1 ಪೇತ್ರ 2 - ಕೊಡವ ಬೈಬಲ್ಜೀವವುಳ್ಳ ಕಲ್ಲ್ ಪಿಂಞ ಪವಿತ್ರವಾನ ಜನಾಂಗ 1 ಆನಗುಂಡ್, ಬೋರೆಯಿಂಗಳ ಕಷ್ಟಪಡ್‌ತ್‌ವದ್‍ಲ್ ಕುಶಿ ಪಡುವ ಎಲ್ಲಾ ಗುಣತ್‍ನ, ವಂಚನೆ ಮಾಡ್‌ವ ಗುಣತ್‍ನ, ಎಲ್ಲಾ ಕಪಟಿಯಾನ ಗುಣತ್‍ನ, ಹೊಟ್ಟೆಕಿಚ್ಚ್‌ನ, ಕುತ್ತಪರಿಯುವಾನೆಲ್ಲಾನ ನಿಂಗಡಲ್ಲಿಂಜ ಚಾಡಿ ಕಳೆಯುವಿರ. 2 ಒರ್ ಪುಟ್ಟ್‌ನ ಕುಂಞಿರನೆಕೆ, ರಕ್ಷಣೆಲ್ ಬೊಳಿಯುವಕ್, ಆತ್ಮೀಯ ಪಾಲಾಯಿತ್ ಉಳ್ಳ ಶುದ್ದವಾನ ದೇವಡ ವಾಕ್ಯತ್‍ನ ಕುಡಿಪಕ್ ಕುಶಿಪಡಿ. 3 ಇಕ್ಕ ನಿಂಗ ಒಡೆಯಂಡ ದಯೇನ ಅನುಬವಿಚಿಟ್ಟಿತುಳ್ಳಿರ. 4 ಮನುಷ್ಯಂಗ ಬೋಂಡಾಂದ್ ತಿರಸ್ಕಾರ ಮಾಡಿತ್ಂಜತೇಂಗಿಯು, ದೇವ ಗೊತ್ತ್ ಮಾಡ್‌ನದು, ದುಂಬ ಬೆಲೆ ಉಳ್ಳದುವಾಯಿತುಳ್ಳ ಜೀವತ್‍ರ ಕಲ್ಲ್‌ರನೆಕೆ ಉಳ್ಳ ಒಡೆಯನಾನ ಯೇಸು ಕ್ರಿಸ್ತಂಡ ಪಕ್ಕ ಬಂದಿತುಳ್ಳಿರ. 5 ಆನಗುಂಡ್, ನಿಂಗಳು, ಜೀವವಾಯಿತುಳ್ಳ ಕಲ್ಲ್‌ರನೆಕೆ ಉಳ್ಳಾಂಗ್, ನಿಂಗಡಗುಂಡ್, ಆತ್ಮೀಯ ಮನೆಯಾಯಿತ್ ಕೆಟ್ಟಿಯಂಡುಂಡ್. ಅಲ್ಲಿ, ನಿಂಗ ಯೇಸು ಕ್ರಿಸ್ತಂಡ ಮೂಲಕ, ದೇವಕ್ ಪ್ರೀತಿಯಾಯಿತುಳ್ಳ, ಆತ್ಮೀಯ ಬಲಿನ ಕೊಡ್‍ಪಕ್ ಪವಿತ್ರವಾನ ಯಾಜಕ ಮಕ್ಕಡ ಕೂಟವಾಯಿತು ಉಳ್ಳಿರ. 6 ದೇವಡ ವಾಕ್ಯತ್‍ಲ್: ನೋಟಿ, ನಾನ್ ಗೊತ್ತ್ ಮಾಡ್‍ನ ಬೆಲೆಯುಳ್ಳ ಮೂಲೆಕಲ್ಲ್‌ನ ಚೀಯೋನ್‌ ಪಟ್ಟಣತ್‍ಲ್ ಬೆಚ್ಚಿಯೆ, ಅದ್ಂಡಮೇಲೆ ನಂಬಿಕೆ ಬೆಪ್ಪಂವೊ ಞಾಣ ಆಪುಲೇಂದ್ ಎಣ್ಣಿತುಂಡ್. 7 ಆನಗುಂಡ್, ಅದ್ಂಡಮೇಲೆ ನಂಬಿಕೆ ಬೆಪ್ಪ ನಿಂಗಕ್ ಅದ್ ಅಮುಲ್ಯವಾನದ್, ಆಚೇಂಗಿ, ಅದ್‍ನ ನಂಬತಯಿಂಗಕ್, ಅದ್: ಮನೆ ಕೆಟ್ಟ್‌ವಯಿಂಗ ಬೋಂಡಾಂದ್ ತಿರಸ್ಕಾರ ಮಾಡ್‍ನ ಆ ಕಲ್ಲೇ, ಮನೆರ ಮುಕ್ಯವಾನ ಕಲ್ಲಾಚಿ 8 ಆ ಕಲ್ಲ್ ಮನುಷ್ಯಂಗಳ ತಡ್‍ಪಕು ಬೂವಕು ಮಾಡ್‌ವ ಬಂಡೆಯಾಯಿತ್ ಆಚಿ. ಅಯಿಂಗ ದೇವಡ ಉಪದೇಶಕ್ ಬಗ್ಗ್‌ಚಿಡತಗುಂಡ್ ಅದ್ ತಡ್‍ತಂಡುಂಡ್, ಅದ್ಂಗೇ ಅಯಿಂಗಳ ನೇಮಿಚಿಟ್ಟಯಿಂಗಳಾಯಿತುಂಡ್. 9 ಆಚೇಂಗಿ ನಿಂಗ, ನಿಂಗಳ ಇರ್‌ಟ್‌ಂಜ ತಾಂಡ ಅದ್ಬುತವಾನ ಬೊಳಿಕ್ ಕಾಕ್‌ನಂವೊಂಡ ತುದಿನ ಅರಿಚಿಡ್‌ವಕ್, ದೇವ ಗೊತ್ತ್ ಮಾಡ್‍ನಯಿಂಗಳಾಯಿತ್, ರಾಜಕೀಯ ಯಾಜಕಂಗಳಾಯಿತ್, ಪವಿತ್ರವಾನ ರಾಜ್ಯತ್‍ರ ಮಕ್ಕಳಾಯಿತ್ ಪಿಂಞ ದೇವಡ ಸ್ವಂತ ಜನವಾಯಿತ್ ಉಳ್ಳಿರ. 10 ಒರ್ ಕಾಲತ್‍ಲ್ ನಿಂಗ ದೇವಡ ಮಕ್ಕಳಾಯಿತ್ ಇಂಜಿತ್‌ಲ್ಲೆ, ಆಚೇಂಗಿ ಇಕ್ಕ ನಿಂಗ ದೇವಡ ಮಕ್ಕಳಾಯಿತ್ ಉಳ್ಳಿರ; ಒರ್ ಕಾಲತ್‍ಲ್ ನಿಂಗಕ್ ಕನಿಕರ ಕ್‍ಟ್ಟಿತ್‌ಲ್ಲೆ, ಆಚೇಂಗಿ ಇಕ್ಕ ನಿಂಗಕ್ ಕನಿಕರ ಕ್‍ಟ್ಟ್‌ಚಿ. ದೇವಡ ಆಳಾಯಿತ್ ಇಕ್ಕಂಡು 11 ನಾಡ ಪ್ರೀತಿರ ಜನಳೇ, ಈ ಲೋಕತ್‍ಲ್ ಚೆನ್ನ ಕಾಲ ಮಾತ್ರ ಬದ್‍ಕ್‍ವಯಿಂಗಳಾಯಿತ್, ಮನೆ ಇಲ್ಲತಯಿಂಗಡನೆಕೆ ಇಪ್ಪ ನಿಂಗಳ ನಾನ್ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ: ನಿಂಗಡ ಆತ್ಮಕ್ ವಿರೋದವಾಯಿತ್ ಯುದ್ದ ಮಾಡ್‌ವ ಪಾಪತ್‍ರ ಗುಣತ್‍ನ ಕಳೆಯಂಡು. 12 ದೇವಡ ಮೇಲೆ ನಂಬಿಕೆ ಇಲ್ಲತ ಜನ, ನಿಂಗ ತಪ್ಪ್ ಮಾಡ್‌ನಯಿಂಗಾಂದ್ ಕುತ್ತ ಪರ್ಂದತೇಂಗಿಯು, ಅಯಿಂಗ ನಿಂಗಡ ನಲ್ಲ ಕ್ರಿಯೇನ ಕಂಡಿತ್, ಅಂವೊ ನಂಗಳ ಕಾಂಬ ದಿವಸತ್‍ಲ್ ಅಯಿಂಗ ದೇವನ ತುದಿಪನೆಕೆ, ಅಯಿಂಗಡ ಮದ್ಯತ್‍ಲ್ ನಲ್ಲ ನಡತೆ ಉಳ್ಳಯಿಂಗಳಾಯಿತ್ ಬದ್‍ಕಂಡು. 