ನಲ್ಲ ಮನಸಾಕ್ಷಿಲ್ ಇರಿ, ಅಕ್ಕ, ನಿಂಗಕ್ ಕ್ರಿಸ್ತಂಡ ಐಕ್ಯತ್‍ಲ್ ಉಳ್ಳ ನಲ್ಲ ನಡತೇನ ದೂಷಣೆ ಮಾಡಿತ್, ನಿಂಗಳ ಕೆಟ್ಟಯಿಂಗಾಂದ್ ಎಣ್ಣುವಯಿಂಗಕ್ ಞಾಣ ಆಪ. 17 ಕೆಟ್ಟದ್ ಮಾಡಿತ್ ಕಷ್ಟಪಡ್‌ವಕಿಂಜ, ದೇವಕ್ ಚಿತ್ತ ಉಂಡೇಂಗಿ, ನಲ್ಲದ್ ಮಾಡಿತ್ ಕಷ್ಟಪಡ್‌ವದ್ ನಲ್ಲದ್. 18 ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತ ಸಹ ನಂಗಳ ದೇವಡ ಪಕ್ಕ ಕೊಂಡ್ ಬಪ್ಪಕಾಯಿತ್, ಅನೀತಿ ಉಳ್ಳಯಿಂಗಕ್ ಬದ್‍ಲಾಯಿತ್ ನೀತಿಯುಳ್ಳಂವೊನಾಯಿತ್ ಒರೇ ಕುರಿ ಪಾಪತ್‍ರಗುಂಡ್ ಕಷ್ಟಪಟ್ಟತ್; ಅಂವೊ ತಡೀಲ್ ಚತ್ತತ್, ಆತ್ಮತ್‍ಲ್ ಜೀವವಾಯಿತ್ ಬಾತ್. 19 ಆ ಆತ್ಮತ್‍ಲ್ ಅಂವೊ ಪೋಯಿತ್, ಕೆಟ್ಟಿ ಇಟ್ಟಿತುಳ್ಳ ಆತ್ಮಂಗಕ್ ದೇವಡ ನಲ್ಲ ಸುದ್ದಿನ ಎಣ್ಣ್‌ಚಿ. 20 ಆ ಆತ್ಮಂಗ, ಪಂಡ್ ಕಾಲತ್‍ಲ್ ನೋಹ ಕಪ್ಪಲ್ ಮಾಡಿಯಂಡಿಪ್ಪಕ, ದೇವ ತಾಳ್ಮೆಲ್ ಪಾರಕಾತಂಡಿಂಜ ಸಮಯತ್‍ಲ್, ದೇವಡ ಸದ್ದ್‌ಕ್ ಕೆಮಿ ಕೊಡ್‍ಕತೆ ಪೋನಯಿಂಗ. ಅಕ್ಕ, ಆ ಕಪ್ಪಲ್‍ಲ್ ಚೆನ್ನ ಜನವಾಯಿತ್ಂಜ ಎಟ್ಟ್ ಜನ ಮಾತ್ರ ಜಲ ಪ್ರಳಯತ್ಂಜ ತಪ್ಪ್‌ಚಿಟ್ಟತ್. 21 ಅದ್ಂಗ್ ಸಮವಾನ ನಂಗಡ ರಕ್ಷಣೆಕಾಯಿತುಳ್ಳ ದೀಕ್ಷಾಸ್ನಾನ ಎಂತ ಎಣ್ಣ್‌ಚೇಂಗಿ, ಅದ್ ನಂಗಡ ತಡೀರ ಅಶುದ್ದತ್‍ನ ಕತ್ತುವ ವಿಷಯ ಅಲ್ಲ. ಆಚೇಂಗಿ, ದೇವಡ ವಿಷಯತ್ ನಂಗಡ ಮನಸಾಕ್ಷಿರ ಒಪ್ಪಂದವಾಯಿತ್, ಇಕ್ಕ ನಂಗಳ ಯೇಸು ಕ್ರಿಸ್ತ ಚಾವ್‍ಯಿಂಜ ಜೀವತ್‍ಲ್ ಬಂದ ಮೂಲಕ ರಕ್ಷಣೆ ಮಾಡಿಯೆ. 22 ಅಂವೊ ಪರಲೋಕಕ್ ಪೋಯಿತ್, ದೇವಡ ಬಲ್‌ತೆ ಬರಿಲ್ ಅಳ್‌ತಿತ್ ಉಂಡ್; ದೇವದೂತಂಗ, ಅದಿಕಾರ, ಶಕ್ತಿ ಅಂವೊಂಡ ಅಡಿಲ್ ಅಡಕತ್‍ಲ್ ಉಂಡ್. |
© 2017, New Life Literature (NLL)