UTAATYETAP SOLOMON 10 - BUKUIT NE TILIIL Sireet ne Dutero Kanon

Poisyetap utaatyet

¹ Ki riib utaatyet kwanda ne tai ne po kipkosabei eng' ng'wony, inee ne kisyi keyai kotom keyai age tugul, ki sar ineendet eng' kabutennyi

² Ak kogoochi ineendet kimnateet koboi tuguuk tugul.

³ Nga kingo manda ne ki ma koititaat eng' nereegek, kolus amu eng' nereek ko ki par ng'eetap kamet.

⁴ Ye kingo La mogoochek ng'wony amu ineendet, ko ki utaatyet ne ki sar kogeny ki iaroor ne ititaat koboisyee keet.

⁵ Kingo pargan pororyosyek agobo kayomisutik che ki ma koititaatiin, konem `utaatyet chii ne ititaat ak kotabaan ineendet si koek ne libwop eng' taitap Kamuktaindet ak kogimit inee eng' chamyennyi agobo lakwennyi.

⁶ Utaatyet ne ki saru chii ne po imanda ye kingo pegu ne ma iywei Kamuktaindet ak komwee mat ne ki robonu ak nganasook muut.

⁷ Ta ko ng'etunotiin paornatetap yaityennyi; kap pusagar ole ta koiyeni Ole pitos minutik che ma iytos anan koruryo logoek. Telele yooto tulweetap munyuk asi koek paornatetap kayanennywa ne ma mi.

⁸ Amu kisirtoe icheek utaatyet, ko ma imuuch koguiyo che myach ak che yaach kityo, ago ki metochi chii koek kabwaatet agobo perberindonywa, si koek kabutennywa ne ma kiutyen agoi.

⁹ Ki sar utaatyet eng' kaimutik icheeget che poisyechin ineendet.

¹⁰ Ki mwee nereegegap tupchennyi chii netelelot ago ki indochin ineendet eng' ortinweek che chuulotin. Kingo mwei ne ititaat komwee nereegegap ng'eetap kamet, ki iboorchi ineendet ortinweek che ititaatiin; ki iboorchi ineendet pounatetap Kamuktaindet ak konet ineendet ng'omnateetap tuguuk che tileleen. Ki yai ineendet koboor eng' poisyonikyik ak kotes ruratetap poisyennyi.

¹¹ Kingo am tawiy puunikyik agobo ineendet, ko ki tep ak ineendet ak koyai ineendet koek mogoryo.

¹² Ki teekta ineendet eng' puunik ak kosar ineendet eng' icheek che kileen kokwar inee; eng' kwetetapkei, ko ki igimit inee, asi tamangap konetkei kole, omi ak Kamuktaindet koma temeneen kiy.

¹³ Ki ngealda ne ititaat, koma meto utaatyet, ago ki sar ineendet kobun tengek, ki rekto tuwai koba korgoret.

¹⁴ Kingo mi korgoreet, koma pagaakta inee, agoi kimnateetap pounatet koboi kiptainikyik. Ki ng'oong' icheek che ki irwokyin koek kiplembechoonik ak ki igoochi inee kondit ne po koigeny.

¹⁵ Ki utaatyet ne ki sar piik che tiliileen komang'une siyogap che ki inyaliili

¹⁶ Ki chut saboondap kiboityotap kiptaiyat, ak koterteer laitorinik che ki kiywei eng' kwang'utik ak kaboorunoik.

¹⁷ Kigoochi piik che tiliileen konunotyo agobo poisyonikwak; ki aror icheeget eng' ooreet ne po kwang'ut, ak koek ineendet urwennywa ne po pet ak lapkeiyetap kecheiyat nenywa eng' kemoi.

¹⁸ Ki imut icheeget kosiir nyanjeet ne piriir, ak kondochi icheek kobun peek che chaang'.

¹⁹ Ago ki kany kola peek puunikwak, ak kong'isyi poorwekwak ngeguutyet.

²⁰ Ko uu no ko king'em che ititaatiin che ma iywei kamuktaindet; ki tyenso tyenwogik kole, Ee Kiptaiyat, eng' kaineng'ung' ne tiliil. Ingolaasunok kaineng'ung' ne kiim ne ki koteektech;

²¹ amu ki yaat utaatyet kutuswegap che ma twegu ak koyai ng'elyebwagigap manyurunik kong'alaal komyee.