TIENWOGIKAL 82 - BUKUIT NE TILIIL Sireet ne Dutero Kanon

Soomet agobo kirwoogetap imanda

¹ Tononi Kamuktaindet eng' tuiyet ne oo ne po kipsengwet; irwoochi Kamuktaindet eng' kwenutap kamuktaik.

² Orwoochi kirwooget ne ma po iman kot kotyanit, ak ogonyiti kiptengeginik?

³ Orwooksechinechi ne panan ak ne ma tinyei sigiik: Oyachi ne po iman che kinyaliili ak ponoonik.

⁴ Osaru kibananiat ak ne ma tinyei kiy: Osaru icheek eng' eunegap kiptengeginik.

⁵ Ma ingen kiy, ama iguitos kiy; Pendi komosi ak komosi eng' mesundeito: Kibotanso lumeiywek tugul che po ng'wony.

⁶ Ki amwa ale, “Oo kamuktaik, ak okweek tugul ko oo weeriigap Ineendet Ne Toroor Miising';

⁷ nganda uu nooto, obegu ko uu piik, ak obutosi ko uu age eng' pounik.”

⁸ Ee Kamuktaindet, ng'eet, irwooksechi ng'wony: Amu tuun egu pororyosyek tugul poroteng'ung'.