13 ಮನುಷ್ಯಂಗಡ ಮದ್ಯತ್‍ಲ್ ನೇಮಿಚಿಟ್ಟಿತುಳ್ಳ ಎಲ್ಲಾ ಅದಿಕಾರಕು, ಒಡೆಯಂಗಾಯಿತ್ ತಗ್ಗಿತ್ ನಡ್‌ಕಂಡು. ಅದ್ ರಾಜನಾಯಿತ್ಂಜತೇಂಗಿಯು, 14 ಅಥವ ಅಂವೊ ಅಯಿಚ ಅದಿಕಾರಿಯಾಯಿತ್ಂಜತೇಂಗಿಯು, ತಪ್ಪ್ ಮಾಡ್‌ವಯಿಂಗಕ್ ದಂಡೆನೆ ತಪ್ಪಯಿಂಗಳಾಡ್ ಅಥವ ನಲ್ಲದ್ ಮಾಡ್‌ವಯಿಂಗಳ ಸತ್ಕಾರ ಮಾಡ್‌ವಯಿಂಗಳಾಡ್, ಅಂವೊ ಅಯಿಚಂವೊಂಗ್ ನಿಂಗ ತಗ್ಗಿತ್ ನಡ್‌ಕಂಡು. 15 ಮುಠಾಳಂಗಡ ಗೊತ್ತಿಲ್ಲತ ತಕ್ಕ್‌ನ ನಿಂಗ ಅಡಕ್‍ವಕ್, ನಲ್ಲದ್ ಮಾಡಂಡೂಂದ್ ಉಳ್ಳದ್ ದೇವಡ ಚಿತ್ತವಾಯಿತ್ ಉಂಡ್. 16 ಬುಡ್‍ಗಡೆ ಆನಯಿಂಗಳಾಯಿತ್ ಬದ್‍ಕಿ, ಆಚೇಂಗಿ, ನಿಂಗಕ್ ಕ್‍ಟ್ಟ್‌ನ ಈ ಸ್ವಾತಂತ್ರತ್‍ನ ನಿಂಗಡ ಇಚ್ಛೆರನೆಕೆ ಪಾಪ ಮಾಡಿತ್ ಮುಚ್ಚ್‌ವಕ್ ಉಪಯೋಗಿಚಿಡತಿ; ದೇವಡ ಸೇವಕಂಗಡನೆಕೆ ಬದ್‍ಕಂಡು. 17 ಎಲ್ಲಾರ್‌ಕು ಚಾಯಿ ಮರ್ಯಾದೆ ಕೊಡಿ, ಯೇಸುನ ನಂಬ್‍ನಯಿಂಗಳ ಪ್ರೀತಿ ಮಾಡಿ, ದೇವಕ್ ಬೊತ್ತ್‌ಚಿಡಿ, ರಾಜನ ಗನಪಡ್‌ತಂಡು. ಕ್ರಿಸ್ತಂಡ ಕಷ್ಟ ನಂಗಕ್ ಒರ್ ಉದಾರಣೆ 18 ಅಳುವಳೇ, ಎಲ್ಲಾ ಮರ್ಯಾದೆಲ್ ನಿಂಗಡ ಎಜಮಾನಂಗಕ್ ತಗ್ಗಿತ್ ನಡ್‌ಪಿರ, ನಲ್ಲಯಿಂಗಕು, ಶಾಂತ ಗುಣ ಉಳ್ಳಯಿಂಗಕ್ ಮಾತ್ರ ಅಲ್ಲ, ಕಠಿಣ ಗುಣ ಉಳ್ಳಯಿಂಗಕು ಅನ್ನನೆ ಮಾಡಿ. 