UTAATYETAP SOLOMON 11 - BUKUIT NE TILIIL Sireet ne Dutero Kanon

Kii Kamuktaindet ak kotinyei riirge

¹ Ki isulda utaatyet poisyonikwak koboor eng' maotyot ne tiliil,

² Ki pun icheeget ong'ateet ole ki surkwen, ak koteech emaisyekwak eng' komoswek che tomo ketyech.

³ Ki telelso icheek eng' nyiganateet ak kimnateet eng' taitap puunikwak.

⁴ Kingo am melel ko kiguurin, ak kong'etee rwandet, ko ki igoochi peek kong'etee koita ne uui kot ko kinyoor waluunennywa.

⁵ Kergong'yet ne ki iboisyee eng' puunikwak ko kotoret icheeget eng' tiritindo.

⁶ Ne kata aineet ne ki rootei kotugul ko ki kiturur ak kimurwonee korotiik.

⁷ Asi koek kergong' eng' icheeget, ko ki ing'at kebaree lagok, ak igoochi piiguk peek che chaang'.

⁸ Ye kingi pooru eng' meleldanywa ne ki tinyei eng' kong'ateet. Asi kochamcham kiye ki chamu kergong'yetap puunikwak.

⁹ Ye kingo ng'waniit sabeet nga ki kibiree ne tenden, ko ki nai kiit ne ki kas che yaach ye ki ngirwookyi eng' nereek.

¹⁰ Amu kigaityem icheek ko uu ye tyemei sigiindet ya kerei kong', ago ki ichigil che ma iyani kamuktain ko uu ye yaei laitoryat eng' kirwooget.

¹¹ Ago, ne ki neegit ak ne ki loo ko king'waniityi kogergeit.

¹² Ago ki tebee icheeget ng'wanindo konyil aeng', ak kotigenso eng' kabwaatetap che ki kosiirto.

¹³ Ak ye kingo nai kole kergong'yet ne kinyooru ko kiting'ee kelechin alage, ko ki nai kole kiptaiyat

¹⁴ Ak nga kiga koborchi sasisyet Ineendet ne ki eng' taunet ko kiga kebagaakta ko kikwong'yee inee eng' let ye kingo am melel eng' ooreet ne teer kosiir che ititaatiin.

¹⁵ Ki iyaagu tyong'ik che yaach koger kong' icheek kosupkei ak abusnateet ak yaityetap kabwaatutikwak che ki yai icheek komaasta ak kogutung'ji erenook ak tyong'ik che ma tilei kiy,

¹⁶ Asi kobiit konet icheeget kole kigere kong' age tugul kosupkei ak tengektanyi ne kayai.

¹⁷ Amu eung'ung' ne kiim ko ki yai ng'wony eng' tuguuk che taagu, ne ma temenee koyaakyi icheek magalaluusyek anan ng'etuunyik che kolgol,

¹⁸ Anan tyong'ik che koroomeen ne tomo kegeerei, anan che isyeng'dos kot, anan kosyee iyeto ne kiim anan che ichiilu konda ne po kwong'.

¹⁹ Ma iguoten kityo ago ki par kogees, eng' konda kityo ko ki iwaany kole chwang'.

²⁰ Kosiir chu, ko ki ibutoos eng' kabuuset agenge ko keero imani, ak ki kiseer icheek eng' kabuusetap kimnateng'ung'. Ago ki itet ak iragende tuguuk tugul atebeet, nyigiisindo ak koindonywa.

²¹ Ak mi kimnateng'ung' kotugul eng' poisyeng'ung'. Ago ng'oo ne tos muitae toroornatetap eung'ung'?

²² Amu ng'wony komugul ko uu kebeber eng' nyigisin, ak uu rewotap karon ne ibutyin ng'wony.

²³ Ak iriiree tugul amu iyae kiy age tugul, ak imuitae tengekwogigap piik asi kosik.

²⁴ Ee, ichame tuguuk tugul che mi, ak me sase kiit age tugul ne ki iyai, amu ki mata piitu kiy nda ki ma imach.

²⁵ Kita muitaitoi ano kiy nda ki ma imach? Anan kita ng'etuundoi ano kiy ne ma iguuru?

²⁶ Ki isaru tuguuk tugul, Ee Kiptaiyat, inyee ne ichame che saptoos.