UTAATYETAP SOLOMON 7 - BUKUIT NE TILIIL Sireet ne Dutero Kanon

Solomon ko kipkosabei

¹ Aa kipkosabei, ko uu chii age tugul, iyoteetap kipkosabei ne tai ne ki kiyae ng'ung'unyat. Ki kimimia aek panyeek eng' moetap kamennyu,

² ole ki kibircho korotik eng' arawek sogool asi asich poor, kobun keswootap chii ak poiboiyetap katunisyet.

³ Ak ki ngesicho, atau abuus ko uu chii tugul, ki aitu ng'wonduni ole kisikyin chii tugul, tuugeet ne tai ne kibunwo ko riirek ko uu chii age tugul.

⁴ Ki kitugeno ngoroik ak keriibo.

⁵ Ma mi laitoryanda ne ki toi sabeet eng' oor age ne teer;

⁶ amu mi kurgeet agenge ne mong'jinee tugul sabeet, ak mi agenge ne kimandae.

Chamei `Solomon Utaatyet

⁷ Ki asaa anyun, ak ki kigoono kaguiyet; ki aguur Kamuktaindet, ak ki nyoonjo saboondap utaatyet.

⁸ Amang'u utaatyet kosiir kirokto ne po kirwooget ak pounoteet, ak aiitii mogornatosyek ko uu puch ngayanie ineendet.

⁹ Ama ayanie inee koik che po kamanuut amu kergei thahabu ak ng'aniek che tutigin eng' konyekyik ak kogergeit fedha ak menet eng' tainnyi.

¹⁰ Achamei ineendet kosiir chametapkei ne po poorto ak karaaranindo, ak ki alewen asich inee kosiir asich lapkeiyet, amu ma pegu lapkeiyennyi.

¹¹ Pwonjino tuguuk tugul che korooron kobooto ineendet, ak eng' eunekyik kobwanjino mogornatosyek che ma iitoksei.

¹² Ki abaibaenji chuuto tugul, amu ki indochin `utaatyet icheek; ago ki ma nai ale utaatyet ko kamennywa.

¹³ Ki aneetkei koma mi ng'also ak ki agoite eng' aiyebindo, ma unyei mogornatennyi.

¹⁴ Amu Ineendet ko konorwet ne ma pegu eng' kipkosabei, icheeget che nyooru niito kosiche chorwandit ak Kamuktaindet, nyoljin konunoik che punu kaneetisyet.

Kosaamei Solomon utaatyet

¹⁵ Ingogoono Kamuktaindet ang'alaal ko uu ole maktoi ak asich kabwaatutik che nyolunotin eng' konunoik che ki anyooru, amu ineendet ne iaroori utaatyet ak karaaranindetap che utaatiin.

¹⁶ Ak ki mi eunnyi acheek ak ng'aleekyok, ko uu kaguiyet tugul ak naet agobo musoknatet.

¹⁷ Ineendet ne kigoono ng'omnateet ne litit agobo tuguuk che pitunotin, asi anai ole ki kiyaita ng'wony ak ole ki kituiye yaetap ng'wony.

¹⁸ Asi anai taunet, kagesunet ak kwenutap kasarwek, ak walosyek agobo ole mi asiista ak waleetapkei ne po ole uu peetuusyek,

¹⁹ ole wetitoi kenyiit ak kayumetapkei ne po kecheik.

²⁰ Asi anai ateptap tyong'ik ak koromnatetap tyong'igap timiin kimnatosyegap koris ak kabwaatutigap kipkosabei terchinetap minutik ak kamanuutyetap tigitikyik.

²¹ Aneetigei nguno tuguuk tugul che ung'ootiin ak che taagu,

²² amu ki ineetata utaatyet ne ilitiiti tuguuk tugul. Eng' oriitinnyi komi sabeet ne ng'oom, ne tiliil, ne ineegei, iboorugei eng' ortinweek che teer teer, ne wisis ak ko chepchep, ne taagunot ak koma tinyei simdo, ne yaataat ak koma ng'emaksei, ne tala, ng'atiip ak koma siirei kiy,

Itoondap utaatyet

²³ ne aiyeep ak ko chamei piich, ne tononot ak koma kergereni, ma tinyei kereretap met ne kiim ak komuuchi kogeer tuguuk tugul, ne imuuchi kochigil ng'omnateetap che ng'oomen, ne tinyei tiliilindo ak kotinyei ng'omnateetap parak.

²⁴ Wendi utaatyet eng' ooreet ne nyumnyum kosiir pan age tugul, amu tiliilindanyi kochute ak ko wendotee kiy age tugul.

²⁵ Ineendet ko kabuusetap kimnateetap Kamuktaindet kaluunet ne charunee inee Ne po Kamuktaet; kiit ne ma tiliil koma nyooru ooreet ne chutee ineendet.

²⁶ Utaatyet ko liilindap lapkeiyetap kachulyo ki oit ne ma tinyei tisya ne po poisyonigap Kamuktaindet, ak itoondap myeeindonyi.

²⁷ Nganda mi ko agenge kityo, komuuch koyai tuguuk tugul; ma walaksei ineendet, imuuchi koleelit kiy age tugul; chutei saboonwek che tiliileen eng' ibinda age tugul ak koyai saboonwechooto koek choronogap Kamuktaindet, ak maotik.

²⁸ Amu chamei Kamuktaindet icheeget che meng'iisyei eng' utaatyet.

²⁹ Tinyei ng'ulotyet itoon kosiir asiista, ak kosiirei kecheik alak tugul che po parak, ngeyanie lapkeiyet ko po parak ineendet kosiir,

³⁰ amu nyoonei mesundeito ye kaibata lapkeiyet ago ma iterteerei `yaityet utaatyet.