UTAATYETAP SOLOMON 4 - BUKUIT NE TILIIL Sireet ne Dutero Kanon

¹ Kaigai ko metinye lagok ak itinye myeeindo, amu eng' kabwaatetap myeeindo komi saboondap koigeny, amu naat myeeindo eng' Kamuktaindet ak piik.

² `Iyaniegei piik myeeindo ingomi, ago ye ma komi, ko koochin mageet; sirtoi kasarwek tugul kilookyin kuutweetap toroornatet, kuutweet ne po kabelisyet ne ma tinyei simdo.

³ Egu puch lagogap che meiywei Kamuktaindet, ak ma piitu agot agenge eng' keswekwak che po timiin ne sichei tigityo anan kolumdaak.

⁴ Amu agot ngo poor ko eng' kasar kityo, ko amu ma kiim kotumdumi koriisto, ak itutoksei eng' kimnateetap usoonet.

⁵ Kitorei temenikwak agot ngo tomo kogong'yo, ak king'aari logoekwak kong'orng'or,

⁶ Amu lagok che kinyoorunee kesesnatet, koegu paornateet ne ya agobo sigiikwak ye kait Kamuktaindet eng' kirwooget.

⁷ Nyooru kamung'et ne po iman ne ititaat agot ngot isip kome.

⁸ Ma kigaanyiti osindo amu koindap peetuusyek, anan kaitetap kenyiisyek che chaang'.

⁹ Utaatyet ko kalwal eng' chii tugul, ak sabeet ne myee ko osindo ne po iman.

¹⁰ Ki mi che ki ibaibai Kamuktaindet ago ki kicham, ak ki kiganapta ye kingo meng'iisyei ak kiptengeginik.

¹¹ Ki kiganapta asi ma wal kaguiyennywa yaityet anan kong'aal lembech saboonwekwak.

¹² Amu tuchei `myeeindo ponditap yaityo, ak weleli naet ne ma tinyei tengek kimnateetap mageet ne ya.

¹³ Eng' atebeennywa ne nwach ne ki tebi che ititaatiin, ko ki yai che tee che po kenyiisyek che chaang';

¹⁴ Amu ki ibaibai Kiptaiyat `saboonwekwak, ara ki imaanda icheek eng' chokyinet komang'unee yaityo.

¹⁵ Nga ki iro piik, koma iguiyo anan kobwaat kiy ne uu no, kole tinyei `myendo ak rireenet chechiik che lewenotin ak koriibei chechiik che tiliileen.

Kabelisyetap che ititaatiin

¹⁶ Irwookyin icheek `ititaatiin ak ko ki kobek, icheek che saptos ago ma iywei Kamuktaindet. Ak korwookyi nerana ne choboony, tengektap chii ne oos.

¹⁷ Keerei icheek kagesunetap che utaatiin ama iguitos chobetap Kiptaiyat, anan che ki kogonorchi icheek.

¹⁸ Tesetai ko keerei ak konyiriirtos che ma ititaatiin. Rorechin `Kiptaiyat icheek ak eng' kasarta ne ma kooi koegu muuswek che kiwirtoi, ak koek puch eng' icheek che ki kobek.

¹⁹ Kiwiirtoi icheek koyaamyo kutuswai, ak kotumdum kong'etee lumeiywekwak; ak kemeto koyaamyo ak kosoonenso, si konyalilso kot, ak kobet kabwaatennywa.

Kirwoogetap let

²⁰ Pwoonei kobotanianu ye tuun kagiguur ng'oogiswogikwak, ak korwookyin icheek ng'oogiswogikwak.