UTAATYETAP SOLOMON 9 - BUKUIT NE TILIIL Sireet ne Dutero Kanon

Kosaae Solomon agobo Utaatyet

¹ “Ee Kamuktaindetap aguiywogikyok, Kiptaiyat ne po riirge, ne ki iyai tuguuk tugul eng' ng'olyoondeng'ung',

² ak eng' utaatyeng'ung' ko ki iyai kipkosabei koboi yautik che ki iyai,

³ si koboi ng'wony eng' tiliilindo ak ititaaet, ak kogoon kirwooget eng' ititaaetap saboondo.

⁴ Koono utaatyet ne tebee ng'echereeng'ung' ne po pounateet, ago meesyo eng' kaitosyegap kiboitiniguk.

⁵ Amu aa otwogindeng'ung', weeriitap cheboityong'ung', chii ne nyalulat ak konwach sabeet, ne kitigin kaguiyennyi ne po imanda ak ng'atuutik.

⁶ Amu ngot komi agot agenge ne ititaat eng' kipkosabei, kiiti koek puch che punuun ngot koma mi utaatyet.

⁷ Ki ileweno aek laitoryatap piiguk, aek kirwoogindetap weeriiguk ak tiibiiguk.

⁸ Ki ing'at keteech hekaluut eng' tulweeng'ung' ne tiliil, ak kaptisiisyo eng' nganaseet ne imenye, kergeindap emaing'ung' ne ki ichop kong'etee taunet.

⁹ Mi utaatyet kobooten, ineendet ne ingen poisyonikyuk, ineendet ne ki mi ye ki iyaei ng'wony; iguitos kiit ne ibobioi konyeguk ak ne po iman kosupkei ak ng'atuutiguk.

¹⁰ Iyaagu ineendet kobun kipsegwet ne tiliil, ak kong'etee ng'echereeng'ung' ne po toroornatet, si kobois inee eng' komostanyu, ak si aneetgei kiit ne iboiboin.

¹¹ Ingen inee ak koguitos tuguuk tugul, ak kondoiwo inee eng' naet eng' poisyonikyuk ak kotektaa eng' lilindonyi

¹² Taachaksei anyun poisyonikyuk, ak arwookyi piiguk eng' imanit, ak aegu ne nyooljin ng'echereetap laitornatet ne po kwandanyu.

¹³ Ng'oo ne imuuchi koguiyo kabwaatutigap Kamuktaindet? Anan ng'oo ne imuuchi koguiyo magutigap Kiptaiyat?

¹⁴ Ole ibwaatitoi kipkosabei koma mi kamang'unet ak imuuch ko itita kabwaatutikwak;

¹⁵ amu poorwegap che pegu koterteeri saboondo, ak poorwekyok che po ng'wony, komuuche koek mileet eng' kabwaatutik.

¹⁶ Kityeme kityo keguiye ng'aleegap ng'wony; ak che neegitenech kenyooru eng' kaotik. Ara anyun ng'oo ne tos imuuch koguiyo agobo tuguuk che miitei kipsengwet?

¹⁷ Ng'oo ne kita ki nai mageng'ung' nda ki ma igoochi utaatyet ak iyoogu Kabuuset ne Tiliil kobun parak?

¹⁸ Ak ki kochulogis ortinwegap icheek che mi ng'wony ago ki kineet piik agobo tuguuk che iboiboin, ago ki kosar icheeget utaatyet.”