UTAATYETAP SOLOMON 2 - BUKUIT NE TILIIL Sireet ne Dutero Kanon

¹ Amu ma ibwaat komyee ye leenjingei: Nwach ak nyalil kityo sabeennyo, ak ma mi kiy ne kegirindoe ye kait kagesunetap sabeet, ak ma mi chii ne kingen ne ki koweek eng' ye mi che ki kobek.

² Amu ki kisichech eng' kipkel, ak ye kiweege ko uu ya ki ma kemi. Kabuusetap seruunekyok ko uu iyeto, ak naennyo ko uu tilaliik che po maat che kinae piretap mugulelwekyok.

³ Ye kagimis, kowalaksei poorto koegu oreek, ak kobetito saboondo ko uu koriisto.

⁴ Ki utye kainaikyok koneegit, ak koma kobwaati chii poisyonikyok; siirtoi sabeennyo ko uu pooldet, ak kopcheak ko uu kiburyenget ne oonei kaluunetap asiista, ak koterteerak eng' maannyi.

⁵ Amu peetuusyek che ki kigoonech ko uu siirtoetap urwet, ak ye kagoityech meet koma keweeksei kogeny.

⁶ Obwa anyun, ongibaibaegei eng' tuguuk che myach che mi, ak keboisyee komyee yautik che mi ko uu atkinye ko kimengeech.

⁷ Onge ee divaik che po alyet ne oo ak keboisyee nyamdutik, ak mat kosiirtoenech taapteet ne po iwot.

⁸ Ongilaach chepkuletap taaptook che korooron ama resyo.

⁹ Mat kong'et chii ne ma poibochin poiboiyennyo. Ongemetee paornateetap poiboiyennyo amu ni ko kebebertanyo ak ne ki kilewenwech.

¹⁰ Onginyaliili kibananiat ne tinyei iman. Mogany keganyit che ki kobegunee manong'otoik ak che ooseen.

¹¹ Ago ingoek kimnateetap tegeennyo ng'atuutyetap iman amu ma tilei kiy ne ma imuuchegei. Ma mi chii pesyo ne ki it ui eng' kaming'inetapkei!

¹² Ongikwaar chii ne ititaat amu iimeech ak koetenech keyai tugun chechook; kereech kong' ye kagimaaste eng' ng'atuutyetap Musa, ak korwookwech ye kagimaaste eng' kaneetutik.

¹³ Lasegei kole ingen Kamuktaindet, ak koitegei kole lakweetap Kiptaiyat.

¹⁴ Ma kimuuchi kemuitae piich che uu chu;

¹⁵ Togeennywa ineegei ko laut amu ma kergei ak piik alak; tinyei atebosyek che po kwong'et.

¹⁶ Keereech ko uu kalabit ak kobwaati kole atebosyekyok koma chamu ak kiy age tugul ne kiyae konyolu keistoegei; kuuren let ne po chii ne ititaat poiboiyo ak lasegei kole kwan Kamuktaindet.

¹⁷ Ongigany asi kiroo ngot ko po iman ng'aleekwak! Ongegany asi kiroo ye tuun kait kobek!

¹⁸ Ngot ko iman lagogap Kamuktaindet che tinyei imanda, kosaru Kamuktaindet kong'etee puunikwak.

¹⁹ Ongetyemee inee maaletap chemusar ak kanyaliilet si kiroo muitaitanyi! Kimache kenai keele imuuchi komuita ne tya!

²⁰ Ongirwookyi inee kome meet ne ya. Amu ui tugul koleen inee sarwo Kamuktaindet.

²¹ Uu nooto kabwaatutigap kiptengeginik, ki kotuch konyekwak yaityet.

²² Tomo konai icheek ung'ootyetap Kamuktaindet. Tomo kosich agot pesyo mageet ne po konunotyotap atebeet ne myee ak sabeetap icheek che ma tinyei tisya.

²³ Kingo yaech Kamuktaindet, ko ki ma makwech kebegu; ki yaech kegergeitu ak ineendet.

²⁴ Ak ki ip ng'etkonda ne po chesawilyet meet konyo ng'wony ak icheek chechiik kobegu.