UTAATYETAP SOLOMON 1 - BUKUIT NE TILIIL Sireet ne Dutero Kanon

Cheerseet keyai imanda

¹ Ocham imanit, okweek pounigap ng'wony, obwaat Kiptaiyat eng' myeeindo, ak ocheeng' ineendet eng' muguleldo ne po iman.

² Amu nyooru inee `icheek che ma tyemei ineendet, ak koboorchingei `inee icheek che ma musmusi ineendet.

³ Ibeestos piik ak Kamuktaindet kabwaatutik che yaach; ak ngetyem kimnateennyi, kong'aanyei ak koteweer che abusan;

⁴ amu ma wendi utaatyet saboondap chii ne ng'aaliin, anan komeng'iis eng' poorto ne ki rat tengekto.

⁵ Amu mwee `ne ititaat ak konetaat ng'aalseet, ak laktochin let kabwaatutik che perber, ak kogeerei ko teweernat riigunetap che ma ititaatiin.

⁶ Amu tinyei `utaatyet muguleldo ne po riirge, ago ma ityaachi saasiik eng' yaityetap kutusweekwak; amu paoryatap kasuutik che mi oriitinnywa Kamuktaindet, ak ko keerindetap iman ne po mugulelwekwak, ak kasiindetap ng'elyebwekwak.

⁷ Ko uu ye nyiitaat ng'wony Kabuusetap Kiptaiyat, ak nooto ne namjindos tuguuk tugul kongen nooto kagimwa,

⁸ ko uu nooto anyun icheek che mwaei yaityo koma ung'aksei, ak ye tuun king'aany kirwooget, koma koi chililee `icheek kergong'yet.

⁹ Amu tuun kiyaei kinisyet agobo katigonutigap kiptengeginik, ak kiityi `ng'olyoo Kiptaiyat agobo ng'aleekwak, asi koityi ko kergong' icheek amu yaityennywa.

¹⁰ Amu iitit ne amei ng'etkong' ko kasei tuguuk tugul, ak tuugeet ne ing'unyng'unyi koma wendi koma kasak.

¹¹ Oriip anyun kang'unyng'unyo ne po puch, ak iriip ng'elyeptang'ung' eng' sasisyet; amu ma mi ng'olyoo ne po ung'at ne ma itei kagesunennyi, ak ng'emei `lembech saboondo.

¹² Amecheeng' myat eng' yaetap tengek, anan ing'emgei eng' poisyonigap euneguk;

¹³ amu ki ma yai `Kamuktaindet meet, ak ma paibai eng' meetap chii.

¹⁴ Amu ki yai tuguuk tugul si komuuch kosapcho, ak kiy age tugul ne ki kiyai ko myee, ak ma tinyei ng'wonetap ng'emisyet eng' icheek, ak pounatetap ye mi che ki kobek koma mi eng' ng'wony.

¹⁵ Amu tebyei koigeny imanda.

Sabeet eng' che ma tinyei kayanet

¹⁶ Ago kuurei meet `piik che ma iywei Kamuktaindet eng' ng'aleek ak poisyonikwak; ki koyai chorwandi, ak arorutyet ak meet, nooto ki konyaalji konam.