UTAATYETAP SOLOMON 5 - BUKUIT NE TILIIL Sireet ne Dutero Kanon

¹ Teleldos che ititaatiin eng' kimnateet eng' taitap icheeget che ki ma yachi imanit ago ki ma ibwaat miising' agobo nyalildanywa.

² Ak ngo keer `che ma ititaatiin icheeget, kobotandos eng' kaiweisyet ne oo, ak kokwong'yo amu ki ma kobwaatyin kole kisaru che ititaatiin.

³ Ng'alaaljingei icheegei eng' icheegei eng' siguunet, ak tigendos eng' mugelwegikwak koleen,

⁴ “Chuuto che ki cham kechure, ki kiabusan! Ki kigeere sabeennywa ko uu iywek ak kagesunennywa koma tinye kondit.

⁵ Ki egundo ano kot kiit koek weeriigap Kamuktaindet, ak kosich kebeberyan eng' che tiliileen.

⁶ Taagunot kole ki kemaaste eng' ooreetap iman, tomo kocharchech lapkeiyetap imanda.

⁷ Ki nyieech acheek ortinwegap maastaetap ak ng'emisyet, ki kiombenie eng' ong'ateet ole ki ma komi oor, ama ki nai ooreetap Kiptaiyat.

⁸ Keljiin nee ne ki kinyoorchi laskeita? Tos ki kotoretech nee laskeitap mogornatosyekyok?

⁹ Ki kosiirto tuguuchooto tugul ko uu urwet, ak ko uu lembeita ne siirtoi;

¹⁰ ko uu meeliit ne punei kwenutap peek, ne ma metoi keelyek che ibooru ole kabun kosiirtoi.

¹¹ Anan ko toriit ne tarireni eng' soet, ma metoi kiy ne ibooru ole kabunei. Iraboochi koriis eng' kebebaikyik ak kereeri kobestos eng' kachumdaennyi, ichumdae pandap kebebaikyik, ak eng' ye ibata koma metoi paornatetap pandanyi.

¹² Anan ko uu kipchabet ne kagimwokto, keraksei eng' chokyinet koristo ye kabun kipchabet. Ma mi nao eng' ole kabunei kipchabet.

¹³ Ko uu nooto agot eng' acheek ko kagesichech, ma ki tinyei paornat agobo myeein ne kibooru, amu ki tar yaityennyo.”

¹⁴ Amu kamang'unetap che meiwei Kamuktaindet, ko uu metetek che ibei usoonet. Iyeni ko uu iyeto eng' taitap kipchurchur, ki keutyee ko uu too ne korutoi egonet agenge.

¹⁵ Che telelyotin kotepche koigeny, ak kotinyei konorweenywa Kiptaiyat.

¹⁶ Ak nyooru icheeget kuutweetap kalasunet, ak tuun tuchei icheeget eng' eunnyi ne po tai ak koteekta icheeget eng' eunnyi. Ratyin kariik yautyet asi ko kergong' puunikwak.

¹⁷ Yaei Kamuktaindet kimnateennyi koek kariikyik ak koratei tuguuk tugul eng' ng'wony kobooryo ak puunikyik;

¹⁸ ilaachi ititaandi ko uu karnetap tegeet, ak kolaach imanda koek chepkuletap metinnyi;

¹⁹ Yaei tiliilindo koek long'eet ne ung'aat,

²⁰ ago litei nereegekyik ko uu rotwetap chok, ak ituitoskei ak tuguuk tugul che ki kiyai asi kobaregei ak puunikyik.

²¹ Itoorchingei `kiit ilet ye kalyel, ak kotilu kong'etee poldeet agoi kiit ne machei, ko uu kwanget ne kariigak,

²² ak kowiirugei koigap rop ko uu ye ka kiwiirunee chemasindaryet; maranjin peegap nyanja eng' kimnon, ak koterteer icheek mogoochegap aineet;

²³ usyin icheek koriisto ne kiim, ak kobuukto icheek komanda. Ng'emei yaityet ng'wony komugul, ak kosereeti yaitwogik che yaach pounatosyegap pounik.