UTAATYETAP SOLOMON 6 - BUKUIT NE TILIIL Sireet ne Dutero Kanon

Nyolu kocheeng' Laitorinik utaatyet

¹ Oep iit okweek laitorinik ak oguiye, oneetkei okweek kirwoogigap ng'wony komugul.

² Oepchi iit ni, okweek che obou piik che chaang', okweek che ogasegei pounetap pororyosyek.

³ Amu Kiptaiyat ne konok kimnateet ak pounateng'wong' kobunu Ne Toroor Miising'.

⁴ Amu ma obou eng' imanit ko uu kiboitinikyik, anan oriip ng'atuutyet, anan osup mageetap Kamuktaindet,

⁵ rarakyinok ineendet eng' chokyinet, nyoonjin kirwooget ne ma tinyei riirge kandoik.

⁶ Amu imuuch eng' riirge kenyoochi kaat che nyerootiin, ago che kiimeen ketyemei miising'.

⁷ Amu Kiptaiyatap tugul koma iywei chii age tugul ama tinyei kalotunet kosupkei ak ooindap chii, amu ki yaei ineendet che mengech ak che eech ak kogoochin tugul kogergeit.

⁸ Ago kichigili miising' icheek che pounisyei.

⁹ Ee okweek, piigap kap laitorin, okweek che ang'alaaljini tamangap kobiit oneetkei utaatyet asi mebutyi leluut.

¹⁰ Amu kitiliili icheek che riibei tuguuk che tiliileen eng' tiliilindo, ak icheek che ki ineeti icheek ko tuun ketektoi eng' kirwoogennywa.

¹¹ Chop muguleldang'ung' eng' kiit ne magaat amwa, epchin iit eng' mageet, ago agoi karon.

Kamanuutyetap utaatyet

¹² Ng'oom utaatyet, ma pegu, tagu eng' icheek che chamei ineendet, nyonunaksei eng' icheek che cheeng'ei ineendet.

¹³ Yaegei kenai korook eng' kagenennyi ne po che machei ineendet.

¹⁴ Age tugul ne ng'eetei karoon miising' asi kocheeng' ineendet koma nyooru kaimet age tugul. Ago nyooru ineendet kotebyei ng'wony eng' kurgeet.

¹⁵ Ke epchi iit utaatyet ko kiit ne po ng'ulotyo eng' chii, ak age tugul ne chobonyitu amu ineendet ko marerchin ng'omnon.

¹⁶ Ak cheeng'ei ineendet olda age tugul che nyolu eng' inee, ak koboorchingei icheeget eng' panwekwak, ak tuiye icheek eng' kabwaatut age tugul.

¹⁷ Taunegei utaatyet mageet ne po kaaroret, kagenet eng' mageet ne po kaaroret kobooru chamyet eng' ineendet.

¹⁸ Chametap ineendet kobooru riipsetap ng'atuutikyik;

¹⁹ Ago ingoma kitaach asoya kenegitee Kamuktaindet.

²⁰ Ara taunetap utaatyet koboorchin chii konyoor kobounis koigeny.

²¹ Okweek che obou piik ngot oboiboenjini ng'echerokwok che po laitornatet, ak peruutigap pounateng'wong' eng' piik, oganyit utaatyet asi obounisye koigeny.

²² Amwaiwok ale utaatyet ko ngo'. Ma unyenok kiit age tugul. Ago asubi tyegutikyik kong'etee taunetap ole ki punu. Achobei ole kigende lapkeiyennyi tugul. Ago ma istaegei imanda.

²³ Ng'etkong' koma egu chorwennyu pesyo, amu ma namegei utaatyet ak ng'etkong'.

²⁴ Ki ek saruunetap ng'wony chaang'indap piik che utaatiin.

²⁵ Oneetegei ng'aleekyuk, si onyooru melekto.