TYENDO NE SIIREI TUGUL 1 - BUKUIT NE TILIIL Sireet ne Dutero Kanon

¹ Tyendo ne siirei tugul, ne po Solomon.

Tyendo ne tai Murereet

² Ingong'ututena `ineendet kutinnyi, amu siirei chamyeng'ung' divaik.

³ Tinyei nyamdutyet ne myee mwaniguk, uu kaineng'ung' mwaita ne kirong'u, chamin anyun pergeinik amu nooto.

⁴ Imuta, ngechakte keebe tuwai. Kagomutwaa laitoryat anyo kooriikyik che po oriit. Kigasigei ak keboiboitu eng' inyee, kimwaitoi acheek chamyeng'ung' kosiir divaik. Chamin icheek eng' iman.

⁵ Ee, tiibiigap Jerusalem, aa tuui ak ko atinye itoon, ko uu emaisyegap Kedar, ko uu angoogap emaisyegap Solomon.

⁶ Ametang'ang'ja amu atuui, amu ki peela asiista. Ki nereekyo weeriigap kamennyu, ki indea aek riibindetap mbareenigap sabibuk. Ago ma ariip mbareennyu ne po sabibuk.

⁷ Ee chamanennyu, mwaiwo anyun ole iyage akweetap keechiireguk, ole igoochine komuung'e ko katelel asiis? Amu nee si aigei chii ne tugoot met eng' ole neegitee akwotisyegap choronoguk?

Saandet

⁸ Ngo mengen, ee inyee ne ii karaaran isiir tiibiik tugul, ui isup ole kabun akweetap keechiirek, ak iyage aareguk che po ng'oroor eng' ole neegitee emaisyegap mestoweek.

⁹ Ee chamanennyu, kaaragenden paraisiit ne kirgit ne po kariisyegap Pharaoh.

¹⁰ Korooron matong'oik kobooto lelestang'ung', ak kaating'ung' kobooto sonoek che korooron.

¹¹ Kiyaun acheek tuguugap lele che po thahabu, kobooto tuguugap lelesta che po fedha.

Murereet

¹² Ye ki tebyei laitoryat eng' itogunnyi, ko kas anyinyindap nyamdutik.

¹³ Uu chamanennyu loletap tuguuk che uu igomoik, ne ruee kwenutap kinaikyuk.

¹⁴ Uu chamanennyu temeet ne mi taaptogap piribirinik che mi mbareenigap sabibuk che po En-gedi.

Saandet

¹⁵ Keero, ii karaaran miising' inyee chamanennyu; keero, itinye itoon; uu konyeguk che po cheptugenik.

Murereet

¹⁶ Itinye itoon, chamanennyu, ee iboiboo iman! Uu susweek che nyaliileen itogunnyo;

¹⁷ pambanigap koonnyo ko taragonik, ak kureiywekyok ko piribirinik.