1 ಕೊರಿಂಥ 5 - ಕೊಡವ ಬೈಬಲ್ಸಬೇಲ್ ವ್ಯಬಿಚಾರ 1 ನಿಂಗಡ ಮದ್ಯತ್‍ಲ್ ವ್ಯಬಿಚಾರ ಕಾರ್ಯ ಆಯಂಡುಂಡ್‍ೕಂದ್ ನೇರಾಯಿತು ಜನ ಪುಕಾರ್ ಮಾಡಿಯಂಡುಂಡ್. ಒಬ್ಬ ಅಂವೊಂಡ, ಚಿಕ್ಕವ್ವಡ ಕೂಡೆ ಬುದ್ದಂಡ್ ಉಂಡ್‍ೕಂದ್ ನಾಕ್ ಸುದ್ದಿ ಬಾತ್. ಈ ತರ ಕಾರ್ಯ ದೇವನ ಗೊತ್ತಿಲ್ಲತ ಜನ ಕೂಡೆ ಮಾಡ್‌ಲೆಲ್ಲಾ? 2 ನಿಂಗ ಇದ್‍ನೆಲ್ಲ ಕಂಡಿತ್ ಎನ್ನನೆ ಬಲ್ಯರಿಕೇಲ್ ಕಳಿಪಿರ? ಆಂಡ ಬದ್‍ಲ್ ನಿಂಗ ಈ ವಿಷಯತ್‍ನ ಕ್‍ೕಟಿತ್ ದುಂಬ ಬೇಜಾರ್ ಆಯಿತ್ ಮೊರಟಂಡ್ ಇಕ್ಕಂಡು. ಅಂತ ಮನುಷ್ಯನ ನಿಂಗಡ ಐಕ್ಯತ್ಂಜ ಪೊರಮೆ ಬೆಚ್ಚಿತಿಕ್ಕಂಡು. 3 ನಾನ್ ತಡೀಲ್ ನಿಂಗಡಿಂಜ ದೂರ ಇಂಜತೇಂಗಿಯು, ಆತ್ಮತ್‍ಲ್ ನಿಂಗಡ ಕೂಡೆ ಉಳ್ಳ. ಆತ್ಮತ್‍ಲ್ ನಿಂಗಡ ಕೂಡೆ ಉಳ್ಳನೆಕೆ, ಅಕ್ಕಲೆ ಯೇಸು ಕ್ರಿಸ್ತಂಡ ಪೆದತ್‍ಲ್ ಆ ಮನುಷ್ಯಂಗ್ ನಾನ್ ತೀರ್ಪ್ ಕೊಡ್‍ತಿತುಳ್ಳ. 4 ನಿಂಗ ಒಡೆಯನಾನ ಯೇಸುರ ಪೆದತ್‍ಲ್ ಕೂಡಿ ಬಪ್ಪಕ, ನಾನು ಆತ್ಮತ್‍ಲ್ ನಂಗಡ ಒಡೆಯನಾನ ಯೇಸುರ ಶಕ್ತಿಲ್ ನಿಂಗಡ ಕೂಡೆ ಇಪ್ಪಿ. 5 ಅನ್ನನೆ ಪಾಪ ಮಾಡ್‍ನ ಮನುಷ್ಯಂಡ ಆತ್ಮ, ಒಡೆಯ ಪುನಃ ಬಪ್ಪ ದಿವಸತ್‍ಲ್ ಬಚಾವ್ ಆಪಕಾಯಿತ್, ಅಂವೊಂಡ ತಡಿ ಇಕ್ಕ ಪಾಳಾಪನೆಕೆ, ಅಂವೊನ ಸೈತಾನಂಗ್ ಒಪ್ಪ್‌ಚಿಡಂಡು. 6 ನಿಂಗ ನಿಂಗಡ ಆತ್ಮೀಯ ವಿಷಯತ್‍ಲ್ ಆಂಗಾರತ್‍ಲ್ ಕಳಿಪದ್ ಸರಿ ಅಲ್ಲ. ಚೆನ್ನ ಈಸ್ಟ್ ಇಟ್ಟಕ ಪೂರ್ತಿ ಮುದ್ದೆ ಬೊಳಿಯುವಾಂದ್ ಎಣ್ಣುವ ತಕ್ಕ್ ನಿಂಗಕ್ ಗೊತ್ತ್‌ಲ್ಲೆಯಾ? 7 ಪಳೆಯ ಈಸ್ಟ್‌ರನೆಕೆ ನಿಂಗಡಡೆಲ್ ಉಳ್ಳ ಆ ಮನುಷ್ಯನ ಪೊರಮೆ ತಳ್ಳಿ. ಅಕ್ಕ ನಿಂಗ ಪವಿತ್ರ ಆಪಿರ. ಎನ್ನಂಗೆಣ್ಣ್‌ಚೇಂಗಿ, ನಂಗಡ ಪಸ್ಕ ಕೊರಿಯಾನ ಕ್ರಿಸ್ತ, ನಂಗಕಾಯಿತ್ ಯಾಗವಾಯಿತ್ ಬಲಿ ಆಚಿ. 