UTAATYETAP SOLOMON 3 - BUKUIT NE TILIIL Sireet ne Dutero Kanon

¹ Mi eutap Kamuktaindet saboonwegap piik che ititaatiin, ak ma nyooru icheek kaimetapkei.

² Taagu icheek eng' konyegap che perber ko uu yo ki kobek; ak pegunennywa ko ki kibwaati keeleen pireet ne oo

³ ak siirtoennywa ko aseenet; eng' iman, komi icheek eng' kalya.

⁴ Taagu eng' taitap piik ko kergong' nyiitaat eng' kamang'unennywa saboondap koigeny.

⁵ Ki kigergong' ne kitigin, ak nyooru telunateet ne oo; amu ki tyem Kamuktaindet icheek ak kogeer kole nyolu.

⁶ Ki tyem icheek ko uu thahabu eng' maat ne lalei, kotaach icheek ko uu korosyot ne ki peelei.

⁷ Ye tuun itu icheek eng' peetuut ne po rutoito, kogoonu lapkeiyet, iluu icheek ko uu maatap saatyet.

⁸ Irwookyin `icheek pororyosyek ak koboi piik tugul, ak koegu `Kamuktaindet laitoryannywa koigeny.

⁹ Tugul che iyani Kamuktaindet koguitos imanda; ak che iyanaatiin kotebyei ak inee eng' chamyet; amu iboorchin myeeindo ak riirge piikyik che tiliileen, ak kusyin kong' che lewenootin.

¹⁰ Nyooru che ma iyani Kamuktaindet pireet ko uu ye yamegei ak kabwaatutikwak, icheek che ma keerei che ititaatiin ko kiy, icheek che ki eesyo ooreetap Kamuktaindet;

¹¹ Amu icheek che sasei utaatyet ak ng'atuutyet koriirtos, puch kamang'unennywa, ak ko aseen poisyennywa.

¹² Perber chepyosokwak ak yaach lagokwak;

¹³ chubootiin iyotennywa. Iberuurot chepyoso ne soon ak ko ititaat, inee ne tomo koyai ibeetapkei; nyooru melekto ye tuun kanyo kochigil Kamuktaindet mugulelweek.

Myeeindap aiyebindo

¹⁴ Iberuurot agine kimonjorooryo ne tomo ko tiiny eunekyik yaityo, inee ne tomo kobwaatyi yaityo Kamuktaindet; tuun kiboorchin inee myeeindo amu kayanennyi, ak kiboorchi komosta ne itoroorot eng' hekaluutap Kiptaiyat.

¹⁵ Amu naat melektap poisyet ne myee, ak ma petei puch tigityotap utaatyet.

¹⁶ Ma ityin etunot lagogap kesesnateet, ago kasei maat lagogap ibeetapkei.

¹⁷ Agot ngo tebi koek keny, ko puch kora, eng' let koma sichei konyit eng' osindanywa.

¹⁸ Ma tinyei kamang'unet ngo keskei komengech, ago ma sichei rireenet eng' peetuutap kirwooget.

¹⁹ Amu let ne po kiptengegin ko myat.