19 ಎನ್ನಂಗೆಣ್ಣ್‌ಚೇಂಗಿ, ದೇವಡ ವಿಷಯತ್ ಉಳ್ಳ ಮನಸಾಕ್ಷಿಲ್, ಒಬ್ಬ ಅನ್ಯಾಯವಾಯಿತ್ ಕಷ್ಟಪ್ಪಟ್ಟತ್, ಹಿಂಸೆನ ಸಹಿಸಿಯಂಡ್ ಇಂಜತೇಂಗಿ, ಅದ್ ದೇವಡ ಮಿಂಞತ್ ದುಂಬ ಕೊಂಡಾಡುವಕ್ ಆಪ. 20 ಆಚೇಂಗಿ, ನಿಂಗ ತಪ್ಪ್ ಮಾಡಿತ್ ಅದ್ಂಗಾಯಿತ್, ಶಿಕ್ಷೆ ಕ್‍ಟ್ಟಿತ್ ಅದ್‍ನ ನಿಂಗ ಸಹಿಸಿಯಂಡ್ ಇಂಜತೇಂಗಿ, ನಿಂಗಕ್ ಎಂತ ಲಾಬ? ನಿಂಗ ನಲ್ಲದ್ ಮಾಡ್‌ವಕ ಕಷ್ಟಪಟ್ಟಿತ್, ಸಹಿಸಿಯಂಡ್ ಇಂಜತೇಂಗಿ ಅದ್ ದೇವಡ ಮಿಂಞತ್ ಕೊಂಡಾಡುವಕ್ ಆಪ. 21 ಇದ್ಂಗಾಯಿತೇ ದೇವ ನಿಂಗಳ ಕಾಕಿಯತ್, ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತನು ನಿಂಗಕಾಯಿತ್ ಪಾಡ್‍ಪಟ್ಟಿತ್ ನಿಂಗ ಅಂವೊಂಡ ಬಟ್ಟೇಲ್ ಬಪ್ಪಕಾಯಿತ್ ಅಂವೊನ ಒರ್ ಉದಾರಣೆಯಾಯಿತ್ ಮಾಡ್‍ಚಿ. 22 ಅಂವೊ ಪಾಪ ಮಾಡಿತ್‌ಲ್ಲೆ, ಅಂವೊಂಡ ತಕ್ಕ್‌ಲ್ ಒರ್ ವಂಚನೇಯು ಕಂಡಿತ್‌ಲ್ಲೆ; 23 ಅಂವೊನ ಅಯಿಂಗ ಅವಮಾನಮಾಡ್‌ವಕ, ಬದ್‍ಲ್ ಬಜ್ಜಿತ್‌ಲ್ಲೆ, ಹಿಂಸೆ ಮಾಡ್‌ವಕ, ಅಯಿಂಗಕ್ ಪೋಡಿ ಬಪ್ಪನೆಕೆ ಮಾಡಿತ್‌ಲ್ಲೆ. ಅದ್ಂಡ ಬದ್‍ಲ್, ನೀತಿಯಾಯಿತ್ ತೀರ್ಪ್ ಮಾಡ್‌ವಂವೊಂಡ ಪಕ್ಕ ಅಂವೊನ ಒಪ್ಪ್‌ಚಿಟ್ಟತ್. 24 ಅಂವೊ ನಂಗಡ ಪಾಪತ್‍ನ ತಾಂಡ ತಡೀಲ್ ಎಡ್‍ತಂಡ್, ಶಿಲುಬೇಲ್ ಪೊರ್‌ತಂಡ್‌ ಚತ್ತತ್. ಆನಗುಂಡ್, ನಂಗ ಪಾಪಕ್ ಚತ್ತ್ ಪೋಯಿತ್ ನೀತಿಕ್ ಬದ್‍ಕ್‍ವನೆಕೆ ಆಚಿ. ಅಂವೊಂಡ ಗಾಯತ್‍ನಗುಂಡ್ ನಂಗ ವಾಸಿಯಾಚಿ. 25 ಚದ್‌ರಿ ಪೋಯಿತ್ಂಜ ಕೊರಿರನೆಕೆ ಇಂಜಿರ; ಆಚೇಂಗಿ ಇಕ್ಕ ಕೊರಿ ಕಾಪಂವೊನೆಕೆ ನಿಂಗಡ ಆತ್ಮತ್‌ನ ನಡ್‍ತಿಯಂಡ್ ಪೋಪಂವೊಂಡ ಪಕ್ಕ, ಪಿಂಞ ನಿಂಗಳ ನೋಟುವ ಪೆರಿಯಂವೊಂಡ ಪಕ್ಕವು ಬಂದಿತುಳ್ಳಿರ. |
© 2017, New Life Literature (NLL)