UTAATYETAP SOLOMON 8 - BUKUIT NE TILIIL Sireet ne Dutero Kanon

¹ Itei eng' kimnateennyi komoswek tugul che po ng'wony ak kong'atei tuguuk tugul kotebee komostanywa.

Chamyetap Solomon eng' utaatyet

² Ki acham utaatyet ak acheeng' kong'etee ming'inatennyu; ki atil aip ineendet koek chamanennyu, ki acham karaaranindonyi.

³ Itoroori sigennyi ne taagunot ak tebyei ak Kamuktaindet, ago chamei inee `Kiptaiyatap tuguuk tugul.

⁴ Mwaitoi tugul che ung'ootiin agobo ng'omnatetap Kamuktaindet, ak leweni kiit ne yaei ineendet.

⁵ Ngot ko eng' sabooni ko mogornateet ko kiit ne imakyinigei, ko nee kiy ne oo kosiir utaatyet, ne indochin tuguuk tugul?

⁶ Ago ngot ko tinyei poisyo kaguiyet ko ng'oo age kosiir ineendet ne itabaani tugun che mi?

⁷ Anan ngot kochamei chii imanda, ko punu tuguuk che myach utaatyet, amu ineeti inee ribetapkei ak ng'omnateet, imanit ak nyiganateet; ma mi kiy eng' kipkosabei ne po kamanuut kosiir chu.

⁸ Ak ngot komachei chii konai agobo tugun che chaang', ko ingen agobo tugun che po keny, ak kogeerei tugun che pwoonei; iguitos ng'alaalutik ak kalewenaik; keerei kaboorunoik ak kwang'utik ak tuguuk che mang'une peetuusyek ak kasarwek.

Magaat utaatyet eng' pounik

⁹ Ara ki atil amut ipkemeng'iisye tuwai angen ale koono katigonet ne myee ak kogaigaa ye mi nyalilda ak riirek.

¹⁰ Aegu ne teegisoteng' chaang' amu ineendet ak kegoonyito eng' taitap che eech nga aa ming'in.

¹¹ Ki nyoorwo ko aa utaat eng' kirwooget, ak kechamo eng' taitap pounik.

¹² Ngasiis kogeno icheek amwa ng'olyoo, ak koep iit ye kang'alaal. Agot ngang'alaal eng' koindo, koue eunekwak ak koebe iit.

¹³ Asabe koigeny amu ineendet, ak kometoi kabwaato ne tebyei agoi agobo chooto isubwo.

¹⁴ Abou piik ak andochini pororyosyek;

¹⁵ iyweisyei laitorinik che pounisyei ingogasa, ak aboorugei eng' taitap piik ale aa kiim, ak aa nyigan eng' pooryeet.

¹⁶ Anyooru kamung'et kobooto ineendet ngachut koonnyu, amu ma mi nyalil ngetebi ak ineendet, ak ma tinyei king'waan sabeet, koonu inee kalya ak poiboiyo.

¹⁷ Ngachigil oriititap tuguuchu, ak abwaatyigei eng' muguleldanyu, ale kisaptos koigeny ngeyai tilyandi ak utaatyet,

¹⁸ ak eng' chorwandit ak ineendet, ko mi poiboiyet ne nyiitaat, ak kogoonu eng' eunnyi mogornateet ne ma pegu, ak ngo tebi tuwai, inae kaguiyet ak naat eng' pcheetap ng'aleekyik.

¹⁹ Ki ang'oom ko aming'in, ak ki ibutyo saboondo ne myee.

²⁰ Anan ngeele amu ki amyee, ko ki achut poor ne karaaran.

²¹ Ak ki anai ale ma siche utaatyet kobatee kogoono Kamuktaindet, kaboorunetap ng'omnateet eng' ineegei, nooto ung'ootyet ne ki ibarunegei kole konunotyotap ng'oo, ara ki asaa Kiptaiyat ak asoom ineendet, ak amwa eng' muguleldonyu tugul ale: