TIENWOGIKAL 85 - BUKUIT NE TILIIL Sireet ne Dutero Kanon

Saaet agobo Kaweegunetap Rireenetap Kamuktaindet

¹ Ki iriree emeng'ung', inyee Kamuktaindet ne Toroor; ki iweegu Jakobo konyo eng' ole kiga luul ineendet.

² Ki inyochi kaat piiguk eng' tengekwogikwak, ki ituch tengektonywa tugul.

³ Ki iste nereegeguk tugul: Ki ituktoochi patai koroomnatetap nereegeguk.

⁴ Weekyeige, Kamuktaindetap yetunennyo. Ak ingosiisyo nereegeguk che tokyineigei.

⁵ Tos inereekyinech agoi? Tos isube nereegeguk ibinwek tugul?

⁶ Tos ma isoobech kogeny, si kobiit koboiboitunenen piiguk?

⁷ Ee Kamuktaindet ne Toroor, iboorwech rireeneng'ung', ak igoonech yetuneng'ung'.

⁸ Nan agas kiit ne mwaei Kamuktaindet, Kamuktaindet ne Toroor; amu mwachin kaalyeet piikyik, chechiik che tiliileen; ago amat kota koweekyigei perberyo.

⁹ Iman neegitee yetunennyi icheek che iywei ineendet; Si komeny telunateet emennyo.

¹⁰ Katuiyo rireenet ak imanda; Kang'ututkei imanda ak kaalyeet.

¹¹ Kabiitune imanda ng'wony; Ak ing'ururi ng'wony imanda eng' kipsengwet.

¹² Ee, koonu Kamuktaindet ne Toroor ne myee; Ak koiyiei emennyo ruratennyi.

¹³ Wendi imanda kondoe ineendet; ak kochopchin ooreet kakwautikyik.