8 ಆನಗುಂಡ್, ಈಸ್ಟ್‌ರಗುಂಡ್ ಮಾಡ್‍ನ ಪಳೆಯ ಒಟ್ಟಿರನೆಕೆ ಉಳ್ಳ ಮೋಸ ಪಿಂಞ ದುಷ್ಟತನತ್‍ನ ಬೆಚ್ಚಂಡ್ ಅಲ್ಲ, ಆಚೇಂಗಿ ಪವಿತ್ರ ಪಿಂಞ ಸತ್ಯ ಎಣ್ಣುವ ಪುಳಿಯಿಲ್ಲತ ಒಟ್ಟಿ ತಿಂಬನೆಕೆ ನಮ್ಮೆನ ಕೊಂಡಾಡನ. 9 ನಾನ್ ನಿಂಗಕ್ ಒಳ್‍ದ್‍ನ ಕಾಗದತ್‍ಲ್ ವ್ಯಬಿಚಾರ ಮಾಡ್‌ವಯಿಂಗಡ ಕೂಡೆ ಕೂಟ್ ಕೂಡತೀಂದ್ ಒಳ್‍ದಿಯೆ. 10 ನಾಡ ಉದ್ದೇಶ ಎಂತ ಎಣ್ಣ್‌ಚೇಂಗಿ, ಈ ಲೋಕತ್‍ಲ್ ಉಳ್ಳ ವ್ಯಬಿಚಾರಿಯಂಗ, ದುಡ್ಡ್‌ರ ಆಸೆ ಉಳ್ಳಯಿಂಗ, ಕಳ್ಳಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗಡ ಕೂಟ್‍ಕ್ ಕೂಡತೀಂದ್ ಒಳ್‍ದಿತ್‌ಲ್ಲೆ. ಅನ್ನನೆ ಆಚೇಂಗಿ, ನಿಂಗ ಈ ಲೋಕತ್‍ನ ಬುಟ್ಟಿತ್ ಪೋಪನೆಕೆ ಆಪಲ್ಲ. 11 ನಾನ್ ನಿಂಗಕ್ ಎಂತ ಒಳ್‍ದಿಯೆ ಎಣ್ಣ್‌ಚೇಂಗಿ, ಯೇಸು ಕ್ರಿಸ್ತನ ನಂಬ್‍ವಂವೋಂದ್ ಎಣ್ಣಿಯಂಡ್, ಆಚೇಂಗಿ ವ್ಯಬಿಚಾರ ಮಾಡಿಯಂಡ್, ದುಡ್ಡ್‌ರ ಮೇಲೆ ಅತಿ ಆಸೆ ಬೆಚ್ಚಂಡ್, ವಿಗ್ರಹ ಆರಾದನೆ ಮಾಡಿಯಂಡ್, ಬಜ್ಜಂಡ್, ಕುಡ್‌ಚಂಡ್, ಜನಳ ವಂಚನೆ ಮಾಡಿಯಂಡ್ ಉಳ್ಳಯಿಂಗಡ ಕೂಡೆ ಕೂಟ್ ಕೂಡತೀಂದ್ ಎಣ್ಣಿಯೆ. ಅಂತ ಜನಡ ಕೂಡೆ ಉಂಬಕ್ ಸಹ ಅಳ್‌ಕತಿ. 12 ಸಬೆರ ಪೊರಮೆ ಉಳ್ಳಯಿಂಗಕ್ ತೀರ್ಪ್ ಕೊಡ್‍ಪಕ್ ನಾಕ್ ಒರ್ ಅದಿಕಾರವು ಇಲ್ಲೆ. ಸಬೇಲ್ ಇಂಜಂಡ್ ಪಾಪ ಮಾಡಿಯಂಡ್ ಉಳ್ಳಯಿಂಗಕ್ ತೀರ್ಪ್ ಕೊಡ್‍ಪದ್ ನಿಂಗಡ ಜವಾಬ್ದಾರಿಯಾಯಿತುಂಡಲ್ಲ. ಪೊರಮೆ ಉಳ್ಳಯಿಂಗಕ್ ದೇವ ತೀರ್ಪ್ ತಪ್ಪ. 13 ಆನಗುಂಡ್ ಕೆಟ್ಟ ಜನಳ ನಿಂಗಡಯಿಂಜ ಪೊರಮೆ ಇಡಿ. |
© 2017, New Life Literature (NLL)