TYENDO NE SIIREI TUGUL 3 - BUKUIT NE TILIIL Sireet ne Dutero Kanon

¹ Ki acheeng' kemoi arue, ineendet ne chamei saboondanyu; ki acheeng' ineendet, ago ma anyooru.

² Ki ale, “Ang'eete nguno ak awendotee nganaseet, eng' ortinwek ak eng' ortinwek che paraen; acheeng'e ineendet ne chamei saboondanyu. Ki acheeng', ago ma anyooru.”

³ Ki nyoorwo riibiik che pendoti eng' nganaseet, Ki ateebee aleenji, “Tos ki ogeer ineendet ne chamei saboondanyu?”

⁴ Kinga we ne matya ko kaasiirtoe icheek, anyooru ineendet ne chamei saboondanyu. Ki anam, ak ma achamji kwo, agoi amutu ineendet konyo kootap kamennyu, agoi koot ne po oriit ne po ineendet ne kisicha.

⁵ Ayosyewok, ee tiibiigap Jerusalem, eng' cheptirgichik ak kenyelok che kotoy, ale, amat otwaa, anan oong'et chamyet, agoi koit kasartanyi.

Tyendap somok Murereet

⁶ Nee ni togosu eng' surkwen ko uu tolochigap iyeto, ne ng'uu nyamdutyet ne po tuguuk che uu igomoik ak tuguuk che nyamdut, ak pusaruk tugul che po chemung'araindet?

⁷ Ogeero, kiit ne lyeldoe Solomon; yiemei kioto murenik tamanwogik lo che kiimeen, murenik che kiimeen che po Israel.

⁸ Tinyei tugul rotoogap chok, ak ko ng'oomen tugul eng' lugeet. Tinyei age tugul rotwennyi po chok eng' suennyi, amu kaiyweisyet ne po kemoi.

⁹ Kiyachigei Laitoryat Solomon ng'echereet ne kilyeldoe ne po keetiigap Lebanon.

¹⁰ Kiyae tolochikyik fedha, koyae patennyi thahabu, koyae ole kitebee tuguuk che arusen ne piriir, ki kitetee kwenunnyi chamyet, ne ki punu tiibiigap Jerusalem.

¹¹ Omong'u, ee tiibiigap Zion, ak ogeer Laitoryat Solomon, kolaachi naaryeetap laitornatet ne ki ilaakyin kamennyi eng' peetuut ne ki itunisye, ee, eng' peetuutap poiboiyetap muguleldanyi.